ሉቃስ 19 FHB Father's Heart Bible™

19 ¹ኢየሱስ ናብ ያሪኮ ኣትዩ ይሓልፍ ነበረ። ²እንሆ ኸዓ ዘኬዎስ ዝስሙ ሓደ ሰብኣይ ነበረ፤ ንሱ ሓለቓ ተቐበልቲ ቐረፅ ነበረ፥ ሃብታምውን ነበረ። ³ኢየሱስ መን ምዃኑ ኽርኢ ደለየ፥ ግና ሓፃር ስለ ዝነበረ ብሰሪ እቶም ህዝቢ ኣይከኣለን። ⁴ኢየሱስ በቲ መንገዲ ኽሓልፍ ስለ ዝነበረ፥ ንምርኣዩ ቀዲሙ ጐይዩ ናብ ሓንቲ ሳግላ ደየበ።

⁵ኢየሱስ ናብቲ ቦታ ምስ በፅሐ፥ ንላዕሊ ጠሚቱ ከምዙይ በሎ፦ “ዘኬዎስ፥ ሎሚ ኣብ ቤትካ ክቕመጥ ይግብአኒ እዩ እሞ፥ ቀልጢፍካ ውረድ።”

⁶ንሱ ድማ ቀልጢፉ ወሪዱ ብሓጐስ ተቐበሎ። ⁷እዙይ ምስ ረአዩ፥ ኵሎም “ናብ ሓደ ሓጢኣተኛ ሰብ ክቕመጥ ኣትዩ” እናበሉ ኣጕረምረሙ።

⁸ዘኬዎስ ደው ኢሉ ንጐይታ ኸምዙይ በሎ፦ “እንሆ ጐይታይ፥ ፍርቂ ጥሪተይ ንድኻታት እህብ ኣለኹ፥ ንዝኾነ ሰብ እንተ ኣታሊለ ኸዓ ኣርባዕተ ዕፅፊ ክመልሰሉ እየ።”

⁹ኢየሱስ ድማ ከምዙይ በሎ፦ “ንሱ ኸዓ ወዲ ኣብርሃም እዩ እሞ፥ ሎሚ ናብዛ ቤት እዚኣ ምድሓን መፅአ። ¹⁰ወዲ ሰብ ነቲ ጠፊኡ ዘሎ ኽደልዮን ከድሕኖን መፂኡ እዩ እሞ።”

እሙናት ኣገልገልቲ ነቲ ንጉስ ይፅበዩ

¹¹ንሳቶም እዙይ እናሰምዑ እንተለዉ፥ ናብ ኢየሩሳሌም ቀሪቡ ስለ ዝነበረ፥ መንግስቲ ኣቦናውን ብኡብኡ ክትግለፅ ይመስሎም ስለ ዝነበረ፥ ሓደ ምሳሌ ወሰኸሎም።

¹²ስለዙይ ከምዙይ በለ፦ “ሓደ ኽቡር ሰብኣይ መንግስቲ ተቐቢሉ ኽምለስ፥ ናብ ርሑቕ ሃገር ከደ። ¹³ካብ ኣገልገልቱ ዓሰርተ ፀዊዑ፥ ነፍሲ ወከፎም ናይ ሰለስተ ወርሒ ዓስቢ ዝኣክል ሃቦም፤ ‘ክሳዕ ዝምለስ በዙይ ንገዱ’ ድማ በሎም። ¹⁴ዜጋታቱ ግና ፀልእዎ፥ ‘እዝ ሰብኣይ እዙይ ኣብ ልዕሌና ኽገዝእ ኣይንደልን ኢና’ እናበሉ ኸዓ ልኡኻት ደድሕሪኡ ሰደዱ።

¹⁵“ነቲ መንግስቲ ተቐቢሉ ምስ ተመለሰ፥ እንታይ ከም ዝረብሑ ምእንቲ ኽፈልጥ፥ ነቶም ገንዘብ ዝሃቦም ኣገልገልቲ ፀውዖም። ¹⁶እቲ ቐዳማይ መፂኡ ‘ጐይታይ፥ ገንዘብካ ዓሰርተ ዕፅፊ ኣትረፈ’ በለ።”

