ሉቃስ 19

19 ¹ኢየሱስ ወደ ኢያሪኮ ገብቶ ያልፍ ነበር። ²ዘኬዎስ የሚባል ሰውም ነበረ፤ እርሱም የቀራጮች አለቃና ባለጸጋ ነበር። ³ኢየሱስ ማን እንደ ሆነ ለማየት ይፈልግ ነበር፤ ነገር ግን አጭር ስለ ነበር ከሕዝቡ ብዛት የተነሣ ሊያየው አልቻለም። ⁴ኢየሱስ በዚያ መንገድ ሊያልፍ ስለ ነበር እርሱን ለማየት ቀድሞ ሮጦ ወደ ሾላ ዛፍ ወጣ።

⁵ኢየሱስም ወደዚያ ስፍራ በደረሰ ጊዜ ወደ ላይ ተመልክቶ፣ “ዘኬዎስ ሆይ፤ ዛሬ በቤትህ ማደር ይገባኛልና ፈጥነህ ውረድ” አለው።

⁶እርሱም ፈጥኖ ወርዶ በደስታ ተቀበለው። ⁷ይህንም አይተው ሁሉም፣ “ኀጢአተኛ ከሆነ ሰው ጋር ሊያድር ሄደ” ብለው አጕረመረሙ።

⁸ዘኬዎስም ቆሞ ጌታን፣ “ጌታ ሆይ፤ እነሆ፤ ከንብረቴ እኩሌታውን ለድኾች እሰጣለሁ፤ ማንንም አታልዬ እንደ ሆነ አራት እጥፍ እመልስለታለሁ” አለው።

⁹ኢየሱስም እንዲህ አለው፤ “እርሱ ደግሞ የአብርሃም ልጅ ስለ ሆነ ዛሬ ድነት ወደዚህ ቤት መጥቷል። ¹⁰የሰው ልጅ የጠፋውን ሊፈልግና ሊያድን መጥቷልና።”

ታማኝ አገልጋዮች ንጉሡን ይጠብቃሉ

¹¹ይህንም ሲሰሙ፣ ወደ ኢየሩሳሌም ቀርቦ ስለ ነበረና የአባታችን መንግሥት ወዲያውኑ የምትገለጥ ይመስላቸው ስለ ነበር ምሳሌ ጨመረላቸው።

¹²ስለዚህ እንዲህ አለ፤ “አንድ መኳንንት ለራሱ መንግሥት ተቀብሎ ሊመለስ ወደ ሩቅ አገር ሄደ። ¹³ከአገልጋዮቹም ዐሥሩን ጠርቶ የሦስት ወር ደመወዝ የሚያህል ገንዘብ ለእያንዳንዳቸው ሰጠ፤ “እስክመለስ ድረስ በዚህ ነግዱ” ብሎ አላቸው። ¹⁴የአገሩ ሰዎች ግን ይጠሉት ነበር፤ “ይህ ሰው በእኛ ላይ ሊነግሥ አንፈልግም” ብለው ከበኋላው መልእክተኞችን ላኩ።

¹⁵“መንግሥቱንም ተቀብሎ በተመለሰ ጊዜ፣ ገንዘብ የሰጣቸውን አገልጋዮች ምን እንዳተረፉ ለማወቅ ጠራቸው። ¹⁶መጀመሪያውም መጥቶ፣ ‘ጌታ ሆይ፤ ገንዘብህ ዐሥር እጥፍ አትርፏል’ አለ።”

¹⁷“እርሱም መልሶ፣ ‘ደግ አገልጋይ ሆይ፤ መልካም አደረግህ! በትንሽ ነገር ታማኝ ስለ ሆንህ በዐሥር ከተማዎች ላይ ሹም ሁን’ አለው።”

¹⁸“ሁለተኛውም መጥቶ፣ ‘ጌታ ሆይ፤ የሰጠኸኝ ገንዘብ አምስት እጥፍ አትርፏል’ አለ።”

¹⁹“እርሱም፣ ‘አንተም በአምስት ከተማዎች ላይ ሹም ትሆናለህ’ አለው።”

²⁰“ሌላውም መጥቶ እንዲህ አለ፤ ‘ጌታ ሆይ፤ በጨርቅ ጠቅልዬ ያስቀመጥሁት ገንዘብህ፣ እነሆ፤ ይኸው፤’ ²¹አንተ ጨካኝ ሰው ስለ ሆንህ ፈራሁህ፤ ያላስቀመጥኸውን ትወስዳለህ፤ ያልዘራኸውንም ታጭዳለህ።”

²²እርሱም መልሶ፣ “አንተ ክፉ አገልጋይ፤ በገዛ አፍህ እፈርድብሃለሁ! ያላስቀመጥሁትን የምወስድ፣ ያልዘራሁትንም የማጭድ ጨካኝ ሰው እንደ ሆንሁ ታውቅ ነበርን? ²³ታዲያ ገንዘቤን በባንክ ለምን አላስቀመጥህም? በተመለስሁ ጊዜ ከነወለዱ በተቀበልሁት ነበር። ²⁴አጠገቡ የቆሙትንም፣ ‘ገንዘቡን ከእርሱ ወስዳችሁ ዐሥር እጥፍ ላለው ስጡት’ አለ።”

