Luke 17

17 ¹E tell im disciples say, “Tin wey go make person fall go sure come, but e go hard for di person wey dem take pass come! ²E go beta make dem hang grinding-stone for im neck throw am inside sea pass make e cause one of dis small pikin dem to fall.

³“Watch unaselves. If your brother sin, talk am for im face, and if e turn im heart, forgive am. ⁴If e sin against you seven times for one day, and seven times come back talk say, ‘I don turn my heart,’ forgive am.”

⁵Di apostle dem tell di Oga, “Add more faith give us!”

⁶Di Oga talk say, “If una get faith wey small like mustard seed, una fit tell dis mulberry tree say, ‘Comot for ground and go plant yourself inside sea,’ and e go obey una. ⁷Which one of una wey get servant wey dey plough ground or dey mind sheep go tell am, wen e come in from farm, ‘Come quick, siddon for table’? ⁸No be say e go rather tell am, ‘Prepare my evening chop, dress well come serve me while I dey chop and drink, and after dat you fit chop and drink’?

⁹“E go thank di servant because e do wetin dem command am to do? ¹⁰So una too, wen una don do everytin wey dem command una, talk say: ‘We be servant wey no fit to praise; na only our work we don do.’”

Our Papa Heal Ten Leprosy People

¹¹For di road wey dey go Jerusalem, e dey pass between Samaria and Galilee. ¹²As e enter one village, ten men wey get leprosy meet am. Dem stand far,

¹³and dem shout loud say, “Jesus, Oga, take pity on us!”

¹⁴Wen e see dem, e talk say, “Go, show unaselves to di priest dem.” As dem dey go, dem come clean.

¹⁵One of dem, wen e see say e don heal, turn back, dey praise our Papa with loud voice, ¹⁶and e fall face down for Jesus feet, dey thank am. Now dis man na Samaria person.

¹⁷Jesus talk say, “No be ten dem clean? Wia di nine dey? ¹⁸Na only dis stranger dem find wey come back come give glory to our Papa?” ¹⁹And e tell am, “Stand up go; your faith don make you well.”

Di Kingdom Don Dey Among Una Already

²⁰Wen di Pharisee dem ask am wen di kingdom of our Papa go come, e answer dem say, “Di kingdom of our Papa no dey come for way wey person fit see with eye, ²¹and dem no go talk say, ‘Look, e dey here!’ or ‘E dey there!’ Because di kingdom of our Papa dey among una.”

²²E tell di disciples say, “Time dey come wen una go wan see one of di days of di Pikin of Man, and una no go see am. ²³Dem go tell una say, ‘Look, e dey there!’ or ‘Look, e dey here!’ No go, no run follow dem. ²⁴Because as lightning dey flash light up di sky from one end reach di other end, na so di Pikin of Man go be for im day. ²⁵But first, e must suffer plenty tin and dis generation go reject am. ²⁶As Noah days be, na so di days of di Pikin of Man go be. ²⁷Dem dey chop, dey drink, dey marry, and dem dey give dem for marriage, reach di day wey Noah enter di ark, and di flood come destroy dem all. ²⁸Na di same tin happen for Lot days: dem dey chop, dey drink, dey buy, dey sell, dey plant, dey build, ²⁹but di day wey Lot comot from Sodom, fire and sulfur rain from heaven come destroy dem all, ³⁰na so e go be for di day wey dem go show di Pikin of Man. ³¹For dat day, whoever dey ontop roof wey im property dey inside house no must come down go carry dem; di same way, whoever dey for farm no must turn back. ³²Remember Lot wife. ³³Whoever wan hold im life tight go lose am, but whoever lose im life go keep am. ³⁴I dey tell una, for dat night two people go dey for one bed: dem go carry one, and leave di other one. ³⁵Two women go dey grind together; dem go carry one and leave di other one.” ^a a v35 Di oldest manuscript dem no get verse 36 for here; copy dem wey come later add say: “Two men go dey for farm; dem go carry one and leave di other one.”

³⁷Dem ask am, “Wia, Oga?” E talk say, “Wia dead body lie, na dia di vulture dem go gather.”