Lucas 17

17 ¹Sinabi niya sa kanyang mga alagad, “Tiyak na darating ang mga pagkakataon ng pagkakasala, ngunit sa aba ng taong pinagmumulan ng mga ito! ²Mabuti pa sa kanya na bitinan ng gilingang bato ang kanyang leeg at itapon sa dagat kaysa maging sanhi ng pagkatisod ng isa sa maliliit na ito.

³“Mag-ingat kayo. Kung magkasala ang iyong kapatid, sawayin mo siya, at kung magsisi siya, patawarin mo siya. ⁴Kung siya ay magkasala sa iyo nang pitong ulit sa isang araw, at pitong ulit ding bumalik na sinasabing, ‘Nagsisisi ako,’ patawarin mo siya.”

⁵Sinabi ng mga apostol sa Panginoon, “Dagdagan mo ang aming pananampalataya!”

⁶Sinabi ng Panginoon, “Kung mayroon kayong pananampalataya na kasinliit ng butil ng mustasa, masasabi ninyo sa punong sikomoro na ito, ‘Mabunot ka at matanim sa dagat,’ at susunod ito sa inyo. ⁷Sino sa inyo na may aliping nag-aararo o nag-aalaga ng mga tupa ang magsasabi sa kanya, pagdating nito mula sa bukid, ‘Halika agad, umupo ka sa hapag’? ⁸Hindi ba, sa halip ay sasabihin niya, ‘Ihanda mo ang aking hapunan, magbihis ka at pagsilbihan mo ako habang ako ay kumakain at umiinom, saka ka kakain at iinom’?

⁹“Pinasasalamatan ba niya ang alipin dahil ginawa nito ang iniutos sa kanya? ¹⁰Kaya kayo rin, matapos ninyong gawin ang lahat ng iniutos sa inyo, sabihin ninyo: ‘Kami ay mga aliping walang kabuluhan; ginawa lamang namin ang aming tungkulin.’”

Pinagaling ng Ama ang Sampung Ketongin

¹¹Sa kanyang paglalakbay patungong Jerusalem, siya ay dumaraan sa pagitan ng Samaria at Galilea. ¹²Habang pumapasok siya sa isang nayon, sinalubong siya ng sampung lalaking may ketong. Tumayo sila sa may kalayuan,

¹³at sumigaw nang malakas, “Jesus, Guro, mahabag ka sa amin!”

¹⁴Nang makita sila, sinabi niya, “Humayo kayo, at pakita kayo sa mga saserdote.” At habang sila ay naglalakad, sila ay gumaling.

¹⁵Ang isa sa kanila, nang makitang siya ay gumaling, ay bumalik, na malakas na pinupuri ang ating Ama, ¹⁶at nagpatirapa siya sa paanan ni Jesus, na nagpapasalamat sa kanya. At siya ay isang Samaritano.

¹⁷Sinabi ni Jesus, “Hindi ba sampu ang gumaling? Nasaan ang siyam? ¹⁸Wala bang nakitang bumalik upang magbigay-luwalhati sa ating Ama maliban sa dayuhang ito?” ¹⁹At sinabi niya sa kanya, “Tumindig ka at humayo; ang iyong pananampalataya ang nagpagaling sa iyo.”

Ang Kaharian ay Nasa Piling Na Ninyo

²⁰Nang tanungin siya ng mga Pariseo kung kailan darating ang kaharian ng ating Ama, sinagot niya sila, “Ang kaharian ng ating Ama ay hindi dumarating nang may nakikitang tanda, ²¹ni sasabihin nila, ‘Tingnan ninyo, narito!’ o ‘Naroon!’ Sapagkat ang kaharian ng ating Ama ay nasa piling na ninyo.”

²²Sinabi niya sa mga alagad, “Darating ang mga araw na maninimdim kayong makita ang isa sa mga araw ng Anak ng Tao, at hindi ninyo ito makikita. ²³Sasabihin nila sa inyo, ‘Tingnan ninyo, naroon!’ o ‘Tingnan ninyo, narito!’ Huwag kayong pupunta, huwag kayong susunod sa kanila. ²⁴Sapagkat kung paanong ang kidlat ay kumikislap at nagliliwanag sa langit mula sa isang dulo hanggang sa kabila, gayundin naman ang Anak ng Tao sa kanyang araw. ²⁵Ngunit kailangan muna niyang magtiis ng maraming bagay at itakwil ng lahing ito. ²⁶Kung paano ang mga araw ni Noe, gayundin naman ang magiging mga araw ng Anak ng Tao. ²⁷Sila ay kumakain, umiinom, nag-aasawa, at ipinagkakasal, hanggang sa araw na pumasok si Noe sa arka, at dumating ang baha at nilipol silang lahat. ²⁸Gayundin ang nangyari noong mga araw ni Lot: kumakain, umiinom, bumibili, nagbibili, nagtatanim, nagtatayo, ²⁹ngunit nang araw na umalis si Lot sa Sodoma, umulan ng apoy at asupre mula sa langit at nilipol silang lahat, ³⁰gayundin ang mangyayari sa araw na mahayag ang Anak ng Tao. ³¹Sa araw na iyon, ang sinumang nasa bubungan na may mga ari-arian sa loob ng bahay ay huwag nang bumaba pa upang kunin ang mga ito; gayundin, ang sinumang nasa bukid ay huwag nang bumalik. ³²Alalahanin ninyo ang asawa ni Lot. ³³Ang sinumang naghahangad na iligtas ang kanyang buhay ay mawawalan nito, ngunit ang sinumang mawalan ng kanyang buhay ay mapapanatili ito. ³⁴Sinasabi ko sa inyo, nang gabing iyon ay dalawa ang nasa iisang higaan: ang isa ay kukunin, at ang isa ay iiwan. ³⁵May dalawang babaing sama-samang gumigiling; ang isa ay kukunin at ang isa ay iiwan.” ^a a v35 Ang pinakamaagang mga manuskrito ay walang talata 36 dito; idinaragdag ng mga huling sipi: “Dalawang lalaki ang nasa bukid; ang isa ay kukunin at ang isa ay iiwan.”

³⁷Nagtanong sila, “Saan, Panginoon?” Sinabi niya, “Kung saan naroroon ang bangkay, doon magtitipon ang mga buwitre.”