ሉቃስ 17 FHB Father's Heart Bible™

17 ¹ንደቀ መዛሙርቱ ድማ ከምዙይ በሎም፦ “መዐንቀፊ ካብ ምምፃእ ኣይተርፍን እዩ፤ ነቲ ብእኡ ዝመፅእ ግና ወይለኡ! ²ካብዞም ናእሽቱ ንሓደ ኻብ ዘዐንቅፍ፥ መዲድ ኣብ ክሳዱ ተሰቒሉ ናብ ባሕሪ እንተ ተደርበየ ይሐሾ።

³“ንባዕልኻትኩም ተጠንቀቑ። ሓውካ እንተ በደለ ገስፆ፤ ንስሃ እንተ ገበረ ድማ ሕደገሉ። ⁴ኣብ መዓልቲ ሸውዓተ ሳዕ ኣባኻ እንተ በደለ፥ ሸውዓተ ሳዕ ከዓ ተመሊሱ ‘ንስሃ ገይረ’ እንተ በለካ፥ ሕደገሉ።”

⁵እቶም ሃዋርያት ድማ ንጐይታ “እምነት ወስኸልና!” በልዎ።

⁶ጐይታ ድማ “ከም ፍረ ኣድሪ እትኸውን እምነት እንተ ትህልወኩም፥ ነዛ ኦም ሰግሞ እዚኣ ‘ተማሕዊ ኣብ ባሕሪ ድማ ተተኸሊ’ ምበልኩምዋ፥ ንሳ ኸዓ ምተኣዘዘትኩም። ⁷ካባኻትኩም ዝሓርስ ወይ ኣባጊዕ ዝሕሉ ባርያ ዘለዎ መን እዩ፥ ካብ ግራት ምስ ኣተወ ‘ቀልጢፍካ ና፥ ኣብ ማእዲ ተቐመጥ’ ዝብሎ? ⁸እኳ ደኣ ‘ድራረይ ኣዳሉለይ፥ ኣነ እናበላዕኩን እናሰተኹን ተዓጢቕካ ኣገልግለኒ፥ ድሕሪዙይ ንስኻ ብላዕን ስተን’ ዶ ኣይብሎን?

⁹ነቲ ባርያ እቲ ዝተኣዘዞ ስለ ዝገበረ የመስግኖ ድዩ? ¹⁰ከምኡ ኸዓ ንስኻትኩም ዝተኣዘዝኩምዎ ዅሉ ምስ ገበርኩም፥ ‘ንሕና ዘይንረብሕ ባሮት ኢና፤ እቲ ክንገብሮ ዝግበኣና ጥራሕ ኢና ዝገበርና’ በሉ።”

ኣቦ ንዓሰርተ ለምፃማት የሕዊ

¹¹ናብ ኢየሩሳሌም ክኸይድ እንተሎ ድማ፥ ብማእኸል ሰማርያን ገሊላን ይሓልፍ ነበረ። ¹²ናብ ሓንቲ ዓዲ ምስ ኣተወ፥ ዓሰርተ ለምፂ ዝነበሮም ሰባት ተቐበልዎ። ርሕቕ ኢሎም ከዓ ቆሙ፤

¹³ዓው ኢሎም ድማ “ኦ ኢየሱስ መምህር፥ ምሓረና!” በሉ።

¹⁴ምስ ረአዮም ድማ “ኪዱ፥ ንባዕልኻትኩም ንኻህናት ኣርእዩ” በሎም። ክኸዱ እንተለዉ ኸዓ ነፅሁ።

¹⁵ካብኣቶም ሓደ ኸዓ ኸም ዝሓወየ ምስ ረአየ፥ ዓው ኢሉ ንኣቦና እናመስገነ ተመለሰ፥ ¹⁶ኣብ እግሪ ኢየሱስ ድማ ብገፁ ተደፊኡ ኣመስገኖ። ንሱ ኸዓ ሳምራዊ ነበረ።

¹⁷ኢየሱስ ድማ “ዓሰርተ ዶ ኣይነፅሁን? እቶም ትሽዓተ ኣበይ ኣለዉ? ¹⁸ነዚ ጓና እዙይ ገዲፍካስ፥ ተመሊሱ ንኣቦና ኽብሪ ዝህብ ሓደ እኳ ኣይተረኽበን ድዩ?” ¹⁹ንእኡ ድማ “ተንሲእካ ኪድ፤ እምነትካ ኣድሒናትካ እያ” በሎ።

