Luka 19 FHB Father's Heart Bible™

19 ¹Yezu apita mu Yeriko, mbapita nkati mwa nzinda. ²Penepo pakhali na mamuna m'bodzi dzina yace Zakeyu; iye akhali nkulu wa anyakulipisa misonkho, pontho akhali wakupfuma. ³Iye akhafuna kuona kuti Yezu ndi ani, mbwenye nee akwanisa thangwi ya mwinji wa anthu, thangwi iye akhali wakufupi. ⁴Na tenepo athamanga patsogolo, mbakwira muti wa sikomoro toera kuona Iye, thangwi Yezu akhafuna kupita na njira ineyi.

⁵Yezu pidafika Iye pa mbuto ineyi, ayang'ana padzulu, mbampanga kuti: “Zakeyu, buluka mwakucimbiza, thangwi lero ndisafunika kukhala panyumba pako.”

⁶Na tenepo abuluka mwakucimbiza, mbantambira mwakutsandzaya. ⁷Pidaona iwo pyenepi, onsene ang'ung'udza, mbalonga kuti: “Iye aenda kukhala na munthu wakudawa.”

⁸Zakeyu alimira, mbapanga Mbuya kuti: “Onani, Mbuya, ndisapereka hafu ya pinthu pyanga kuna anthu akusauka, pontho ndingapandza munthu cinthu, ndinam'bwezera kanai kakulu.”

⁹Yezu ampanga kuti: “Lero upulumuki wafika panyumba pano, thangwi iyembo ndi mwana wa Abrahamu. ¹⁰Thangwi Mwana wa Munthu abwera toera kusaka na kupulumusa ale adataika.”

Anyabasa Akukhulupirika Asadikhira Mambo

¹¹Mukhabvesera iwo, athimiza nsangani, thangwi Iye akhali cifupi na Yerusalemu, pontho iwo akhanyerezera kuti Umambo wa Baba wathu ukhafuna kuoneka mwakucimbiza.

¹²Na tenepo alonga kuti: “Mamuna m'bodzi wakulemedzeka aenda ku dziko yakutali toera katambira umambo, mbabwerera. ¹³Acemera anyabasa ace khumi, mbapasa m'bodzi na m'bodzi kobiri yakulandana na mphatho wa miyezi mitatu, mbalonga kuti: “Citani malonda na kobiri iyi mpaka ndibwerere.” ¹⁴Anthu a mu dziko yace amuida, mbatuma amitumi toera kuntowera, mbalonga kuti: “Nee tisafuna mamuna uyu toera kutitonga.”

¹⁵“Pidabwerera Iye mudamala kutambira umambo, acemera anyabasa adapasa iye kobiri, toera kudziwa phindu idagumana iwo. ¹⁶Wakutoma abwera, mbalonga kuti: ‘Mbuya, kobiri yanu yabala kakhumi kakulu.’”

¹⁷“Iye atawira kuti: ‘Wacita mwadidi, nyabasa wadidi! Nakuti wakhala wakukhulupirika pa cinthu cing'ono, khala wakutonga mizinda khumi.’”

¹⁸“Waciwiri abwera, mbalonga kuti: ‘Mbuya, kobiri idandipasa imwe yabala kaxanu kakulu.’”

¹⁹“Iye ampanga kuti: ‘Nawembo unakhala wakutonga mizinda mixanu.’”

²⁰“Penepo unango abwera, mbalonga kuti: ‘Mbuya, kobiri yanu iyi, ndaikoya ndaiphumbira na nguwo;’ ²¹thangwi ndikhakugopani, nakuti imwe ndimwe munthu wakuwanga: musakwata pidakhonda imwe kuika, mbamubvuna pidakhonda imwe kubzwala.”

²²Iye atawira kuti: “Ndisakutonga na mulomo wako unowu, nyabasa wakuipa! Iwe ukhadziwa kuti ndine munthu wakuwanga, anakwata pidakhonda ine kuika, mbabvuna pidakhonda ine kubzwala? ²³Thangwi yanji nee waikha kobiri yanga ku bhanki? Mbudaigumana pabodzi na phindu yace pidabwerera ine. ²⁴Penepo apanga ale akhalimira penepo kuti: ‘Kwatani kobiri kuna iye, mbaipasa ule ali na kakhumi kakulu.’”

