Pilate aru Herod laga usor te

Pilate tin bar koise Tai ekjon dosh bhi napai, tinu bhi tai haar mani loise. Jisu kandi thaka mahila khan ke nijor nimite kandibole koise, Tai ke krus te morai thaka manuh khan ke maph koribole Tar Pitri ke mangise, aru ekjon dushto manuh ke Paradise laga kotha dise. Andhar giri jaise, porda phati jaise, aru Joseph Tar gaw ke mangise.

Adhyay 23.

Tetiya pura sabha tu uthi kene Tar ke Pilate laga usor te loi anise. Tarkhan Tar ke golti dibole shuru korise, koise, “Ami etu manuh ke amar desh laga manuh khan ke thogai diya, Caesar ke kor dibole mana kora, aru nijor ke Khrista, ekjon raja ase koi thaka pali paise.”

Pilate pora Tar ke hudise, “Tumi Yehudi khan laga Raja ase?” Jisu pora jawab dise, “Tumi nijor koi ase.”

Tetiya Pilate pora moha purohit khan aru manuh bhir ke koise, “Moi etu manuh te eku golti pa-a nai.”

Kintu tarkhan aru bhi joborile koise, “Tai manuh khan ke bhrohai diye, Galilee pora shuru kori kene yate tak, pura Judea te sikhai diye.”

Pilate etu kotha huni kene, etu manuh Galilee laga manuh ase na nai hudise. Tai Herod laga adhikar nichete ase koi jani kene, Tar ke Herod logote pathai dise, kun bhi hei din khan te Jerusalem te thakise.

Jisu ke dikhi kene Herod bisi khushi hoise—kilemane tai bisi din pora Tar kotha huni kene Tar ke sabole mon thakise, aru Tar pora ekta chihna kora sabole asha korise. Tai Tar ke bisi kotha hudise, kintu Jisu pora tai ke eku jawab dia nai. Moha purohit khan aru niyom likha khan khara hoi kene, Tar ke joborile golti dise. Herod aru tai laga sipahi khan pora Tar ke tuchcho korise aru hasi uthai dise, aru Tar ke ujjol kapra pindhai kene, Pilate logote wapas pathai dise. Hei dinte Herod aru Pilate sathi hoi jaise—kilemane age te tarkhan ekjon-ekjon laga dushman thakise.

Tetiya Pilate pora moha purohit khan, cholawta khan, aru manuh khan ke matai anise, aru tarkhan ke koise, “Tumikhan etu manuh ke manuh khan ke ulta rasta te loi jua ekjon nisena moi logote loi anise. Moi tumikhan laga usor te Tar ke bisari saise, kintu tumikhan pora diya golti khan te etu manuh laga eku golti pa-a nai. Herod bhi pa-a nai, kilemane tai Tar ke amikhan logote wapas pathai dise. Sabi, Tai mori bole layak eku kaam kora nai. Etu karne moi Tar ke saja di kene chari dibo.” ^a Kintu tarkhan sob eke logote hala korise, “Etu manuh ke hatai dibi! Amikhan nimite Barabbas ke chari dibi!” etu manuh to sheher te huathaka ekta hangama aru khun kora karone bondhi ghor te thakise.

Pilate Jisu ke chari dibole mon korise, aru aru ekbar tarkhan ke koise, kintu tarkhan hala kori thakise, “Krus te tangai dibi, Tar ke krus te tangai dibi!”

Tin bar te tai tarkhan ke koise, “Kile? Etu manuh ki biya korise? Moi Tar te mora laga eku karone pa-a nai. Etu karne moi Tar ke saja di kene chari dibo.” Kintu tarkhan jor pora hala kori thakise, Tar ke krus te tangai dibole mangise, aru tarkhan laga awaj jiti jaise. Etu karne Pilate tarkhan laga mangi thaka purah hobo lage koi kene faisla korise. Tai hangama aru khun kora karone bondhi ghor te thaka, tarkhan mangi thaka manuh ke chari dise, kintu Jisu ke tarkhan laga itcha te di dise.

Putro Ke Krus Te Tangai Dise

Tar ke loi ja-a homoi te, tarkhan gaon pora ahi thaka, Cyrene laga Simon koi kene ekjon manuh ke dhurise, aru Jisu laga pichete krus bukhi bole tai uporte rakhi dise. Bisi dangor manuh bhir Tar pichete jaise, Tar karone kandi thaka aru mata mari thaka maiki khan bhi thakise.

