ሉቃስ 16

16 ¹ለደቀ መዛሙርቱም እንዲህ አለ፤ “ንብረቱን እያባከነ ነው ተብሎ የተከሰሰ መጋቢ የነበረው አንድ ባለጠጋ ሰው ነበረ። ²ጠርቶም፣ ‘ስለ አንተ የምሰማው ይህ ምንድር ነው? ከእንግዲህ መጋቢ ልትሆን አትችልምና ስለ መጋቢነትህ ሒሳብ ስጠኝ’ አለው።

³“መጋቢውም በልቡ እንዲህ አለ፤ ‘ጌታዬ መጋቢነቴን ከእኔ ሊወስድ ነውና ምን ላድርግ? ለመቆፈር ጕልበት የለኝም፣ ለመለመን አፍራለሁ።’ ⁴ከዚህ ሥራ ስወርድ ሰዎች ወደ ቤታቸው እንዲቀበሉኝ፣ ምን ማድረግ እንዳለብኝ ዐውቃለሁ።’ ⁵የጌታውንም ባለ ዕዳዎች አንድ በአንድ ጠራና የመጀመሪያውን፣ ‘ለጌታዬ ስንት ዕዳ አለብህ?’ ብሎ ጠየቀው። ⁶እርሱም፣ ‘መቶ መስፈሪያ የወይራ ዘይት’ አለ። መጋቢውም፣ ‘ደረሰኝህን ውሰድና ተቀምጠህ ፈጥነህ አምሳ ብለህ ጻፍ’ አለው። ⁷ቀጥሎም ሌላውን፣ ‘አንተስ ስንት ዕዳ አለብህ?’ ብሎ ጠየቀው። እርሱም፣ ‘መቶ መስፈሪያ ስንዴ’ አለ። ‘ደረሰኝህን ውሰድና ሰማንያ ብለህ ጻፍ’ አለው።

⁸“ጌታውም ዐመፀኛውን መጋቢ በብልኀት ስለ ሠራ አደነቀው፤ የዚህ ዓለም ልጆች ከብርሃን ልጆች ይልቅ ለራሳቸው ትውልድ ይበልጥ ብልኆች ናቸውና። ⁹እላችኋለሁ፤ ዓለማዊ ሀብት በሚያልቅበት ጊዜ ወደ ዘላለማዊ ማደሪያ እንዲቀበሏችሁ፣ በእርሱ ለራሳችሁ ወዳጆችን አፍሩ። ¹⁰በትንሹ የታመነ በብዙም ይታመናል፤ በትንሹ ዐመፀኛ የሆነ በብዙም ዐመፀኛ ነው። ¹¹እንግዲህ በዓለማዊ ሀብት ካልታመናችሁ፣ እውነተኛውን ባለጠግነት ማን አደራ ይሰጣችኋል? ¹²በሌላውም ሰው ነገር ካልታመናችሁ፣ የራሳችሁ የሆነውን ማን ይሰጣችኋል? ¹³ማንም የቤት አገልጋይ ለሁለት ጌቶች ሊገዛ አይችልም። አንዱን ይጠላል ሌላውንም ይወዳል፣ ወይም ለአንዱ ይጠጋል ሌላውንም ይንቃል። ለአባታችንም ለሀብትም መገዛት አትችሉም።”

¹⁴ገንዘብን የሚወዱ ፈሪሳውያንም ይህን ሁሉ ሰምተው ያፌዙበት ነበር።

¹⁵እርሱም እንዲህ አላቸው፤ “እናንተ በሰዎች ፊት ራሳችሁን ታጸድቃላችሁ፤ አባታችን ግን ልባችሁን ያውቃል። በሰዎች ዘንድ ከፍ ከፍ የሚባለው በአባታችን ዘንድ አስጸያፊ ነው።”

¹⁶“ሕግና ነቢያት እስከ ዮሐንስ ድረስ ነበሩ፤ ከዚያ ወዲህ የአባታችን መንግሥት ወንጌል ይሰበካል፣ ሁሉም ሰው በኀይል ወደ እርሷ ይገባል። ¹⁷ነገር ግን ከሕግ አንዲት ነጥብ ከምትወድቅ ይልቅ ሰማይና ምድር ቢያልፉ ይቀላል።”

