Luke 16

16 ¹Ana awui sākhangatha̱binglila hānga, "Kashānga mi akhawuili lanse akha leisai, kala lanse china awui lan shaikashimāna da awuitungli kaphen khuirai. ²Ana ali hokhuida hānga, 'Nawui pongli ina shākahai hi khina? Nawui lanse ot sākahai chi ili chitheimilu, kaja nana lanse maleiluimara.'

³"Lanse china khalattali hānga, 'Ina khi sarakhala? Iwui akhavāna iwui otpam khuihaira. Chui khavai ina yāng maleimana, kala poda khavai ina khayak.' ⁴Ina khi sāra kaji theihaira, chithākha ina lanse otpam eina khuishokhai tharan, mibingna ili athumwui shimli zang ngasakra.' ⁵Ana awui akhavāwui kashuka mibing chi akha akhali hokhuilaga, khare chili, 'Iwui akhavāli nana kayākha shukhaili?' da ngahāna. ⁶Ana hānga, 'olive thao napon shākha shukhaili.' Ana ali hānga, 'Nawui leiman kapi khuilaga, katotsisi pamda, hangphangā kapilu.' ⁷Chiwui thili ana khangatei chili ngahāna, 'Chithākha na, kayākha shukhaili?' 'kehu napon shākha,' da ana hānga. 'Nawui leiman kapi khuilu,' da ana ali hānga, 'kala hangchishat kapilu.'

⁸"Akhavā china makhamashung lanse chi awor eina sākahaiwui vang sochikatta hānga, kaja okthot hiwui naongarā chi kahorwui naongarāwui lāngda khalattawui thotwui mibingli themmeikap. ⁹Ina nathumli kahāngna, okathuiwui lan eina nathum khalattawui vang ngasotnao sāmilu, chithākha lan chi kānhai tharan, athumna nathumli katang makhavai pamkhavaili zang ngasakra. ¹⁰Kateo otli horzakta a chi hakta otlila horzakta; kateo otli makhamashunga a chi hakta otlila makhamashunga. ¹¹Chithākha nathum okathuiwui lanli horzakta maleiakha, khipākha nathumli akachanga kashāng horsangmirakhala? ¹²Kala nathum mi kateiwui otli horzakta maleiakha, khipākha nathumli nathum khalattawui chi mirakhala? ¹³Shimwui rao khipānakha akhavā khani otram mathārarmana. Ana akhali ningkachaira kala akhali leishira, maningakha akhali singtitta akhali sānhaira. Nathumna ithumwui Avā kala lan khani ngaraichada otram mathārarmana."

¹⁴Lupāli leishi Phariseebingna hi saikora shālaga ali mana̱shiya.

¹⁵Ana athumli hānga, "Nathumna mibingwui mangāli nathum khalatta mashungkhui, kha ithumwui Avāna nathumwui ning thei. Mibingwui ngachaili aman kasak hi ithumwui Avāwui mangāli ningkakachai otna."

¹⁶"Ain eina marānbing chi Johnwui atam eina tangda leisai; chi eina thuida, ithumwui Avā wungramwui paokaphā hāshoka, kala mi saikorana yāng eina chiwui alungli zangki. ¹⁷Kha ainwui mayekkainao akha shimānhaira kajile, kazingram eina okathui shimān kaji paimei."

¹⁸"Kachikathāna preiva̱li pānghailaga khangatei akhali ngakumhaiakha ana phokaphāna; kala gaharana pānghai preiva̱li ngakuma mipā chila phokaphāna."

Kashānga kala Lazarus

¹⁹"Hungrisi kala khamenga kachon ngavaida, thangkachida mavātlak eina zātkhān kasā kashānga mi akha leisai. ²⁰Kala angun moksā eina hak kahai Lazarus kaho kachāma mi akha awui khāmongli khaisai, ²¹kashānga chiwui tabletungli kongluida zātpā chi zāngai; kha fabing eina tangda awui moksā rāmaleka. ²²Kachāma mi chi thihaowa; kazingraobingna ali Abrahamwui ngalemli khuivai. Kashānga chila thida chifahaowa, ^a a v22 Abrahamwui ngalem: khamashung khangarongbing thikahaiwui thili ringshokwui atam khāngkatheida ngasāmkakhui ringphā pamli khaji Jihudibingwui khangachāyanna. ²³kala chikhurli, rekharekta, ana mik yangkakā eina Abrahamli katāva̱li kala Lazarusli awui ngalemli thei. ^b b v23 Hades chiya kathibingwui ram, kathi kala naomeikapwui bicharwui azingli khāngkathei pamna—naomeikapwui bichar pamla chi manātmana. ²⁴Ana vaoda hānga, 'Avā Abraham, ili khalumashanmilu. Lazarusli chihovāmilu, ana awui pāng mareng atung tara̱li chumkhuilaga imale khamakui ngasakmiga, kaja ina meiwon hiwui alungli khananglakhaira.'

²⁵"Kha Abrahamna hānga, 'Inao, phaningunglu: nawui mirin peida kaphā otbing samphanghaira, kala Lazarusna chithada sāda makaphā otbing samphanga. Ara ana hili ringphā samphangda leili, kala nana khananglakhaira. ²⁶Saikora hi hailaga, khareia kathuk akhana ithum eina nathum kaingasakhaira, chiwui vang eina hiwui eina nathumli kānkā khangaibing china makānkarrarmana, kala apam chiwui eina ithumli kachikathāna makānkarrarmana.'

²⁷"Ana hānga, 'Chithākha, avā, ina nali poda khangakaona, ali iwui avāwui shimli kaishalu, ²⁸kaja ina ichinā ngarā phangā lei; athumla rekharek pam hili marā khavai ana athumli hāngmathiranu.'

²⁹"Kha Abrahamna hānga, 'Athumli Moses eina marānbing lei; athumna athumli nganāranu.'

³⁰Ana hānga, 'Maningmana, Ava Abraham, kha kathiwui eina kachikathā akha athumli vātlakha, athumna ning ngateira.'

³¹Ana ali hānga, 'Athumna Moses eina marānbingli manganākha, kachikathā akha kathiwui eina ringshokra tangda athum makhuisangpaimana.'"