Luke 20 FHB Father's Heart Bible™

20 ¹Ek din, Jisu pora mondir te manuh khan ke sikhai thakise aru susamachar prachar kori thakise, titia moha purohit khan aru niyom likha khan tu bura manuh khan logot ahhise, ²aru Tar ke hudise, “Kun adhikar pora Apuni eitu kaam khan kori ase, nahole kun pora Apuni ke eitu adhikar dise, amikhan ke kobi.”

³Tar pora jawab di koise, “Moi bhi tumikhan ke ekta kotha hudibo. Moi ke kobi: ⁴John laga baptizma tu sorgo pora thakise, nahole manuh pora?”

⁵Tarkhan nijor majot te kotha korise, “Jodi amikhan ‘Sorgo pora’ koile, Tai ‘Tetiya tumikhan kile tar ke biswas kora nai?’ kobo. ⁶Kintu jodi amikhan ‘Manuh pora’ koile, sob manuh khan amikhan ke pathor maribo, kilemane tarkhan John tu bhabobadi asele koi kene mani loise.” ⁷Etu karone tarkhan jawab dise, eitu kot pora ahhise tarkhan jana nai.

⁸Aru Jisu pora tarkhan ke koise, “Moi bhi kun adhikar pora eitu kaam khan kori ase, tumikhan ke nakobo.”

Pitri pora Tar Morom laga Putro ke Pathai Diye

⁹Tai pora manuh khan ke eitu drishtanto kobole shuru korise: Ekjon manuh pora ekta angur kheti lagaise, kheti kora manuh khan ke bhara dise, titia bahut din nimite dusra desh te jaise. ¹⁰“Kheti kata somoi te, angur kheti laga phol laga tar bhag lobole, tai pora ekjon noukar ke kheti kora manuh khan logot pathaise, kintu tarkhan tai ke marise aru khali hath pathai dise. ¹¹Tai pora aru ekjon noukar ke pathaise; tarkhan tai ke bhi marise, sorom khilai dise, aru khali hath pathai dise. ¹²Aru tai pora tisra ekjon ke bhi pathaise, kintu tarkhan eitu ke bhi jokhom korise aru bahar te phelai dise. ¹³Angur kheti laga malik pora koise, ‘Moi ki koribo? Moi laga morom laga putro ke pathabo; hoito tarkhan tai ke sonman koribo.’

¹⁴Kintu tai ke dekhi kene, kheti kora manuh khan nijor majot te bhabona korise, ‘Eitu uttoradhikari ase. Tai ke morai dibo, titia uttoradhikar amikhan laga hobo.’ ¹⁵Tarkhan tai ke angur kheti laga bahar te phelai dise aru morai dise. Tetiya angur kheti laga malik pora tarkhan ke ki koribo?

¹⁶“Tai ahhibo, hei kheti kora manuh khan ke khotom kori dibo, aru angur kheti dusra khan ke dibo.” Eitu huni kene, tarkhan koise, “Eneka kitia bhi nohobo!”

¹⁷Tai pora tarkhan ke sidha saise aru hudise, “Tetiya eitu ki likhi rakhise, eitu ki ortho ase: ‘Ghor bona manuh khan pora pela diya pathor tu he kuna laga mukhyo pathor hoise’? ^a a v17 Eitu Bhajan Sanhita 118:22 pora loa kotha ase. ¹⁸Kun manuh hei pathor uporte giribo, tai tukra tukra hoi jabo, aru eitu kun uporte giribo, tai ke guri kori dibo.”

Caesar ke Dibi, Pitri ke Dibi

¹⁹Niyom likha khan aru moha purohit khan hei somoi te Tar ke dhoribole mon korise, kilemane Tai eitu drishtanto tarkhan birodh te koise koi kene tarkhan jani loise—kintu tarkhan manuh khan ke bhoi khaise. ²⁰Tarkhan bhal pora dhyan di kene, Tar ke Tar laga kotha pora dhoribole, aru shashonkorta laga shashon aru adhikar te Tar ke di dibole, dharmik manuh nisina bhan kora guptachar khan pathaise. ²¹Tarkhan Tar ke hudise, “Guruji, Apuni thik pora kotha koi ase aru sikhai ase, kun manuh laga mukh bhi nasai kene, kintu hosa pora Isor laga rasta sikhai ase, eitu amikhan jane. ²²Amikhan nimite Caesar ke kor diya tu niyom te thik ase, nahole nai?”

