Mi eng' bukuit

Luka 19 FHB Father's Heart Bible™

Kiistoi 15% eng' kiy ne iale korook →
Bukuit

Cheeng'ei Jeso ak Kosar Sakayo

Togostai Sakayo keetit, kigure kotaach, ak kogoochi kebeberta ne po tuguukyik tugul. Parak agobo otwogik che aldaanjigei rabisyegap mastinnywa konyo kotom kochut Jerusalem, ole kiboiboienchi tuiyosyek, koriirchin Jeso nganaseet, yeityo koisto piik che aldei eng' kootap Kwandanyi.

Sura 19.

Ki chut Jeso Jeriko, ak ki wendi kosiirto. Ak ki mi chiito age ne kiguure Sakayo; ki taagindetap aisuruut ne oo, ak ki chii ne tinyei kimnateet. Ki machei kogeer ngo ng'oo Jeso, ago ki ma imuuch amu chaang'indap piik, amu ki chii ne ming'in. Ki labat tai ak kotogosta keetitap mogoonik si kogeer ineendet, amu ki machei Jeso kosiir ooreenooto.

Ye ki riik Jeso olooto, kogeer parak, ak koleenji, “Sakayo, nyo kochook ng'wony, amu nyolu atebi eng' koong'ung' raini.”

Ki nyo kochook ng'wony, ak kotaach ineendet eng' poiboiyet. Ye kigeer nooto, ki ing'unyng'ung'so tugul, kole, “Kagowo konyo kotebi kobooto chiito ne tinyei tengek.”

Ki tonon Sakayo, ak koleenji Kiptaiyat, “Keero, Kiptaiyat, agoochini kibananook kebebertap tuguukyuk, ak ngot kaiberber chii age tugul, arepaim konyil ang'wan.”

Ki leenji Jeso, “Raini kagonyo sorunet eng' kooni, amu ineendet ko weeriitap Abraham agine. Amu ki nyo Weeriitap chii kocheeng' ak kosar che kagobet.”

Riibe Otwogik Che Imanat Laitoryat

Ye kigas icheek tuguuchooto, kotes Jeso paran, amu ki neegit Jerusalem, ak ki ibwaat icheek kole tuun kobooru laitornatetap Kwandanyo koma tyanit.

Ki le, “Ki wo chiito age ne oo emet ne loo si konyoor laitornatet ineegei, ak koweek. Kiguure otwogikyik taman, ak kogoochi age tugul olo po melektap arawek somok, koleenji, ‘Oyai mung'aaret eng' niito agoi aweek.’ Ki wechi piigap emennyi ineendet, ak koyookto kiwootonik kosubu ineendet, koleenji, ‘Ma kemachei chiini kobou echeek.’

“Ye kiweek, kagonyoor laitornatet, koguure otwogik che ki kogoochi robiinik, si konai nee ne ki konyoor eng' mung'aaret. Konyo ne po tai, koleenji, ‘Kiptaiyat, kagotesaktoi robiinikuk konyil taman.’”

“Kowol koleenji, ‘Kiyai komyee, otwogindet ne myee! Amu ki imanatin eng' kiy ne ming'in, nam laitornatetap nganasook taman.’”

“Konyo ne po aeng', koleenji, ‘Kiptaiyat, kagotesak robiinik che ki igoono konyil muut.’”

“Koleenji agine, ‘Ak inyee, ibou nganasook muut.’”

“Konyo age, koleenji, ‘Kiptaiyat, ang'ni robiinikuk, ne ki akonor korate eng' ngoroindo;’ amu ki aiywei inyee, amu ii chii ne nyigiis: inemu ne ma inde, ak iges ne ma igoole.”

Kowol koleenji, “Airwoguun eng' kuting'ung' ineeng', otwogindet ne ya! Ingen ile aa chii ne nyigiis, anemu ne ma ki inde, ak ages ne ma ki agoole? Amu nee anyun si ki ma inde robiinikyuk ole kikonorchin robiinik, si kingo aweek, ko anemu kobooto keljinet? Koleenji icheek che kitonondos, ‘Onam robiinik eng' ineendet, ak ogoochi ne tinyei konyil taman.’”

“Kowol icheek koleenji, ‘Kiptaiyat, kotinyei konyil taman!’ Amwaiwok: age tugul ne tinyei kigoochin kotesak; ago ne ma tinyei, kinam agot ne tinyei eng' ineendet. Ago omut yu puunikyuk chu che ma machei kolaitoran icheek, ak obar eng' tainnyu.’”

Chut Weeriit Jerusalem Ko Laitoryat

Ye kingo kagomwa tuguuchuuto, kwo tai, kotogosta kobendi Jerusalem.

Ye ki neegit Bethphage ak Bethania, eng' tulweetap Mseituni, koyooto kasubik aeng', koleenji, “Oba nganaseet ne mi tai. Ye ochut, ko onyooru moitap sigiryet ne karat yooto, ne ma ki tebi chii kogeny. Oyat ak omutu yu. Ngot koteebe chii age tugul, koleenji, ‘Amu nee si oyat?’ omwa, ‘Machei Kiptaiyat.’”

Ki pa anyun icheek che ki kiyookte, ak kinyoor ko uu ye kagagemwachi. Ye kiyat icheek moitap sigiryet, kole piik che tinyei, “Amu nee si oyat moitap sigiryet?” Kole icheek, “Machei Kiptaiyat.” Ki imut ole mi Jeso, ak kowiir ngoroikwak eng' moitap sigiryet, ak kolanyis Jeso. Ye kilaany kowendi, ki konde ngoroikwak eng' ooreet. Ye ki neegit ole kiwendi ng'wony eng' tulweetap Mseituni, kotoi chaang'indap kasubik koboiboi, kolasu Kwandanyo eng' kutit ne oo agobo tuguuk che kiim tugul che ki kogeer, koleen, “Koberuurot Laitoryat ne nyoo eng' kainetap Kwandanyo! Kaalyeet eng' kipsengwet ak teegisto eng' ole toroor miising'!”

Kole alage eng' Pharisaik che mi kwenutap piik, koleenji, “Kaneetindet, iger kasubikuk.”

Kowol koleenji, “Amwaiwok, ngot kosilem chuuto, ko tuun kowaach koik.”

Ak ye kingo riik ak kogeer nganaseet, koriir agobo ineendet,

koleenji, “Ngot kiinai ra tuguuk che koonin kaalyeet! Ago nguno kagiisto eng' konyeguk. Pwoonei peetuusyek che koyai punwekuk kurwet ne koyiem inyee, ak koyiem inyee, ak koriikyin eng' komoswek tugul, ak koriprib inyee ak lagoguk che mi inyee eng' kurwekuk, koma bagaakta koito age eng' koito age, amu ma inai sait ne ki nyoonjin.” a a v44 Sait ne ‘nyoonin’ ko sait ne ki nyo Kamuktaindet Jerusalem eng' Jeso.

Kotilil Jeso Kootap Abba

Ak kochut oriit, ak kotoi koristo icheek che aldae tuguuk,

koleenji, “Mwaei Siruutyet kole, ‘Koek koonnyu koot ne po saaet,’ ago kagoyai okweek koik goitap rebiik.”

Koneeti eng' peetuut age tugul oriit, ago ki cheeng'ei kiptainigap tisiik, ak siriik, ak kandoigap piik ooreet ne komuuch kobar ineendet, ago ma kinyoor kiy ne komuuch koyai, amu ki machei piik tugul kogas ng'olyoondennyi.