Luku 21

21 ¹Nígbà tí Jesu gbé ojú sókè, ó rí àwọn ọlọ́rọ̀ tí wọ́n ń fi ẹ̀bùn wọn sínú àpótí ìṣúra tẹ́mpìlì. ²Ó tún rí opó tálákà kan tí ó ń fi ẹyọ owó idẹ kékeré méjì sí i.

³Ó wí pé, “Lóòótọ́ ni mo wí fún yín, opó tálákà yìí ti fi sí i ju gbogbo àwọn yòókù lọ. ⁴Nítorí gbogbo àwọn wọ̀nyí fi nínú àjẹsílẹ̀ wọn ṣe ẹ̀bùn, ṣùgbọ́n òun fi nínú òṣì rẹ̀ fún ohun gbogbo tí ó ní láti fi wà láàyè.”

Tẹ́mpìlì Yóò Wó

⁵Bí àwọn kan ti ń sọ̀rọ̀ nípa tẹ́mpìlì, tí a fi òkúta dáradára àti àwọn ẹ̀bùn tí a yà sọ́tọ̀ fún Baba wa ṣe lọ́ṣọ̀ọ́, ó wí pé:

⁶“Ní ti ohun tí ẹ̀ ń wò yìí, ọjọ́ ń bọ̀ nígbà tí a kì yóò fi òkúta kan sílẹ̀ lórí òmíràn—a ó wó gbogbo rẹ̀ lulẹ̀.”

⁷Wọ́n béèrè pé, “Olùkọ́, nígbà wo ni nǹkan wọ̀nyí yóò ṣẹlẹ̀, àti àmì wo ni yóò fi hàn pé nǹkan wọ̀nyí fẹ́rẹ̀ ṣẹlẹ̀?”

⁸Ó wí pé, “Ẹ ṣọ́ra, kí a má ṣe tàn yín jẹ. Ọ̀pọ̀lọpọ̀ ni yóò wá ní orúkọ mi, tí wọn yóò máa wí pé, ‘Èmi ni,’ àti pé, ‘Àkókò náà kù sí dẹ̀dẹ̀.’ Ẹ má ṣe tẹ̀lé wọn. ⁹Nígbà tí ẹ bá gbọ́ nípa ogun àti ìdìtẹ̀, ẹ má ṣe fòyà. Nǹkan wọ̀nyí kò lè ṣàì kọ́kọ́ ṣẹlẹ̀, ṣùgbọ́n òpin kì yóò tẹ̀lé e lẹ́sẹ̀kẹsẹ̀.”

¹⁰Nígbà náà ni ó wí fún wọn pé, “Orílẹ̀-èdè yóò dìde sí orílẹ̀-èdè, àti ìjọba sí ìjọba. ¹¹Ìmìtìtì ilẹ̀ ńlá yóò ṣẹlẹ̀, pẹ̀lú ìyàn àti àjàkálẹ̀ àrùn ní oríṣiríṣi ibi, àti ìpayà àti àwọn àmì ńlá láti ọ̀run wá. ¹²Ṣùgbọ́n ṣáájú gbogbo èyí, wọn yóò mú yín, wọn yóò sì ṣe inúnibíni sí yín, wọn yóò fà yín lé àwọn sínágọ́gù àti àwọn ẹ̀wọ̀n lọ́wọ́, wọn yóò wọ́ yín lọ síwájú àwọn ọba àti àwọn gómìnà nítorí orúkọ mi. ¹³Èyí ni yóò jẹ́ àǹfààní fún yín láti jẹ́rìí. ¹⁴Nítorí náà, ẹ pinnu ní ọkàn yín pé ẹ kì yóò múra ìgbèjà yín sílẹ̀ ṣáájú, ¹⁵nítorí èmi yóò fún yín ní ọ̀rọ̀ àti ọgbọ́n tí kò sí ọ̀tá tí ó lè kọ ojú ìjà sí tàbí tí ó lè tako. ¹⁶Àní àwọn òbí àti àwọn arákùnrin àti àwọn ìbátan àti àwọn ọ̀rẹ́ ni yóò fi yín hàn, wọn yóò sì pa àwọn kan nínú yín. ¹⁷Gbogbo ènìyàn ni yóò kórìíra yín nítorí orúkọ mi. ¹⁸Ṣùgbọ́n irun orí yín kan kì yóò ṣègbé. ¹⁹Nípa sùúrù yín ni ẹ ó fi jèrè ẹ̀mí yín.”

