Kas Kwandanyo kuuyeet ne ma istoe
Nereechei mosoget age kirwoogindet ne ma po imanda, ak taagindetap aisuruut ne ma muuchi kotogosta konyeguk koweekyigei kaa ko po imanda eng' taitap Kwandanyo, ago ma uu nooto Pharisaindet. Kitaachi lagok, kobendi laitoryat ne tinyei kimnateet koriirei, ak kowaach paoryat ne koraat ne mi saang' po Jeriko agoi kotegen Jeso.
18 1Ki mwachi Jeso icheek kalewenoni agobo kole nyolu kosaaei saisyek tugul, ak koma kobek.
2“Ki mi eng' nganaseet age kirwoogindet age ne ma iywei Kamuktaindet ak ne ma igonyit pik. 3Ki nyonei ineendet mosoget age ne mi nganasanooto, koleenji, ‘Iyaiywo imanda eng' chiitap lugeennyu.’ 4Ki mang'eny saisyek alak, ago kingo mwa eng' muguleldanyi kole, ‘Agot ko ma aiywei Kamuktaindet ak ma igonyit pik, 5amu testai mosogoni konyaliila, ayaiywen imanda, si koma kobwa koong'etyo eng' nyoonetnyi ne ma istoe.’”
6Ak ki le Kiptaiyat, “Ogas ne mwaei kirwoogindet ne ma po imanda. 7Tos ma iyaiywen Kwandanyo imanda chooto che ki kilewen che kuurei ineendet peetuut ak keemeet? Tos tesei kotegen? 8Amwaiwok ale, iyaiywen imanda chiito. Ago ye konyoonu Weeriitap chii, tos konyoor kayaneet eng' ng'wony?”
Konyoorei muguleldo ne iming'inegei kaalyeet
9Ki mwachi kora kalewenoni chiito che iyanjigei icheek kole po imanda ak kebagachi pik tugul alak:
10“Ki ba pik aeng' hekaluut kosaaei, age Pharisaindet ak age taagindetap aisuruut. 11Ki tonon Pharisaindet kosa agobo ineegei kole: ‘Kamuktaindet, kong'oi inyee amu ma aa kou pik alak—rebiik, pistoik, che ibegei—anan kou taagindetap aisuruut ni.’ 12‘Atigei amitwogik konyil aeng' eng' wigiit; agoochi kebeberta ne po taman eng' tugul che anyooru.’ 13Ago taagindetap aisuruut, kotonon loo, ma ki machei agot koeeti koonyek koba kipsengwet, ago ki bir chesirereennyi, koleenji, ‘Kwandanyo, riirwa anee kiptengekyot.’ 14Amwaiwok ale, ki we chiini kaa ko ki ityi imanda, ma age niin. Age tugul ne eeti ineegei kiming'in, ak ne iming'inegei kieet.”
Laitornatetap Kwandanyo ko po lagok
15Ki iibu pik agot lagokwak che mengech ineendet si koroochi, ago kingo keer kasubik niito, kokergong' icheek.
16Ago ki guur Jeso lagok ineendet ak kole, “Ingonyo lagok kobwanjo, amokergei icheek, amu laitornatetap Kwandanyo ko po che kou chu. 17Iman amwaiwok ale, age tugul ne ma namei laitornatetap Kwandanyo kou lakweet ne ming'in, ma kochut koigeny.”
Kiy age ne ma imuuch konoraik koal
18Ki teebe ineendet laitoryat age, koleenji, “Kaneetindet ne myee, nee ne nyolu ayai si anyoor saboondap koigeny?”
19Ki leenji Jeso ineendet, “Amune iguure ne myee? Ma mi ne myee, ago ko Kwandanyo kityo. a a v19 Iboorchi Jeso muguleldap murenyonndet Kwandanyo kou kwenutet ne mang'une myeeinda tugul; ma istoe miyoninndennyi ineegei, ago iweleli chiito koba Kwanda.
20Ingen ng'atuutik: ‘Mogesesen, Amerumisye, Amochoorse, Amobaoryan eng' lembech, Igonyit kwandang'ung' ak kamenng'ung'.’”
21Ki le ineendet, “Tugul chu ko ki ariip kong'etee ming'inatennyu.”
22Kingo kas niito Jeso, kole, “Tagirarari inyee kiy age: ial tugul che itinye, ak igoochi kibananook, si itinye konoraik eng' kipsengwet; yeityo inyoo, isuba.”
23Ago kingo kas niito, koarageni muguleldanyi miising', amu ki mogoryo miising'.
24Ki ger Jeso ineendet ak kole, “Nyigiis miising' kochut mogoryot laitornatetap Kwandanyo! 25Amu tolyo kolal tambeesyet koonyeetap sindani kosiir kochut mogoryot laitornatetap Kwandanyo.”
26Ki teebe chooto che kagogas, kole, “Ng'oo anyun ne imuuch kosar?”
27Ago ki le, “Che ma kiim eng' pik ko imugaksei eng' Kwandanyo.”
28Ak ki le Petero, “Keer, kibagakta meng'otosyekyo ak kisubin.”
29Ki leenji icheek, “Iman amwaiwok ale, ma mi chii ne kabagakta koo, osotyonnyi, tupchosyekyik, sigiikyik, anan lagokyik agobo laitornatetap Kwandanyo, 30ne ma konyoor che chaang' kosiir nguno, ak saboondap koigeny eng' emet ne nyoonei.”
Koba Weeriitap chii kurubaneet
31Ki nam taman ak aeng' komut taban ak kole, “Ogeero, keba Jerusalem, ak konyoolunjigei tugul che ki sir maotik agobo Weeriitap chii. 32Amu king'wekta ineendet Pororyosyek, ak kichombil, ak kiteweer, ak king'utyi. 33Kobirei ineendet ak kobar, ak eng' peetuut ne po somok ko ng'eetei.”
34Ago ma ki guiyo icheek kiy age eng' chu; ki ung'oot ng'olyoondoni eng' icheek, ak ma ki nai ne kimwaei.
Weeriitap Kwanda koweekta koonyek
35Ye kiriikyi Jeso Jeriko, ki tebee chiito ne ma geere eng' tabandap ooreet kosaaei toloch. 36Kingo kas kibagenge kolanda, koteebe kiy ne yaei. 37Ki mwachi ineendet kole, “Landa Jeso ne po Nazareth.” 38Ki waach koleenji, “Jeso, Weeriitap Daudi, riirwa anee!” 39Ki kergong' ineendet chooto che ki mi tai ak komwachi kosiis, ago ki testai kowaach, “Weeriitap Daudi, riirwa anee!”
40Ki tonon Jeso ak kong'at koiibchin ineendet. Kingo riikyi, ki teebe Jeso,
41“Imache ayaun nee?” Kole, “Kiptaiyat, agoigeer kogeny.”
42Ak koleenji Jeso, “Igeer; kagosarin kayaneng'ung'.”
43Ki igeer kityo ak kosubu Jeso, kotoroori Kwandanyo. Ak ki lasunoti piik tugul che ki keer niito Kwandanyo agine.