Luk 21 FHB Father's Heart Bible™

21 ¹Mgbe Jisọs leliri anya, ọ hụrụ ndị ọgaranya ka ha na-etinye onyinye ha nʼụlọ akụ nke ụlọ nsọ ahụ. ²Ọ hụkwara otu nwaanyị ogbenye di ya nwụrụ ka ọ na-etinye mkpụrụ ego ọla abụọ dị nta.

³Ọ sịrị, “Nʼezie, agwa m unu, nwaanyị ogbenye a di ya nwụrụ etinyela karịa ndị ọzọ niile. ⁴Nʼihi na ndị a niile sitere nʼihe fọdụrụ ha nye onyinye, ma o sitere nʼogbenye ya nye ihe niile o nwere iji dị ndụ.”

Ụlọ Nsọ ahụ Ga-ada

⁵Mgbe ụfọdụ nọ na-ekwu banyere ụlọ nsọ ahụ, nke e ji nkume mara mma na onyinye ndị e doro nsọ nye Nna anyị chọọ mma, ọ sịrị:

⁶“Banyere ihe ndị a unu na-ele anya ya, ụbọchị na-abịa mgbe a na-agaghị ahapụ otu nkume nʼelu ibe ya—a ga-akwatu ha niile.”

⁷Ha jụrụ, “Onye nkuzi, olee mgbe ihe ndị a ga-eme, gịnịkwa bụ ihe ịrịba ama ga-egosi na ihe ndị a na-achọ ime?”

⁸Ọ sịrị, “Lezienụ anya, ka a ghara iduhie unu. Ọtụtụ mmadụ ga-abịa nʼaha m, na-asị, ‘Ọ bụ m bụ ya,’ na, ‘Oge ahụ eruola nso.’ Unu esola ha. ⁹Mgbe unu nụrụ banyere agha na nnupụisi, ka obi ghara ịlọ unu mmiri. Ihe ndị a aghaghị ịbịa buru ụzọ, ma ọgwụgwụ agaghị eso ozugbo.”

¹⁰Mgbe ahụ ọ gwara ha sị, “Mba ga-ebili megide mba, alaeze ga-ebilikwa megide alaeze. ¹¹Oke ala ọma jijiji ga-adị, ụnwụ na ọrịa na-efe efe ga-adịkwa nʼebe dị iche iche, ihe egwu na ọtụtụ ihe ịrịba ama dị ukwuu ga-esitekwa nʼeluigwe pụta. ¹²Ma tupu ihe ndị a niile emee, ha ga-ejide unu, kpagbuo unu, na-arara unu nye nʼụlọ nzukọ na nʼụlọ mkpọrọ, na-adọkpụrụ unu gaa nʼihu ndị eze na ndị gọọmenti nʼihi aha m. ¹³Nke a ga-abụ ohere unu ịgba akaebe. ¹⁴Ya mere, kpebienụ nʼobi unu ịghara ịkwadebe otu unu ga-esi gọọ ọnụ unu tupu oge eruo, ¹⁵nʼihi na aga m enye unu okwu na amamihe nke ọ dịghị onye iro unu ga-enwe ike iguzogide maọbụ gọnarị. ¹⁶Ọbụladị ndị mụrụ unu na ụmụnne unu na ndị ikwu unu na ndị enyi unu ga-arara unu nye, ha ga-egbukwa ụfọdụ nʼime unu. ¹⁷Mmadụ niile ga-akpọ unu asị nʼihi aha m. ¹⁸Ma ọ dịghị otu agịrị isi unu ga-ala nʼiyi. ¹⁹Ọ bụ site na ntachi obi unu ka unu ga-azọpụta ndụ unu.”

²⁰“Mgbe unu hụrụ ka ndị agha gbara Jerusalem gburugburu, matanụ mgbe ahụ na mbibi ya eruola nso. ²¹Mgbe ahụ ka ndị nọ na Judia gbaga nʼelu ugwu, ka ndị nọ nʼime obodo ahụ pụọ, ka ndị nọ nʼime ime obodo ghara ịbanye nʼime ya, ²²nʼihi na ndị a bụ ụbọchị ikpe, mgbe ihe niile e dere ga-emezu. ²³Lee ka ọ ga-esi dịrị ndị dị ime na ndị nne na-enye ụmụ ara njọ nʼụbọchị ndị ahụ! Nʼihi na oke mkpagbu ga-adakwasị ala ahụ, iwe ga-adịkwara ndị a. ²⁴Ha ga-eji ọnụ mma agha daa, a ga-adọtakwa ha nʼagha gaa na mba niile. Mba dị iche iche ga-azọtọ Jerusalem ụkwụ ruo mgbe oge nke ndị mba ahụ ga-emezu.”

²⁵“Ihe ịrịba ama ga-adị nʼanyanwụ, nʼọnwa, na kpakpando, nʼụwa kwa, mba dị iche iche ga-anọ na nhụjuanya, mgbagwoju anya ga-esite nʼụzụ na mmali elu nke oke osimiri. ²⁶Ndị mmadụ ga-ada mba nʼihi egwu, na-atụ egwu ihe na-abịakwasị ụwa, nʼihi na a ga-eme ka ike nke eluigwe maa jijiji. ²⁷Mgbe ahụ ha ga-ahụ Nwa nke Mmadụ ka ọ na-abịa nʼime igwe ojii, jiri ike na oke ebube. ²⁸Mgbe ihe ndị a malitere ime, guzoronụ ọtọ, welie isi unu elu, nʼihi na mgbapụta unu eruola nso.”

²⁹Mgbe ahụ ọ tụụrụ ha ilu, sị: “Lee osisi fig na osisi niile. ³⁰Mgbe ha na-epupụta akwụkwọ, unu na-ahụ nʼonwe unu, matakwa na oge okpomọkụ eruola nso. ³¹Nʼotu aka ahụ, mgbe unu hụrụ ihe ndị a ka ha na-eme, matanụ na alaeze Nna anyị eruola nso. ³²Nʼezie, agwa m unu, ọgbọ a agaghị agabiga ruo mgbe ihe ndị a niile ga-emezu. ³³Eluigwe na ụwa ga-agabiga, ma okwu m agaghị agabiga ma ọlị.”

³⁴“Lezienụ onwe unu anya, ma ọ bụghị ya, obi unu ga-adịwanye arọ site nʼibi ndụ rụrụ arụ, na ịṅụbiga mmanya oke, na nchegbu nke ndụ, ụbọchị ahụ ga-abịakwasịkwa unu na mberede, dịka ọnya. ³⁵Nʼihi na ọ ga-abịakwasị onye ọbụla bi nʼelu ụwa niile. ³⁶Na-echenụ nche mgbe niile, na-ekpe ekpere maka ike iji gbanarị ihe niile na-achọ ime, na iji guzoro nʼihu Nwa nke Mmadụ.”

³⁷Nʼehihie ọ na-ezi ihe nʼụlọ nsọ ahụ; nʼabalị ọ na-apụ gaa nọrọ nʼUgwu Oliv. ³⁸Ndị mmadụ niile na-abịakwute ya nʼisi ụtụtụ nʼụlọ nsọ ahụ ịnụ okwu ya.