²⁰“Nígbà tí ẹ bá rí Jerúsálẹ́mù tí àwọn ọmọ ogun yí ká, nígbà náà ni kí ẹ mọ̀ pé ahoro rẹ̀ ti súnmọ́ tòsí. ²¹Nígbà náà, kí àwọn tí ó wà ní Judea sá lọ sí orí òkè, kí àwọn tí ó wà ní ìlú jáde, kí àwọn tí ó wà ní ìgbèríko má sì ṣe wọ inú rẹ̀, ²²nítorí àwọn wọ̀nyí ni ọjọ́ ìdájọ́, nígbà tí gbogbo ohun tí a kọ yóò ṣẹ. ²³Yóò ti burú tó fún àwọn aboyún àti àwọn ìyá tí ń fún ọmọ lọ́mú ní ọjọ́ wọ̀nyẹn! Nítorí ìpọ́njú ńlá yóò dé bá ilẹ̀ náà, àti ìbínú sí àwọn ènìyàn yìí. ²⁴Wọn yóò ti ipa idà ṣubú, a ó sì kó wọn ní ìgbèkùn lọ sí gbogbo orílẹ̀-èdè. Àwọn orílẹ̀-èdè yóò tẹ Jerúsálẹ́mù mọ́lẹ̀ títí àkókò àwọn orílẹ̀-èdè yóò fi ṣẹ.”

²⁵“Àwọn àmì yóò wà nínú oòrùn, òṣùpá, àti àwọn ìràwọ̀, àti lórí ilẹ̀ ayé, àwọn orílẹ̀-èdè yóò wà nínú ìpọ́njú, tí ìró àti rírú omi òkun yóò dà rú. ²⁶Àwọn ènìyàn yóò dákú nítorí ìbẹ̀rù, wọn yóò máa páyà ohun tí ń bọ̀ wá sórí ayé, nítorí a ó mi àwọn agbára ọ̀run. ²⁷Nígbà náà ni wọn yóò rí Ọmọ Ènìyàn tí yóò máa bọ̀ nínú ìkùùkuu pẹ̀lú agbára àti ògo ńlá. ²⁸Nígbà tí nǹkan wọ̀nyí bá bẹ̀rẹ̀, ẹ dìde dúró ṣánṣán, kí ẹ sì gbé orí yín sókè, nítorí ìràpadà yín ti súnmọ́.”

²⁹Nígbà náà ni ó pa òwe kan fún wọn pé: “Ẹ wo igi ọ̀pọ̀tọ́ àti gbogbo igi. ³⁰Nígbà tí wọ́n bá rú ewé, ẹ máa fi ara yín rí i, ẹ sì mọ̀ pé ìgbà ẹ̀ẹ̀rùn ti súnmọ́. ³¹Bákan náà, nígbà tí ẹ bá rí nǹkan wọ̀nyí tí wọ́n ń ṣẹlẹ̀, ẹ mọ̀ pé ìjọba Baba wa ti súnmọ́. ³²Lóòótọ́ ni mo wí fún yín, ìran yìí kì yóò kọjá lọ títí gbogbo nǹkan wọ̀nyí yóò fi ṣẹlẹ̀. ³³Ọ̀run àti ayé yóò kọjá lọ, ṣùgbọ́n ọ̀rọ̀ mi kì yóò kọjá lọ láéláé.”

³⁴“Ẹ ṣọ́ra fún ara yín, kí ọkàn yín má baà di wúwo nípa wọ̀bìà, ọtí àmupara, àti àwọn àníyàn ayé, kí ọjọ́ náà má sì baà dé bá yín lójijì, bí ìdẹ̀kùn. ³⁵Nítorí yóò dé bá gbogbo ènìyàn tí ń gbé ní orí gbogbo ilẹ̀ ayé. ³⁶Ẹ máa ṣọ́ra ní gbogbo ìgbà, kí ẹ máa gbàdúrà fún agbára láti bọ́ lọ́wọ́ ohun gbogbo tí ó fẹ́rẹ̀ ṣẹlẹ̀, àti láti dúró níwájú Ọmọ Ènìyàn.”

³⁷Ní ọ̀sán, ó ń kọ́ni nínú tẹ́mpìlì; ní òru, ó jáde lọ, ó sì ń dúró ní orí Òkè Ólífì. ³⁸Gbogbo àwọn ènìyàn a sì máa tọ̀ ọ́ wá ní àfẹ̀mọ́júmọ́ nínú tẹ́mpìlì láti gbọ́ ọ̀rọ̀ rẹ̀.