ጐልያድ ንሰራዊት እስራኤል ይላገፅ

ኣርብዓ መዓልቲ ሓደ ጅግና ንእስራኤል ሓደ ሰብ ከውፅኡ ተገዳደሮም፥ ኵሉ ድማ ተሸበረ። ዳዊት ንኣሕዋቱ እንጀራ እናኣብፅሐ፥ ምእንቲ ሰራዊት እቲ ህያው ኣቦ ተቘጥዐ። ነቲ ዝተለቀሐ ኣፅዋር ኣበዮ፥ ካብ ሩባ ሓሙሽተ ኣእማን ኣልዒሉ፥ ንጐልያድ ድማ ብሓንቲ ኣውደቖ።

ምዕራፍ 17።

ፍልስጥኤማውያን ድማ ንውግእ ሰራዊቶም ኣከቡ፤ ኣብ ሶኰት ናይ ይሁዳ ተኣከቡ፤ ኣብ መንጎ ሶኰትን ዓዜቃን ኣብ ኤፌስ ዳሚም ከዓ ሰፈሩ። ሳኦልን ሰብ እስራኤልን ድማ ተኣከቡ፤ ኣብ ለሰ ኤላህ ሰፈሩ፤ ፍልስጥኤማውያን ገፅ ኣቢሎም ኸዓ ንውግእ ተሰለፉ። ፍልስጥኤማውያን ኣብ ሓደ ኰረብታ፥ እስራኤል ድማ ኣብቲ ኣንፃሩ ዘሎ ኰረብታ ደው በሉ፤ ለሰ ኸዓ ኣብ መንጎኦም ነበረ። ጐልያድ ዝበሃል ጅግና ሰብ ጌት ድማ ካብ ሰፈር ፍልስጥኤማውያን ወፀ፤ ቑመቱ ኸዓ ኣስታት ትሽዓተ ፊትን ትሽዓተ ኢንችን ነበረ። ኣብ ርእሱ ናይ ነሓሲ ቍራዕ ነበሮ፤ ክብደቱ ኣስታት ሚእትን ዕስራን ሓሙሽተን ፓውንድ ዝኸውን ቅራፍ ዝመሰለ ድርዒ ኸዓ ተኸዲኑ ነበረ። ኣብ ኣእጋሩ ናይ ነሓሲ መከላኸሊ ነበሮ፤ ኣብ መንጎ መናኩቡ ድማ ናይ ነሓሲ ዂናት ተሰቒሉ ነበረ። ዛብያ ዂናቱ ኸም መጠቕለሊ ኣላማይ ነበረ፤ ናይ ሓፂን ርእሱ ድማ ክብደቱ ኣስታት ዓሰርተ ሓሙሽተ ፓውንድ ነበረ። ዋልታ ዝሓዘ ኸዓ ኣብ ቅድሚኡ ይኸይድ ነበረ። ደው ኢሉ ድማ ናብ ሰራዊት እስራኤል ዓው ኢሉ ከምዙይ በለ፦ “ንውግእ ክትስለፉ ስለ ምንታይ ወፂእኹም? ኣነ ፍልስጥኤማዊ ኣይኮንኩንዶ? ንስኻትኩምከ ባሮት ሳኦልዶ ኣይኮንኩምን? ሓደ ሰብ ሕረዩ እሞ ናባይ ይውረድ። ክዋግኣኒን ክቐትለንን እንተ ኽኢሉ፥ ባሮትኩም ክንኸውን ኢና፤ ኣነ ግና እንተ ሓየልክዎን እንተ ቐተልክዎን፥ ባሮትና ክትኮኑ ኢኹም፤ ከተገልግሉናውን ኢኹም።” እቲ ፍልስጥኤማዊ ድማ “ሎሚ ንሰራዊት እስራኤል እላገፅ ኣለኹ! ሓደ ሰብ ሃቡኒ እሞ ንዋጋእ” በለ።

