ሉቃስ 20 FHB Father's Heart Bible™

20 ¹ካብተን መዓልቲታት በታ ሓንቲ፥ ኢየሱስ ኣብ ቤተ መቕደስ ነቲ ህዝቢ እናመሃረን ወንጌል እናሰበኸን እንተሎ፥ ሊቃውንቲ ካህናትን ፀሓፍትን ምስ ዓበይቲ ሰባት ቀረቡ፤ ²ከምዙይ ኢሎም ከዓ ጠየቕዎ፦ “እዝ ነገር እዙይ በየናይ ስልጣን ከም እትገብሮ፥ ወይ እዙይ ስልጣን እዙይ መን ከም ዝሃበካ ንገረና።”

³ንሱ ኸዓ ኢሉ መለሰሎም፦ “ኣነውን ሓንቲ ሕቶ ክሓተኩም እየ፤ ንገሩኒ ደኣ፦ ⁴ጥምቀት ዮሃንስ ካብ ሰማይ ድዩ ኔሩ፥ ወይ ካብ ሰብ?”

⁵ንሳቶም ከዓ ከምዙይ ኢሎም ንስንሳቶም ተዘራረቡ፦ “‘ካብ ሰማይ’ እንተ በልና፥ ‘ስለ ምንታይ ብእኡ ዘይኣመንኩም?’ ክብለና እዩ፤ ⁶‘ካብ ሰብ’ እንተ በልና ግና፥ ኵሉ እቲ ህዝቢ፥ ዮሃንስ ነብዪ ምዃኑ ኣሚኖም እዮም እሞ፥ ብእምኒ ክወግሩና እዮም።” ⁷ስለዙይ፥ ካበይ ከም ዝመፀ ኸም ዘይፈልጡ ኢሎም መለሱ።

⁸ኢየሱስ ድማ “እምበኣር ኣነውን በየናይ ስልጣን እዝ ነገር እዙይ ከም ዝገብሮ ኣይነግረኩምን እየ” በሎም።

ኣቦ ንፍቑር ወዱ ይሰድድ

⁹ነቲ ህዝቢ ኸዓ እዝ ምሳሌ እዙይ ክነግሮም ጀመረ፦ “ሓደ ሰብ ኣታኽልቲ ወይኒ ተኸለ፤ ንሓረስቶት ሂቡ ድማ፥ ንነዊሕ ጊዜ ናብ ካልእ ሃገር ከደ። ¹⁰ብጊዜ ዓፂድ ከዓ፥ ካብ ፍረ እቲ ኣታኽልቲ ወይኒ ዝግብኦ ግዲ ምእንቲ ክህብዎ፥ ናብቶም ሓረስቶት ሓደ ባርያ ለኣኸ፤ ንሳቶም ግና ወቒዖም ጥራሕ ኢዱ ሰደድዎ። ¹¹ካልእ ባርያ ድማ ለኣኸ፤ ንእኡውን ወቒዖም ኣሕሲሮም ጥራሕ ኢዱ ሰደድዎ። ¹²ሳልሳይ ድማ ለኣኸ፤ ንእዙይውን ኣቝሲሎም ንደገ ደርበይዎ። ¹³እቲ ጐይታ ኣታኽልቲ ወይኒ ኸዓ ‘እንታይ ክገብር? ንፍቑር ወደይ ክሰዶ እየ፤ ምናልባሽ ከኽብርዎ እዮም’ በለ።

¹⁴እቶም ሓረስቶት ግና ንእኡ ምስ ረኣይዎ፥ ‘እዙይ እቲ ወራሲ እዩ፤ እቲ ርስቲ ናህና ምእንቲ ክኸውን፥ ንቕተሎ’ ኢሎም ንስንሳቶም ተማኸሩ። ¹⁵ካብቲ ኣታኽልቲ ወይኒ ኣውፂኦም ድማ ቀተልዎ። እምበኣር እቲ ጐይታ ኣታኽልቲ ወይኒ እንታይ ክገብሮም እዩ?

