Luke 16 FHB Father's Heart Bible™

16 ¹Tai laga chella khan ke bhi koise, “Ekjon dhuni manuh laga ekjon ghor cholawnkari thakise, jun manuh ke tai laga dhun-sompoti nosto kori ase koi kene golti lagai dise.” ²“Tai pora taike mati kene koise, ‘Tumi laga kotha moi ki huni ase? Tumi laga cholawn laga hisab dibi, kilemane tumi aru cholawnkari kaam koribo naparibo.’”

³“Cholawnkari pora nijor monte koise, ‘Moi ki koribo? Moi laga malik pora moi laga kaam moi pora loi loi ase. Mati khundibole moi takot nai, aru bhik mangibole moi sorom lage.’” ⁴“‘Moi ki koribo lage, moi jane, eneka hoile jitia moi etu kaam harai dibo, titia manuh khan pora moike tarkhan laga ghor khan te grohon koribo.’” ⁵“Tai pora tai laga malik laga karja thaka manuh khan ke ekjon ekjon kori mati anise, aru prothom jon ke hudise, ‘Tumi moi laga malik ke kiman karja ase?’” ⁶“Tai koise, ‘Eksoh maap joliton tel.’ Tai pora taike koise, ‘Tumi laga hisab-potro loi lobi, joldi bohi kene, pachas likhibi.’” ⁷“Titia tai dusra ekjon ke hudise, ‘Aru tumi, kiman karja ase?’ Tai koise, ‘Eksoh maap gehu.’ Tai pora taike koise, ‘Tumi laga hisab-potro loi lobi, aru assi likhibi.’”

⁸“Malik pora hei beiman cholawnkari ke buddhi logot kaam kora nimite prosansa korise, kilemane etu yug laga bacha khan tarkhan nijor jamana logote ujala laga bacha khan pora bhi bisi buddhiman ase.” ⁹“Moi tumikhan ke koi ase, prithibi laga dhun pora nijor nimite sathi khan bonabi, eneka hoile jitia eitu khotom hoi jabo, titia tarkhan pora tumikhan ke ananta ghor khan te grohon koribo.” ¹⁰“Kun manuh ekdom chutu jinis te biswasi ase, tai dangor jinis te bhi biswasi ase; aru kun manuh chutu jinis te beiman ase, tai dangor jinis te bhi beiman ase.” ¹¹“Jodi tumikhan prithibi laga dhun te biswasi thaka nai, tene hoile kun pora tumikhan ke hosa dhun biswas kori dibo?” ¹²“Aru jodi tumikhan dusra manuh laga jinis te biswasi thaka nai, tene hoile tumikhan laga nijor jinis kun pora dibo?” ¹³“Kun ghor laga nokor bhi duijon malik laga sewa koribo napare. Tai ekjon ke ghin koribo aru dusra ke morom koribo, nohoile ekjon ke dhori rakhibo aru dusra ke tuchcho koribo. Tumikhan amar Pitri aru dhun duita laga sewa koribo naparibo.”

¹⁴Poisa ke morom kora Pharisee khan pora etu sob kotha huni kene Taike thatta kori thakise.

¹⁵Tai pora tarkhan ke koise, “Tumikhan manuh khan laga usorte nijorke dharmik dikhai, kintu amar Pitri tumikhan laga mon jane. Manuh khan majote ki jinis ke dangor mani ase, eitu amar Pitri laga usorte ghin laga ase.”

¹⁶“Niyom aru Bhabobadi khan John tak thakise; etu pichete amar Pitri laga rajyo laga susamachar prachar kori ase, aru sob manuh jor kori kene etu bhitorte ghusi ase.” ¹⁷“Kintu Niyom laga ekta chutu chihno harai ja pora, sorgo aru prithibi harai ja he aru asan ase.”

¹⁸“Kun manuh tai laga maiki ke chari kene dusra ke shadi kore, tai bebichar kore; aru mota pora chari diya maiki ke shadi kora bhi bebichar ase.”

Dhuni Manuh aru Lazarus

¹⁹“Ekjon dhuni manuh thakise, jun beguni rong aru bhal mihin kapur pindhi kene, hodai din bisi bhal pora bhoj khai thakise.” ²⁰“Aru Lazarus koi kene ekjon gorib manuh thakise, jun ke tai laga dorja te rakhi dise, aru tai laga gaw te ghaw khan bhorta thakise,” ²¹“tai dhuni manuh laga mez pora giri thaka tukra khan khabole mon korise; kintu kutta khan ahhi kene tai laga ghaw khan chatise.” ²²“Hei gorib manuh mori jaise; aru sorgoduth khan pora taike Abraham laga kat te loi jaise. Dhuni manuh bhi mori jaise aru taike kobor dise,” ^a a v22 Abraham laga kat: etu Yehudi khan laga ekta chobi ase, kot te dharmik manuh khan mora pichete aram pai thakise, aru mora pora jee utha ke rukhi thakise. ²³“aru kobor bhitorte, dukh pai thaka homoite, tai upor te sa-i kene door te Abraham ke, aru tai laga kat te Lazarus ke dikhise.” ^b b v23 Hades tu mora manuh khan laga jaga ase, mrityu aru hekh bichar laga majote rukhi thaka jaga — etu hekh bichar laga jaga logote eke nohoi. ²⁴“Tai jor pora matise, ‘Baba Abraham, moike doya koribi. Lazarus ke pathai dibi, jun tai laga anguli laga agha pani te dubai kene moi laga jiba thanda kori dibo, kilemane moi etu juu-lov te bisi dukh pai ase.’”

²⁵“Kintu Abraham koise, ‘Bacha, mon te rakhibi: tumi tumi laga jivon te bhal jinis khan paise, aru Lazarus thik tenekena biya jinis khan paise. Etiya tai yate aram pai ase, aru tumi dukh pai ase.’” ²⁶“‘Etu sob pora bahar te, amikhan aru tumikhan laga majote ekta dangor khai ase, etu nimite kun yate pora tumikhan logote jabole mon kore tai jabo napare, aru tate pora kun bhi amikhan logote ahhibo napare.’”

²⁷“Titia tai koise, ‘Tene hoile moi tumike binti kori ase, baba, taike moi laga baba laga ghor te pathai dibi,’” ²⁸“‘kilemane moi laga pasta bhai ase—tai pora tarkhan ke hoshiar kori dibi, eneka hoile tarkhan bhi etu dukh laga jaga te nahhibo.’”

²⁹“Kintu Abraham koise, ‘Tarkhan logote Moses aru Bhabobadi khan ase; tarkhan ke taikhan laga kotha huni bole dibi.’”

³⁰“Tai koise, ‘Nohoi, baba Abraham, kintu jodi mora manuh majot pora ekjon tarkhan logote jabo, tene hoile tarkhan mon ghurabo.’”

³¹“Tai pora taike koise, ‘Jodi tarkhan Moses aru Bhabobadi khan laga kotha nahune, tene hoile mora pora ekjon jee uthile bhi tarkhan biswas nakoribo.’”