路加福音 16

16 ¹耶穌又同佢啲門徒講:「有個財主,佢有個管家俾人告話揮霍佢嘅財產。 ²財主就叫佢嚟,同佢講:『我聽到關於你嘅係咩事嚟㗎?你要交代吓你管理嘅賬目,因為你唔可以再做管家喇。』

³「嗰個管家心裏面諗:『而家我可以點做呢?我主人要收返我份工。掘地我冇力氣,乞食我又覺得羞恥。 ⁴我知道應該點做喇,咁樣等我冇咗份工嘅時候,啲人就會接我入佢哋屋企。』 ⁵於是佢逐個逐個叫佢主人嘅債仔嚟,問第一個:『你欠我主人幾多呀?』 ⁶佢話:『一百簍橄欖油。』管家對佢講:『攞你張賬單,快啲坐低,寫五十。』 ⁷跟住佢又問另一個:『你呢,你欠幾多呀?』佢話:『一百石麥。』管家對佢講:『攞你張賬單,寫八十。』

⁸「主人就稱讚呢個唔誠實嘅管家做事精明,因為今世之子對付自己嗰代嘅人,比光明之子仲要精明。 ⁹我話俾你哋知,要用世上嘅錢財為自己結交朋友,咁樣到錢財冇晒嘅時候,佢哋就會接你哋入永恆嘅居所。 ¹⁰喺最小嘅事上忠心嘅人,喺大事上都會忠心;喺最小嘅事上唔誠實嘅人,喺大事上都會唔誠實。 ¹¹咁樣,如果你哋喺世上嘅錢財上唔忠心,邊個會將真正嘅財富交託俾你哋呢? ¹²如果你哋喺別人嘅嘢上唔忠心,邊個會將屬於你哋自己嘅嘢俾你哋呢? ¹³冇一個僕人可以服侍兩個主人。佢會恨呢個,愛嗰個;或者忠於呢個,睇唔起嗰個。你哋唔可以同時服侍我哋嘅父,又服侍錢財。」

¹⁴法利賽人一向都貪錢,佢哋聽晒呢啲嘢,就取笑耶穌。

¹⁵耶穌對佢哋講:「你哋喺人面前扮自己有義,但係我哋嘅父知道你哋嘅心。人所看重嘅嘢,喺我哋嘅父眼中係可憎嘅。」

¹⁶「律法同先知一直到約翰為止;由嗰陣時起,我哋父嘅國嘅福音就傳開,而且人人都拼命擠入去。 ¹⁷但係天地過去,都比律法上一劃失效仲容易。」

¹⁸「凡休咗自己妻子又娶第二個嘅,就係犯姦淫;娶一個俾丈夫休咗嘅女人,都係犯姦淫。」

財主同拉撒路

¹⁹「有一個財主,着住紫色袍同細麻布嘅衣服,日日奢華宴樂。 ²⁰又有一個窮人,名叫拉撒路,成身生瘡,俾人放喺財主嘅門口, ²¹好想食財主枱面跌落嚟嘅碎屑;甚至有啲狗嚟舐佢啲瘡。 ²² 後來嗰個窮人死咗,天使將佢帶到亞伯拉罕嘅身邊。嗰個財主都死咗,俾人埋葬, ^a a v22 亞伯拉罕嘅身邊:猶太人嘅一個意象,指義人死後安息、等候復活嘅安舒之處。 ²³ 喺陰間受苦嘅時候,佢舉目望上去,見到亞伯拉罕喺遠處,拉撒路喺佢身邊。 ^b b v23 陰間係死人嘅居所,係死亡同最後審判之間嘅等候之處——同最後受審判嘅地方唔同。 ²⁴佢就嗌:『我祖亞伯拉罕啊,可憐吓我啦。打發拉撒路用指尖蘸啲水,涼吓我條脷啦,因為我喺呢團火焰裏面非常痛苦。』

²⁵「但係亞伯拉罕話:『仔啊,你要記得:你一世人享受過好嘢,拉撒路就同樣受過苦。而家佢喺呢度得到安慰,你就要受痛苦。 ²⁶除咗呢啲之外,喺我哋同你哋之間,仲有一個好大嘅深淵隔住,想由呢邊過去你哋嗰邊嘅都過唔到,想由嗰邊過嚟我哋呢邊嘅都過唔到。』

²⁷「佢就話:『我祖啊,咁我求你打發佢去我父親嘅屋企, ²⁸因為我有五個兄弟——等佢去警告佢哋,免得佢哋都嚟到呢個痛苦嘅地方。』

²⁹「但係亞伯拉罕話:『佢哋有摩西同眾先知;等佢哋聽摩西同先知講嘅嘢啦。』

³⁰佢話:『唔係嘅,我祖亞伯拉罕啊,如果有一個由死人中復活嘅去佢哋嗰度,佢哋就會悔改喇。』

³¹亞伯拉罕對佢講:『如果佢哋唔聽摩西同眾先知,就算有人由死人中復活,佢哋都唔會信服嘅。』」