¹⁸“ሚስቱን ፈትቶ ሌላ የሚያገባ ሁሉ ያመነዝራል፤ ከባሏ የተፈታችውን ሴት ማግባትም ዝሙት ነው።”

ባለጠጋውና አልዓዛር

¹⁹“ቀይ ሐምራዊ ልብስና ቀጭን በፍታ ለብሶ በየቀኑ ደምቆ ይደገስ የነበረ አንድ ባለጠጋ ሰው ነበረ። ²⁰አልዓዛር የሚባል አንድ ድኻ ሰውም በቍስል ተሸፍኖ በደጁ ተኝቶ ነበር፤ ²¹ከባለጠጋው ማዕድ የሚወድቀውን ፍርፋሪ ለመብላት ይመኝ ነበር፤ ውሾችም እንኳ መጥተው ቍስሉን ይልሱ ነበር። ²²ድኻውም ሞተ፤ መላእክትም ወደ አብርሃም ዕቅፍ ወሰዱት። ባለጠጋውም ደግሞ ሞተና ተቀበረ፤ ^a a v22 የአብርሃም ዕቅፍ፦ ጻድቃን ከሞት በኋላ ትንሣኤን ሲጠብቁ ያረፉበትን የመጽናናት ስፍራ የሚያመለክት የአይሁድ ምሳሌ ነው። ²³በመቃብርም ውስጥ፣ በሥቃይ ላይ ሳለ ዐይኑን አንሥቶ አብርሃምን በሩቅ፣ አልዓዛርንም በዕቅፉ አየ። ^b b v23 ሲኦል የሙታን ዓለም ነው፤ በሞትና በመጨረሻው ፍርድ መካከል ያለው የመጠበቂያ ስፍራ ነው — ከመጨረሻው የፍርድ ስፍራ ጋራ አንድ አይደለም። ²⁴እርሱም ጮኾ፣ ‘አባት አብርሃም ሆይ፣ ማረኝ፤ በዚህ ነበልባል ውስጥ እሠቃያለሁና አልዓዛርን የጣቱን ጫፍ በውሃ ነክሮ አንደበቴን እንዲያበርድልኝ ላከው’ አለ።

²⁵“አብርሃም ግን እንዲህ አለ፤ ‘ልጄ ሆይ፣ አስታውስ፤ አንተ በሕይወትህ መልካሙን ተቀብለሃል፣ አልዓዛርም እንዲሁ ክፉውን ተቀብሏል። አሁን እርሱ በዚህ ይጽናናል፣ አንተ ግን ትሠቃያለህ። ²⁶ከዚህም ሁሉ ባሻገር፣ በእኛና በእናንተ መካከል ታላቅ ገደል ጸንቷል፤ ስለዚህ ከዚህ ወደ እናንተ ሊሻገሩ የሚፈልጉ አይችሉም፣ ከዚያም ወደ እኛ ሊሻገር የሚችል የለም።’

²⁷“እርሱም፣ ‘እንግዲያውስ አባት ሆይ፣ ወደ አባቴ ቤት እንድትልከው እለምንሃለሁ፤ ²⁸አምስት ወንድሞች አሉኝና እነርሱም ደግሞ ወደዚህ የሥቃይ ስፍራ እንዳይመጡ ያስጠንቅቃቸው’ አለ።

²⁹“አብርሃም ግን፣ ‘ሙሴና ነቢያት አሏቸው፤ እነርሱን ይስሙ’ አለ።

³⁰እርሱም፣ ‘አይ፣ አባት አብርሃም ሆይ፣ ነገር ግን ከሙታን አንዱ ወደ እነርሱ ቢሄድ ንስሓ ይገባሉ’ አለ።

³¹እርሱም፣ ‘ሙሴንና ነቢያትን የማይሰሙ ከሆነ፣ ከሙታን አንዱ ቢነሣም እንኳ አይታመኑም’ አለው።”