Game da Abubuwan Sa Tuntuɓe da Gafara

Ka yi gafara sau bakwai a rana. Bangaskiya girman ƙwayar iri ta isa. Bayin da suka yi aikinsu ba sa neman yabo. An warkar da mutum goma masu kuturta, ɗaya kuwa, Basamariye, ya komo yana yabon Ubanmu. Mulkin ba wani wuri ba ne da za a nuna da yatsa; ya riga ya kasance a tsakaninsu.

Babi na 17.

Ya ce wa almajiransa, “Lalle abubuwan sa tuntuɓe za su zo, amma kaiton wanda suke zuwa ta gare shi! Zai fi masa kyau a rataya masa dutsen niƙa a wuyansa a jefa shi cikin teku, da yă sa ɗaya daga cikin ƙananan nan yă yi tuntuɓe.

“Ku lura da kanku. Idan ɗan'uwanka ya yi zunubi, ka tsawata masa, in kuwa ya tuba, ka gafarta masa. In ya yi maka zunubi sau bakwai a rana, ya kuma komo sau bakwai yana cewa, ‘Na tuba,’ ka gafarta masa.”

Manzannin suka ce wa Ubangiji, “Ka ƙara mana bangaskiya!”

Ubangiji ya ce, “Da kuna da bangaskiya kamar ƙwayar mastad, da kun ce wa itacen tsamiya nan, ‘Ka tumɓuke ka dasu a cikin teku,’ sai ya yi muku biyayya. Wane ne a cikinku da yake da bawa mai noma ko mai kiwon tumaki, da ya dawo daga gona, zai ce masa, ‘Zo nan take, ka zauna ka ci abinci’? A maimakon haka, ba zai ce masa, ‘Ka shirya mini abincin dare, ka ɗaura damara ka yi mini hidima yayin da nake ci nake sha, sa'an nan kai za ka ci za ka sha’ ba?

“Shin, yana gode wa bawan domin ya yi abin da aka umarce shi? Haka ku ma, bayan kun yi dukan abin da aka umarce ku, ku ce, ‘Mu bayi ne marasa amfani; kawai mun yi aikin da ya rataya a kanmu ne.’”

Ubanmu Ya Warkar da Kutare Goma

A hanyarsa zuwa Urushalima, yana wucewa tsakanin Samariya da Galili. Yayin da yake shiga wani ƙauye, sai ga mutane goma masu kuturta suka taryo da shi. Suka tsaya daga nesa,

suka ɗaga murya suka ce, “Yesu, Malam, ka yi mana jinƙai!”

Da ya gan su, sai ya ce, “Ku tafi, ku nuna kanku ga firistoci.” Suna cikin tafiya, sai suka tsarkaka.

Ɗaya daga cikinsu, da ya ga an warkar da shi, sai ya komo, yana yabon Ubanmu da babbar murya, ya kuma fāɗi rubda ciki a gaban ƙafafun Yesu, yana gode masa. To, shi mutumin Samariya ne.

Yesu ya ce, “Ba goma ne aka tsarkake ba? Ina sauran tara? Ba a sami wani da zai komo yă ɗaukaka Ubanmu ba sai wannan baƙon?” Sai ya ce masa, “Tashi ka tafi; bangaskiyarka ta warkar da kai.”

Mulkin Ubanmu Yana Tsakaninku Tuni

Da Farisiyawa suka tambaye shi lokacin da Mulkin Ubanmu zai zo, sai ya amsa musu ya ce, “Mulkin Ubanmu ba ya zuwa da ganin ido, ba kuwa za a ce, ‘Ga shi nan!’ ko ‘Ga shi can!’ ba, gama Mulkin Ubanmu yana tsakaninku.”

Ya ce wa almajiran, “Kwanaki suna zuwa da za ku yi marmarin ganin ɗaya daga cikin kwanakin Ɗan Mutum, amma ba za ku gani ba. Za su ce muku, ‘Ga shi can!’ ko ‘Ga shi nan!’ Kada ku tafi, kada ku bi su. Gama kamar yadda walƙiya take wulgawa ta haskaka sararin sama daga wannan gefe zuwa wancan, haka Ɗan Mutum zai kasance a ranarsa. Amma da farko, dole yă sha wahaloli masu yawa, mutanen wannan zamani kuma su ƙi shi. Kamar yadda kwanakin Nuhu suka kasance, haka kwanakin Ɗan Mutum za su kasance. Mutane suna ci, suna sha, suna aure, suna aurarwa, har ranar da Nuhu ya shiga jirgi, sai ruwan tsufana ya zo ya hallaka su duka. Haka ma ya faru a kwanakin Lutu: ana ci, ana sha, ana saye, ana sayarwa, ana shuki, ana gini, amma a ranar da Lutu ya bar Saduma, sai wuta da kibiritu suka yi ruwa daga sama suka hallaka su duka, haka zai kasance a ranar da za a bayyana Ɗan Mutum. A ranar nan, duk wanda yake kan rufin ɗaki, kayansa kuma suna cikin gida, kada yă sauka don yă ɗauko su; haka kuma, duk wanda yake gona kada yă komo baya. Ku tuna da matar Lutu. Duk wanda ya nemi yă kiyaye ransa zai rasa shi, amma duk wanda ya rasa ransa zai riƙe shi. Ina gaya muku, a daren nan mutum biyu za su kasance a gado ɗaya: za a ɗauki ɗaya, a bar ɗayan. Mata biyu za su kasance suna niƙa tare; za a ɗauki ɗaya a bar ɗayar.” ^a

Suka tambaye shi, “A ina, Ubangiji?” Ya ce, “Duk inda mushe yake, a nan ungulai za su taru.”