Luke 18

18 ¹Chieina Jishuna athumli atam kachida seihā sāda ning masuitā khavai phai kaji chānjam akha hānga.

²"Keinung akhali bichar kasā mi akha leisai, ana Vareli mangacheela kala mibingli makhayāshimana. ³Chikathā keinungli ra̱meinao akhana awuili rāchinga, 'Iwui yangkashewuitungli mashun sāmilu' da hānga. ⁴Atam kasha̱kha ana mamayāthuwa, kha chieina ana khalattali hānga, 'Ina Vareli mangacheesālala, mibingli makhayāshilala, ⁵chikathā ra̱meinaona ili mathāhaila sheikhutchingwui vang, ina awui mashun sāra, thangkachida ana rāda ili wukhanang ngasakhaipaishina.'"

⁶Kala Prohona hānga, "Mashun makhalei bichar kasāna khi hānga chi nganālu. ⁷Ithumwui Avāna awui kapang kahaibing, ngashun kala ngayā ali khangakaobingli vang mashun masārarmara? Ana athumwui vang huinganongra? ⁸Ina nathumli kahāngna, ana athumwui mashun katotsisi sāra. Kha miwui Naomayarana rāthang, ana okathuili shitkasang samphangra?"

Malung Khanganima Chi Lumashan Samphangra

⁹Ana khalattali khamashung khangarong da shitsangda mi khangatei saikorali yangkharinga mi kaikhali chānjam hi hānga:

¹⁰"Mi khani seihā sākhavai khorumshimli kātonga, akhana Pharisee kala akhapāna khāshinā khalokana. ¹¹Phariseepā chi nganingda khalattawui pong seihā sāda hānga, 'O Vare, ina khangatei mibing thāda—khangapona, khayon kasābing, phokaphābing—lah chikathā khāshinā khaloka thāda maningmanawui vang nali ningshi.' ¹²'Ina haptā akhali khani shida khuma; ina samphang saikorawui tharāwui akhum akha chihomi.' ¹³Kha khāshinā khalokapā chi katāli nganingda, kazingram shongli mik yangkakā khavaila mamayāthuwa, kha awui makā shaoda hānga, 'Ithumwui Avā, morei kaphunga ili khalumashanmilu.' ¹⁴Ina nathumli kahāngna, mipā hi mashung ngasakda awui shimli unghaowa, akhapā chi maningmana. Kachikathā reikhangaiya chi teongasakra, kala kachikathā kateowana chi reingasakra.

Ithumwui Avā Wungram Chi Naoshinaobingwuina

¹⁵Mibingna athumwui angangnaobing chi Jishuna sāza̱ khavai ali khuirā, kha sākhangatha̱bingna chi theilaga athumli kharara.

¹⁶Kha Jishuna naoshinaobingli awuili hokhuida hānga, "Naoshinaobing chi iwuili rāranu; athumli mangatei ngasaklu—ithumwui Avā wungram hi chithādabingwuina. ¹⁷Kachangkhat eina ina nathumli kahāngna, kachikathā ithumwui Avā wungram chi naoshinao thāda makhuisang a chi chili mazanglakmara."

Kashāngna Malokhuishap Khikha Akha

¹⁸Kachikathā khamung akhana ali ngahāna, "Kaphā Ojā, katang makhavai kharing mathunkhui khavai ina khi sārakhala?"

¹⁹Jishuna ali hānga, "Ili khisāda kaphā da hokhala? Ithumwui Avā maningla khipākha kaphā maleimana." ^a a v19 Jishuna yaronnaowui ning chi kaphā saikorawui haokaphok kaji ithumwui Avāli ngashukmi; ana khalattawui kaphā chi maphenmana, kha mi chi Avāshong ngalanngasakmina.

²⁰Ningkhamibing chi nana thei: 'Maphophāpaimana, mashaothatpaimana, maleepaimana, mikhanam shākhi masāpaimana, nava̱ navāli khayashilu.'"

²¹"Saikora hi ina nganuilakhawui eina mayonrā kahaina," da ana hānga.

²²Chi shālaga Jishuna hānga, "Aruila nawui khavāt akha lei: nawui khalalei saikora chi yorserhailaga kachāmnaoli mihaolu, chithākha nawui lan chi kazingramli leira; chieina rāda ithi shurlu."

²³Kha chi shālaga, ana khanang sakkachangkhathaowa, kaja a kashānga khangazip mina.

²⁴Jishuna ali yangda hānga, "Ithumwui Avā wungramli zangkida kashāngbingwui vang kayākha sakrakhala! ²⁵Kaja kashānga mina ithumwui Avā wungramli zangki kajile utna kapimkhurli ngara̱kashok paimei."

²⁶Chi kashābingna ngahāna, "Chithākha khipāna kahui samphangrakhala?"

²⁷Kha ana hānga, "Mikumowui vang masākapai kahai chi, ithumwui Avāwui vang sāpaisera."

²⁸Chieina Peterna hānga, "Yanglu, ithumna ithumwui shim horhailaga nawui thi shurhaira."

²⁹Ana athumli hānga, "Kachangkhat eina ina nathumli kahāngna, ithumwui Avā wungramwui vang shim, preiva̱, achināngarā, ava̱-avā, lah naongarā horhaishapakha, ³⁰mi chi shāshā mataida hi thotli samphangra, kala katang makhavai kharing chi rakharā thotli samphangra."

Miwui Naomayara Krushli Vāki

³¹Ana katonga chi hokhuilaga hānga, "Yanglu, ithum Jerusalem shangkida zatli, kala miwui Naomayarawui pongli marānbingna kapihai saikora ungshungra. ³²Kaja ali Gentilebingwui pāngli horsangmira, kala athumna ali mana̱shira, hāngmachinra, kala machora̱ mashorrora. ³³Athumna ali lijei eina ngaphitra kala sāthatra, kala kakathumathang a ringshokluira."

³⁴Kha athumna hi khikha akhala bhap matārarmana; hi tui chi athumwui eina ngathumhaira, kala khi hāngkahai kaji athumna matheirarmana.

Avāwui Naomayarana Mik Theingasakmi

³⁵Jishuna Jericho ngalemli vākashung tharan, mik khangapeo mi akha shongfapheili zāt popamsai. ³⁶Mi kachungkha rārāli kaji kashā eina, chi khi shokhaokhala da ngahāna. ³⁷Athumna ali hānga, "Nazarethwui Jishu rārāli kajina." ³⁸Chieina ana vaoda hānga, "Davidwui Naomayara Jishu, ili khalumashanmilu!" ³⁹Mangāshong khavābingna ali kharara, kasainakha pamlu da hānga; kha ana pangmeida vaoda hānga, "Davidwui Naomayara, ili khalumashanmilu!"

⁴⁰Jishuna ngasāmda, ali awuili khuirai khavai kasoi. Ana rānganai tharan, Jishuna ali ngahāna,

⁴¹"Nana ili khi sāmi ngasakngaikhala?" Ana hānga, "Proho, imik theingasakmilu."

⁴²Chieina Jishuna ali hānga, "Namik theihaoranu; nawui shitkasangna nali huikhuihaira."

⁴³Ngalāngda ana kathei samphanga kala Jishuwui thi shurthuwa, ithumwui Avāli masochikatta. Chi katheibing mi saikorala ithumwui Avāli masot chikata.