Luke 17

17 ¹Ana awui sākhangatha̱bingli hānga, "Ningkhamaong hi rā kajina, kha ningkhamaong khipāwui mangā eina rā, a chiwui kakhanang ngasāranu! ²Awui akahungli lungriham hokthangmihailaga shamadruli horsang kahaina, hi naoshinaobing akhali morei sāngasak kahaina awui vang phamei.

³"Nathum khalatta nganātitkhuilu. Napā morei saakha, ali kaharlu, kala a ning ngateiakha, ali pheomilu. ⁴Nawuitungli thangkhali shini shida morei saakha, kala shini shida 'Ina ning ngateihaira' da nawuili latung tharan, ali pheomilu."

⁵Paokazatbingna Proholi hānga, "Ithumwui shitkasang mataisanglu!"

⁶Prohona hānga, "Nathumna shitkasang kayānghanthā rikha leiakha, hi mulberry thingrongli 'Phurshoklaga shamadruli lingsanghaolu' jilala chi nathumwui kahāng nganaira. ⁷Nathum lungli khipāna, seiot sā lah yao homkapam rao akha leiakha, arao luiwui eina rā tharan ali, 'Thākta rālaga tableli phazā khavai pamlu' da hāngkhala? ⁸Chithālala ana ali, 'Iwui phazāt khangarān sālaga, ina phāshak phazā tharan ili sheba sāmikhavai khutlai khangkālu, chiwui thili nala phāshak phāzalu' da mahāngmala?

⁹"Ana rao chili, ali kaso kahai chi sāhaiwui vang, ningshi khamikhala? ¹⁰Chithāda sāda nathumla, nathumli kaso kahai saikora sāhailaga, 'Ithum teona raobingna; ithumna sāphalungki kaji ot chi maningla sāhaira' da hānglu."

Avāna Phārrei Kakazā Tharāli Raimi

¹¹Jerusalemli vāki shongfali, ana Samaria eina Galileewui ngachaili rārāda kāna. ¹²Ana kha̱ akhali azang tharan, phārrei kakazā mi tharāna ali samphanga. Athum katāda nganinga,

¹³kala panglāk eina vaowa, "Jishu, Amei, ithumli khalumashanmilu!"

¹⁴Athumli kathei eina, ana hānga, "Vālu, pāngmonbingli nathum khalatta chitheikhuilu." Athum vāda leilakha, kathar samphanghaowa.

¹⁵Athum akhana a raihaira chi theilaga ithumwui Avāli panglāk eina masochikatta ngareiungda latunga, ¹⁶kala Jishuwui pheili amai mashunzangda pia, kala ali ningkashi miya. Chi a Samarianao akhana.

¹⁷Jishuna hānga, "Tharā kathar samphanghaira maningmala? Kha chiko china haili leila? ¹⁸Latungda ithumwui Avāli tekmatei miakha kaji, hi kha̱mi khangatei maningla khipākha matheimarala?" ¹⁹Kala ana ali hānga, "Ngakarthuida vālu; nawui shitkasangna nali raimihaira."

Wungram Chi Aruichang Nathumwui Ngachaili Lei

²⁰Phariseebingna ithumwui Avā wungram khale rārakhala da ngahān tharan, ana athumli ngahānkai, "Ithumwui Avā wungram chi nathumna yangda thei kahai eina marāmana, ²¹lah athumna, 'Yanglu, hili lei!' lah 'Chili leili!' da mahāngmara. Khikhalajila ithumwui Avā wungram chi nathumwui ngachaili lei."

²²Ana sākhangatha̱bingli hānga, "Atambing rāra, chitharan nathumna miwui Naomayarawui atam akhali theikhavai ngailuira, kha nathumna matheimara. ²³Athumna nathumli, 'Yanglu, chili lei!' lah 'Yanglu, hili lei!' da hāngra. Mavālu, athumli makharomalu. ²⁴Kaja rikhāna ngasheilaga kazingram akatang akhawui eina khangatei akatangli horvai thada, miwui Naomayara awui atamli chi tākamra. ²⁵Kha ana rida apong kachungkhali kakhanang kachot samphangra kala thot hina mamayāmara. ²⁶Noahwui atamli kashok thada, miwui Naomayarawui atambing chithāpapamra. ²⁷Noahna marikhongli kākazang atam eina tangda athumna phāshak, phazā, ngalā khui kala fakathui sāsai; chieina tara̱ phongda athum saikorali shimān ngasaka. ²⁸Lotwui atamlila chi tākam eina shokkahaina: phāshak, phazā, lokhavai, khayor, lingsang, shim sā, ²⁹kha Lotna Sodomwui eina zatthuihai atam chithang, meiwon kala meiri china kazingram eina rotālaga, athum saikora chi shimān ngasaka; ³⁰miwui Naomayara shokrāsai atamlila chithāpapamra. ³¹Chithang, khipānakha shimtungli leilaga awui ot chi shimlungli lei, ana chi khuikhavai matunglakaranu; chithada sāda, luili leikasapa china malatungaranu. ³²Lot preiva̱li phaningunglu. ³³Khipānakha awui mirin kanmi khavai saakha shimānra, kha awui mirin shimānhaiakha china mayonra. ³⁴Ina nathumli kahāngna, chi ayingā mishini kachaphunatli leira: akhali khuithuihaora kala akhapāli haihaora. ³⁵Preinao khanina mā rungrumsāra; akhali khuithuihaora kala akhapāli haihaora." ^a a v35 Rida shokkahai lairikbingli hili verse 36 maleimana; kharethang lairikbingna hi ngarumsaka: "Atam chitharan luili mi khani leisāra, akhali khuithuihaora kala akhapāli haihaora."

³⁷Athumna ngahāna, "Kachili, Proho?" Ana hānga, "Kathingun khaleipam kachida, chili khalāngbing kazipra."