Yesu Ke Sosa mpe Ke Vuukisa Zashe
Zashe yulukaka na yinti, Yesu bokilaka yandi mosi na yinzo ya yandi, mpe yandi pesaka ndambu ya bima ya yandi nyonso na bansukami. Kingana samu na bisadi yina vwandaka sala kisalu na mbongo ya mfumu ya bawu kwizaka na ntwala ya kukota na Yelusalemi, kuna nkonga ya bantu vwandaka sepela, Yesu dilaka samu na mbanza, mpe na manima yandi basisaka bantu ya mumbongo na yinzo ya Tata ya yandi.
19 1Yesu kotaka na Yeliko mpe vwandaka luta na kati ya mbanza. 2Muntu mosi vwandaka kuna, nkumbu ya yandi Zashe; yandi vwandaka mfumu ya bilokoti-mpaku, mpe yandi vwandaka mvwama. 3Yandi vwandaka na nsatu ya kutala Yesu kele nani, kasi yandi lendaka ve samu na nkonga ya bantu, samu ti yandi vwandaka nkufi. 4Yandi bakaka ntinu na ntwala mpe yulukaka na yinti ya sikomole samu na kutala yandi, samu ti Yesu vwandaka pene-pene ya kuluta na nzila yina.
5Ntangu Yesu kumaka na kisika yina, yandi vumbulaka meso, mpe tubaka na yandi: «Zashe, kulumuka nswalu, samu ti bubu yayi mu fwana kuvwanda na yinzo ya nge.»
6Na yina, yandi kulumukaka nswalu mpe yambaka yandi na kyese nyonso. 7Ntangu bawu talaka yawu, bantu nyonso vwandaka nyunguta, bawu tubaka: «Yandi me kwenda kuvwanda na yinzo ya musumuki.»
8Zashe telamaka mpe tubaka na Mfumu: «Tala, Mfumu, mu ke pesa ndambu ya bima ya munu na bansukami, mpe kana mu me vuna muntu, mu ke vutula yandi mbala iya.»
9Yesu tubilaka yandi: «Bubu yayi, mpulusu me kwiza na yinzo yayi, samu ti yandi mpe kele mwana ya Abalayami. 10Samu ti Mwana ya Muntu kwizaka samu na kusosa mpe kuvuukisa bantu yina me vila.»
Bisadi ya Kwikama Ke Vingila Ntinu
11Ntangu bawu vwandaka kuwa mambu yina, Yesu yikaka kingana ya nkaka, samu ti yandi vwandaka pene-pene ya Yelusalemi mpe samu ti bawu vwandaka kubanza ti Kimfumu ya Tata ya beto ke monikina nswalu-nswalu.
12Na yina, yandi tubaka: «Muntu mosi ya nene kwendaka na yinsi ya ntama samu na kubaka kimfumu samu na yandi mpe kuvutuka. 13Yandi bokilaka bisadi ya yandi kumi, yandi pesaka konso muntu difuta ya bangonda tatu, yandi tubaka: “Beno sala mumbungu na yawu tii mu ke vutuka.” 14Bantu ya yinsi ya yandi mengaka yandi, mpe bawu fidisaka bantumwa na manima ya yandi, bawu tubaka: “Beto zola ve ti muntu yayi yala beto.”
15Ntangu yandi vutukaka na manima ya kubaka kimfumu, yandi bokilaka bisadi yina yandi pesaka mbongo, samu na kuzaba yina konso muntu kuzwaka. 16Muntu ya ntete kwizaka, yandi tubaka: “Mfumu, mbongo ya nge me buta mbala kumi.”
17Yandi vutulaka: “Mbote mpenza, kisadi ya mbote! Samu ti nge vwandaka ya kwikama na dyambu ya fyoti, nge ke yala bambanza kumi.”
18Muntu ya zole kwizaka, yandi tubaka: “Mfumu, mbongo yina nge pesaka munu me buta mbala tanu.”
19Yandi tubaka na yandi: “Nge mpe, nge ke yala bambanza tanu.”
20Na manima, muntu ya nkaka kwizaka, yandi tubaka: “Mfumu, tala mbongo ya nge; mu bumbaka yawu, mu zingaka yawu na lele; 21samu ti mu vwandaka na boma ya nge, samu ti nge kele muntu ya ngolo: nge ke baka yina nge tulaka ve, mpe nge ke yonzika yina nge kunaka ve.”
22Yandi vutulaka: “Mu ke sambisa nge na munwa ya nge mosi, kisadi ya yimbi! Nge zabaka ti mu kele muntu ya ngolo, mu ke baka yina mu tulaka ve, mpe mu ke yonzika yina mu kunaka ve? 23Samu na yinki nge tulaka ve mbongo ya munu na bantu yina ke defisaka mbongo? Ntangu mu vutukaka, mu zolaka kubaka yawu kumosi na ndandu ya yawu.” 24Yandi tubaka na bantu yina telamaka pene-pene: “Beno katula yandi mbongo, mpe beno pesa yawu na muntu yina me zwa mbala kumi.”