²⁵“Iwo ampanga kuti: ‘Mbuya, iye ali na kakhumi kakulu kale! ²⁶Ndisakupangani: munthu onsene ali na cinthu anadzapaswa pizinji; mbwenye ule nkhabe na cinthu, ngakhale ciri na iye cinadzakwatwa. ²⁷Mbwenye bweresani pano anyamalwa anga awa, ale akhonda kutongwa na ine, mbamuphani pamaso panga.’”

Mwana Apita mu Yerusalemu ninga Mambo

²⁸Pidamala Iye kulonga pyenepi, aenda patsogolo, mbakwira ku Yerusalemu.

²⁹Pidafika Iye cifupi na Bhetafage na Bhetania, pa Phiri ya Mioliva, atuma awiri a anyakupfundza ace, ³⁰mbalonga kuti: “Ndokoni ku mudzi uli patsogolo. Mungapita, munagumana mwana wa bulu wakumangwa penepo, wakuti nkhabe munthu adadzati kukhala padzulu pace. Umangululeni, mbaubweresa pano. ³¹Munthu angakubvundzani kuti: ‘Thangwi yanji musamangulula bulu?’ longani kuti: ‘Mbuya asaifuna.’”

³²Na tenepo ale adatumwa aenda, mbagumana pyonsene ninga mudalonga Iye kuna iwo. ³³Mukhamangulula iwo mwana wa bulu, anthu akhali na iye apanga iwo kuti: “Thangwi yanji musamangulula mwana wa bulu?” ³⁴Iwo atawira kuti: “Mbuya asaifuna.” ³⁵Aubweresa kuna Yezu, mbaikha nguwo zawo padzulu pa mwana wa bulu, mbakwaza Yezu padzulu pace. ³⁶Mukhafamba Iye, anthu ayala nguwo zawo pa njira. ³⁷Pidafika Iye cifupi na mbuto yakutcita ya Phiri ya Mioliva, mwinji onsene wa anyakupfundza atoma kutsandzaya, mbasimba Baba wathu na mafala makulu thangwi ya mabasa onsene amphambvu adaona iwo, ³⁸mbalonga kuti: “Akusimbwa Mambo anabwera mu dzina ya Baba wathu! Ntendere kudzulu, na mbiri kudzulu kwene kwene!”

³⁹Anango a Afarisi akhali pakati pa mwinji wa anthu apanga Iye kuti: “Mpfundzisi, kalipirani anyakupfundza anu.”

⁴⁰Iye atawira kuti: “Ndisakupangani, awa angakhala dzii, miyala yokhene mbidakhuwa.”

⁴¹Pidafika Iye cifupi, mbaona nzinda, aulira thangwi ya wo,

⁴²mbalonga kuti: “Mbudadziwa iwe lero pinakubweresera ntendere! Mbwenye cincino pyabiswa pamaso pako. ⁴³Ntsiku zinafika zakuti anyamalwa ako anadzamanga khoma ya kukuzungulira, mbakuzungulira, mbakutsekera m'mbali zonsene, ⁴⁴anadzakugwisa pantsi iwe pabodzi na anako ali n'kati mwa makhoma ako, nee anadzasiya mwala padzulu pa unango, thangwi nee wadzindikira n'dzidzi udakudinga Mulungu.” ^a a v44 “N'dzidzi udakudinga Mulungu” ndi n'dzidzi udabwera Mulungu ku Yerusalemu kubulukira mwa Yezu.

Yezu Acenesa Nyumba ya Baba wace

⁴⁵Na tenepo Yezu apita mu Nyumba ya Mulungu, mbatoma kuthamangisa ale akhagulisa,

⁴⁶mbaapanga kuti: “Malemba asalonga: ‘Nyumba yanga inadzakhala nyumba ya maphembero,’ mbwenye imwe mwaicita mphako ya mambava.”

⁴⁷Iye akhapfundzisa ntsiku zonsene mu Nyumba ya Mulungu, mukhasaka akulu a anyantsembe, alembi, na atsogoleri a mbumba njira yakumpha, ⁴⁸mbwenye nee agumana cinthu cakucita, thangwi mbumba yonsene ikhabvesera mwadidi mafala ace.