Seneibü Bouei maangkaangbü welaubü ditda
Latnyu matjembü cheei asaopobü matjembou anongtikei, hoba nyek anganbü khüm hebou cheei seneibü Bou thedanga saopobü yingan chem to longeikei, lausikei Farisibou kho ayingen. Chilang sungletkei, keibü thükkabou maangjakko hautikei, hoba Jerikho khongnyua nyek shatbü sukbou cheei Jisu sungen shongko chongchingkei.
18 1Hobaje Jisuei müt ladangdang welaula hoba maang temok dogo, haoen to ngühphatbü che lenkei.
2“Sangnyu chenei Mühghaü to ahatko, müt to ongkei souhat akümbü matjembou che kikei. 3Kho sangnyua latnyu cheei hao jungto ladangdang louko laukei, ‘Ngeibü labou khulimbo ngo shanga matjemshi.’ 4Jihsiphai thodak haoei anongkei, lausikei kho phaia haoei hao lolo to laukei, ‘Ngei Mühghaü to ahatko, müt to ongkei souhat akümsikei, 5aishanga ho latnyu khoei ngo ladangdang hongeida, ngei hao shanga matjemlabü, khei yinga longa saoei ladangdang louan ngo ahangtilabü.’”
6Hoba Bunyubouei laukei, “Asaopobü matjembouei ai laudaje ditashi. 7Chalou si ngeyang hao to welaubü hao pienbü shuong shanga seneibü Bouei matjemlabü aying lo? Haoei haoen shanga dela kulabü lo? 8Ngei kan to lenda, haoei haoen shanga tongde matjemlabü. Lausikei Müteibü Shou loulaje, haoei kaodaka mailembü hapmeilabü lo?”
Eaaoabü maangponei onou hapda
9Himshuong to saopobü dogo maanglembü hoba lubü pendou to nyikubü atei shuong to haoei ho ngühphatbü lenkei:
10“Müt nyi welaula shanga lembüchem to angkei, che Farisibü hoba che khüm hebou kikei. 11Farisibouei lokei hoba hao lolo shanga welauko laukei, ‘Mühghaü, ngo yepeijawebü, amaibü kümbü, asangalanbü lubü müt tegü aying, ayingsi ho khüm hebou tegükei aying dogo ngei no la nyensang kuda.’ 12‘Ngei balea nyishou nyengko kida; ngei hapbü pendou ka an phejan kuda.’ 13Lausikei khüm hebouei waangko loan, khuthük aeto nyek ongkei atonen, lausikei hao senlang ipbo laukei, ‘Abou, shabü müt ngo to onoushi.’ 14Ngei kan to lenda, ho müt matmaitibü yeian jembü chem to haukei, lubü aying. Aoei himshuong tonenda haoei yantilabü; lausikei aoei himshuong yantida haoei tonenlabü.”
Seneibü Bou Sangle kho shousi shuong shangabü
15Mütshuongei haoei meitila shanga lulueibü senyopbo shuong hao jungto leibakei, lausikei eikshuongei kho hapan haoen to kaangkei.
16Lausikei Jisuei shousi shuong hao jungto ngaankei hoba laukei, “Shousi shuong kü jungto loutishi; haoen tethaktijan—aishanga seneibü Bou Sangle kho hai tegübü shuong shangabü ki. 17Maimaitham ngühmaia ngei kan to lenda, aoei shou hanbü che tegü seneibü Bou Sangle asungletlonga, haoei kho ladangkei aatlabü.”
Nyaksinamei jekla athükbü thinei che
18Leiyeibü cheei hao to phekei, “Maibü Lenbou, ponpen langkei pailetla ngei ai kümla?”
19Jisuei hao to laukei, “Aila no ngo to maibü dogo lauda? Seneibü Bou alongbü to liman atei maibü aying. a a v19 Jisuei maibü pendou longbü seneibü Bou aeto nashoueibü maang jungeitida—haoei hao lolo maibü ki dogo anangbü aying, lausikei müt kho Bou aeto sepeitida.
20Nyi ngühkhüm shuong ngekei: ‘Asangalan tejungei, müt tühaiti, tekok, amlangbü aukabü teku, kaibü bou si nyu to souhat kushi.’”
21“Habü pendou ngei nashoudangka sühko hatlepbei,” dogo haoei laukei.
22Kho ditan Jisuei laukei, “Thinei che no tokei shaleda: kaibü kibü pendou yaakkuan shalebü shuong to kushi, kheijinei no khuthüka peisilei hapmeilabü; kheijinei louan ngo semshi.”
23Lausikei haoei kho ditan, hao aeibou ngangko apbei, aishanga hao aeibou keian kikei.
24Jisuei hao to chühan laukei, “Keibü shuong seneibü Bou Sangle to atla aeibou haanglabü! 25aishanga keibü müt seneibü Bou Sangle to atla toje, ut cheei sümthak nyek danjung haula aei hemaibü ki.”
26Kho ditbü shuongei phekei, “Kheijinei ao khümenla thüklabü?”
27Lausikei haoei laukei, “Müt shanga athükbü dan seneibü Bou shanga thüklabü.”
28Kheijinei Peterei laukei, “Chühashi, künei kün lulueibü chem shonan no sembei.”
29Haoei haoen la laukei, “Maimaitham ngühmaia ngei kan to lenda, aoeikei seneibü Bou Sangle laüa chem, yak, jaisina shuong, nyusibou ayingsi shousi shuong shonbü, 30aoei kümsilei an tokei juongbou, hoba loulabü jihsiphaia ponpen langkei ahaplonga, kho müt aki aying.”
Müteibü Shou peisile aeto hauda
31Haoei eik anthüknyi leilangan laukei, “Chühashi, senei Jerusalem to angda, hoba thuseibü shuong pendouei Müteibü Shou shangabü dobü pendou joyolabü. 32aishanga haoei Küksithang shuong la khümbo kuan aplabü, hoba haoen la louyoan, nyikuko, hoba eok thoklabü. 33Haoenei hao to ipan haitilabü, hoba chalou semnyet to haoei langngailabü.”
34Lausikei haoenei habü ka ai ongkei aditenbei; ho ngüh haoen ka huan phobü kikei, hoba ai laudaje haoenei ashuokbei.
Bou Shouei nyek maitikei
35Jisu Jerikho nyangko lousühjinei, nyekthubü che khongnyu aeto setan nam hiko kiteikei. 36Mütshang paibü ditan, haoei kho ai haüda dogo phekei. 37Haoenei hao to lenkei, “Nazaretbü Jisu paida.” 38Kheijinei haoei ngekkei, “Jisu, Dawid Shou, ngo to onoushi!” 39Thedanga haubü shuongei hao to kaangan küpjembo kila lenkei, lausikei haoei aei ngekkei, “Dawid Shou, ngo to onoushi!”
40Jisuei atopeiko lokei, hoba hao to hao jungto leibala lenkei. Haoei nyangko loujinei, Jisuei phekei,
41“Ka shanga ngei ai kümla no wanthung?” Haoei laukei, “Bunyubou, ngo nyibou chühan apshi.”
42Hobaje Jisuei hao to laukei, “Kaibü nyek nyibou chühan apshi; kaibü mailemei ka khümenkei.”
43Hobaje tongde hao nyibou chühan apbei, hoba Bou la soneikangbü kuko Jisu sembei. Hoba kho hapbü müt pendouei yoan Bou nyen sangkei.
