Luku 19

19 ¹Jesu wọ Jeriko, ó sì ń kọjá lọ. ²Ọkùnrin kan sì wà tí orúkọ rẹ̀ ń jẹ́ Sakkeu; òun ni olórí àwọn agbowó orí, ó sì jẹ́ ọlọ́rọ̀. ³Ó fẹ́ rí ẹni tí Jesu jẹ́, ṣùgbọ́n kò lè rí i nítorí ọ̀pọ̀ ènìyàn, nítorí pé kúkúrú ni ó jẹ́ ní gíga. ⁴Ó sáré síwájú, ó sì gun orí igi sikamórè kan láti lè rí i, nítorí Jesu fẹ́ kọjá ní ọ̀nà náà.

⁵Nígbà tí Jesu dé ibẹ̀, ó gbé ojú sókè, ó sì wí fún un pé, “Sakkeu, yára sọ̀kalẹ̀, nítorí èmi gbọ́dọ̀ dúró ní ilé rẹ lónìí.”

⁶Nítorí náà ó yára sọ̀kalẹ̀, ó sì fi ayọ̀ gbà á. ⁷Nígbà tí gbogbo wọn rí èyí, wọ́n ń kùn pé, “Ó ti lọ dúró sọ́dọ̀ ọkùnrin ẹlẹ́ṣẹ̀ kan.”

⁸Sakkeu dìde, ó sì wí fún Olúwa pé, “Wò ó, Olúwa, èmi ó fi ìdajì ohun ìní mi fún àwọn tálákà, bí mo bá sì ti fi ẹ̀tàn gba nǹkan lọ́wọ́ ẹnikẹ́ni, èmi ó san án padà ní ìlọ́po mẹ́rin.”

⁹Jesu wí fún un pé, “Lónìí ni ìgbàlà dé ilé yìí, nítorí òun náà jẹ́ ọmọ Abrahamu. ¹⁰Nítorí Ọmọ Ènìyàn wá láti wá àti láti gba àwọn tí ó ti nù là.”

Àwọn Ìránṣẹ́ Olóòtítọ́ Ń Dúró De Ọba

¹¹Nígbà tí wọ́n ń gbọ́ nǹkan wọ̀nyí, ó fi òwe kún un, nítorí ó wà nítòsí Jerusalemu, wọ́n sì rò pé ìjọba Baba wa yóò farahàn lẹ́sẹ̀kẹsẹ̀.

¹²Nítorí náà ó wí pé, “Ọkùnrin ọlọ́lá kan lọ sí ilẹ̀ jíjìnnà láti gba ìjọba fún ara rẹ̀ kí ó sì padà wá. ¹³Ó pe mẹ́wàá nínú àwọn ìránṣẹ́ rẹ̀, ó fún ẹnìkọ̀ọ̀kan wọn ní owó iṣẹ́ oṣù mẹ́ta, ó wí pé, “Ẹ fi èyí ṣòwò títí èmi ó fi padà wá.” ¹⁴Àwọn ará ìlú rẹ̀ kórìíra rẹ̀, wọ́n sì rán àwọn aṣojú tẹ̀lé e, wọ́n wí pé, “Àwa kò fẹ́ kí ọkùnrin yìí jẹ ọba lé wa lórí.”

¹⁵“Nígbà tí ó padà dé lẹ́yìn tí ó ti gba ìjọba náà, ó ránṣẹ́ pe àwọn ìránṣẹ́ tí ó ti fún ní owó, kí ó lè mọ èrè tí ẹnìkọ̀ọ̀kan ti jẹ. ¹⁶Èkínní wá, ó wí pé, ‘Olúwa, owó rẹ ti jẹ èrè ní ìlọ́po mẹ́wàá.’”

¹⁷“Ó dáhùn pé, ‘Ó ṣeun, ìránṣẹ́ rere! Nítorí tí ìwọ jẹ́ olóòtítọ́ nínú ohun kékeré, gba àṣẹ lórí ìlú mẹ́wàá.’”

¹⁸“Èkejì sì wá, ó wí pé, ‘Olúwa, owó tí ìwọ fún mi ti jẹ èrè ní ìlọ́po márùn-ún.’”

¹⁹“Ó sì wí fún un pé, ‘Ìwọ pẹ̀lú yóò ṣe olórí ìlú márùn-ún.’”

²⁰“Nígbà náà ni òmíràn wá, ó wí pé, ‘Olúwa, owó rẹ nìyí tí mo mú padà wá, tí mo fi aṣọ wé pamọ́;’ ²¹nítorí mo bẹ̀rù rẹ, nítorí ènìyàn líle ni ìwọ: ìwọ ń gba ohun tí ìwọ kò gbé kalẹ̀, ìwọ sì ń kórè ohun tí ìwọ kò gbìn.”

²²Ó dáhùn pé, “Ní ẹnu ara rẹ ni èmi ó ṣe ìdájọ́ rẹ, ìwọ ìránṣẹ́ búburú! Ìwọ mọ̀ pé ènìyàn líle ni mí, tí mo ń gba ohun tí èmi kò gbé kalẹ̀, tí mo sì ń kórè ohun tí èmi kò gbìn? ²³Èéṣe nígbà náà tí ìwọ kò fi fi owó mi sí báńkì? Èmi ìbá sì ti gbà á padà pẹ̀lú èlé nígbà tí mo padà dé. ²⁴Ó wí fún àwọn tí ó dúró níbẹ̀ pé, ‘Ẹ gba owó náà lọ́wọ́ rẹ̀, kí ẹ sì fi fún ẹni tí ó ní ìlọ́po mẹ́wàá.’”