²³Kintu Tai pora tarkhan laga chalaki bujhi loise aru koise,

²⁴“Din laga mojuri joggo ekta poisa Moi ke dikhai dibi. Eitu uporte kun laga chehera aru likha ase?” Tarkhan koise, “Caesar laga.”

²⁵Tai pora tarkhan ke koise, “Tetiya Caesar laga ki ase eitu Caesar ke dibi, aru amar Pitri laga ki ase eitu amar Pitri ke dibi.”

²⁶Tarkhan manuh khan laga age te Tar ke Tar laga kotha pora dhori bole para nai, aru Tar jawab te asurit hoi kene, tarkhan chup hoi jaise.

Pitri tu Jinda Thaka Khan laga Isor ase

²⁷Kunba Sadukee khan, kun khan mora pora jee uthibo nai koi kene mane, ahhi kene Tar ke hudise, ²⁸“Guruji, Moses amikhan nimite likhise: jodi ekjon manuh laga maiki thaki kene kintu bacha nathaki kene mori jai, titia tar bhai pora hei bidhowa ke shadi kori kene tar nimite bacha ulai dibo lage. ^b b v28 Eitu Bidhoban 25:5–6 te likhi rakha bhai laga bidhowa ke shadi kora niyom laga kotha ase. ²⁹Etiya sat-jon bhai thakise. Poila jon pora ekta maiki loise aru bacha nathaki kene mori jaise. ³⁰Aru dusra jon pora, ³¹aru tisra jon pora tai ke loise, aru eneka he sat-jon sob bacha nachari kene mori jaise. ³²Sob laga pichete hei maiki bhi mori jaise. ³³Tetiya, punoruthan te, tai kun laga maiki hobo? Kilemane sat-jon sob pora tai ke shadi korise.”

³⁴Aru Jisu pora tarkhan ke koise, “Eitu yug laga manuh khan shadi kore aru shadi te di diye,

³⁵“Kintu kun khan hei yug aru mora pora punoruthan te ponchibole yogya bhabona kora hoise, tarkhan shadi nakore aru shadi te bhi nadiye. ³⁶Kilemane tarkhan aru kitia bhi moribo napare, kilemane tarkhan sorgodoot khan nisina ase aru amar Pitri laga bacha khan ase, punoruthan laga bacha khan ase. ³⁷Kintu Moses bhi, jui jola jhar laga kotha te, amar Pitri ke Abraham laga Isor, Isaac laga Isor aru Jacob laga Isor koi kene, mora khan jee uthi ase koi kene dikhai dise. ^c c v37 Jui jola jhar laga kotha tu Prostan 3:2–6 te ase. ³⁸Tai mora khan laga Isor nohoi kintu jinda khan laga Isor ase, kilemane Tar age te sob jinda ase.”

³⁹Tetiya kunba niyom likha khan jawab dise, “Guruji, Apuni bhal pora koise.” ⁴⁰Kilemane tarkhan aru Tar ke eku bhi hudibole himmot kora nai.

Khrista tu Kun laga Putro ase?

⁴¹Kintu Tai pora tarkhan ke koise, “Khrista tu David laga putro ase koi kene tarkhan kineka kobo pare?

⁴²Kilemane David nijor pora Bhajan Sanhita te koi ase, ‘Amar Pitri pora moi laga Prabhu ke koise, “Moi laga dyna hath te bohibi, ^d d v42 Eitu Bhajan Sanhita 110:1 pora loa kotha ase. ⁴³jitia tak Moi tumar dushman khan ke tumar theng rakhibole jaga bonabo.”’

⁴⁴Tetiya David pora Tar ke Prabhu koi ase—tinehoile Tai kineka tar putro ase?”

⁴⁵Sob manuh khan huni thaka somoi te, Tai pora Tar chella khan ke koise,

⁴⁶“Niyom likha khan pora hoshiar thakibi, kun khan lamba kapra lagai kene bera bole mon kore, aru bajar khan te salam pabole, mondolee ghor khan te sob se bhal bohibole jaga, aru bhuj te sonman laga jaga khan bhal pai, ⁴⁷kun khan bidhowa khan laga ghor khai diye aru manuh ke dikhabole lamba prathana kore. Tarkhan aru bisi dangor sajai pabo.”