¹⁶“ንሱ መፂኡ ነቶም ሓረስቶት ከጥፍኦም፥ ነቲ ኣታኽልቲ ወይኒ ድማ ንኻልኦት ክህቦ እዩ።” እዙይ ምስ ሰምዑ ኸዓ “ከምዙይ ኣይኹን!” በሉ።

¹⁷ንሱ ኸዓ ጠሚቱ “እምበኣር እቲ ፅሑፍ ዝብሎ እዙይ እንታይ እዩ፦ ‘እታ ነደቕቲ ዝነፀግዋ እምኒ፥ ንሳ ርእሲ መኣዝን ኮነት’ ዝብል?” በሎም። ^a a v17 ካብ መዝሙር 118፥22 ዝተወስደ ጥቅሲ። ¹⁸“ኣብ ልዕሊ እታ እምኒ እቲኣ ዝወድቕ ኵሉ ኽስበር እዩ፤ ንሳ ኣብ ልዕሊ ዝኾነ ሰብ እንተ ወደቐት ከዓ፥ ክትቕጥቅጦ እያ።”

ንቄሳር ሃቡ፥ ንኣቦ ሃቡ

¹⁹ፀሓፍትን ሊቃውንቲ ካህናትን ድማ፥ እዝ ምሳሌ እዙይ ብዛዕባኦም ከም ዝበሎ ፈሊጦም፥ በታ ሰዓት እቲኣ ክሕዝዎ ደለዩ፤ ንህዝቢ ግና ፈርሑ። ²⁰ኣጥቢቖም እናተዓዘብዎ ድማ፥ ካብ ዘረባኡ ክሕዝዎ፥ ኣብ ትሕቲ ግዝኣትን ስልጣንን ናይቲ ገዛኢ ኣሕሊፎም ክህብዎ ኢሎም፥ ቅኑዓት መሲሎም ዝቐርቡ ሰለልቲ ለኣኹ። ²¹ከምዙይ ኢሎም ከዓ ጠየቕዎ፦ “መምህር፥ ንስኻ ቅኑዕ ኢልካ ኸም እትዛረብን እትምህርን፥ ገፅ ሰብ ድማ ከም ዘይትርኢ፥ መንገዲ እግዚኣብሄር ግና ብሓቂ ኸም እትምህር፥ ንፈልጥ ኢና። ²²ንቄሳር ግብሪ ኽንከፍል ተፈቒዱልና ድዩ፥ ወይ ኣይፋሉን?”

²³ንሱ ግና ተንኰሎም ኣስተብሂሉ ከምዙይ በሎም፦

²⁴“ዋጋ ናይ ሓደ መዓልቲ ዓስቢ ዝኸውን ገንዘብ ኣርእዩኒ። ናይ መን ምስልን ፅሕፈትን ኣለዎ?” ንሳቶም ከዓ “ናይ ቄሳር” በሉ።

²⁵ንሱ ኸዓ “እምበኣር ናይ ቄሳር ንቄሳር፥ ናይ ኣቦና ድማ ንኣቦና ሃቡ” በሎም።

²⁶ኣብ ቅድሚ እቲ ህዝቢ ኸዓ ካብ ዘረባኡ ክሕዝዎ ኣይከኣሉን፤ በቲ ዝመለሰሎም መልሲ ተገሪሞም ድማ ፀጥ በሉ።

ኣቦ ኣምላኽ ህያዋን እዩ

²⁷ትንሳኤ ኸም ዘየለ ዝኽሕዱ ገሊኦም ሰዱቃውያን ድማ ናብኡ መፂኦም ከምዙይ ኢሎም ጠየቕዎ፦ ²⁸“መምህር፥ ሙሴ፦ ‘ሓደ ሰብ ሰበይቲ ሓዲጉ ብዘይ ውሉድ እንተ ሞተ፥ ሓዉ ነታ መበለት ኣእትዩ ንሓዉ ዘርኢ ከተንስኣሉ ኣለዎ’ ኢሉ ፀሓፈልና። ^b b v28 እዙይ ነቲ ኣብ ዘዳግም 25፥5-6 ተፀሒፉ ዘሎ ሕጊ መርዓ ሓው የመልክት። ²⁹እምበኣር ሸውዓተ ኣሕዋት ነበሩ። እቲ ቐዳማይ ሰበይቲ ኣእተወ፤ ብዘይ ውሉድ ድማ ሞተ። ³⁰እቲ ኻልኣይ ድማ ሓዛ፤ ³¹እቲ ሳልሳይ ድማ ሓዛ፤ ከምኡ ኸዓ እቶም ሸውዓቲኦም ውሉድ እንተይገደፉ ሞቱ። ³²ኣብ መወዳእታ ድማ እታ ሰበይቲ እውን ሞተት። ³³እምበኣር በቲ ትንሳኤ፥ ናይ መን ሰበይቲ ክትከውን እያ? እቶም ሸውዓቲኦም ኣእትዮምዋ እዮም እሞ።”

