Mi eng' bukuit

Luka 22 FHB Father's Heart Bible™

Kiistoi 15% eng' kiy ne iale korook →
Bukuit

Kochopchi Tisiik ak Siriik Meennyi

Ki yan Judas aldaet. Eng' mesetap Paska kogoochi Jeso magatyat ak soteet, ak kobargei kasubikyik agobo oldo. Ki saa Kwandanyi eng' nyalilda agoi kergeitu kaotikyik korotiik, ak kogochwo eng' peny, ak koeesyo Petero korok somok, yeityo kogereer koonyekyik.

Sura 22.

Ki riikyi anyun sagutyetap amitwogik che ma tinyei chumbiiset, ne keguure Paska. Ki cheeng' tisiik che eecheen ak siriik ooreet ne kibarei ineendet, amu ki iywei piik.

Ki chut anyun Setani Judas, ne keguure Iskaryot, ne ki age eng' taman ak aeng'. Ki wo ak kong'alaal ak tisiik che eecheen ak riibiigap Hekaluut ole kong'wekyi ineendet icheeget. Ki boiboiyo ak koyan kogoochi ineendet rabiisyek. Ki yan anyun ak kotoi kocheeng' poroindo ne kong'wekyi ineendet icheeget ye ma mi tuiyet.

Kachobchinet Paska ne po Let

Ki it anyun peetuutap amitwogik che ma tinyei chumbiiset, ye ki nyolu kegas rorweetap Paska.

Ki yookto Jeso Petero ak Johana, koleenji, “Oba ochobwech Paska si keam.”

Ki leenji ineendet, “Imache kechop ano?”

Ki leenji, “Ngo omong'u nganaseet, konyoonjo okweek chii ne ipe soteetap peek. Osup ineendet koot ole mong'jin ineendet,

“ak oleenji kiptaiyandetap koot, ‘Koleeng'wong' Kaneetindet: Mi ano kot ne po toek, ole amei Paska kobooto kasubikyuk?’ Ak koboorwok ineendet koot ne oo ne mi parak ne kagechob; ochop olooto.”

Ki pa ak konyoor ko uu ye kiga koleenji icheek, ak kochop Paska.

Ye kingo it sait, kotebee koamis, ak kaeng'waldaik kobooto ineendet.

Ki leenji, “Kamachei miising' aame Paska ni kobooto okweek kotom anyalil. Amu amwaiwok, ma aame kot koit eng' laitornatetap Kwandanyo.” Kingo nam kombeet ak kogoochin kong'oi, kole, “Onam ni, ak obchegei okweek. Amu amwaiwok, kobooch nguno ma aei logoegap mzabibu kot konyo laitornatetap Kwandanyo.”

Ki nam kimnyeet, kogoochin kong'oi, koriit, ak kogoochi icheek, kole, “Ni ko boornyu, ne kigoochin agobo okweek. Oyai ni koek ne kibwaatee anee.” Ki yai ko uu nooto ak kombeet ye kagoam amisyet: “Kombeet ni ko arorutyet ne leel eng' korotiknyu, che kagepwaakta agobo okweek. Ago keero—eutap ne ng'wektoe anee komi ak anee eng' meset. Wendi Weeriitap chii ko uu ye kigochob, ago pwo chiichooto ne king'wektae ineendet!”

Ki toi koteebegei icheek ng'oo eng' icheek ne yaei ni.

Ki piit kora teebutyet eng' icheek agobo ng'oo eng' icheek ne oo miising'.

Ki leenji, “Laitorinigap pororyosyek kotinyei kamuktaet eng' icheek, ak che laitorani icheek keguure bene-jaakan. Ma ko uu nooto eng' okweek: ago ne oo eng' okweek koek ko uu ne ming'in, ak ne tai koek ko uu ne poisyei. Ng'oo ne oo—ne tebee koamis anan ne poisyei? Maa ne tebee koamis? Ago ami anee eng' kwenung'wong' ko uu ne poisyei.

“Okweek ko che kagomenyi anee eng' tyemuutikyuk, ak agoochiwok laitornatet, ko uu ye kigoochi anee Abba laitornatet, si oame ak oe eng' mesennyu eng' laitornatennyu, ak otebee ng'echerok otirwookyin ortinwegap Israel taman ak aeng'.”

“Simion, Simion, kas—kagomach Setani kotyem okweek tugul ko uu ngaanoek, ago kagosaayin inyee, si ma til iyaneetng'ung'. Ye kiga iweektoogei, igimit tupchoguk.”

Ki leenji Petero, “Kiptaiyat, ami ne tetat awe kobooto inyee korgoreet ak meet.”

Ki leenji Jeso, “Amwaun, Petero: ma koote kipsoiywet rani, kotom ieesyoa konyil somok ile mangen anee.”

Ki teebee icheek, “Ye kayooktowok ma otinye lolet ne po rabiisyek, anan lolet ne po ooreet, anan sandet, ki omagei kii?” Ki leenji, “Ma mi kiy.”

