عئسا زاکّایی آختاریب خئلاص ادر
زاکّای بئر آغاجا چیخیر، قوناق ساخلاماغا دعوت اولونور، و هر شیئنئن یاریسینی پایلاییر. آغالارینین پولو ائله تئجارت ادن قوللار حاقّیندا بئر مثل، اورشلئمه گئرمکدن قاباق گلئر؛ اورادا جاماعات شادلیق ادر، عئسا شهرئن اوستونه آغلاییر، و سونرا تاجئرلری آتاسینین اِوئندن قوور.
19 1عئسا اَرئحایا گئرئب اورادان کچئردی. 2زاکّای آدلی بئر آدام وار ائدی؛ او، باج ییغانلارین باشچیسی و وارلی بئر آدام ائدی. 3او، عئسانین کئم اولدوغونو گؤرمک ائسته‌یئردی، آمّا جاماعاتین چوخلوغونا گؤره اونو گؤره بئلمئردی، چونکی بویو گوده ائدی. 4قاباغا قاچیب عئسانی گؤرمک اوچون بئر وحشی انجئر آغاجینا چیخدی، چونکی عئسا او یولدان کچه‌جک ائدی.
5عئسا او یره چاتاندا، یوخاری باخیب اونا ددی: «زاکّای، تله‌سئک آشاغی دوش، چونکی من بو گون گرک سنئن اِوئنده قالام.»
6او دا تله‌سئک آشاغی دوشوب اونو شادلیقلا قبول اتدی. 7بونو گؤرنده هامی میریلدانیب ددی: «گوناهکار بئر آدامین یانینا قوناق گتدی.»
8زاکّای دوروب ربّه ددی: «باخ، ای رب، مالیمین یاریسینی کاسیبلارا وِرَم و اگر بئر کسی آلداتمیشامسا، دؤرد قات قایتارارام.»
9عئسا اونا ددی: «بو گون بو اِوه نئجات گلدی، چونکی بو آدام دا ائبراهئمئن اوغلودور. 10چونکی ائنسان اوغلو ائتمئش‌لری آختاریب خئلاص اتمک اوچون گلدی.»
صادئق قوللار پادشاهی گؤزله‌یئر
11اونلار قولاق آساندا، عئسا بئر مثل ده علاوه اتدی، چونکی او اورشلئمه یاخین ائدی و اونلار گومان ادئردئلر کی، آتامیزین پادشاهلیغی او آندا ظاهئر اولاجاق.
12بله‌جه ددی: «بئر اصئل‌زاده آدام اؤزو اوچون بئر پادشاهلیق آلیب قاییتماق اوچون اوزاق بئر اؤلکه‌یه گتدی. 13اؤز قوللاریندان اون نفری چاغیریب هر بئرئنه اوچ آیلیق مزد قدر پول ورئب ددی: ”بو پول ائله من قاییدانا قدر تئجارت ادئن.“ 14اونون وطنداشلاری اوندان نئفرت ادئردئلر و اونون دالینجا اِلچئلر گؤندَ‌رئب ددئلر: ”بئز ائسته‌مئرئک کی، بو آدام بئزئم اوستوموزده حؤکمرانلیق اتسئن.“
15«پادشاهلیغی آلاندان سونرا قاییدیب، پول وردئیی قوللاری چاغیردی کی، نه قازاندیقلارینی بئلسئن. 16بئرئنجئسی گلئب ددی: ”آغا، سنئن پولون اون قات قازاندی.“»
17«آغاسی اونا ددی: ”آفرین، یاخشی قول! ماداماکی آز بئر ائشده صادئق اولدون، اون شهرئن اوستونده حؤکمرانلیق ات.“»
18«ائکئنجئسی گلئب ددی: ”آغا، منه وردئیئن پول بش قات قازاندی.“»
19«آغاسی اونا دا ددی: ”سن ده بش شهرئن اوستونده اول.“»
20«سونرا بئر آیریسی گلئب ددی: ”آغا، بودور سنئن پولون، اونو بئر دسمالدا بوکولو ساخلادیم؛“ 21چونکی سندن قورخدوم، اونا گؤره کی، سن سرت بئر آدامسان: قویمادیغین شیی گؤتورورسن و اَکمه‌دئیئن شیی بئچئرسن.»
