ሉቃስ 21 FHB Father's Heart Bible™

21 ¹ኢየሱስ ዓይኑ ኣልዒሉ፥ ሃብታማት ገፀ በረኸቶም ናብ መዝገብ ቤተ መቕደስ ከእትዉ ከለዉ ረአየ። ²ሓንቲ ድኻ መበለትውን ክልተ ንኣሽቱ ቐለበት ነሃስ ከተእቱ ከላ ረአየ።

³ንሱ ድማ ከምዙይ በለ፦ “ብሓቂ እብለኩም ኣለኹ፥ እዛ ድኻ መበለት እዚኣ ካብ ኵሎም ንላዕሊ ኣእተወት። ⁴እዚኦም ኵሎም ካብ ትርፎም ገፀ በረኸት ሂቦም እዮም እሞ፤ ንሳ ግና ካብ ድኽነታ፥ መነባበሪኣ ዝኾነ ኵሉ ሃበት።”

ቤተ መቕደስ ክፈርስ እዩ

⁵ሓድሓደ ሰባት ብዛዕባ እቲ ቤተ መቕደስ፥ በቲ ፅቡቕ ኣእማንን ንኣቦና ዝተወፈየ ገፀ በረኸትን ከም ዝተሸለመ ክዛረቡ ከለዉ፥ ኢየሱስ ከምዙይ በለ፦

⁶“ነዚ ትርእይዎ ዘለኹም ነገርስ፥ ሓደ እምኒ ኣብ ልዕሊ ካልእ እምኒ ከይተረፈ፥ ኵሉ ዝፈርሰሉ መዓልቲታት ክመፅአ እየን።”

⁷ንሳቶም ድማ “መምህር፥ እዚ ነገር እዙይ መዓዝ ክኸውን እዩ? እዚ ነገር እዙይ ክኸውን ምዃኑ እንታይ ምልክት እዩ ዘርኢ?” ኢሎም ጠየቕዎ።

⁸ንሱ ድማ ከምዙይ በለ፦ “ከይተስሕቱ ተጠንቀቑ። ብዙሓት ‘ኣነ እየ’ ከምኡውን ‘እዋኑ ቐሪቡ እዩ’ እናበሉ፥ ብስመይ ክመፁ እዮም። ኣይትስዓብዎም። ⁹ውግእን ዓመፅን ምስ ሰማዕኹም፥ ኣይትሸበሩ፤ እዚ ኣቐዲሙ ክኸውን ግቡእ እዩ እሞ፤ መወዳእታ ግና ብኡብኡ ኣይስዕብን እዩ።”

¹⁰ሽዑ ኸምዙይ በሎም፦ “ህዝቢ ኣብ ልዕሊ ህዝቢ፥ መንግስቲ ኸዓ ኣብ ልዕሊ መንግስቲ ክለዓል እዩ። ¹¹ዓበይቲ ምንቅጥቃጥ ምድሪ ክኸውን እዩ፤ ኣብ በቦታኡ ጥሜትን ፌራን፥ ዘፍርሕ ነገርን ዓበይቲ ምልክትን ከዓ ካብ ሰማይ ክኸውን እዩ። ¹²ቅድሚ እዝ ኵሉ ግና፥ ክሕዙኹምን ክሳጕጉኹምን እዮም፤ ናብ ኣብያተ ፀሎት ኣይሁድን ናብ ኣብያተ ማእሰርትን ኣሕሊፎም ክህቡኹም፥ ብምኽንያት ስመይ ድማ ናብ ነገስታትን መኳንንትን ክወስዱኹም እዮም። ¹³እዙይ ክትምስክሩ ምችዊ ጊዜ ክኸውን እዩ። ¹⁴ስለዙይ፥ ከመይ ኢልኩም ከም እትምጉቱ ኣቐዲምኩም ከይትሓስቡ፥ ኣብ ልብኹም ቁረፁ፤ ¹⁵ኵሎም ፀላእትኹም ክቃወምዎ ወይ ክመልሱሉ ዘይኽእሉ ቃልን ጥበብን ክህበኩም እየ እሞ። ¹⁶ብወለድኹምን ብኣሕዋትኩምን ብኣዝማድኩምን ብፈተውትኹምን እኳ ኣሕሊፎም ክወሃቡኹም እዮም፤ ካባኻትኩም ንገሊኦም ድማ ክቐትሉ እዮም። ¹⁷ብምኽንያት ስመይ ድማ ብዅሉ ሰብ ክትፅልኡ ኢኹም። ¹⁸ካብ ፀጕሪ ርእስኹም ግና ሓንቲ እኳ ኣይትጠፍእን እያ። ¹⁹ብትዕግስትኹም ንነፍስኹም ከተድሕንዋ ኢኹም።”

