Luka 17 FHB Father's Heart Bible™

17 ¹Naake akĩĩra arutwo aake atĩrĩ, “Maũndũ ma kũhĩngithia no nginya moke, no kaĩ mũndũ ũrĩa makoka magereire harĩ we arĩ na haaro! ²Nĩ kaba aoohererwo ihiga inene rĩa gĩthĩi ngingo na aikio iriainĩ, gũkĩra atũme ũmwe wa twana tũtũ tũnini ahĩngwo.

³“Mwĩmenyagĩrĩrei. Mũrũ wa nyũkwa angĩhĩtia, mũkaanie, na angĩĩrira, ũmũrekere. ⁴Na angĩkũhĩtĩria maita mũgwanja o mũthenya, na acooke harĩwe maita mũgwanja akiuga atĩ, ‘Nĩndĩĩrira,’ no nginya ũmũrekere.”

⁵Nao atũmwo makĩĩra Mwathani atĩrĩ, “Tuongerere wĩtĩkio witũ!”

⁶Nake Mwathani akiuga atĩrĩ, “Korwo mũrĩ na wĩtĩkio ũigana o ta mbegũ ya karatarũ, no mwĩre mũkũyũ ũyũ atĩrĩ, ‘Munũka ũkahaandwo iriainĩ,’ naguo no ũmwathĩkĩre. ⁷Nĩ ũrĩkũ wanyu ũngĩkorwo na ndungata ĩkũrĩma kana ĩkũrĩithia ng'ondu, ũngĩmĩĩra, rĩrĩa yoka yumĩte mũgũnda, atĩrĩ, ‘Ũka o rĩu ũikarĩre metha’? ⁸Githĩ ndangĩmĩĩra atĩrĩ, ‘Thondekera irio ciakwa cia hwaĩinĩ, wĩohe nguo ũndungatĩre ngĩrĩa na ngĩnyua, thuutha ũcio nĩguo wee ũrĩe na ũnyue’?

⁹“Githĩ nĩacookagĩria ndungata ĩyo ngaatho tondũ nĩĩkĩte ũrĩa yathĩtwo? ¹⁰Ũguo noguo o na inyuĩ, mwarĩkia gwĩka marĩa moothe mwathĩtwo, muugage atĩrĩ, ‘Ithuĩ tũrĩ ndungata itaagĩrĩire; twĩkĩte o wĩra witũ ũrĩa twagĩrĩirwo nĩ gwĩka.’”

Ithe witũ Ahonia Arũaru a Mangũ Ikũmi

¹¹Na rĩrĩa aathiiaga Jerusalemu, aahĩtũkagĩra gatagatĩ ka Samaria na Galili. ¹²Na rĩrĩa aatoonyaga itũũra rĩmwe, agĩtũngwo nĩ arũme ikũmi maarĩ na mangũ. Nao makĩrũgama o haraaya,

¹³makĩanĩrĩra na mũgambo mũnene atĩrĩ, “Jesũ, Mũnene, tũiguĩre tha!”

¹⁴Rĩrĩa aamoonire, akĩmeera atĩrĩ, “Thiĩi mũkeyoonanie kũrĩ athĩnjĩri Ngai.” Na rĩrĩa maathiiaga, magĩtherio.

¹⁵Nake ũmwe wao, oona atĩ nĩahonio, akĩhũndũka, akĩgoocaga Ithe witũ na mũgambo mũnene, ¹⁶nake akĩgũa, agĩturumithia ũthiũ wake thĩ magũrũinĩ ma Jesũ, akĩmũcookeria ngaatho. Na rĩrĩ, mũndũ ũcio aarĩ Mũsamaria.

¹⁷Nake Jesũ akiuga atĩrĩ, “Githĩ ti andũ ikũmi maatherio? Acio angĩ kenda marĩ kũ? ¹⁸Githĩ gũtirĩ mũndũ ũngĩ wonekire wa gũcooka nĩguo agoocithie Ithe witũ, tiga o mũndũ ũyũ wa kũngĩ?” ¹⁹Nake akĩmwĩra atĩrĩ, “Ũkĩra ũthiĩ; wĩtĩkio waku nĩguo ũkũhonetie.”

