Imbere ya Pilato na Herodi

Pilato avuga gatatu ko atamubonako icaha, mugabo amaherezo arabemerera. Yesu abwira abagore barira ngo biririre bo ubwabo, asaba Data wiwe kubabarira abariko baramubamba, kandi asezeranira umugizi wa nabi paradizo. Umwijima urakwira, umwenda ugatabukamo kabiri, Yosefu agasaba umubiri wiwe.

Igice 23.

Nuko ishengero ryose rirahaguruka, rimushikana imbere ya Pilato. Baratangura kumwagiriza bati: “Uyu muntu twamusanze azimiza ihanga ryacu, abuza gutanga ikori rya Sezari, kandi yiyita Kristo, umwami.”

Pilato aramubaza ati: “Ni wewe Mwami w’Abayuda?” Aramwishura ati: “Ni ko uvuze.”

Nuko Pilato abwira abakuru b’abaherezi n’amasinzi ati: “Nta caha nsanga kuri uyu muntu.”

Mugabo baranka bati: “Arasambuza abantu, yigisha hose muri Yudaya, uhereye i Galilaya gushika ng’aha.”

Pilato avyumvise, abaza nimba uyo muntu yari Umugalilaya. Amenye ko yari mu buyobozi bwa Herodi, aramurungika kuri Herodi, na we nyene yari i Yeruzalemu muri iyo misi.

Herodi abonye Yesu, aranezerwa cane, kuko yamaze igihe kirekire ipfuza kumubona, yari yarumvise ivyiwe, kandi yizigira ko azomubona akora igitangaza. Aramubaza ibibazo vyinshi, mugabo Yesu nta co yamwishuye. Abakuru b’abaherezi n’abanditsi bari bahagaze, bamwagiriza bivuye inyuma. Herodi n’abasoda biwe baramugaya, baramukengera, bamwambika impuzu zaka, maze bamusubiza kwa Pilato. Uwo musi Herodi na Pilato baracika abagenzi; mu gihe c’imbere bari abansi.

Nuko Pilato ahamagara abakuru b’abaherezi, abatware n’abantu, arababwira ati: “Mwanshikirije uyu muntu nk’uwuhindukiza abantu. Namubajije imbere yanyu, nta caha nsanze kuri uyu muntu ku vyo mumwagiriza. Na Herodi nyene nta kindi yasanze, kuko yamusubije iwacu. Raba, nta co yakoze cotuma apfa. Ni co gituma nzomuhana, maze ndamurekure.” ^a Mugabo bose baratakamba icarimwe bati: “Yikurweho uyu muntu! Udurekurire Baraba!” uwo yari mu munyororo kubera ukwigomeka kwabaye mu gisagara, no kubera ubwicanyi.

Pilato yongera kubaganiriza, agomba kurekura Yesu, mugabo baguma bavuza induru bati: “Mubambe, mubambe ku musaraba!”

Ubwa gatatu arababwira ati: “Kubera iki? Ikibi uyu muntu yakoze ni ikihe? Nta caha co kumwicisha nsanga muri we. Ni co gituma nzomuhana, maze ndamurekure.” Mugabo baguma bavuza induru cane, basaba ko abambwa ku musaraba, maze amajwi yabo araganza. Nuko Pilato aca afata ingingo yuko ivyo basavye bizoshitswa. Arekura wa muntu basavye, uwari mu munyororo kubera ukwigomeka n’ubwicanyi, mugabo ashikiriza Yesu ivyo bagomba.

Umwana Arabambwa ku Musaraba

Bamujana, bafata umuntu umwe yitwa Simoni w’i Kurene, yari avuye mu gisagara, bamwikoreza umusaraba ngo awutware inyuma ya Yesu. Isinzi rinini ry’abantu ririmukurikira, hamwe n’abagore bamuririra bakaborogera.

