Luka 18 FHB Father's Heart Bible™

18 ¹Nake Jesũ akĩmahe ngerekano ya kũmeera atĩ no mũhaka mahooyage hĩndĩ ciothe na matikoorwo nĩ hinya.

²“Thĩinĩ wa itũũra rĩmwe nĩ kwarĩ mũtuanĩri ciira ũteetigagĩra Ngai na ũtaatĩĩaga andũ. ³Naake mũtumia ũmwe wa ndigwa thĩinĩ wa itũũra rĩu nĩaathiiaga kũrĩ we akĩmwĩraga atĩrĩ, ‘Nduĩre ciira na kĩhooto harĩ thũ yakwa.’ ⁴Ihinda rĩmwe akĩrega, no thuutha-inĩ akĩĩyĩra na ngoro atĩrĩ, ‘O na gũtuĩka ndietigagĩra Ngai na ndiĩtĩĩaga andũ, ⁵nĩ ũndũ mũtumia ũyũ wa ndigwa nĩanjthĩĩnagia, nĩngũmũtuĩra ciira na kĩhooto, nĩ geetha ndakananogie na gũũka gwake kũrĩa gũtathiraga.’”

⁶Nake Mwathani akiuga atĩrĩ, “Ta thikĩrĩriai ũrĩa mũtuanĩri ciira ũcio ũtarĩ kĩhooto ekuuga. ⁷Githĩ Ithe witũ ndagaatuĩra andũ aake arĩa aamũrĩte ciira na kĩhooto, o acio mamũkayagĩra mũthenya na ũtukũ? Nĩegũtũũra amaceereria? ⁸Ngũmwĩra atĩ nĩakamatuĩra ciira na kĩhooto narua. No rĩrĩa Mũrũ wa Mũndũ agooka, nĩagakora wĩtĩkio gũkũ thĩ?”

Ngoro ĩrĩa Ĩĩnyiihĩtie Nĩĩoonaga Tha

⁹Ningĩ akĩhe amwe arĩa meehokaga o ene atĩ nĩ athingu na makĩnyarara andũ arĩa angĩ oothe ngerekano ĩno:

¹⁰“Andũ eerĩ nĩmaambatire hekarũinĩ makahooe, ũmwe aarĩ Mũfarisai, na ũrĩa ũngĩ aarĩ mũcaariria mbeeca cia igooti. ¹¹Nake Mũfarisai akĩrũgama akĩĩhooera we mwene atĩrĩ, ‘Ngai, nĩndagũcookeria ngaatho tondũ ndihaanaine na andũ arĩa angĩ, atunyani, eeki ũũru, na itharia, o na kana ta mũcaariria ũyũ wa mbeeca cia igooti. ¹²Nĩndĩĩhingaga irio maita meerĩ o kiumia; na ngarutaga gĩcunjĩ gĩa ikũmi kĩa indo ciothe iria njarĩĩkia kwĩgĩĩra.’ ¹³No mũcaariria ũcio wa mbeeca cia igooti, arũgamĩte haraaya, ndaigana o na gũtiira maitho make na igũrũ, no nĩeegũthaga gĩthũri akĩugaga, ‘Ithe witũ, njiguĩra tha, niĩ mwĩhia.’ ¹⁴Ngũmwĩra atĩ mũndũ ũyũ nĩainũkire mũciĩ aarĩkĩtie gũtuuo mũthingu, ũrĩa ũngĩ ndaatuirwo. Amu mũndũ o wothe wĩtũgagĩria nĩagaanyiihio, na ũrĩa wĩnyiihagia nĩagaatũgĩrio.”

Ũthamaki wa Ithe witũ nĩ wa Ciana

¹⁵O na ningĩ andũ nĩmaamũreheire tũkenge twao nĩguo atũhutie, no arutwo meeyoonire ũndũ ũcio makĩmakaania.

¹⁶No Jesũ agĩĩta ciana icio harĩ we akiuga atĩrĩ, “Rekei ciana ciũke kũrĩ niĩ; mũtigaciirigĩrĩrie, amu Ũthamaki wa Ithe witũ nĩ wa arĩa matariĩ ta cio. ¹⁷Ngũmwĩra na ma atĩ: mũndũ o wothe ũtangĩĩtĩkĩra Ũthamaki wa Ithe witũ ta kaana kaanini, gũtirĩ hĩndĩ akaaũtoonya.”

Kĩndũ Kĩrĩa Ũtonga ũtangĩgũra

¹⁸Nake mũnene ũmwe akĩmũũria atĩrĩ, “Mũrutani mwega, nĩ atĩa njagĩrĩirwo nĩ gwĩka nĩgeetha ngaagaya muoyo wa tene na tene?”

¹⁹Jesũ akĩmwĩra atĩrĩ, “Ũranjĩta mwega nĩkĩĩ? Gũtirĩ mũndũ mwega tiga Ithe witũ wiki. ^a a v19 Jesũ nĩerekagĩria ngoro ya mwanake ũcio kũrĩ Ithe witũ ta kĩhumo kĩa wega wothe, atarakaana wega wake mwene, no nĩkũgarũra mũndũ ũcio akĩmwerekeria kũrĩ Ithe.