¹⁷“ንሱ ኸዓ ‘ኣንታ ሕያዋይ ኣገልጋሊ፥ ፅቡቕ! ኣብ ውሑድ ነገር እሙን ስለ ዝኾንካ፥ ኣብ ልዕሊ ዓሰርተ ኸተማታት ስልጣን ይሃልኻ’ ኢሉ መለሰሉ።”

¹⁸“እቲ ኻልኣይ ድማ መፂኡ ‘ጐይታይ፥ እቲ ዝሃብካኒ ገንዘብ ሓሙሽተ ዕፅፊ ኣትረፈ’ በለ።”

¹⁹“ንእኡ ኸዓ ‘ንስኻ ድማ ኣብ ልዕሊ ሓሙሽተ ኸተማታት ክትከውን ኢኻ’ በሎ።”

²⁰“ሽዑ ኻልእ መፂኡ ‘ጐይታይ፥ እንሆ እቲ ብጨርቂ ጠቕሊለ ዝሓዝክዎ ገንዘብካ፤ ²¹ንስኻ ተሪር ሰብ ኢኻ እሞ፥ ፈሪሐ ነይረ፤ ነቲ ዘየቐመጥካዮ ትወስድ፥ ነቲ ዘይዘራእካዮ ኸዓ ትዓፅድ ኢኻ።’”

²²ንሱ ኸዓ ከምዙይ ኢሉ መለሰሉ፦ “ኣታ እኩይ ኣገልጋሊ፥ በቲ ኣፍካ ክፈርደካ እየ! ተሪር ሰብ ምዃነይ፥ ነቲ ዘየቐመጥክዎ ዝወስድ፥ ነቲ ዘይዘራእክዎ ዝዓፅድ ምዃነይ ትፈልጥ ነይርካ ዲኻ? ²³ስለ ምንታይ ደኣ ገንዘበይ ናብ ባንኪ ዘይኣቶኻዮ? ኣነ ምስ ተመለስኩ ኸዓ ምስ ወለዱ ምኣከብክዎ ነይረ። ²⁴ነቶም ኣብኡ ደው ኢሎም ዝነበሩ ኸዓ ‘እቲ ገንዘብ ካብኡ ውሰዱ፥ ነቲ ዓሰርተ ዕፅፊ ዘለዎ ድማ ሃብዎ’ በሎም።”

²⁵“ንሳቶም ከዓ ‘ጐይታይ፥ ንሱ ዓሰርተ ዕፅፊ ኣለዎ እኮ!’ በልዎ። ²⁶እብለኩም ኣለኹ፦ ንዘለዎ ዅሉ ኺውሰኸሉ እዩ፤ ካብቲ ዘይብሉ ግና እቲ ዘለዎ እኳ ኺውሰዶ እዩ። ²⁷እዞም ኣነ ኽገዝኦም ዘይደለዩ ፀላእተይ ግና ናብዙይ ኣምፅእዎም፥ ኣብ ቅድመይ ድማ ሕረድዎም።’”

ወልድ ከም ንጉስ ናብ ኢየሩሳሌም ኣተወ

²⁸እዙይ ምስ በለ ኸዓ፥ ናብ ኢየሩሳሌም እናደየበ፥ ቀዲሙ ኸደ።

²⁹ናብ ቤተ ፋጌን ቢታንያን ኣብ ጥቓ እቲ ደብረ ዘይት ዝበሃል እምባ ምስ ቀረበ፥ ካብ ደቀ መዛሙርቱ ኽልተ ሰደደ፤ ³⁰ከምዙይ ኢሉ፦ “ናብታ ኣብ ቅድሜኹም ዘላ ዓዲ ኺዱ። ክትኣትዉ እንተለኹም፥ ሓደ ሰብ ዘይተቐመጦ ዒሉ ተኣሲሩ ኽትረኽቡ ኢኹም፤ ፈቲሕኩም ድማ ናብዙይ ኣምፅእዎ። ³¹ዝኾነ ሰብ ‘ስለ ምንታይ ኢኹም እትፈትሕዎ?’ ኢሉ እንተ ሓተተኩም፥ ‘ንጐይታ የድልዮ ኣሎ’ በልዎ።”

