NgokukaLuka 21

21 ¹Ebheka phezulu, uJesu wabona izicebi zifaka iminikelo yazo emphongolweni womnikelo wethempeli. ²Wabona nomfelokazi ompofu efaka izinhlamvu zemali ezincane ezimbili zethusi.

³Wathi: "Ngiqinisile ngithi kini, lo mfelokazi ompofu ufake okungaphezu kwabanye bonke. ⁴Ngokuba bonke laba banikele iminikelo evela kokusele kwabo, kodwa yena unikele kokuphila kwakhe konke, evela ebumpofini bakhe."

Ithempeli Liyakudilika

⁵Kuthe abanye bekhuluma ngethempeli, lihlotshiswe ngamatshe amahle nangeminikelo enikelwe uBaba wethu, wathi:

⁶"Mayelana nalokhu enikubukayo, kuyeza izinsuku lapho kungeyikusala khona litshe phezu kwelinye—onke ayakudilizwa."

⁷Babuza: "Mfundisi, lezi zinto ziyakwenzeka nini, futhi siyini isibonakaliso esiyakubonisa ukuthi lezi zinto sezizakwenzeka?"

⁸Wathi: "Qaphelani, ningakhohliswa. Abaningi bayakuza egameni lami, bethi, 'Nginguye,' futhi, 'Isikhathi sesisondele.' Ningabalandeli. ⁹Lapho nizwa ngezimpi nangeziphithiphithi, ningethuki. Lezi zinto zimelwe ukuza kuqala, kodwa ukuphela akuyikulandela masinyane."

¹⁰Wayesethi kubo: "Isizwe siyakuvukela isizwe, nombuso uvukele umbuso. ¹¹Kuyakuba khona ukuzamazama komhlaba okukhulu, nendlala nezifo ezindaweni ngezindawo, nezinto ezesabekayo nezibonakaliso ezinkulu ezivela ezulwini. ¹²Kodwa ngaphambi kwakho konke lokhu, bayakunibamba banizingele, beninikela emasinagogeni nasematilongweni, benihudulela phambi kwamakhosi nababusi ngenxa yegama lami. ¹³Lokhu kuyakuba yithuba lenu lokufakaza. ¹⁴Ngakho kumiseni ezinhliziyweni zenu ukuba ningalungiseli kusengaphambili ukuzivikela kwenu, ¹⁵ngokuba mina ngiyakuninika amazwi nokuhlakanipha okungeyikumelana nakho noma ukuphikisana nakho yisitha senu. ¹⁶Niyakukhashelwa ngisho nangabazali nabafowenu nezihlobo nabangani, futhi bayakubulala abanye benu. ¹⁷Niyakuzondwa yibo bonke ngenxa yegama lami. ¹⁸Kodwa akuyikubhubha ngisho nonwele olulodwa lwekhanda lenu. ¹⁹Ngokubekezela kwenu niyakuzuza ukuphila kwenu."

²⁰"Lapho nibona iJerusalema lihanqwe yizimpi, yazini-ke ukuthi incithakalo yalo isisondele. ²¹Khona-ke abaseJudiya mababalekele ezintabeni, abasemzini baphume, nabasemaphandleni bangangeni kuwo, ²²ngokuba lezi ziyizinsuku zokwahlulela, lapho konke okulotshiweyo kuyakugcwaliseka. ²³Maye kwabesifazane abakhulelweyo nabancelisayo ngalezo zinsuku! Ngokuba kuyakwehla usizi olukhulu ezweni, nolaka kulesi sizwe. ²⁴Bayakuwa ngosiko lwenkemba, bathunjelwe ezizweni zonke. IJerusalema liyakunyathelwa yizizwe, kuze kugcwaliseke izikhathi zezizwe."

²⁵"Kuyakuba khona izibonakaliso elangeni, nasenyangeni, nasezinkanyezini, nasemhlabeni izizwe ziyakuba sosizini, zididekile ngenxa yokuduma nokudlakaza kolwandle. ²⁶Abantu bayakuquleka ngenxa yokwesaba, belindele lokho okwehlela izwe, ngokuba amandla asezulwini ayakuzanyazanyiswa. ²⁷Khona-ke bayakuyibona iNdodana yomuntu iza ngefu inamandla nenkazimulo enkulu. ²⁸Lapho lezi zinto ziqala ukwenzeka, yimani niqonde niphakamise amakhanda enu, ngokuba ukukhululwa kwenu sekusondele."

²⁹Wayesebatshela umfanekiso: "Bhekani umkhiwane nayo yonke imithi. ³⁰Lapho ihluma amaqabunga, niyazibonela nina, nazi ukuthi ihlobo selisondele. ³¹Kanjalo nani, lapho nibona lezi zinto zenzeka, yazini ukuthi umbuso kaBaba wethu ususondele. ³²Ngiqinisile ngithi kini, lesi sizukulwane asiyikudlula kuze kwenzeke zonke lezi zinto. ³³Izulu nomhlaba kuyakudlula, kodwa amazwi ami awasoze adlula."

³⁴"Ziqapheleni, funa izinhliziyo zenu zisindwe ngukuminza nokudakwa nokukhathazeka kwalokhu kuphila, lolo suku lunehlele ningazelele, njengogibe. ³⁵Ngokuba luyakwehlela bonke abahlala ebusweni bomhlaba wonke. ³⁶Lindani ngezikhathi zonke, nikhuleka ukuba niphiwe amandla okuphunyuka kukho konke lokho osekuzakwenzeka, nokuma phambi kweNdodana yomuntu."

³⁷Emini wayefundisa ethempelini; ebusuku ephuma ayohlala eNtabeni Yeminqumo. ³⁸Bonke abantu babeza kuye ekuseni kakhulu ethempelini ukuzomuzwa.