²⁵“Wọ́n sì wí fún un pé, ‘Olúwa, ó ti ní ìlọ́po mẹ́wàá! ²⁶Mo wí fún yín: ẹni tí ó ní ni a ó fún ní sí i; ṣùgbọ́n ẹni tí kò ní, àní ohun tí ó ní ni a ó gbà lọ́wọ́ rẹ̀. ²⁷Ṣùgbọ́n ẹ mú àwọn ọ̀tá mi wọ̀nyí tí kò fẹ́ kí n jẹ ọba lé wọn lórí wá síhìn-ín, kí ẹ sì pa wọ́n níwájú mi.’”

Ọmọ Náà Wọ Jerusalemu bí Ọba

²⁸Nígbà tí ó sì ti sọ nǹkan wọ̀nyí tán, ó lọ síwájú, ó ń gòkè lọ sí Jerusalemu.

²⁹Nígbà tí ó súnmọ́ Betifage àti Betani, ní Òkè Olifi, ó rán méjì nínú àwọn ọmọ-ẹ̀hìn, ³⁰ó wí pé, “Ẹ lọ sí abúlé tí ó wà níwájú yín. Bí ẹ ti ń wọlé, ẹ ó rí ọmọ kẹ́tẹ́kẹ́tẹ́ kan tí a dè síbẹ̀, tí ẹnìkankan kò tí ì gùn rí. Ẹ tú u, kí ẹ sì mú un wá síhìn-ín. ³¹Bí ẹnikẹ́ni bá béèrè lọ́wọ́ yín pé, ‘Èéṣe tí ẹ fi ń tú u?’ ẹ wí pé, ‘Olúwa nílò rẹ̀.’”

³²Àwọn tí a rán sì lọ, wọ́n rí i gẹ́gẹ́ bí ó ti sọ fún wọn. ³³Bí wọ́n ti ń tú ọmọ kẹ́tẹ́kẹ́tẹ́ náà, àwọn olówó rẹ̀ wí fún wọn pé, “Èéṣe tí ẹ fi ń tú ọmọ kẹ́tẹ́kẹ́tẹ́ náà?” ³⁴Wọ́n sì wí pé, “Olúwa nílò rẹ̀.” ³⁵Wọ́n mú un tọ Jesu wá, wọ́n da aṣọ wọn lé ọmọ kẹ́tẹ́kẹ́tẹ́ náà, wọ́n sì gbé Jesu gùn ún. ³⁶Bí ó sì ti ń lọ, wọ́n tẹ́ aṣọ wọn ní ọ̀nà. ³⁷Nígbà tí ó súnmọ́ ibi tí a ti ń sọ̀kalẹ̀ ní Òkè Olifi, gbogbo ọ̀pọ̀ àwọn ọmọ-ẹ̀hìn bẹ̀rẹ̀ sí ní yọ̀, wọ́n ń fi ohùn rara yin Baba wa nítorí gbogbo iṣẹ́ agbára tí wọ́n ti rí, ³⁸ẹ wí pé, “Ìbùkún ni fún Ọba tí ó ń bọ̀ ní orúkọ Baba wa! Àlàáfíà ní ọ̀run àti ògo ní ibi gíga jùlọ!”

³⁹Àwọn kan nínú àwọn Farisi tí ó wà nínú ọ̀pọ̀ ènìyàn náà wí fún un pé, “Olùkọ́, bá àwọn ọmọ-ẹ̀hìn rẹ wí.”

⁴⁰Ó dáhùn pé, “Mo wí fún yín, bí àwọn wọ̀nyí bá dákẹ́, àwọn òkúta gan-an ni yóò ké jáde.”

⁴¹Nígbà tí ó sì súnmọ́ tòsí, tí ó rí ìlú náà, ó sọkún lé e lórí,

⁴²ó wí pé, “Ìbá ṣe pé ìwọ mọ̀, àní ìwọ fúnra rẹ, ní òní, ohun tí ń mú àlàáfíà wá fún ọ! Ṣùgbọ́n nísinsìnyí ó ti fi ara sin kúrò ní ojú rẹ. ⁴³Àwọn ọjọ́ ń bọ̀ nígbà tí àwọn ọ̀tá rẹ yóò mọ odi yí ọ ká, wọn ó yí ọ po, wọn ó sì há ọ mọ́ ní gbogbo ọ̀nà, ⁴⁴wọn ó sì wó ọ palẹ̀, ìwọ àti àwọn ọmọ rẹ tí ń bẹ nínú odi rẹ, wọn kì yóò sì fi òkúta kan sílẹ̀ lórí òmíràn, nítorí ìwọ kò mọ àkókò ìbẹ̀wò rẹ.” ^a a v44 ‘Àkókò ìbẹ̀wò rẹ’ ni àkókò tí Ọlọ́run wá sí Jerusalemu ní ẹni Jesu.

Jesu Wẹ Ilé Baba Rẹ̀ Mọ́

⁴⁵Ó sì wọ inú tẹ́mpìlì, ó bẹ̀rẹ̀ sí lé àwọn tí ń tà jáde,

⁴⁶ó wí fún wọn pé, “Ìwé Mímọ́ wí pé, ‘Ilé mi yóò jẹ́ ilé àdúrà,’ ṣùgbọ́n ẹ̀yin ti sọ ọ́ di ihò àwọn ọlọ́ṣà.”

⁴⁷Ó ń kọ́ni lójoojúmọ́ nínú tẹ́mpìlì, nígbà tí àwọn olórí àlùfáà, àwọn akọ̀wé òfin, àti àwọn olórí àwọn ènìyàn ń wá ọ̀nà láti pa á, ⁴⁸ṣùgbọ́n wọn kò rí ohunkóhun tí wọ́n lè ṣe, nítorí gbogbo ènìyàn fi ara mọ́ ọ̀rọ̀ rẹ̀.