Mugabo Yesu arabahindukirira, ababwira ati: “Bakobwa b’i Yeruzalemu, ntimundirire; nimwiririre mwebwe nyene n’abana banyu. Kuko hari imisi igiye kuza, aho bazovuga bati: ‘Hahirwa ingumba, inda zitigeze zivyara, n’amabere atigeze yonsa.’ Maze bazotangura kubwira imisozi bati: ‘Nimutugweko,’ no gusaba udusozi bati: ‘Nimudupfuke.’ Kuko nimba bagira gutya ku giti kibisi, bizogenda gute ku giti cumye?” ^b

Hari n’abandi babiri, bari abagizi ba nabi, bajanwa na we kugira bicwe. Bashitse ahantu hitwa Igihanga, bamubambira ng’aho hamwe na ba bagizi ba nabi, umwe iburyo bwiwe, uwundi ibubamfu bwiwe.

Yesu avuga ati: “Data, ubababarire, kuko batazi ico bariko barakora.” Maze bagabura impuzu ziwe, bazikubita akamena. ^c

Abantu bari bahagaze barareba; abatware baramuyiyagiza bati: “Yarokoye abandi; nyene yirokore, nimba ari Kristo w’Imana, Umutoranijwe.”

N’abasoda baramukengera, baza bamuzanira umuvinyu usharira, bati: “Nimba uri Mwami w’Abayuda, nuyirokore!”

Hari n’ikibaho co hejuru yiwe canditse kiti: “Uyu ni we Mwami w’Abayuda.”

Umwe muri ba bagizi ba nabi bari bamanitswe aramutuka ati: “Mbega si wewe Kristo? Niwirokore natwe udukize!”

Mugabo uwundi aramukankamira ati: “Mbega wewe ntugira ubwoba Imana, kandi uri mu rubanza rumwe? Twebwe ni ko bikwiriye, kuko turiko turahanirwa ivyo twakoze; mugabo uyu muntu nta kibi na kimwe yakoze.” Maze aravuga ati: “Yesu, uzondibuke nuza mu bwami bwawe.”

Yesu aramwishura ati: “Ni ukuri ndakubwira, uyu musi uzoba hamwe nanje mu Paradizo.”

Umwana Arahekura

Hari hamaze gushika nko ku muntango w’umutaga, maze umwiza ukwira igihugu cose gushika ku saha zitatu z’umuhingamo, kuko umuco w’izuba wazimye; maze umwenda w’urusengero utabuka mo kabiri.

Yesu asemerera n’ijwi rirenga ati: “Data, mu minwe yawe ndashize impwemu yanje!” Maze ahekura.

Umukuru w’abasoda abonye ivyabaye, ashemeza Data wa twese ati: “Ni ukuri uyu muntu yari umugororotsi.” Amasinzi yose yari yakoraniye kuri ico kintu, abonye ivyabaye, asubira imuhira yikubita mu gikiriza. Abo bose bari bamuzi, n’abagore bari baramukurikiye kuva i Galilaya, bari bahagaze kure bareba ivyo bintu.

Umwana Arashirwa mu Mva

Hariho umuntu yitwa Yozefu, umwe mu nama nkuru, umuntu mwiza kandi umugororotsi, uwo atari yaremeye umugambi wabo n’ivyo bakoze. Yari avuye i Arimataya, igisagara c’Abayuda, kandi yari arindiriye ubwami bwa Data wa twese. Uyo muntu aja kwa Pilato, asaba umubiri wa Yesu. Awumanura, awupfunya mu mpuzu y’ilino, maze amushira mu mva yacukuwe mu buye, aho hataraharirwa umuntu n’umwe. Wari umusi wo Kwitegura, kandi Isabato yari igiye gutangura. Abagore bari baje na we bava i Galilaya baramukurikira, barabona imva n’ukuntu umubiri wiwe washizwe. Basubira inyuma, bategura imibavu n’amavuta, maze baruhuka ku Isabato nk’uko vyategetswe.