መንግስቲ ድሮ ኣብ ማእኸልኩም ኣላ

²⁰እቶም ፈሪሳውያን መንግስቲ ኣቦና መዓስ ከም እትመፅእ ምስ ሓተትዎ፥ ከምዙይ ኢሉ መለሰሎም፦ “መንግስቲ ኣቦና ብምዕዛብ ኣይትመፅእን፥ ²¹‘እንሆ ኣብዙይ!’ ወይ ‘ኣብቲ!’ ኢሎም ከዓ ኣይብሉን፤ እንሆ መንግስቲ ኣቦና ኣብ ማእኸልኩም ኣላ እሞ።”

²²ንደቀ መዛሙርቱ ድማ ከምዙይ በሎም፦ “ካብ መዓልቲታት ወዲ ሰብ ሓንቲ መዓልቲ ኽትርእዩ እትምነይሉ መዓልቲ ኽመፅእ እዩ፥ ግናኸ ኣይክትርእይዋን ኢኹም። ²³‘እንሆ ኣብቲ!’ ወይ ‘እንሆ ኣብዙይ!’ ድማ ክብሉኹም እዮም፤ ኣይትኺዱ፥ ኣይትስዓብዎምውን። ²⁴ከምቲ መብረቕ ካብ ሓደ ወገን ሰማይ ክሳዕ ካልእ ወገኑ ባርቒቑ ዘብርህ፥ ወዲ ሰብ ከዓ በታ መዓልቱ ኸምኡ ክኸውን እዩ። ²⁵ግና ቅድም ብዙሕ መከራ ኽቕበል፥ በዚ ትውልዲ እዙይ ድማ ክንፀግ ይግባእ። ²⁶ከምቲ ኣብ መዓልቲታት ኖህ ዝነበረ፥ ኣብ መዓልቲታት ወዲ ሰብ ድማ ከምኡ ክኸውን እዩ። ²⁷ኖህ ናብ መርከብ ክሳዕ ዝኣተወ መዓልቲ፥ ይበልዑን ይሰትዩን ይምርዓዉን የመርዕዉን ነበሩ፤ ማይ ጥፍኣት ድማ መፂኡ ንዅሎም ኣጥፍኦም። ²⁸ከምኡውን ኣብ መዓልቲታት ሎጥ ኮነ፦ ይበልዑን ይሰትዩን፥ ይዕድጉ፥ ይሸጡ፥ ይተኽሉ፥ ይሃንፁ ነበሩ፤ ²⁹ሎጥ ካብ ሰዶም በታ ዝወፀ መዓልቲ ግና፥ ካብ ሰማይ ሓዊን ዲንን ዘነመ እሞ ንዅሎም ኣጥፍኦም። ³⁰በታ ወዲ ሰብ ዝግለፀላ መዓልቲ ኸዓ ኸምኡ ክኸውን እዩ። ³¹በታ መዓልቲ እቲኣ፥ እቲ ኣብ ናሕሲ ዘሎ ጥሪቱ ኣብ ውሽጢ ገዛ ኸላ፥ ከውርድ ኣይውረድ፤ ከምኡ ኸዓ እቲ ኣብ ግራት ዘሎ ንድሕሪት ኣይተመለስ። ³²ሰበይቲ ሎጥ ዘክሩ። ³³ህይወቱ ከድሕን ዝደሊ ዅሉ ከጥፍኣ እዩ፤ ህይወቱ ዘጥፍእ ግና ኸድሕና እዩ። ³⁴እብለኩም ኣለኹ፥ በታ ለይቲ እቲኣ ኽልተ ኣብ ሓደ ዓራት ክኾኑ እዮም፤ ሓደ ክውሰድ እዩ፥ እቲ ሓደ ድማ ክተርፍ እዩ። ³⁵ክልተ ኣንስቲ ብሓንሳእ ክጥሕና እየን፤ ሓንቲ ክትውሰድ እያ፥ እታ ሓንቲ ድማ ክትተርፍ እያ።” ^a a v35 እቶም ዝጠንተዩ ቅዳሓት ኣብዙይ ፍቕዲ 36 የብሎምን፤ ዳሕረዎት ቅዳሓት ግና፦ “ክልተ ሰብኡት ኣብ ግራት ክኾኑ እዮም፤ ሓደ ክውሰድ እዩ፥ እቲ ሓደ ድማ ክተርፍ እዩ” ዝብል ይውስኹ።

³⁷“ኣበይ ኦ ጐይታ?” ኢሎም ሓተትዎ። ንሱ ድማ “ሬሳ ኣብ ዘለዎ፥ ኣሞራታት ኣብኡ ክእከቡ እዮም” በሎም።