Ruka 21 FHB Father's Heart Bible™

21 ¹Jesu paakatarisa kumusoro, akaona vapfumi vachiisa zvipo zvavo muchivigiro chepfuma chetemberi. ²Akaonawo chirikadzi murombo ichiisamo tumari tuviri tuduku twendarira.

³Akati, “Ndinokuudzai chokwadi, chirikadzi iyi murombo yaisamo zvizhinji kupfuura vamwe vose. ⁴Nokuti vose ava vakapa zvipo kubva pazvakawanda zvavo, asi iye akapa kubva muurombo hwake zvose zvaaiva nazvo zvokurarama nazvo.”

Temberi Ichakoromoka

⁵Vamwe pavakanga vachitaura nezvetemberi, yakanga yakashongedzwa namatombo akanaka nezvipo zvakatsaurirwa Baba vedu, akati:

⁶“Kana zviri izvo zvamuri kutarisa, mazuva achasvika apo pasina kana dombo rimwe richasara riri pamusoro perimwe—rimwe nerimwe richawisirwa pasi.”

⁷Vakabvunza vachiti, “Mudzidzisi, zvinhu izvi zvichaitika rinhi, uye chiratidzo chei chicharatidza kuti zvinhu izvi zvava kuda kuitika?”

⁸Akati, “Chenjerai, musanyengerwa. Vazhinji vachauya muzita rangu, vachiti, ‘Ndini iye,’ uye, ‘Nguva yaswedera.’ Musavatevera. ⁹Pamunonzwa nezvehondo nokumukira, musavhunduka. Izvi zvinofanira kutanga kuitika, asi mugumo hauzouyi pakarepo.”

¹⁰Ipapo akati kwavari, “Rudzi ruchamukira rumwe rudzi, noumambo huchamukira humwe umambo. ¹¹Kuchava nokudengenyeka kwenyika kukuru, nenzara nematenda munzvimbo dzakasiyana-siyana, nezvinhu zvinotyisa nezviratidzo zvikuru zvinobva kudenga. ¹²Asi zvose izvi zvisati zvaitika, vachakubatai vagokutambudzai, vachikuisai kumasinagoge nomumatirongo, vachikukweverai pamberi pamadzimambo navabati nokuda kwezita rangu. ¹³Iri richava mukana wenyu wokupupura. ¹⁴Saka tsungai mumwoyo yenyu kuti musatanga kugadzirira zvokuzvidzivirira nazvo pachine nguva, ¹⁵nokuti ndichakupai mashoko nouchenjeri hwokuti hapana muvengi wenyu angagona kuhudzivisa kana kuhuramba. ¹⁶Muchapandukirwa kunyange navabereki nehama nevokwenyu neshamwari, uye vachauraya vamwe venyu. ¹⁷Muchavengwa navanhu vose nokuda kwezita rangu. ¹⁸Asi hapana kana ruvhudzi rumwe rwomusoro wenyu ruchaparara. ¹⁹Nokutsungirira kwenyu muchawana upenyu hwenyu.”

²⁰“Pamunoona Jerusarema rakakombwa nemauto, zivai kuti kuparadzwa kwaro kwaswedera. ²¹Ipapo vari muJudhea ngavatizire kumakomo, vari muguta ngavabude, uye vari kumaruwa ngavarege kupinda mariri, ²²nokuti aya mazuva okutonga, apo zvose zvakanyorwa zvichazadziswa. ²³Haiwa zvichava zvakaoma sei kuvakadzi vane pamuviri nokumadzimai anoyamwisa mumazuva iwayo! Nokuti nhamo huru ichawira panyika, nehasha pamusoro porudzi urwu. ²⁴Vachaurayiwa nomunondo vagotapwa vachiendeswa kundudzi dzose. Jerusarema richatsikwa-tsikwa nendudzi kusvikira nguva dzendudzi dzazadziswa.”

²⁵“Kuchava nezviratidzo muzuva, nomumwedzi, nomunyeredzi, uye panyika, ndudzi dzichava munhamo, dzichavhiringidzwa nokutinhira nokupfuta kwamafungu egungwa. ²⁶Vanhu vachafenda nokutya, vachitya izvo zvinouya pamusoro penyika, nokuti masimba okudenga achazununguswa. ²⁷Ipapo vachaona Mwanakomana woMunhu achiuya mugore ane simba nokubwinya kukuru. ²⁸Zvinhu izvi pazvinotanga kuitika, mirai makati twasu musimudze misoro yenyu, nokuti kudzikinurwa kwenyu kwaswedera.”

²⁹Ipapo akavaudza mufananidzo achiti: “Tarisai muonde nemiti yose. ³⁰Painotunga mashizha, munozvionera momene uye munoziva kuti zhizha ratoswedera. ³¹Saizvozvo, pamunoona zvinhu izvi zvichiitika, zivai kuti umambo hwaBaba vedu hwaswedera. ³²Ndinokuudzai chokwadi, chizvarwa chino hachingapfuuri kusvikira zvinhu izvi zvose zvaitika. ³³Denga nenyika zvichapfuura, asi mashoko angu haangatongopfuuri.”

³⁴“Zvichenjererei, kuti mwoyo yenyu irege kuremerwa noupenyu hwokungonakidzwa, nokudhakwa, nokufunganya kwoupenyu, zuva iro rikazokuwirai kamwe kamwe, somusungo. ³⁵Nokuti richauya pamusoro pomunhu wose anogara pamusoro penyika yose. ³⁶Rambai makarinda nguva dzose, muchinyengetera kuti muwane simba rokupukunyuka pazvose zvava kuda kuitika, uye mugokwanisa kumira pamberi paMwanakomana woMunhu.”

³⁷Masikati aidzidzisa mutemberi; usiku aibuda achinogara paGomo reMiorivhi. ³⁸Vanhu vose vaiuya kwaari mangwanani-ngwanani mutemberi kuzomunzwa.