Ũthamaki Rĩu Ũrĩ Gatagatĩ Kanyu

²⁰Na rĩrĩa aũririo nĩ Afarisai atĩ Ũthamaki wa Ithe witũ ũgaakinya rĩ, akĩmacookeria atĩrĩ, “Ũthamaki wa Ithe witũ ndũũkaga na mũonere wa maitho, ²¹o na matikoiga atĩrĩ, ‘Ta rora, ũrĩ haaha!’ kana ‘Ũrĩ harĩa!’ Nĩgũkorwo Ũthamaki wa Ithe witũ ũrĩ gatagatĩ kanyu.”

²²Nake akĩĩra arutwo atĩrĩ, “Nĩgũgaakinya matukũ rĩrĩa mũkeerirĩria kuona mũthenya ũmwe wa mĩthenya ya Mũrũ wa Mũndũ, no mũtikaawona. ²³Nao mariĩmwĩra atĩrĩ, ‘Ta rorai, ũrĩ harĩa!’ kana ‘Ta rorai, ũrĩ haaha!’ Mũtikoimagare mũthiĩ, o na mũtikamarũmĩrĩre. ²⁴Nĩgũkorwo o ta ũrĩa rũheni rũhenũkaga rũkamũrĩka igũrũ kuuma mwena ũmwe nginya ũrĩa ũngĩ, noguo Mũrũ wa Mũndũ agaakorwo mũthenya wake. ²⁵No mbere ya ũguo, no nginya anyamaarĩrio nĩ maũndũ maingĩ na aregwo nĩ rũciaro rũrũ. ²⁶O ta ũrĩa gwatariĩ matukũinĩ ma Nuhu, noguo gũgaatariĩ matukũinĩ ma Mũrũ wa Mũndũ. ²⁷Andũ maarĩĩaga na makanyua, makahikania na makaheanwo kũhikio, nginya mũthenya ũrĩa Nuhu aatoonyire thabina, naguo mũiyũro wa maaĩ ũgĩũka ũkĩmaniina oothe. ²⁸Ũguo noguo gwatariĩ matukũinĩ ma Loti: andũ maarĩĩaga, makanyua, makagũra, makeendia, makahaanda, na magaaka, ²⁹no mũthenya ũrĩa Loti oimire Sodomu, mwaki na baurutu ikiura kuuma igũrũ ikĩmaniina oothe, ³⁰ũguo noguo gũgaatuĩka mũthenya ũrĩa Mũrũ wa Mũndũ akaaguũranĩrio. ³¹Mũthenya ũcio, ũrĩa wothe ũgaakorwo arĩ nyũmba igũrũ, indo ciake irĩ thĩinĩ, ndakaaharũrũke acioe; o ũndũ ũmwe, ũrĩa ũrĩ mũgũnda ndakaahũndũke na thuutha. ³²Ririkanai mũtumia wa Loti. ³³Ũrĩa wothe ũgeria kũhonokia muoyo wake, nĩakaũũrwo nĩguo, no ũrĩa ũkoorwo nĩ muoyo wake, nĩakaũtũũria. ³⁴Ngũmwĩra atĩrĩ, ũtukũ ũcio andũ eerĩ makorwo marĩ ũrĩrĩinĩ ũmwe: ũmwe nĩakooywo, na ũrĩa ũngĩ atigwo. ³⁵Nĩgũkagĩa na atumia eerĩ magĩthĩĩra hamwe; ũmwe nĩakooywo na ũrĩa ũngĩ atigwo.” ^a a v35 Maandĩko marĩa ma tene mũno matirĩ na mũhari wa 36 haaha; mabuku marĩa maandĩkirwo thuutha nĩmongereire atĩrĩ: “Arũme eerĩ magaakorwo marĩ mũgũnda; ũmwe nĩakooywo na ũrĩa ũngĩ atigwo.”

³⁷Nao makĩmũũria atĩrĩ, “Kũ, Mwathani?” Nake akĩmacookeria atĩrĩ, “Harĩa hothe harĩ na kĩimba, noho nderi ikoongana.”