Luke 20

20 ¹Thangkha, Jishuna khorumshimli mibingli tamchitheida paokaphā hāshok leilakha, pāngmon akhokabing, ain kathembing kala ararbingna rāhaowa, ²kala ali ngahāna, "Khiwui pangshap eina nana otbing hi kasākhala kaji ithumli hānglu, kala khipāna nali pangshap hi khamikhala," da hānga.

³Ana athumli ngahānkai, "Inala nathumli khangahān akha sāra; ili hānglu: ⁴Johnwui ra̱kahik chi kazingram eina rāsaila, ka mikumo eina rāsaila?"

⁵Athum akha eina akha ngayat ngaroka, "Ithumna 'Kazingramwui einana' da hāngakha, ana 'Khisāthuda nathumna ali mashitsangthukhala' da hāngra; ⁶Kha 'Mikumowui einana' da hāngakha, mi saikorana ithumli lunggui eina horthatra, kaja mibingna John chi kachangkhat marān ngasāhai da khalung khuiya." ⁷Chiwui vang eina athumna chi kachiwui eina rākhala kaji matheimana da ngahānkai.

⁸Chieina Jishuna athumli hānga, "Inala otbing hi khiwui pangshap eina kasākhala kaji nathumli mahāngmara."

Avāna Awui Naomayara Leikasheli Chihovā

⁹Ana mibingli chānjam hi hāngchithei phokhaowa: "Mi akhana drakhā yāmgui akha sai, chi khamasābingli luimasāt mihailaga, atam ngayur eina kha̱ram thuihaowa. ¹⁰"Mā kahāt atamli ana khamasābingwui eina drakhā yāmguiwui athei sharuk akhui khavai rao akha chihovai, kha athumna ali shaoshaomihailaga khamasai eina shiunhaowa. ¹¹Ana rao khangatei akhala chihovai; kha athumna alila shaoda, maishi ngasakida, khamasai eina shiunhaowa. ¹²Ana kakathuma akhala chihovai, kha athumna hilila khamā za̱mihailaga shimenshokhaowa. ¹³Drakhā yāmguiwui akhavāna hānga, 'Ina khi sārakhala? Ina iwui naomayara leikasheli chihovāra; athumna ali khayāshirapai.'

¹⁴Kha ali kathei eina, khamasābing china athum khalatta ngazek ngaroka, 'Hina shimluikatpa ngasāra; ali shaothathaosa, chithākha shimlui chi ithumwui ngasāhaora.' ¹⁵Ali drakhā yāmgui eina athumna shimenshoklaga shaothatserhaowa. Chithākha drakhā yāmguiwui akhavāna athumli khi ngasārakhala?

¹⁶"Ana rāda, khamasābing chili shaothatserhaora kala drakhā yāmgui chi kateibingli mihaora." Hi kashā tharan athumna, "Masāpaimana!" da hānga.

¹⁷Ana athumli ngatartei yangda hānga, "Chithākha kapihaida lei hi khi kahāngkhala: 'Lunggui shim kasābingna khalan kahai china achikunwui akho lunggui ngasāhaowa'? ^a a v17 Psalm 118:22 eina khuikahai tui. ¹⁸Kachikathāna ngalung chiwuitungli tārorakha sākhayāngra, kala chi khipākhawuitungli tārorlala, alila sākachupra."

Caesarli Milu, Avāli Milu

¹⁹Ain kathembing eina pāngmon akhokabingna chānjam chi ana athumli rinlaga kahāngna da theida, chitharan tangda ali tukkhui khavai ngarāna, kha athumna mibingli ngacheehaowa. ²⁰Chieina athumna ali ra̱yangda, awui tui eina ali tukkhui khavai kala governorwui sāshap kala pangshapli horsang khavai, ningkathar mina da sakhaninglaga ra̱khayangabing chihovai. ²¹Athumna ali ngahāna, "Ojā, ithumna thei kaja na mashunglak eina matui kala tamchithei, mimai makhayanga, kha khamashung eina Varewui shongfa tamchithei. ²²Ithumna Caesarli khāshinā khami hi ainlā, lah maningmakhala?"