²⁰Nĩũĩ maathani: ‘Ndũkanatharie, Ndũkanoorage, Ndũkanaiye, Ndũkanaruute ũira wa maheeni, Tĩĩa thoguo na maitũguo.’”

²¹Nake akiuga atĩrĩ, “Maya mothe ndũũrĩte ndĩmamenyereire kuuma ũnyinyi wakwa.”

²²Rĩrĩa Jesũ aiguire ũguo, akĩmwĩra atĩrĩ, “Nĩ harĩ ũndũ ũmwe ũgũtigairie: endia indo ciothe iria ũrĩ nacio, ũheane kũrĩ athĩĩni, na nĩũkagĩa na mũthiithũ igũrũ; ũcooke ũũke, ũnũmĩrĩre.”

²³No rĩrĩa aiguire ũguo, akĩigua kĩeha kĩnene, amu aarĩ mũtongu mũno.

²⁴Nake Jesũ akĩmũrora akiuga atĩrĩ, “Kaĩ nĩ hinya atongu gũtoonya Ũthamaki wa Ithe witũ-ĩ! ²⁵Amu nĩ ũhũthũ ngamĩĩra ĩhĩtũkĩre irima rĩa cindano gũkĩra mũndũ mũtongu gũtoonya Ũthamaki wa Ithe witũ.”

²⁶Nao arĩa maiguire ũguo makĩũria atĩrĩ, “Kũngĩkĩhoota mũndũ ũrĩkũ kũhonoka?”

²⁷No akĩmeera atĩrĩ, “Maũndũ marĩa matangĩhoteka nĩ andũ, Ithe witũ nĩahota kũmahotithia.”

²⁸Nake Petero akiuga atĩrĩ, “Ta rora, ithuĩ nĩtũtiganĩirie mĩciĩ iitũ tũgakũrũmĩrĩra.”

²⁹Nake akĩmeera atĩrĩ, “Ngũmwĩra na ma atĩ: gũtirĩ mũndũ ũtiganĩirie nyũmba, kana mũtumia wake, kana ariũ a nyina, kana aciari, kana ciana, nĩ ũndũ wa Ũthamaki wa Ithe witũ, ³⁰ũtakaamũkĩra maita maingĩ makĩria rĩu ihinda-inĩ rĩĩrĩ, na ihinda-inĩ rĩrĩa rĩgũũka akĩamũkĩre muoyo wa tene na tene.”

Mũrũ wa Mũndũ Aathiĩ Mũtharaba-inĩ

³¹Nake akĩoya arĩa ikũmi na eerĩ keheri-inĩ akĩmeera atĩrĩ, “Ta rorai, nĩtwambata Jerusalemu, na maũndũ marĩa mothe anabii maandĩkire ũhoro wa Mũrũ wa Mũndũ nĩmakaahingio. ³²Amu nĩagaaneanwo kũrĩ andũ-a-Ndũrĩrĩ, anyũrũrio, arumwo, na atuĩrwo mata. ³³Nao nĩmakaamũhũũra iboko na mamũũrage, na mũthenya wa gatatũ nĩakariũka.”

³⁴No matiataũkĩirwo nĩ ũndũ o na ũmwe wa macio; ũhoro ũcio nĩwahithĩtwo kũrĩ o, na matiamenyire ũrĩa kwarĩ kuugwo.

Kuona Gũgĩcookio nĩ Mũũriũ wa Ithe witũ

³⁵Na rĩrĩa Jesũ aakuhĩrĩirie Jeriko, nĩ kwarĩ mũndũ mũtumumu waikaraga mũkĩra-inĩ wa njĩra akĩhooyaga. ³⁶Rĩrĩa aiguire kĩrĩndĩ kĩhĩtũkĩra, akĩũria ũrĩa kwarĩ. ³⁷Nao makĩmwĩra atĩrĩ, “Nĩ Jesũ wa Nazarethi ũrahĩtũka.” ³⁸Nĩ ũndũ ũcio agĩkaya akiuga atĩrĩ, “Jesũ, Mũrũ wa Daudi, njiguĩra tha!” ³⁹Nao arĩa maarĩ mbere makĩmũkaania makĩmwĩra akire, no agĩkĩrĩrĩria gũkaya makĩria atĩrĩ, “Mũrũ wa Daudi, njiguĩra tha!”

⁴⁰Nake Jesũ akĩrũgama, agĩathana areehwo kũrĩ we. Rĩrĩa aakuhĩrĩirie, Jesũ akĩmũũria atĩrĩ,

⁴¹“Ũkwenda ngwĩkĩre atĩa?” Nake akiuga atĩrĩ, “Mwathani, reke njooke kuona rĩngĩ.”

⁴²Nake Jesũ akĩmwĩra atĩrĩ, “Cooka wone; wĩtĩkio waku nĩwakũhonia.”

⁴³O rĩmwe agĩcooka kuona, akĩrũmĩrĩra Jesũ, akĩgoocaga Ithe witũ. Nao andũ othe arĩa meeyoonire ũguo makĩgooca Ithe witũ o nao.