Luka 19

19 ¹Yesu aliingia Yeriko, akawa anapita katikati yake. ²Na kulikuwa na mtu mmoja aitwaye Zakayo; alikuwa mkuu wa watoza ushuru, tena alikuwa tajiri. ³Alitaka kumwona Yesu ni nani, lakini hakuweza kwa sababu ya umati—maana alikuwa mfupi wa kimo. ⁴Basi akatangulia mbio, akapanda mkuyu ili amwone, kwa maana Yesu alikuwa karibu kupita njia ile.

⁵Yesu alipofika mahali pale, akatazama juu, akamwambia, "Zakayo, shuka upesi, kwa maana leo yanipasa kukaa nyumbani kwako."

⁶Basi akashuka upesi, akamkaribisha kwa furaha. ⁷Walipoona hayo, kila mtu akanung'unika, akisema, "Ameingia kukaa kwa mtu mwenye dhambi."

⁸Zakayo akasimama, akamwambia Bwana, "Tazama, Bwana, nusu ya mali yangu nawapa maskini, na kama nimempunja mtu ye yote kitu, namrudishia mara nne."

⁹Yesu akamwambia, "Leo wokovu umeingia nyumbani humu, kwa kuwa yeye naye ni mwana wa Ibrahimu. ¹⁰Kwa maana Mwana wa Adamu alikuja kutafuta na kuokoa kilichopotea."

Watumishi Waaminifu Wamngoja Mfalme

¹¹Walipokuwa wakisikiliza hayo, akaongeza kusema mfano, kwa sababu alikuwa karibu na Yerusalemu, nao walidhani kwamba ufalme wa Baba yetu ungeonekana mara moja.

¹²Basi akasema, "Mtu mmoja mwenye cheo alisafiri kwenda nchi ya mbali ili apokee ufalme kwa nafsi yake, kisha arudi. ¹³Akawaita watumishi wake kumi, akawapa kila mmoja kiasi cha mshahara wa miezi mitatu, akisema, "Fanyeni biashara kwa hivi hata nitakaporudi." ¹⁴Lakini wenyeji wake walimchukia, wakatuma wajumbe nyuma yake, wakisema, "Hatutaki mtu huyu atutawale."

¹⁵"Ikawa aliporudi, akiisha kupokea ufalme, akaamuru waitwe wale watumishi aliokuwa amewapa fedha, ili ajue faida waliyopata. ¹⁶Wa kwanza akaja, akisema, 'Bwana, fedha yako imepata faida mara kumi zaidi.'"

¹⁷"Akamwambia, 'Vema, mtumishi mwema! Kwa kuwa umekuwa mwaminifu katika jambo dogo, uwe na mamlaka juu ya miji kumi.'"

¹⁸"Wa pili akaja, akisema, 'Bwana, fedha uliyonipa imepata faida mara tano zaidi.'"

¹⁹"Akamwambia huyu naye, 'Nawe uwe na mamlaka juu ya miji mitano.'"

²⁰"Kisha mwingine akaja, akisema, 'Bwana, hii hapa fedha yako, niliyoiweka imefungwa katika kitambaa;' ²¹kwa maana nilikuogopa, kwa sababu wewe u mtu mkali: wachukua usichoweka na kuvuna usichopanda."

²²Akamwambia, "Nakuhukumu kwa kinywa chako mwenyewe, mtumishi mwovu! Ulijua ya kuwa mimi ni mtu mkali, nachukua nisichoweka na kuvuna nisichopanda? ²³Mbona basi hukuiweka fedha yangu benki? Nami ningerudi ningeipata pamoja na faida yake. ²⁴Akawaambia wale waliosimama karibu, 'Mnyang'anyeni ile fedha, mkampe yule mwenye mara kumi zaidi.'"

²⁵"Wakamwambia, 'Bwana, tayari yeye ana mara kumi zaidi!' ²⁶Nawaambia: kila aliye na kitu atapewa zaidi; bali yule asiye na kitu, hata alicho nacho atanyang'anywa. ²⁷Lakini hao adui zangu waliokataa niwatawale, waleteni hapa, mwachinje mbele yangu.'"

Mwana Aingia Yerusalemu kama Mfalme

²⁸Alipokwisha kusema hayo, akaenda mbele, akipanda kwenda Yerusalemu.

²⁹Alipokaribia Bethfage na Bethania, mlimani penye Mlima wa Mizeituni, akawatuma wawili katika wanafunzi wake, ³⁰akisema, "Nendeni katika kijiji kilicho mbele yenu. Mtakapoingia, mtamkuta mwana-punda amefungwa, ambaye hajapata kupandwa na mtu ye yote. Mfungueni, mkamlete hapa. ³¹Na mtu ye yote akiwauliza, 'Mbona mnamfungua?' semeni, 'Bwana anamhitaji.'"

³²Basi wale waliotumwa wakaenda zao, wakaona kama alivyowaambia. ³³Walipokuwa wakimfungua yule mwana-punda, wenyewe wakawaambia, "Mbona mnamfungua mwana-punda?" ³⁴Wakasema, "Bwana anamhitaji." ³⁵Wakamleta kwa Yesu, wakatandika mavazi yao juu ya mwana-punda, wakampandisha Yesu juu yake. ³⁶Naye alipokuwa akiendelea, wakatandika mavazi yao njiani. ³⁷Alipokaribia mahali pa kuteremkia Mlima wa Mizeituni, umati wote wa wanafunzi wakaanza kufurahi na kumsifu Baba yetu kwa sauti kuu, kwa ajili ya matendo yote makuu waliyokuwa wameyaona, ³⁸wakisema, "Amebarikiwa Mfalme ajaye kwa jina la Baba yetu! Amani mbinguni na utukufu huko juu sana!"

³⁹Baadhi ya Mafarisayo waliokuwa katika umati wakamwambia, "Mwalimu, wakemee wanafunzi wako."

⁴⁰Akajibu, "Nawaambia, hawa wakinyamaza, mawe yenyewe yatapaza sauti."

⁴¹Alipokaribia na kuuona mji, akaulilia,

⁴²akisema, "Laiti ungalijua hata wewe, katika siku hii ya leo, yale yakuletayo amani! Lakini sasa yamefichwa machoni pako. ⁴³Kwa maana siku zinakuja ambazo adui zako watakuzingira kwa boma, watakuzunguka, watakubana pande zote, ⁴⁴watakuangusha wewe pamoja na watoto wako ndani ya kuta zako, wala hawataacha jiwe juu ya jiwe ndani yako, kwa sababu hukuutambua wakati wa kujiliwa kwako." ^a a v44 'Wakati wa kujiliwa kwako' ni wakati ule Mungu alipoujia Yerusalemu katika nafsi ya Yesu.

Yesu Aisafisha Nyumba ya Baba yake

⁴⁵Kisha akaingia hekaluni, akaanza kuwafukuza wale waliokuwa wakiuza,

⁴⁶akawaambia, "Imeandikwa, 'Nyumba yangu itakuwa nyumba ya sala,' lakini ninyi mmeifanya kuwa pango la wanyang'anyi."

⁴⁷Akawa akifundisha hekaluni kila siku, nao wakuu wa makuhani na waandishi na wakuu wa watu wakatafuta njia ya kumwua, ⁴⁸lakini hawakuona lo lote wangeloweza kufanya, kwa maana watu wote walikuwa wakimtega sikio kwa maneno yake.