²³Kha ana athumwui awor chi theida hānga,

²⁴"Thangkachiwui ngalangman chāng lupāsā akha ili chitheilu. Hi khipāwui azak kala khipāwui kapihailikhala?" Athumna, "Caesarwuina" da ngahānkai.

²⁵Ana athumli hānga, "Chithākha Caesarli Caesarwui chi milu, kala ithumwui Avāli ithumwui Avāwui chi milu."

²⁶Athumna mibingwui mangāli awui tui eina ali tukkhui masāthuwa, kala awui ngahānkakā chi shālaga matakhakhaoda kasaikha pama.

Avā hi Kharingabingwui Vare

²⁷Ringkhalui maleimana da kahānga Sadduceebing kaikhana ali rāngahāna, ²⁸"Ojā, Mosesna ithumwui vang hithada kapimihai: mi akhana preiva̱ horhailaga nao maleila thihaiakha, agato china ra̱meiva̱ chili ngakumlaga amawui vang nao pharākhuiphalungra. ^b b v28 Hi chi Deuteronomy 25:5-6 li kapi kahai, mi akha nao maleila thihaiakha agatona apreiva̱li ngakumwui ain chi hāngchithei. ²⁹Ara chinaongarā shini leisai. Kharara china ngalā khuilaga nao maleila thihaowa. ³⁰Kala kakhane chinala, ³¹kala kakathuma china preiva̱ chi ngakuma, chithāda sāda shini saikorana nao maleila thiserhaowa. ³²Naomeikapta sha̱naopāva̱ chila thihaowa. ³³Chithākha ringluishit tharan, a khipāwui preiva̱ ngasārakhala? Kaja shini saikorana ali ngakuma."

³⁴Kala Jishuna athumli hānga, "Hi okathuiwui mibingna ngalā khuira kala ngakum khavai mira,

³⁵"Kha atam chi kala kathiwui eina ringkhalui chili samphang khavai kanā da khuihaibing chi ngalāla makhuimara, fakathuila mafathuimara. ³⁶Kaja athum mathiluimara, khikhalajila athum kazingraobing thāda, kala ithumwui Avāwui naongarā, ringkhaluiwui naongarā ngasāra. ³⁷Kha kathebing ringlui khangasaka kaji Moses khalattanala chithei, thing khangapom chuida, ithumwui Avāli Abrahamwui Vare, Isaacwui Vare, kala Jacobwui Vare da hoi. ^c c v37 Meiwonda kachui thingpomwui pao chi Exodus 3:2–6li lei. ³⁸A kathebingwui Vare maningmana, kha kharing leibingwui Varena, kaja awui mangāli saikora kharingna."

³⁹Chiwui thili ain kathembing kaikhana ngahānkai, "Ojā, nana phāda hānga." ⁴⁰Kaja athumna ali khikhala khangahān khavai masālengthuwa.

Khrista chi Khipāwui Naomayarakhala?

⁴¹Kha ana athumli hānga, "Khrista chi Davidwui naomayarana da kathada mibingna hāngpaira?

⁴²Kaja David khalattana Laa lairikli hānga, 'Ithumwui Avāna iwui Proholi hānga, "Iwui yāshong pamlu, ^d d v42 Hi Laa 110:1 einawui matui china. ⁴³nawui yangkashebingli ina nawui pheinai masā ngasakranglakha eina tangda."'

⁴⁴Davidna ali Proho hoi; hithaakha kathada a awui naomayara ngasāpaira?"

⁴⁵Mi saikorana nganāda leilakha, ana awui sākhangatha̱bingli hānga,

⁴⁶"Ain kathembingli ning ngasharlu, athum phahon katuma ngavaida yaothui khangaibing, kala leihngapha̱li shālam, synagogueli mathāmeikap kaji pam, kala zātkhān kasāli khayākakā pam ningkachāngbing, ⁴⁷ra̱meinaobingwui shim sashimānkhamebing kala sakakhaninga seihā kasāngsāng kasābing. Athum sakkhamei khonshāt samphangra."