²⁵“እነርሱም እንዲህ አሉት፤ ‘ጌታ ሆይ፤ እርሱ ዐሥር እጥፍ አለው! ²⁶እላችኋለሁ፤ ላለው ሁሉ ይጨመርለታል፤ ከሌለው ግን ያው ያለው እንኳ ይወሰድበታል። ²⁷ነገር ግን እኔ እንድነግሥባቸው ያልፈለጉትን እነዚህን ጠላቶቼን ወደዚህ አምጥታችሁ በፊቴ እረዷቸው።’”

ወልድ እንደ ንጉሥ ወደ ኢየሩሳሌም ገባ

²⁸ይህንም ከተናገረ በኋላ፣ ወደ ኢየሩሳሌም ሲወጣ ቀድሞ ሄደ።

²⁹ደብረ ዘይት ወደ ተባለው ተራራ አጠገብ ወዳሉት ወደ ቤተ ፋጌና ወደ ቢታንያ በቀረበ ጊዜ፣ ከደቀ መዛሙርቱ ሁለቱን ላከ፤ ³⁰እንዲህም አላቸው፤ “በፊታችሁ ወዳለችው መንደር ሂዱ፤ ወደ እርሷ ስትገቡም ማንም ተቀምጦበት የማያውቅ ውርንጫ ታስሮ ታገኛላችሁ፤ ፈትታችሁም አምጡት። ³¹ማንም ሰው፣ ‘ለምን ትፈቱታላችሁ?’ ብሎ ቢጠይቃችሁ፣ ‘ጌታ ይፈልገዋል’ በሉት።”

³²የተላኩትም ሄደው እንደ ነገራቸው ሆኖ አገኙት። ³³ውርንጫውን ሲፈቱትም፣ ባለቤቶቹ፣ “ውርንጫውን ለምን ትፈቱታላችሁ?” አሏቸው። ³⁴እነርሱም፣ “ጌታ ይፈልገዋል” አሉ። ³⁵ወደ ኢየሱስም አመጡት፤ ልብሳቸውንም በውርንጫው ላይ ጥለው ኢየሱስን አስቀመጡት። ³⁶ሲሄድም ልብሳቸውን በመንገድ ላይ ያነጥፉ ነበር። ³⁷ወደ ደብረ ዘይት ተራራ ቍልቍለት በቀረበ ጊዜ፣ የደቀ መዛሙርቱ ሕዝብ ሁሉ ስላዩት ታምራት ሁሉ በታላቅ ድምፅ ደስ እያላቸው አባታችንን ያመሰግኑ ጀመር፤ ³⁸እንዲህ እያሉ፤ “በአባታችን ስም የሚመጣ ንጉሥ የተባረከ ነው! በሰማይ ሰላም፤ በአርያምም ክብር ይሁን!”

³⁹ከሕዝቡ መካከል የነበሩ አንዳንድ ፈሪሳውያን፣ “መምህር ሆይ፤ ደቀ መዛሙርትህን ገሥጻቸው” አሉት።

⁴⁰እርሱም መልሶ፣ “እላችኋለሁ፤ እነዚህ ዝም ቢሉ ድንጋዮች ይጮኻሉ” አለ።

⁴¹በቀረበም ጊዜ ከተማዪቱን አይቶ አለቀሰላት፤

⁴²እንዲህም አለ፤ “ዛሬ፣ ሰላም የሚያመጣልሽን ነገር አንቺ ብታውቂ ኖሮ! አሁን ግን ከዐይኖችሽ ተሰውሯል። ⁴³ጠላቶችሽ በዙሪያሽ ምሽግ የሚሠሩብሽ፣ የሚከቡሽና በየአቅጣጫው የሚያስጨንቁሽ ቀናት ይመጣሉ፤ ⁴⁴አንቺንም ሆነ በቅጥርሽ ውስጥ ያሉትን ልጆችሽን ያፈራርሱብሻል፤ የመጐብኘትሽን ጊዜ ስላላወቅሽ ድንጋይ በድንጋይ ላይ አይተዉብሽም።” ^a a v44 ‘የመጐብኘትሽ ጊዜ’ ማለት እግዚአብሔር በኢየሱስ አካል ወደ ኢየሩሳሌም የመጣበት ጊዜ ነው።

ኢየሱስ የአባቱን ቤት አነጻ

⁴⁵ወደ ቤተ መቅደስም ገብቶ ይሸጡ የነበሩትን ማስወጣት ጀመረ፤

⁴⁶እንዲህም አላቸው፤ “መጽሐፍ፣ ‘ቤቴ የጸሎት ቤት ይሆናል’ ይላል፤ እናንተ ግን የወንበዴዎች ዋሻ አደረጋችሁት።”

⁴⁷በየዕለቱም በቤተ መቅደስ ያስተምር ነበር፤ የካህናት አለቆችና ጸሐፍት የሕዝቡም መሪዎች ግን ሊገድሉት ይፈልጉ ነበር፤ ⁴⁸ሕዝቡ ሁሉ ቃሉን በጥሞና ያዳምጥ ስለ ነበር የሚያደርጉት ምንም ነገር አጡ።