22آغاسی اونا ددی: «سنی اؤز آغزیندان چیخان سؤزه گؤره محکوم ادئرم، ای پئس قول! بئلئردئن کی، من سرت بئر آدامام، قویمادیغیم شیی گؤتورورم و اَکمه‌دئیئم شیی بئچه‌رم؟ 23بس اوندا نئیه منئم پولومو بانکایا قویمادین؟ من قاییداندا اونو سَلَم ائله ییغاردیم. 24یانیندا دورانلارا ددی: ”پولو اوندان آلین و اون قاتی اولانا ورئن.“»
25«اونلار اونا ددئلر: ”آغا، اونون کی اون قاتی وار! 26سئزه دیئرم: هر کئمئن کی واری، اونا داها چوخ ورئله‌جک؛ آمّا هچ نه‌سی اولمایاندان، اَلئنده اولان دا آلیناجاق. 27آمّا منئم حؤکمرانلیغیمی ائسته‌مه‌یَن بو دوشمنلرئمی بورا گتئرئن و اونلاری منئم قاباغیمدا کسئن.“»
اوغول پادشاه کئمی اورشلئمه گئرئر
28عئسا بو سؤزلری ددئکدن سونرا، قاباغا دوشوب اورشلئمه طرف یوخاری چیخدی.
29زیتون داغی یانیندا اولان بیت‌فاجی و بیت‌عنیایا یاخینلاشاندا، شاگئردلردن ائکی نفری گؤندَ‌رئب 30ددی: «قاباقداکی کنده گدئن. اورایا گئرنده، باغلانمیش بئر قودوق تاپاجاقسینیز کی، اوستونه هچ کئم مئنمه‌یئب. اونو آچیب بورا گتئرئن. 31اگر بئر کس سئزدن سوروشسا: ”نئیه اونو آچیرسینیز؟“ دئیه‌سئنئز: ”ربّئن اونا احتئیاجی وار.“»
32گؤندَرئلنلر گدئب، عئسانین اونلارا ددئیی کئمی تاپدیلار. 33اونلار قودوغو آچاندا، اونون صاحئبلری اونلارا ددئلر: «نئیه قودوغو آچیرسینیز؟» 34اونلار ددئلر: «ربّئن اونا احتئیاجی وار.» 35قودوغو عئسانین یانینا گتئرئب اؤز پالتارلارینی اونون اوستونه سالدیلار و عئسانی اونا مئندئردئلر. 36عئسا مئنئب گدنده، اونلار پالتارلارینی یولا سَرئردئلر. 37عئسا زیتون داغینین اِنئشئنه یاخینلاشاندا، بوتون شاگئرد جاماعاتی گؤردوکلری بوتون قودرتلی ائشلر اوچون سوئنئب اوجا سَسله آتامیزا حمد اتمه‌یه باشلادی، 38ددئلر: «آتامیزین آدی ائله گلن پادشاه موبارکدئر! گؤیده باریش و لاپ اوجالاردا عئزّت اولسون!»
39جاماعاتین ائچئنده‌کی فرئسئلردن بعضئسی عئسایا ددئلر: «اوستاد، شاگئردلرئنی دانلا.»
40عئسا جاواب وردی: «سئزه دیئرم، اگر بونلار ساکئت اولسالار، داشلارین اؤزو قیشقیراجاق.»
41عئسا شهره یاخینلاشیب اونو گؤرنده، شهرئن اوچون آغلادی،
42ددی: «کاش سن ده بو گون سنه باریش گتئرن شیلری بئلسه‌یدئن! آمّا ائندی بونلار سنئن گؤزلرئندن گئزله‌دئلئب. 43اله گونلر گله‌جک کی، دوشمنلرئن سنئن اطرافیندا سَدّ قوروب، سنی موحاصئره‌یه آلاجاقلار و هر طرفدن سنی سیخیشدیراجاقلار، 44سنی و دووارلارین ائچئنده‌کی اؤولادلارینی یرله یکسان اده‌جکلر و بئر داشی او بئری داشین اوستونده قویمایاجاقلار، چونکی سنه باش چکئلَن واختی تانیمادین.» a a v44 «سنه باش چکئلن واخت»، تارینین عئسانین شخصئنده اورشلئمه گلدئیی واختدیر.
عئسا آتاسینین اِوئنی تمئزله‌یئر
45عئسا معبده گئرئب، اورادا آلیش-وِرئش ادنلری اِشئیه قووماغا باشلادی،
46اونلارا ددی: «موقدّس کئتابدا یازیلیب: ”منئم اِوئم دوعا اِوی اولاجاق،“ آمّا سئز اونو حرامی یوواسینا چِویرئبسئنئز.»
47عئسا هر گون معبده تعلئم ورئردی. باش کاهئنلر، دئن عالئملری و خالقین باشچیلاری ائسه اونو اؤلدورمک اوچون یول آختاریردیلار، 48آمّا هچ نه اده بئلمئردئلر، چونکی بوتون خالق اونون سؤزلرئنه جان-دئلدن قولاق آسیردی.
