路加福音 17

17 ¹耶穌對佢啲門徒講:「絆倒人嘅事一定會嚟,但係嗰個令人絆倒嘅人就有禍喇! ²佢若果令到呢啲細小嘅人當中一個絆倒,倒不如攞塊大磨石掛喺佢頸度,掉落海仲好啦。

³「你哋要自己謹慎。如果你個兄弟犯咗罪,就要責備佢;佢若果悔改,就要饒恕佢。 ⁴如果佢一日七次得罪你,又七次返轉頭同你講『我悔改喇』,你都要饒恕佢。」

⁵啲使徒對主講:「求你加增我哋嘅信心!」

⁶主講:「如果你哋有信心,就算細到好似一粒芥菜種咁,你哋對呢棵桑樹講『你連根拔起,栽喺海度啦』,佢都會聽你嘅話。 ⁷你哋當中邊個有個僕人喺度耕田或者牧羊,佢由田入嚟,你會對佢講『你即刻嚟坐低食飯』呢? ⁸難道唔係反而對佢講『你整定我嘅晚飯,束好腰帶服侍我食嘢飲嘢,之後你至好食飯飲嘢』咩?

⁹「僕人做咗吩咐佢做嘅嘢,主人使唔使多謝佢呢? ¹⁰同樣,你哋做咗一切吩咐你哋做嘅嘢之後,都要講:『我哋係不配嘅僕人,我哋只不過係做咗本份啫。』」

我哋嘅父醫好十個痲瘋病人

¹¹耶穌去耶路撒冷嘅時候,經過撒瑪利亞同加利利中間。 ¹²佢入到一條村嗰陣,有十個生痲瘋病嘅人迎面而嚟。佢哋遠遠咁企住,

¹³大聲叫喊講:「耶穌,老師呀,可憐我哋啦!」

¹⁴耶穌見到佢哋,就講:「你哋去,畀啲祭司睇下你哋。」佢哋去緊嘅時候,就潔淨咗喇。

¹⁵當中一個見到自己好返,就返轉頭,大聲讚美我哋嘅父, ¹⁶喺耶穌腳邊俯伏喺地,多謝佢。呢個人係一個撒瑪利亞人。

¹⁷耶穌講:「潔淨咗嘅唔係十個咩?其餘九個喺邊度呀? ¹⁸除咗呢個外族人之外,竟然搵唔到人返轉頭將榮耀歸畀我哋嘅父?」 ¹⁹跟住耶穌對佢講:「你起身走啦;你嘅信心救咗你喇。」

神嘅國已經喺你哋中間

²⁰法利賽人問耶穌我哋父嘅國幾時嚟到,耶穌答佢哋講:「我哋父嘅國嚟到,唔係眼見得到嘅, ²¹人亦都唔會講『睇呀,喺呢度!』或者『喺嗰度!』因為我哋父嘅國就喺你哋中間。」

²²耶穌對啲門徒講:「日子將會到,嗰陣你哋渴望睇見人子嘅日子當中一日,卻係睇唔到。 ²³人會對你哋講『睇呀,喺嗰度!』或者『睇呀,喺呢度!』你哋唔好去,亦都唔好追隨佢哋。 ²⁴因為好似閃電閃爍,由天嘅一邊照到另一邊咁,人子喺佢嘅日子都會係咁樣。 ²⁵不過佢首先必須受好多苦,又畀呢個世代嘅人棄絕。 ²⁶挪亞嘅日子點樣,人子嘅日子都會係咁樣。 ²⁷嗰陣啲人又食又飲,又娶又嫁,直到挪亞入方舟嗰日,洪水嚟到,將佢哋全部毀滅。 ²⁸羅得嘅日子都係一樣:啲人又食又飲,又買又賣,又耕種又起屋, ²⁹但係到羅得離開所多瑪嗰日,天上就落火同硫磺,將佢哋全部毀滅。 ³⁰人子顯現嗰日,都會係咁樣。 ³¹喺嗰日,凡喺屋頂上而傢俬喺屋入面嘅,唔好落嚟攞;同樣,凡喺田裏面嘅,亦都唔好返轉頭。 ³²你哋要記住羅得嘅老婆。 ³³凡想保全自己性命嘅,反而會失去性命;凡失去性命嘅,反而會保存性命。 ³⁴我話畀你哋知,嗰一晚會有兩個人喺一張床上面:一個會畀人接去,另一個會留低。 ³⁵ 會有兩個女人一齊磨麥:一個會畀人接去,另一個會留低。」 ^a a v35 最早嘅抄本喺呢度冇第36節;後來嘅抄本加咗:「會有兩個人喺田裏面;一個會畀人接去,另一個會留低。」

³⁷門徒問:「主呀,喺邊度呀?」耶穌講:「屍首喺邊度,鷹就聚集喺嗰度。」