ዘረባ እቲ ፍልስጥኤማዊ ዝሰምዑ ሳኦልን ኵሎም እስራኤላውያንን ተሸበሩ፤ የመናውን ፈርሑ።

ዳዊት ድማ ወዲ እቲ ሾሞንተ ደቂ ዝነበርዎ፥ ካብ ቤተ ልሔም ናይ ይሁዳ ዝነበረ ኤፍራታዊ እሴይ እዩ ነይሩ። እሴይ ከዓ ብዘመን ሳኦል ኣሪጉ ብዕድመ ደፊኡ ነበረ። እቶም ሰለስተ ዓበይቲ ደቂ እሴይ ድማ ንሳኦል ናብ ውግእ ሰዓብዎ፤ ስም እቶም ናብ ውግእ ዝኸዱ ሰለስተ ደቁ ኸዓ፥ በኵሩ ኤልያብ፥ ካልኣዩ ኣሚናዳብ፥ ሳልሳይ ድማ ሻማ እዩ። ዳዊት ድማ እቲ ዝንእሽ ነበረ፤ እቶም ሰለስተ ዓበይቲ ኸዓ ንሳኦል ሰዓብዎ፤ ዳዊት ግና ናብ ሳኦል እናተመላለሰ፥ ኣባጊዕ ኣቦኡ ኣብ ቤተ ልሔም ይጓሲ ነበረ።

እቲ ፍልስጥኤማዊ ድማ ኣርብዓ መዓልቲ ንግሆን ምሸትን እናቐረበ ደው ይብል ነበረ።

እሴይ ድማ ንዳዊት ወዱ ከምዙይ በሎ፦ “እዝ ብዙሕ ቑሉ እኽሊ እዙይን እዘን ዓሰርተ እንጀራታት እዚኤንን ውሰድ እሞ፥ ናብ ኣሕዋትካ ናብቲ ሰፈር ቀልጢፍካ ኣብፅሐሎም። እዘን ዓሰርተ ኣጅቦ እዚኣን ድማ ናብ ሓለቓ እቲ ክፍሊ ሰራዊቶም ውሰድ፤ ኣሕዋትካ ደሓን ምህላዎም ኣፃሪ እሞ፥ ብስራዮም ኣምፅአለይ። ሳኦልን ኣሕዋት ዳዊትን ኵሎም ሰብ እስራኤልን ድማ ኣብ ለሰ ኤላህ ምስ ፍልስጥኤማውያን ይዋግኡ ኣለዉ።”

ዳዊት ድማ ኣንጊሁ ተሲኡ፥ ነተን መጓሰ ናብ ሓላዊ ገዲፉ፥ ፅዒኑ ኸም ትእዛዝ እሴይ ከደ። እቲ ሰራዊት ዓው ዓው እናበለ ናብ ሜዳ ውግእ ኽሳለፍ እንተሎ ኸዓ ኣብቲ ሰፈር በፅሐ። እስራኤልን ፍልስጥኤማውያንን ድማ ንሓድሕዶም ገፅ ንገፅ ተሰለፉ። ዳዊት ድማ ኣቑሑቱ ናብ ሓላዊ ኣቑሑ ገዲፉ፥ ናብቲ ሰራዊት ጎየየ፤ ኣሕዋቱ ኸዓ ሰላም በሎም። ምስኣቶም ክዛረብ እንተሎ ኸዓ፥ እቲ ካብ ጌት ዝመፀ ፍልስጥኤማዊ ጅግና ጐልያድ፥ ካብ ሰራዊት ፍልስጥኤማውያን ወፂኡ ኸም ልማዱ ዘረባኡ ተዛረበ፤ ዳዊት ድማ ሰምዖ። ኵሎም ሰብ እስራኤል ነቲ ሰብኣይ ምስ ረኣይዎ፥ የመና ፈሪሖም ካብ ቅድሚኡ ሃደሙ። ሰብ እስራኤል ድማ “ነዝ ዝወፅእ ዘሎ ሰብኣይ እዙይ ትርእይዎዶ ኣለኹም? ንእስራኤል ክላገፅ እዩ ዝመፅእ ዘሎ። ንጉስ ከዓ ነቲ ዝቐትሎ ብዙሕ ሃብቲ ክህቦ እዩ፤ ጓሉ ድማ ክህቦ እዩ፤ ንቤት ኣቦኡውን ኣብ እስራኤል ካብ ግብሪ ነፃ ክገብሮ እዩ” በሉ።

