Latnyu cheeibü Maangpon Pendou
Latnyu cheei chinam poisa den nyi lembei hoba pendou to aei lema dogo laubü. Lembüchem laang maibü shanga laujinei, Jisuei laang che ong joulabü aki dogo laukei, hoba wapyobü, kipbü, chemdak shuongei khümbo kubü, hoba Jerusalem phai sembü shanga lenkei, hoba jungeibü shuong to tangshaitham meimeian maangsangen kishi dogo laukei.
21 1Jisuei haoeibü nyek ipbei hoba keibü shuongei haoeneibü jongsak lemshang thanshang to lembü hapbei. 2Hoba haoei latnyu shalebü cheei chinam poisa den nyi lembü hapbei.
3Haoei laukei, “Maimaitham ngei kan to lenda, ho latnyu shalebü cheei lubü pendou to aei lema. 4Aishanga khübü pendouei jembü aei peisilei ka jongsak lembei, lausikei saoei saoeibü shalebü ka saoeibü langkei kitila ai khei jouan kibü pendou lema.”
Lemshang Khüplabü
5Lubü shuongei lemshang shanga, laang maibü hoba Bou la khümbo kubü jongsak shuongei saüenan phobü shanga laujinei, haoei laukei:
6“Kanei chühbü khübü shanga, laang che che thüka laang che ong joulabü aki, pendou yantilabü chalou loulabü.”
7Haoenei hao to phekei, “Lenbou, khübü ai jiha loushedla, hoba khübü loushedla nyangko loua dogo ai tetsidaei ngesakla?”
8Haoei laukei, “Maangsangashi, khüpettibula. Aishanga juongnyu kü nyena loulabü, ‘Ngo hao ki,’ hoba ‘Jihsiphai nyangko loua,’ dogo laulabü. Haoen phai asemjan. 9Hobaje ladang kanei wapyobü hoba lason shanga ditlaje, telüh. Aishanga khübü shangieda loushedla kongnyu ki, lausikei thonbü kho mangde aloulabü.”
10Kheijinei haoei haoen to laukei, “Phang cheei phang che khulimbo meimeilabü, hoba sangle cheei sangle che khulimbo meimeilabü. 11Kaodak tennyinbü yaangbü loulabü, hoba kaonyek phang phanga kongbü hoba shat lim loulabü, hoba hatlabü yaangbü hoba khuthük ka tetsida yaangbü loulabü. 12Lausikei khübü pendou shangieda, haoenei kan laptilabü hoba shieikoelabü, kan sinagoga hoba thüngdang to khümbo kulabü, hoba kü nyena Choba hoba governor shuong thedanga kan leian haulabü. 13Kho kan la aukabü hangsilam maibü che kilabü. 14Kheijinei kanei kaneibü jongbü ngüh shangieda alamlela shanga kaneibü maangpona khühashi, 15aishanga kaneibü dangbou aoeikei teshebo hoba akhambo kibü ngüh hoba ngarü ngei kan la kulabü. 16Nyusibou hoba jaisinasi hoba chempen hoba lepbü shuongei yoan kan khümbomeiko kulabü, hoba kan yoa lubü shuong haitilabü. 17Hoba kü nyena pendouei kan to mangsenlabü. 18Lausikei kaneibü khu che ongkei amaulabü. 19Kaneibü khonkhitla danko kanei kaneibü langkei leilabü.”
20“Hobaje ladang kanei sepai shuongei Jerusalem kailepbü hapbei, kheijinei haoeibü sangliphang la yeitibü nyangko loua dogo ngeashi. 21Kheijinei Jihudaa kibü shuong shongh to satenan ki, hoba sangnyua kibü shuong bangjung loujan, hoba sekmanga kibü shuong sangnyu to teat, 22aishanga khübü mat jembü chalou ki, Laishiba ka dobü pendou loushedla shanga. 23Khübü chaloua mangakongbü yaksi hoba shoushou thonbü yaksi shanga ügütü! Aishanga kaonyeka khonsakbü yaangbü loulabü, hoba ho mütshuong khulimbo maangshat loulabü. 24Haoen khongaenei haiko haulabü hoba phang pendou to thüngbü la leian haulabü. Hobaje phangshuongeibü chalou loushedla shongko Jerusalem phangshuongei lintilabü.”
25“Chanyu, litnyu hoba khanshoulitshou to tetsida loulabü, hoba kaodaka phangshuong khonsaktilabü, yungnyu ngühbü hoba shoubü shanga maangpangyokulabü. 26Mütshuong kaodak to loulabü shanga nyekto thean, hatbüei maumaulabü, aishanga khuthükbü seisihuon kho shaknyinkulabü. 27Kheijinei Müteibü Shou seisihuon hoba soneikangbü yaangbü yoa sangmeia loubü haoenei haplabü. 28Hobaje khübü loushedla khangla kijinei, meimeian kaneibü khu phonashi, aishanga kaneibü angnam nyangko loua.”
29Kheijinei haoei haoen la ngühphatbü che lenkei: “Bhuklong hoba bunyu shuong pendou to chühashi. 30Ladang khübüei khisho longbü kanei hapda, sanglem nyangko loua dogo kanei kaneibü lolo ngeda. 31Kho tegü, ladang kanei khübü loushedla hapda, Bou Sangle nyangko loua dogo ngeashi. 32Maimaitham ngei kan to lenda, khübü pendou aloushad shongko ho metena adanglabü. 33Khuthük hoba kaodak danglabü, lausikei kü ngüh ladangkei adanglabü.”
34“Kaneibü lolo maangsangashi, kho aying longa kaneibü maangpon amaibü kümsilei, jaakbü hoba langkeibü thounoubü shuongei künan kilabü, hoba kho chalou sung tegü mangde kan to loulabü. 35Aishanga kho kaonyudak pendou shenko kibü pendou khulimbo loulabü. 36Hobaje loushedla nyangko kibü pendou ka satenla hoba Müteibü Shou thedanga loenla kanei hau kula shanga athakko chühko welaukuashi.”
37Chaloua haoei lemshang to lenkei; nangnaka haoei bangjung hauan Oliv Shongh to kikei. 38Hoba mütshuong pendouei hao ngüh ditla ngeyang lemshang to hao jungto loukei.