³⁴ኢየሱስ ድማ ከምዙይ በሎም፦ “ውሉድ እዝ ዓለም እዙይ ይምርዓዉን የመርዕዉን እዮም፤

³⁵እቶም ናብቲ ዓለም እቲን ናብ ትንሳኤ ምዉታንን ክበፅሑ ብቑዓት ኮይኖም ዝተቘፀሩ ግና፥ ኣይምርዓዉን ኣየመርዕዉንን እዮም። ³⁶ከም መላእኽቲ፥ ውሉድ ኣቦና፥ ውሉድ ትንሳኤ እዮም እሞ፥ ደጊም ክሞቱ ኣይኽእሉን እዮም። ³⁷ሙሴ እውን ከይተረፈ ግና፥ ኣብቲ ብዛዕባ ኣሻዅ ቈጥቋጥ ዝዛረብ ክፍሊ፥ ንኣቦና ‘ኣምላኽ ኣብርሃም፥ ኣምላኽ ይስሓቅ፥ ኣምላኽ ያእቆብ’ ኢሉ ፀዊዑ፥ ምዉታት ከም ዝትንስኡ ኣርኣየ። ^c c v37 እቲ ብዛዕባ እታ እትነድድ ኣሻዅ ቈጥቋጥ ዝዛረብ ዛንታ ኣብ ዘፀኣት 3፥2-6 ይርከብ። ³⁸ኵሎም ብእኡ ህያዋን እዮም እሞ፥ ንሱ ኣምላኽ ህያዋን ደኣ እምበር፥ ኣምላኽ ምዉታን ኣይኮነን።”

³⁹ሽዑ ገሊኦም ፀሓፍቲ “መምህር፥ ፅቡቕ ተዛሪብካ” ኢሎም መለሱ። ⁴⁰ደጊም ዝኾነ ነገር ክሓትዎ ኣይደፈሩን እዮም እሞ።

ክርስቶስ ወዲ መን እዩ?

⁴¹ንሱ ግና “ክርስቶስ ወዲ ዳዊት እዩ ኢሎም ከመይ ኢሎም እዮም ዝብሉ?” በሎም።

⁴²“ዳዊት ባዕሉ ኣብ መዝሙር ከምዙይ ይብል እዩ እሞ፦ ‘ኣቦና ንጐይታይ ከምዙይ በሎ፦ “ኣብ የማነይ ተቐመጥ፥ ^d d v42 ካብ መዝሙር 110፥1 ዝተወስደ ጥቅሲ። ⁴³ክሳዕ ንፀላእትኻ መርገፂ እግርኻ ዝገብሮም።”’

⁴⁴ዳዊት ደኣ ጐይታ ኢሉ ይፅውዖ፤ ከመይ ኢሉ ድማ ወዱ ይኸውን?”

⁴⁵ኵሉ እቲ ህዝቢ እናሰምዑ እንተለዉ፥ ንደቀ መዛሙርቱ ከምዙይ በሎም፦

⁴⁶“ካብ ፀሓፍቲ ተጠንቀቑ፤ ንሳቶም ነዊሕ ክዳን ለቢሶም ክመላለሱ ይደልዩ፥ ኣብ ዕዳጋ ኢድ ክንስኡሎም፥ ኣብ ቤተ ፀሎት ኣይሁድ ዝለዓለ መቐመጢ፥ ኣብ በዓላትውን ዝበለፀ ስፍራ የፍቅሩ፥ ⁴⁷ንሳቶም ኣባይቲ መበለታት ይበልዑ፥ ንምርኣይ ድማ ነዊሕ ፀሎት ይፅልዩ። ንሳቶም ዝገደደ ኵነኔ ክቕበሉ እዮም።”