ሉቃስ 17

17 ¹ደቀ መዛሙርቱን እንዲህ አላቸው፤ “ማሰናከያ ሳይመጣ አይቀርም፤ ነገር ግን በእርሱ በኩል ለሚመጣው ሰው ወዮለት! ²ከእነዚህ ታናናሾች አንዱን ከሚያሰናክል ይልቅ፣ የወፍጮ ድንጋይ በአንገቱ ታስሮ ወደ ባሕር ቢጣልበት ይሻለዋል።

³“ራሳችሁን ተጠንቀቁ። ወንድምህ ቢበድል ገሥጸው፤ ንስሐ ቢገባም ይቅር በለው። ⁴በቀን ውስጥ ሰባት ጊዜ ቢበድልህ፣ ሰባት ጊዜም ተመልሶ ‘ንስሐ ገብቻለሁ’ ቢልህ፣ ይቅር በለው።”

⁵ሐዋርያትም ጌታን፣ “እምነታችንን ጨምርልን!” አሉት።

⁶ጌታም እንዲህ አለ፤ “እንደ ሰናፍጭ ቅንጣት የምታክል እምነት ቢኖራችሁ፣ ይህን የሾላ ዛፍ ‘ተነቅለህ በባሕር ተተከል’ ብትሉት፣ ይታዘዛችሁ ነበር። ⁷ከእናንተ መካከል የሚያርስ ወይም በጎች የሚጠብቅ ባሪያ ያለው ማን ነው፣ ከዕርሻ ሲገባ ‘ፈጥነህ መጥተህ በማዕድ ተቀመጥ’ የሚለው? ⁸ከዚህ ይልቅ ‘እራቴን አሰናዳ፤ እስክበላና እስክጠጣ ድረስ ታጥቀህ አገልግለኝ፤ ከዚያም አንተ ትበላለህ፤ ትጠጣለህ’ አይለውም?

⁹“ባሪያው የታዘዘውን ስላደረገ ያመሰግነዋልን? ¹⁰እናንተም እንደዚሁ የታዘዛችሁትን ሁሉ ካደረጋችሁ በኋላ፣ ‘የማንጠቅም ባሪያዎች ነን፤ የሚገባንን ብቻ ነው ያደረግነው’ በሉ።”

አባታችን ዐሥር ለምጻሞችን ፈወሰ

¹¹ወደ ኢየሩሳሌም ሲጓዝ፣ በሰማርያና በገሊላ መካከል ዐለፈ። ¹²ወደ አንድ መንደር ሲገባ፣ ለምጽ ያለባቸው ዐሥር ሰዎች ተገናኙት። ርቀውም ቆሙ፤

¹³ድምፃቸውንም ከፍ አድርገው፣ “ኢየሱስ ጌታ ሆይ፣ ማረን!” ብለው ጮኹ።

¹⁴ባያቸውም ጊዜ፣ “ሄዳችሁ ራሳችሁን ለካህናት አሳዩ” አላቸው። ሲሄዱም ነጹ።

¹⁵ከእነርሱም አንዱ እንደ ተፈወሰ ባየ ጊዜ፣ ድምፁን ከፍ አድርጎ አባታችንን እያመሰገነ ተመለሰ፤ ¹⁶በኢየሱስም እግር ሥር በግንባሩ ተደፋ፤ አመሰገነውም። እርሱም ሳምራዊ ነበር።

¹⁷ኢየሱስም፣ “ዐሥሩ አልነጹምን? ታዲያ ዘጠኙ የት አሉ? ¹⁸ከዚህ መጻተኛ በቀር፣ ተመልሶ ለአባታችን ክብር የሚሰጥ ማንም አልተገኘምን?” ¹⁹እርሱንም፣ “ተነሥተህ ሂድ፤ እምነትህ አድኖሃል” አለው።

መንግሥቱ አስቀድሞ በመካከላችሁ ነው

²⁰ፈሪሳውያን የአባታችን መንግሥት መቼ እንደምትመጣ በጠየቁት ጊዜ፣ እንዲህ ብሎ መለሰላቸው፤ “የአባታችን መንግሥት በምትታይ ምልክት አትመጣም፤ ²¹‘እነሆ፣ እዚህ ናት!’ ወይም ‘እዚያ ናት!’ ተብሎም አይባልም፤ የአባታችን መንግሥት በመካከላችሁ ናትና።”

²²ደቀ መዛሙርቱንም እንዲህ አላቸው፤ “የሰው ልጅ ከሚገለጥባቸው ቀኖች አንዱን ለማየት የምትመኙበት ዘመን ይመጣል፤ ነገር ግን አታዩትም። ²³‘እነሆ፣ እዚያ ነው!’ ወይም ‘እነሆ፣ እዚህ ነው!’ ይሏችኋል፤ አትሂዱ፤ አትከተሏቸውም። ²⁴መብረቅ ብልጭ ብሎ ከሰማይ ዳር እስከ ዳር እንደሚያበራ፣ የሰው ልጅም በቀኑ እንዲሁ ይሆናል። ²⁵ነገር ግን አስቀድሞ ብዙ መከራ ሊቀበል፣ በዚህም ትውልድ ሊጣል ያስፈልገዋል። ²⁶በኖኅ ዘመን እንደ ሆነው፣ በሰው ልጅ ዘመንም እንዲሁ ይሆናል። ²⁷ኖኅ ወደ መርከብ እስከገባበት ቀን ድረስ፣ ይበሉ፣ ይጠጡ፣ ያገቡና ይጋቡ ነበር፤ የጥፋት ውሃም መጥቶ ሁሉንም አጠፋ። ²⁸በሎጥ ዘመንም እንዲሁ ነበር፤ ይበሉ፣ ይጠጡ፣ ይገዙ፣ ይሸጡ፣ ይተክሉ፣ ይሠሩ ነበር፤ ²⁹ነገር ግን ሎጥ ከሰዶም በወጣበት ቀን፣ እሳትና ዲን ከሰማይ ዘነበ፤ ሁሉንም አጠፋ፤ ³⁰የሰው ልጅ በሚገለጥበት ቀንም እንዲሁ ይሆናል። ³¹በዚያ ቀን፣ በሰገነት ላይ ያለ ሰው ዕቃው በቤት ውስጥ ቢሆንም ሊወስደው አይውረድ፤ እንዲሁም በዕርሻ ያለ ሰው ወደ ኋላ አይመለስ። ³²የሎጥን ሚስት አስቡ። ³³ነፍሱን ሊያድን የሚፈልግ ያጠፋታል፤ ነፍሱን የሚያጠፋ ግን ጠብቆ ያኖራታል። ³⁴እላችኋለሁ፣ በዚያች ሌሊት ሁለት ሰዎች በአንድ ዐልጋ ላይ ይሆናሉ፤ አንዱ ይወሰዳል፣ ሌላው ይቀራል። ³⁵ሁለት ሴቶች አብረው ይፈጫሉ፤ አንዷ ትወሰዳለች፣ ሌላዋ ትቀራለች።” ^a a v35 የጥንቶቹ ቅጂዎች እዚህ ላይ ቍጥር 36 የላቸውም፤ የኋለኞቹ ቅጂዎች ግን፣ “ሁለት ሰዎች በዕርሻ ይሆናሉ፤ አንዱ ይወሰዳል፣ ሌላው ይቀራል” የሚለውን ይጨምራሉ።

³⁷እነርሱም፣ “ጌታ ሆይ፣ የት?” ብለው ጠየቁት። እርሱም፣ “በድን ባለበት ሁሉ፣ አሞራዎች በዚያ ይሰበሰባሉ” አለ።