²⁰“ንኢየሩሳሌም ብሰራዊት ተኸቢባ ምስ ረኣኹምዋ፥ ጥፍኣታ ኸም ዝቐረበ ፍለጡ። ²¹ሽዑ እቶም ኣብ ይሁዳ ዘለዉ ናብ ኣኽራን ይህደሙ፤ እቶም ኣብ ማእኸል ከተማ ዘለዉ ይውፁ፤ እቶም ኣብ ገጠር ዘለዉ ድማ ናብኣ ኣይእተዉ። ²²እዚ ዝተፅሓፈ ኵሉ ዝፍፀመሉ፥ መዓልቲታት ፍርዲ እዩ እሞ። ²³በተን መዓልቲታት እቲኣተን ነተን ጥኑሳትን ነተን ዘጥብዋን ወይለአን! ኣብ ምድሪ ዓብዪ መከራ፥ ኣብዚ ህዝቢ እዙይ ድማ ቍጥዓ ክወርድ እዩ እሞ። ²⁴ብስሕለት ሰይፊ ክወድቁ፥ ናብ ኵሎም ኣህዛብ ድማ ተማሪኾም ክውሰዱ እዮም፤ ኢየሩሳሌምውን ዘመን ኣህዛብ ክሳዕ ዝፍፀም፥ ብኣህዛብ ክትርገፅ እያ።”

²⁵“ኣብ ፀሓይን ወርሕን ከዋኽብትን ምልክታት ክኸውን እዩ፤ ኣብ ምድሪ ድማ ኣህዛብ፥ በቲ ዝሃምም ባሕርን ማዕበሉን ተደናጊፆም ክጭነቑ እዮም። ²⁶ሰባት በቲ ኣብ ዓለም ዝመፅእ ነገር እናፈርሑ ኽሳምሙ እዮም፤ ሓይልታት ሰማያት ክናወፁ እዮም እሞ። ²⁷ሽዑ ንወዲ ሰብ ብሓይልን ብዓብዪ ክብርን ብደመና ክመፅእ ከሎ ክርእይዎ እዮም። ²⁸እዚ ኽኸውን ምስ ጀመረ፥ ምድሓንኩም ቀሪቡ እዩ እሞ፥ ቀኒዕኹም ርእስኹም ኣልዕሉ።”

²⁹ሽዑ ኸምዙይ ኢሉ መሰለሎም፦ “ነቲ በለስን ንዅሎም ኣእዋምን ርኣዩ። ³⁰ቆፅሊ ምስ ኣውፅኡ፥ ባዕልኻትኩም ርኢኹም ሓጋይ ከም ዝቐረበ ትፈልጡ ኢኹም። ³¹ከምኡ ኸዓ፥ እዚ ክኸውን ምስ ረኣኹም፥ መንግስቲ ኣቦና ኸም ዝቐረበ ፍለጡ። ³²እዚ ኵሉ ኽሳዕ ዝኸውን፥ እዝ ወለዶ እዙይ ከም ዘይሓልፍ ብሓቂ እብለኩም ኣለኹ። ³³ሰማይን ምድርን ክሓልፍ እዩ፤ ቃላተይ ግና ከቶ ኣይሓልፍን እዩ።”

³⁴“ልብኹም ብጓይላን ብስኽራንን ብጭንቀት ናብራን ከይኽብድ፥ እታ መዓልቲ እቲኣ ድማ ከም መፈንጠር ብድንገት ከይትመፅአኩም፥ ንርእስኹም ተጠንቀቑ። ³⁵ኣብ ገፅ ኵላ ምድሪ ኣብ ዝነብሩ ኵሎም ክትመፅእ እያ እሞ። ³⁶ነዚ ኽኸውን ዘለዎ ኵሉ ኽትመልጡ፥ ኣብ ቅድሚ ወዲ ሰብ ድማ ደው ክትብሉ ምእንቲ ኽትክእሉ፥ ኵሉ ጊዜ እናፀለኹም ተጠንቀቑ።”

³⁷ንሱ ድማ ብመዓልቲ ኣብ ቤተ መቕደስ ይምህር፥ ብለይቲ ድማ ወፂኡ ኣብ ደብረ ዘይት ይሓድር ነበረ። ³⁸ኵሉ ህዝቢ ድማ ክሰምዖ ኣጋ ወጋሕታ ናብኡ ናብ ቤተ መቕደስ ይመፅእ ነበረ።