³²እቶም ልኡኻት ድማ ከይዶም፥ ከምቲ ዝበሎም ኮይኑ ረኸብዎ። ³³ነቲ ዒሉ ኺፈትሕዎ እንተለዉ፥ ዋናታቱ “ስለ ምንታይ ኢኹም ነቲ ዒሉ እትፈትሕዎ?” በልዎም። ³⁴ንሳቶም ከዓ “ንጐይታ የድልዮ ኣሎ” በሉ። ³⁵ናብ ኢየሱስ ድማ ኣምፅእዎ፥ ክዳውንቶም ኣብ ልዕሊ እቲ ዒሉ ደርበዩ፥ ንኢየሱስውን ኣብኡ ኣቐመጥዎ። ³⁶ንሱ ተቐሚጡ እናኸደ እንተሎ ኸዓ፥ ክዳውንቶም ኣብ መንገዲ ዘርግሑ። ³⁷ናብቲ ቝልቍለት ደብረ ዘይት ምስ ቀረበ፥ ኵሎም እቶም ብዙሓት ደቀ መዛሙርቲ ስለ እቲ ዝረአይዎ ዅሉ ተኣምራት፥ ዓው ኢሎም ንኣቦና እናመስገኑ ክሕጐሱ ጀመሩ፤ ³⁸ከምዙይ እናበሉ፦ “በስም ኣቦና ዝመፅእ ንጉስ ብሩኽ እዩ! ኣብ ሰማይ ሰላም፥ ኣብ ኣርያምውን ክብሪ ይኹን!”

³⁹ካብቶም ኣብቲ ህዝቢ ዝነበሩ ፈሪሳውያን ገሊኦም ድማ “መምህር፥ ንደቀ መዛሙርትኻ ገስፆም” በልዎ።

⁴⁰ንሱ ኸዓ ከምዙይ ኢሉ መለሰ፦ “እብለኩም ኣለኹ፥ እዚኣቶም ስቕ እንተ ዝብሉ፥ እቶም እምኒ ባዕልቶም ምጨርሑ ነይሮም።”

⁴¹ናብታ ኸተማ ቀሪቡ ምስ ረአያ ድማ፥ ኣብ ልዕሊኣ በኸየ፥

⁴²ከምዙይ ድማ በለ፦ “ነቲ ሰላም ዘምፅኣልኪ ሎሚ እንተ ትፈልጥዮ ነይርኪ! ሕዚ ግና ካብ ኣዒንትኺ ተሰዊሩ ኣሎ። ⁴³መዓልቲታት ክመፅኣ እየን፤ ሽዑ ፀላእትኺ ኣብ ዙርያኺ ዕርዲ ክሰርሑ፥ ክኸቡኺ፥ ብኹሉ ወገን ድማ ክጨቍኑኺ እዮም፤ ⁴⁴ንኣኺን ነቶም ኣብ ውሽጢ መናድቕኺ ዘለዉ ደቅኺ ድማ ክሳዕ ምድሪ ከፍርሱኺ እዮም፤ ነቲ ጊዜ ምብፃሕኪ ስለ ዘየለለኽዮ ኸዓ፥ ሓደ እምኒ ኣብ ልዕሊ ካልእ ኣይክተርፍን እዩ።” ^a a v44 እቲ “ጊዜ ምብፃሕኪ” ዝበሃል፥ እግዚኣብሄር ብኣካል ኢየሱስ ኮይኑ ናብ ኢየሩሳሌም ዝመፀሉ ጊዜ እዩ።

ኢየሱስ ንቤት ኣቦኡ የንፅሆ

⁴⁵ናብ ቤተ መቕደስ ኣትዩ ድማ፥ ነቶም ዝሸጡ ዝነበሩ ክሰጎም ጀመረ፥

⁴⁶ከምዙይ ኢሉ ድማ በሎም፦ “ፅሑፍ ‘ቤተይ ቤት ፀሎት ክትከውን እያ’ ይብል፤ ንስኻትኩም ግና በዓቲ ጐሓሉት ገበርኩምዋ።”

⁴⁷ኣብ ቤተ መቕደስ መዓልቲ መዓልቲ ይምህር ነበረ፤ ሊቃውንቲ ካህናትን መምህራን ሕግን መራሕቲ ህዝብን ግና ክቐትልዎ መገዲ ይደልዩ ነበሩ፤ ⁴⁸እንታይ ከም ዝገብሩ ግና ሰአኑ፤ ኵሉ እቲ ህዝቢ ናብ ቃሉ ተለጢፉ ይሰምዕ ስለ ዝነበረ።