Kintu Jisu tarkhan phale ghuri kene koise, “Jerusalem laga chukri khan, Moi karone nakandibi; nijor karone aru tumikhan laga bacha khan karone kandibi. Kilemane eneka din khan ahi ase, jitia tarkhan kobo, ‘Bacha nohua maiki khan, kitia bhi bacha nojonom diya pet khan, aru kitia bhi dudh nokhuwa buku khan asirbad pa-a ase.’ Tetiya tarkhan pahar khan ke, ‘Amikhan uporte giri bhi,’ aru tila khan ke, ‘Amikhan ke dhaki dibi,’ koi kene kobole shuru koribo. Kilemane jodi tarkhan lakri hora thaka homoi te eneka kore, tene hole sukha homoi te ki hobo?” ^b

Dusra duijon, kun golti kora manuh thakise, Tar logote morai dibole loi jaise. Tarkhan “Khuli” koi thaka jaga te punchise, aru ta te golti kora khan logote Tar ke krus te tangai dise, ekjon Tar dyna phale, ekjon Tar baya phale.

Jisu pora koise, “Pitri, tarkhan ke maph kori dibi, kilemane tarkhan ki kori ase najane.” Tetiya tarkhan chithi phelai kene Tar laga kapra khan bhag kori loise. ^c

Manuh khan khara hoi kene sai thakise; cholawta khan hinsa kori koise, “Tai dusra khan ke bachaise—jodi Tai Isor laga Khrista, basi luwa Jon ase, tene hole Tai nijor ke bachai lobi.”

Sipahi khan bhi Tar ke sorom khilai dise, aru usorte ahi kene Tar ke tita angur-ros dise, aru koise, “Jodi tumi Yehudi khan laga Raja ase, tene hole nijor ke bachai lobi!”

Tar uporte ekta likha bhi thakise: “Etu Yehudi khan laga Raja ase.”

Tangai thaka golti kora khan majote ekjon pora Tar ke sorom dise, “Tumi Khrista nohoi? Nijor ke aru amikhan ke bachai lobi!”

Kintu dusra jon pora tai ke dhomkai kene koise, “Tumi bhi eke saja te ase, tene hole bhi Isor ke bhoi nakore? Amikhan nimite thik ase—amikhan ki korise etu laga daan pai ase; kintu etu manuh eku biya kaam kora nai.” Tetiya tai koise, “Jisu, jitia Apuni laga rajyo te ahibo, titia moi ke yaad koribi.”

Aru Jisu pora tai ke koise, “Hosa kotha Moi tumi ke koi ase, aji tumi Moi logote Paradise te thakibo.”

Putro Laga Pran Chari Dise

Etu homoi te prai dupor hoi jaise, aru pura desh uporte andhera ahise aru tin baje tak thakise, kilemane suryo laga ujala harai jaise; aru mondir laga porda majot pora duita hoi phati jaise.

Jisu jor pora hala kori kene koise, “Pitri, Apuni laga hath te Moi laga atma shompi di ase!” Etu koi kene Tar pran ulai jaise.

Ki hoise etu dikhi kene, ekshoh sipahi laga cholawta pora amar Pitri ke stuti korise, “Etu manuh hosa pora dharmik thakise.” Etu sabole joma huwa sob manuh bhir, ki hoise etu dikhi kene, nijor laga buku marikene ghor te wapas jaise. Tar laga sob chena manuh khan, aru Galilee pora Tar pichete aha maiki khan, dur te khara hoi kene etu sob jinis sai thakise.

Putro Ke Kobor Te Rakhise

Etiya Joseph koi kene ekjon manuh thakise, tai ekta sabha laga sadasya thakise, ekjon bhal aru dharmik manuh thakise, kun tarkhan laga plan aru kaam te mani thaka nathakise. Tai Arimathea, ekta Yehudi sheher pora thakise, aru amar Pitri laga rajyo ke rukhi thakise. Etu manuh Pilate logote jai kene Jisu laga mora gaw mangise. Tai etu namai loise, mihin kapra pora bandhi loise, aru kun ke bhi etiya tak narakha, pathor te kata ekta kobor te Tar ke rakhi dise. Etu Taiyar Kora laga din thakise, aru Bisram din shuru hobole thakise. Galilee pora Tar logote aha maiki khan pichete jaise, aru kobor tu, aru Tar gaw kineka rakhise etu saise. Tarkhan wapas jai kene sugondhi tel aru mihthi gundh taiyar korise, titia hukum diya nisena Bisram din te aram korise.