Ki leenji, “Ago nguno, ne tinyei lolet ne po rabiisyek konam, ak lolet ne po ooreet kora. Ago ne ma tinyei rotweet, koalda ingoroinnyi, ak koal rotweet. Amu amwaiwok, nyolu koyaneksei siroindoni ne kisiraat eng' anee: ‘Ki kigiit ineendet kobooto kiptengeginik.’ Amu che kisiraat agobo anee ko kagobiit.”

Ki leenji, “Kiptaiyat, keero, mi rotoogap chok aeng' yu.” Ki leenji, “Kakoyeeya.”

Koigoochigei Weeriit eng' Kwanda

Ki manda koba tulweetap Mseituni ko uu ye kicham, ak kosup kasubik ineendet.

Ye kingo it komosta, koleenji, “Osaae si mochut yoomseet.”

Ki istogei anyun eng' icheek ko uu ole kiwiirtoe koita, ak kogutunyi ng'wony kosaaei,

kole, “Abba, ngot icham, inam kombeet ni eng' anee. Ago ma magennyu, ago ne po inyee, keyai.”

Ki nyoonji anyun malaikaiyat ne kibunu kipsengwet, ak kogimit ineendet. a a v43 Olyootap 43-44 ko ma mi eng' siruutik alak che kiyoon. Kisir yuu, ko uu eng' Bukuuik che leel che chaang'. Eng' ng'wanindo ko ki saae kong'eny miising'; ak koegu kaotikyik ko uu korotiik che eecheen che ki ibutyi ng'wony.

Kingo ng'eet eng' saaet, konyoonji kasubik ak konyoor icheek koruei amu ng'wanindo,

ak koleenji, “Amune oruitosi? Ong'eetyee ak osaae, si mochut yoomseet.”

Kiga King'wekto eng' Torocheet

Kingo ta kong'alaali, konyo tuiyet, kobooto age ne keguure Judas ne kondoe icheek, age eng' taman ak aeng'. Ki riikyi Jeso si kotorooch ineendet,

ago koleenji Jeso, “Judas, ing'wektoe Weeriitap chii eng' torocheet?”

Kingo keer pichooto che ki mi ak ineendet kiy ne mi koyaaksei, kole, “Kiptaiyat, kewiir ak rotweet?” Ki wiir anyun age eng' icheek otwogindetap tisiindet ne oo, ak kotil itinnyi ne po eutap tai.

Ago kowolji Jeso koleenji, “Agoi oli!” Ak kotwa itit ak kosoop ineendet. Kowolji anyun Jeso tisiik che eecheen ak riibiigap Hekaluut ak poisyek che ki pwa ole mi ineendet, “Komong'u otinye rotoogap chok ak kirokweek, ko uu ye osetyini rebindet? Ki ami kobooto okweek peetuusyek tugul eng' Hekaluut, ak ma ki onama. Ago niito ko saiteng'wong', ak kamuktaetap mesundeito.”

Eesyoi Petero Kole Mangen Jeso

Ki nam icheek ineendet, ak koip koba kootap tisiindet ne oo; ak kosup Petero eng' loo. Ki belji maat kwenutap seremutap koot ak kotebee icheek togeet; kitebee Petero kwenunnywa. Ago kingo keer chepto age kotebee ole mi maat, kochiilji ak koleenji, “Ki mi chiini kobooto ineendet.”

Ago ki eesyo kole, “Chepyoso, mangen ineendet.”

Ne ma tya, kingo keer ineendet age ak koleenji, “Ii agenge eng' icheek.” Ago kole Petero, “Chii, ma anee.”

Ko uu kingo it saitap agenge, komwa age eng' kimnateet kole, “Iman ki mi chiini kobooto ineendet, amu Galiilindet agine.”

Ago kole Petero, “Chii, mangen nooto imwae.” Ak koma tyanit, kingo ta kong'alaali, koote kipsoiywet. Ki welelgei Kiptaiyat ak kogeer Petero. Ak ki ibwaat Petero ng'olyoot ne kiga komwachi Kiptaiyat kole, “Kotom koote kipsoiywet rani, ieesyoa konyil somok.” Kimanda anyun saang', koriir eng' ng'wanindo ne oo.

Ak piik che ki riibei Jeso, ko ki ng'emei ineendet ak kobirei. Ki tuch konyekyik, ak koteebe kole, “Maotisye! Ng'oo ne kuwiirin?” Ak komwa ng'aleek alak che chaang' che yaacheen agobo ineendet.

Tonone Jeso Taitap Kapkirwooget

Kingo kaeech, kituiyo kapkirwooget ne po poisyegap piik—tisiik che eecheen ak siriik—ak koip ineendet koba kapkirwoogennywa, kole,

“Ngot ii Kristo, imwaiwech.” Koleenji icheek, “Ngot amwaun, ma oyan,

“ak ngot ateebwok, ma owolwo.

“Ago kobooch nguno, kotebee Weeriitap chii eng' eutap taitap kamuktaetap Kwandanyo.”

Kole icheek tugul, “Ii anyun Weeriitap Kamuktaindet?” Koleenji icheek, “Omwae okweek ale anee.”

Kole icheek, “Kemache nee paornateet ne alak? Amu kagas acheek kobun kutinnyi.”