25Bawu tubaka na yandi: “Mfumu, yandi kele ti mbala kumi! 26Mu ke zabisa beno: na konso muntu yina kele na kima, ba ke pesa yandi dyaka; kasi na muntu yina kele na kima ve, ata yina yandi kele na yawu, ba ke katula yawu. 27Kasi beno nata awa bambeni yayi ya munu, bayina mangaka ti mu yala bawu, mpe beno fwa bawu na mantwala ya munu.”»
Mwana Ke Kota na Yelusalemi Mutindu Ntinu
28Ntangu Yesu manaka kutuba mambu yayi, yandi kwendaka na ntwala, yuluka na Yelusalemi.
29Ntangu yandi kumaka pene-pene ya Betefaje mpe Betani, na mongo ya bayinti ya olive, yandi fidisaka bilandi zole ya yandi, 30yandi tubaka: «Beno kwenda na bwala yina kele na ntwala. Ntangu beno ke kota, beno ke mona mwana ya mbuluku ya kukangama kuna, yina ata muntu mosi yulukaka na zulu ya yawu ntete ve. Beno nyangula yawu mpe beno nata yawu awa. 31Kana muntu yufula beno: “Samu na yinki beno ke nyangula yawu?” beno tuba: “Mfumu kele na nsatu ya yawu.”»
32Na yina, bayina ba fidisaka kwendaka mpe bawu monaka yawu kaka mutindu Yesu zabisaka bawu. 33Ntangu bawu vwandaka nyangula mwana ya mbuluku, bamfumu ya yawu yufulaka bawu: «Samu na yinki beno ke nyangula mwana ya mbuluku?» 34Bawu tubaka: «Mfumu kele na nsatu ya yawu.» 35Bawu nataka yawu na Yesu, bawu losaka biyunga ya bawu na zulu ya mwana ya mbuluku, mpe bawu tulaka Yesu na zulu ya yawu. 36Ntangu yandi vwandaka kwenda na zulu ya mbuluku, bawu panzaka biyunga ya bawu na nzila. 37Ntangu yandi kumaka pene-pene ya kisika ya kukulumuka ya mongo ya bayinti ya olive, nkonga nyonso ya bilandi bandaka na kuyangalala, bawu vwandaka kembila Tata ya beto na ndinga ya ngolo samu na bisalu nyonso ya ngolo yina bawu monaka, 38bawu tubaka: «Lusakumunu na Ntinu yina ke kwiza na nkumbu ya Tata ya beto! Kizunu na zulu mpe nkembo na zulu ya kuluta!»
39Ba-Falisye ya nkaka yina vwandaka na kati ya nkonga tubaka na yandi: «Mulongisi, ngala bilandi ya nge.»
40Yesu vutulaka: «Mu ke zabisa beno, kana bawu yayi vwanda pi, matadi yawu mosi zola kulooka.»
41Ntangu yandi kumaka pene-pene mpe talaka mbanza, yandi dilaka samu na yawu,
42yandi tubaka: «Kana nge zabaka bubu yayi mambu yina ke nataka kizunu na nge! Kasi ntangu yayi yawu me bumbama na meso ya nge. 43Bilumbu ke kwiza ntangu bambeni ya nge ke tunga kibaka na nzyunga ya nge, ke zunga nge, mpe ke kanga nge na konso lweka, 44mpe bawu ke bebisa nge na bana ya nge na kati ya bibaka ya nge, bawu ke bika ve ditadi mosi na zulu ya ditadi ya nkaka, samu ti nge zabaka ve ntangu yina Nzambi kwizaka na kutala nge.» a a v44 «Ntangu yina Nzambi kwizaka na kutala nge» kele ntangu yina Nzambi kwizaka na Yelusalemi na kimuntu ya Yesu.
Yesu Kuvedisa Yinzo ya Tata ya yandi
45Yandi kotaka na Yinzo ya Nzambi mpe bandaka na kukula bayina vwandaka teka bima,
46yandi tubilaka bawu: «Dibuku ya Nzambi ke tuba: “Yinzo ya munu ke vwanda yinzo ya kisambu,” kasi beno me kitula yawu dibulu ya bimpumbulu.»
47Yandi vwandaka longisa konso kilumbu na Yinzo ya Nzambi, ntangu banganga-Nzambi ya ntete, milongisi ya Misiku, mpe bantwadisi ya bantu vwandaka sosa nzila ya kufwa yandi, 48kasi bawu zwaka ve kima yina bawu lendaka sala, samu ti bantu nyonso vwandaka kangama na mambu ya yandi.