Mi eng' bukuit

Luka 17 FHB Father's Heart Bible™

Kiistoi 15% eng' kiy ne iale korook →
Bukuit

Agobo tuguuk che riichei piik ak nyoetap kaat

Inyochi kaat tisap eng' peetuut agenge. Ikwurei kayaneet ne uu kesenyot kityo. Otwogik che yaei poisyekwak komatinye kongoi. Kisaap piik taman che tinyei mogondosaik ak kowek agenge, Samariaindet, kolasunoti Kwandanyo. Ma mi ole po toorchini laitornatet; mi kun eng' kwenunnywa.

Sura 17.

Ki leenji tononikyik, “Nyolu kobiit lelutik, ago pwo eng' chiichooto bunu icheek! Myee ineendet kesonginin isyet eng' sogotennyi ak kewiir eng' araraita, kosiir kole konach agenge eng' lagok chu che meng'echen.

“Oriipkei okweegei. Ngot kotengekto tupcheng'ung', iger kong' ineendet, ak ngot kosik, inyochi kaat. Ngot kotengekton konyil tisap eng' peetuut agenge, ak koweekta konyil tisap koleenjin, ‘Asigu,’ inyochi kaat.”

Ki leenji che kiyooktoi Kiptaiyat, “Ites kayanennyo!”

Ki le Kiptaiyat, “Ngot otinye kayaneet ne uu kesetap haradali, omuuchi oleenji keetit ne po mulberi ni, ‘Itutakei ak kekoolin eng' araraita,’ ak koepchin iit okweek.” Ng'oo eng' okweek ne tinyei otwogindet ne ibatisye anan ne iyagi keechiirek, ne leenjin ye konyo eng' mbareet, “Nyo nguno isain, itep ng'wony iam”? Tos ma koleenji, “Iteechi amitwogik che po lagat, ilaakyi ngoroik si ipoisyechwo ye aam ak aee peek, ak kingobata iam inyee ak iee”?

“Tos koweekyi otwogindet kongoi amu kayai che ki king'at ineendet? Uu nooto anyun okweek, ye kagoyai tugul che king'atak, omwa, ‘Ki otwogik che ma nyolu echeek; kiyai agenge poisyet ne ki nyolu keyai.’”

Isaabu Kwanda piik taman che tinyei mogondosaik

Ye kiwendi Jerusalem, kobunei kwenutap Samaria ak Galilaya. Ye kingo chut nganaseet, ki konyoonji murenik taman che ki tinyei mogondosaik. Ki tononso eng' ole loo,

ak ki kuur eng' kutit ne oo, “Jeso, Masta, riirwech!”

Kingo keer icheek, kole, “Obe, oboorchigei tisiik.” Ye kiwendi, ki tiliilit icheek.

Agenge eng' icheek, kingo keer kole kagosap, koweekta, kolasu Kwandanyo eng' kutit ne oo, ak kong'uruuk eng' keelyegap Jeso kotokyi tainnyi ng'wony, koweekyi kongoi. Ago ki chiito ne po Samaria.

Kole Jeso, “Tos ma kitiliili taman? Mi ano che sogool? Tos ma kinyoor age ne week koochi toroornatet Kwandanyo kobatee chiini ne po emet age?” Ak ki leenji ineendet, “Ng'eet ak iwe; kagosorun kayaneng'ung'.”

Kamii Laitornatet Kwenuneng'wong'

Kingo teebee Pharisaik ano sait ne bunu laitornatetap Kwandanyo, kowolji icheek koleenji, “Ma bunu laitornatetap Kwandanyo eng' keeret ne kigeerei koonyek, ak ma koleenji, ‘Keere, ni yu!’ anan ‘Ni kooyo!’ Amu laitornatetap Kwandanyo ko kwenung'wong'.”

Ki leenji kasubik, “Bunu peetuusyek che oamachini ogeer agenge eng' peetuusyegap Weeriitap chii, ak ma ogeer. Koleenjinok, ‘Keere, ni kooyo!’ anan ‘Keere, ni yu!’ Amobe, amosup icheek. Amu ko uu kalyeleet ne iyeni ak koluuchi kipsengwet kong'etee luuita age agoi luuita age, kou nooto kobo Weeriitap chii eng' peetuunnyi. Ago ne po tai nyolu konyaliil tuguuk che chaang' ak kesas ibinda ni. Ko uu peetuusyegap Noah, kou nooto kobo peetuusyegap Weeriitap chii. Ki am, koee, koton, ak ketunji, agoi peetuut ne kingo chut Noah moinget, ak kobiit maraneet ak kong'em icheek tugul. Ki uu nooto agine eng' peetuusyegap Lot: amisyet, eet, alset, aldaet, koolet, tekset, ago peetuut ne kingo mong' Lot Sodom, ki rong'ji maat ak koik che laldos kobunu kipsengwet ak kong'em icheek tugul, kou nooto kobo peetuut ne kiboorchin Weeriitap chii. Eng' peetuunooto, age tugul ne mi parak ne po koot ak kotinyei tuguukyik oriit, matachoorto koip tuguuk; kou nooto, age tugul ne mi mbareet, mataweek let. Obwaat kwondap Lot. Age tugul ne cheeng'ei koriip saboondanyi, kobeeti; ago ne ibeeti saboondanyi, koriip. Amwaiwok ale, eng' kemoi nooto, komi piik aeng' eng' kitet agenge: kenam agenge, ak koeng' age. Komi kwonyiik aeng' che ollei togeet; kenam agenge ak koeng' age.” a a v35 Chigilisyek che tai matinyei isetap 36 yu; che let kotes: “Komi murenik aeng' eng' mbareet; kenam agenge ak koeng' age.”

Ki teebe koleenji, “Ano, Kiptaiyat?” Kole, “Ole miitei muusto, kiyumi kurgeiyosyek olooto.”