Igoochin Kwanda Melekto Mang'unet ne po Utaatyet
Chiito ne riibei tuguuk ne machei kotyakta poisyennyi kolelgei kaatap kiptaiyandennyi si konyoor choronok, ak kilas agobo utaatyennyi. Kaboortos komosyon tugul ko robinik, amu momi chii ne muuchi koboisyechi Kwandanyo ak robinik. Yeityo chiito ne po koik ak Lazarus, ak keriinget ne momuuchi chii age tugul kong'asta ye kagobek.
16 1Ki leenji kasubikyik agine kole, “Ko ki mi chii age ne mogornatindet ne ki tinyei chiito ne riibei tuguukyik, ne ki kimwachi kole kobees tuguukyik. 2Koguur ineendet ak kole, ‘Nee ni ne kase agobo inyee? Iboorwo riibetap tuguuk, amu momuuchi iriip kogeny.’
3“Ki le chiichooto ne riibei tuguuk eng' muguleldanyi, ‘Ayai nee? Namei kiptaiyandennyu poisyennyu eng' anee. Mamuuchi abal amu matinye kimnateet, ak alilan asaa.’ 4Angen kiit ne ayai, si ye kaistoo eng' poisyoni, koaachwo piik eng' meng'otosyekwak.’ 5Koguur pichu che lelei kiptaiyandennyi, age tugul ak age, ak koteebe ne tai kole, ‘Ole tai ne ilelini kiptaiyandennyu?’ 6Ki le, ‘Karogutik pogol che po mwaetap mseituni.’ Koleenji, ‘Ip sireeng'ung', itebi chok, ak isir artam ak taman.’ 7Yeityo koteebe age, ‘Ak inyee, ole tai ne ilelini?’ Ki le, ‘Karogutik pogol che po ngano.’ ‘Ip sireeng'ung',’ koleenji, ‘ak isir tamanwogik sisiit.’
8“Ki las kiptaiyat chiichooto ne riibei tuguuk ne ma po iman amu ki yai eng' utaatyet, amu utaateen lagogap pichu po emoni eng' ng'aleegchwak kosiir lagogap lapkeiyet. 9Amwaiwok ale, oyaei choronok eng' mogornatetap ng'wony, si ye kagobata, kotaachok eng' meng'otosyek che po koigeny. 10Age tugul ne po iman eng' kiy ne ming'in, ko po iman agine eng' ne oo; ak age tugul ne ma po iman eng' kiy ne ming'in, ko ma po iman agine eng' ne oo. 11Ngot anyun koma oegu che po iman eng' mogornatetap ng'wony, ng'oo ne imang'uwok eng' mogornateet ne po iman? 12Ak ngot koma oek che po iman eng' tuguugap chii age, ng'oo ne igoochook ne po okweek? 13Ma mi otwogindet ne imuuchi koot kiptainik aeng'. Iwech age ak icham age, anan koriipei age ak kosasei age. Momuuchi oot Kwandanyo kobooto mogornateet.”
14Ki kas pharisaik, che ki chame rabiisyek, tuguuchu tugul, ak kirosyini ineendet.
15Koleenji, “Oegunoogei piik che po iman eng' taitap piik, ago ngen Kwandanyo mugulelwogikwok. Amu kiy ne kilasei eng' kwenutap piik, ko kererusot eng' Kwandanyo.”
16“Ki mi Ng'atuutyet ak maotik agoi Johana; kong'etee yooto, ko kiamei logoiywek che myach che po laitornatetap Kwandanyo, ak age tugul chutei eng' kimnateet. 17Ago yomeksei kipsengwet ak ng'wony kosiirto, kosiir tisyet agenge ne po Ng'atuutyet kobata.”
18“Age tugul ne oonei osotyonnyi ak kotun age, ko gesesen; ak ne ituni kobogoryo ne ki kigeon manong'otyondennyi, ko gesesen agine.”
Chiito ne Mogornatindet ak Lazaro
19“Ko ki mi chii age ne mogornatindet ne ki laktoe ngoroik che poldoiyoot ak che korooron miising', ak ki boiboitunei ak amitwogik che chaang' peetuut age tugul. 20Ak ki kigonde chii age ne pooryeet ne kainennyi Lazaro eng' kurgeetap koonnyi, ne ki nyiitootiin simbiryek, 21ne ki mache koam tuguuk che sachin kong'etee mesaitap chiichooto ne mogornatindet; agot sesenik kobwa ak komele simbiryekyik. 22Ki me chiichooto ne pooryeet; ak ki ip malaikaisyek ineendet kwo ole mi Abraham. Ki me agine chiichooto ne mogornatindet ak ki kitup, a a v22 ole mi Abraham: ne po boortaetap Yahudik ne po olendo ne po kaanyit ole ki meng'iisyei piik che po iman ye kagome, koiyonchini ng'eetutyet. 23ak eng' kurubet, eng' pichiindo ne oo, kong'eet koonyek parak ak kogeer Abraham loo, ak Lazaro ole mi ineendet. b b v23 Hades ko emetap piik che kagome, olendo ne kiiyoni eng' kwenutap meet ak kirwoogindet ne po let — ma kogergei ak olendap kirwoogindet ne po let. 24Ki riir kole, ‘Abba Abraham, iriiree anee. Iyook Lazaro, kosonu letap eunnyi eng' peek ak koisis ng'elyeptanyu, amu ami nyalilda eng' liplibenoni.’
25“Ago ki le Abraham, ‘Lakweet, ibwaat: kiisich tuguuk che myach eng' saboondang'ung', ak Lazaro ko uu nooto tuguuk che ya. Nguno ko kikaanyinji yu, ak inyee ko imi pichiindo. 26Ak kosiir tuguuchu tugul, ki kiiride keriingot ne oo eng' kwenunnyo ak okweek, si pichu che mache kolanda kong'etee yu koba okweek mamuuchi, ak ma komuuch chii age kolandae yooto konyoonech.’
27“Ak ki le, ‘Asaain anyun, abba, iyook ineendet kootap abba, 28amu atinye tupchonik muut—ingoiteechi icheek, si ma pwa agine oldap pichiindoni.’
29“Ago ki le Abraham, ‘Tinye Musa ak maotik; ingogas icheek.’
30Ki le, ‘Achicha, abba Abraham, ago ngot koba ole mi icheek chii age ne kong'eetu kobun che kagome, kosigu.’
31Koleenji, ‘Ngot koma kas Musa ak maotik, komakoyan agot ngo kong'eetu chii age kobun che kagome.’”