Mu Kisinza kya Kubwila yi mu Kulolukila

Lolula mbala nsambwadi mu kilumbu kimosi. Lukwikilu lwa fwanana yi ngenza ya tidi lwafwana. Basadi bana basala mana bathuma batelaku lukumu. Bayakala kumi ba maladi babeluka, amana mosi, mwisi Samadiya, wávutuka ni kakumisa Tata wetu. Kipfumu kyisi homa ha kusongila; kibati kala ha kati dya bawu.

Kapitulu 17.

Yesu wuzimbudi kwena balonguki bandi: «Mambu ma kubwisa batu makála mu kwisa, kaasi phasi kwena mutu wuna mu nzila yandi mabwíla! Bulungi kwena yandi banamika kalunga tadi hana tsingu yandi amana bamununguna muna yanga dya mbuta, kuluta kuhukumuna mosi wa bana bakhunda baba.»

«Lukikeba. Yuka ni phangi waku kasumuka, mukaya; amana yuka ni kabaludi mbundu, munlolukila. Yuka ni kakusumukina mbala nsambwadi mu kilumbu kimosi, amana mbala nsambwadi kavutuka mu kuzimbula: “Mbaludi mbundu,” munlolukila.»

Bathumwa bazimbudi kwena Pfumu: «Yikila lukwikilu lwetu!»

Pfumu wuzimbudi: «Yuka ni lwenina yi lukwikilu lwa fwanana yi ngenza ya tidi, wadi lukhani zimbula kwena miti wawu: “Vúsuka amana wukunama muna yanga,” amana wadi wukulemvukila.» «Nani muna benu, wuna wenina yi musadi wuna kalima holo kakeba mameme, kamuzimbwala, buna kakotanga tuka ku kilanga: “Alwisa nswalu, wuvwanda ha mesa”?» «Abweti kamuzimbwala: “Yidika madya mama, wuvwata miledi mya kisalu ndangu wunsila bima buna meni mbati dya yi kunwa, amana kunima ngeyi wudya yi kunwa”?»

«Abweti kavutula matondu kwena musadi wuna, kikuma kahangini mana báthuma yandi?» «Bwabuna benu phi, buna lumani hanga mambu moosu mana báthuma benu, luzimbwala: “Betu thwenina basadi bakonda lufwani; tuhangidi kaka mana twafwana kuhanga.”»

Tata Wubelula Bakwa Bwasi Kumi

Muna nzila ya kwenda ku Yelusalemi, Yesu wákala hita hakati dya Samadiya yi Ngadidi. Buna kákota mu hata dimosi, batu kumi bana bakala yi bwasi bámusenguna. Bátelama ku thama,

amana bábokula mu ndinga yineni: «Yesu, Mulongi, utuyukila kyadi!»

Buna kábamona, wuzimbudi: «Ndalwenda, lukimonisa kwena banganga Nzambi.» Buna bakala kwenda, básema.

Mosi muna bawu, buna kámona ni wábeluka, wávutuka, mu kuzatulaka Tata wetu mu ndinga yineni, amana wábwa ha zizi kuna malu ma Yesu, mu kuvutula matondu. Yandi phi wákala mwisi Samadiya.

Yesu wuzimbudi: «Keti batu kumi básema? Kweti bana vwa benina? Ka mutu ku wámonika mu kuvutuka yi kuzatula Tata wetu, konda munzenza wawu?» Amana wumuzimbwadi: «Telama, wenda; lukwikilu lwaku luhuludi ngeyi.»

Kipfumu Kyena Kedi Hakati dya Benu

Buna Bafwadisi bámuyufula tangwa dyaki Kipfumu kya Tata wetu kyakwísa, wábavutwala: «Kipfumu kya Tata wetu kyisi kwisiku mu kumonika kwa mesu, amana batu bazimbulaku: “Tala, haha!” holo “Kuna!” Mukuma Kipfumu kya Tata wetu kyena hakati dya benu.»

Wuzimbudi kwena balonguki: «Bilumbu bikakwísa tangwa lwakázola mona kilumbu kimosi mu bilumbu bya Mwana wa mutu, kaasi lwakakimonaku. Bakáluzimbula: “Tala, kuna!” holo “Tala, haha!” Lwendaku, lwalandaku ku manima ma bawu. Mukuma bwosu mutsyenzya wisi lubuka amana wukenzula mu zulu tuka ku ndambu yimosi tii ku ndambu yikwawu, bwabuna phi bwakála Mwana wa mutu mu kilumbu kyandi. Kaasi theti kafwana mona phasi zazingi amana batu ba mbandu yayi bakanlewula. Bwosu bwákala mu bilumbu bya Nowa, bwabuna phi bwakála bilumbu bya Mwana wa mutu. Bakala dya yi kunwa, bakala dikwela yi kukwedisa, tii yi kuna kilumbu kina kákota Nowa mu nzasa, amana kithombu kyisa, kyabunga bawu boosu. Bwabuna phi bwákala mu bilumbu bya Loti: kudya, kunwa, kusumba, kutekisa, kukuna, kutunga, kaasi mu kilumbu kina Loti kákatuka ku Sotomu, mbawu yi sufuru byánoka tuka ku zulu, amana byabunga bawu boosu, bwabuna phi bwakála mu kilumbu kina Mwana wa mutu kakamonika. Mu kilumbu kina, wosu wuna wenina ha mudilu wa nzu, bima byandi byena mu nzu, kakakulumukaku mu kubonga; bwabuna phi, wosu wenina ku kilanga kavutukaku ku manima. Luyindula mukhetu wa Loti. Wosu wuna wisi sanda kuhulula moya wandi kakawuzimbisa, kaasi wosu wuna kakazimbisa moya wandi kakawukeba. Yiluzimbwadi: mu fuku dina, batu bodi bakála ha thangi yimosi: mosi bamúnata, mukwawu bamúsisa. Bakhetu bodi bakála toka kumosi: mosi bamúnata, mukwawu bamúsisa.» ^a

Bámuyufula: «Kweti, Pfumu?» Wuzimbudi: «Kuna kwakála mvumbi, kwakuna bangandwanganga bakútakanina.»