ዳዊት ድማ ነቶም ኣብ ጥቓኡ ደው ኢሎም ዝነበሩ ሰባት “ነዝ ፍልስጥኤማዊ እዙይ ቐቲሉ ንእስራኤል ካብ ነውሪ ዘናግፍ ሰብ እንታይ እዩ ዝረክብ? እዝ ዘይተገረዘ ፍልስጥኤማዊ እዙይ ንሰራዊት እቲ ህያው ኣቦ ዝላገፅ መን እዩ?” ኢሉ ጠየቐ።

እቲ ህዝቢ ድማ ነቲ ዝቐትሎ ሰብ እንታይ ከም ዝግበረሉ፥ ከምቲ ቕድም ዝበልዎ ነገርዎ።

ዓብዪ ሓዉ ንዳዊት ኤልያብ ድማ፥ ምስቶም ሰባት ክዛረብ ከሎ ምስ ሰምዖ፥ ብዳዊት ተቖጥዐ። “ስለ ምንታይ ወሪድካ? ነተን ቑሩብ ኣባጊዕ ኣብ በረኻ ንመን ገዲፍካየን? ኣነ ትዕቢትካን ክፍኣት ልብኻን እፈልጥ እየ፤ ንስኻ ውግእ ክትርኢ ጥራሕ ኢኻ ወሪድካ” በሎ።

ዳዊት ድማ “ሕዚ እንታይ ገይረ? ሕቶ ጥራሕ እዩ ነይሩ” በለ። ናብ ካልእ ድማ ግልፅ ኢሉ ኸምኡ ጠየቐ፤ እቲ ህዝቢ ኸዓ ኸምቲ ቐዳማይ መለሰሉ። እቲ ዳዊት ዝበሎ ዘረባ ተሰሚዑ ድማ ንሳኦል ነገርዎ፤ ንሱ ኸዓ ናብኡ ልኢኹ ኣምፅኦ። ዳዊት ድማ ንሳኦል “ብሰሪኡ ልቢ ሓደ እኳ ኣይድከም፤ ባርያኻ ኸይዱ ነዝ ፍልስጥኤማዊ እዙይ ክዋግኦ እዩ” በሎ።

ሳኦል ድማ “ንስኻ ገና ቖልዓ ኢኻ፥ ንሱ ግና ካብ ንእስነቱ ጀሚሩ ተዋጋኢ እዩ ነይሩ እሞ፥ ነዝ ፍልስጥኤማዊ እዙይ ክትዋግኦ ኣይትኽእልን ኢኻ” በለ።

ዳዊት ድማ ንሳኦል ከምዙይ በሎ፦ “ባርያኻ ኣባጊዕ ኣቦኡ ይጓሲ ነበረ፤ ኣንበሳ ወይ ድቢ መፂኡ ኸዓ ካብ መጓሰ በጊዕ ምስ ጨበጠ፥ ኣነ ሰጒገዮ፥ ወቒዐዮ፥ ነቲ በጊዕ ድማ ካብ ኣፉ ኣናገፍክዎ፤ ናባይ ምስ ተንስአ ኸዓ፥ ብፀጕሪ ምዕጕርቱ ሒዘ ወቒዐ ቐተልክዎ። ባርያኻ ንኣንበሳን ንድብን ክልቲኦም ቐቲሉ እዩ፤ እዝ ዘይተገረዘ ፍልስጥኤማዊ እዙይ ንሰራዊት እቲ ህያው ኣቦ ላጊፁ እዩ እሞ፥ ከም ሓደ ኻብኣቶም ክኸውን እዩ።” ዳዊት ድማ መሊሱ “እቲ ኻብ ጭፍራ ኣንበሳን ካብ ጭፍራ ድብን ዘድሓነኒ ኣቦና፥ ካብ ኢድ እዝ ፍልስጥኤማዊ እዙይ ከድሕነኒ እዩ” በለ። ሳኦል ድማ “ኪድ፤ ኣቦናውን ምሳኻ ይኹን” በለ።

ሽዑ ሳኦል ንዳዊት ናይ ገዛእ ርእሱ ኽዳን ውግእ ኣከደኖ፤ ኣብ ርእሱ ናይ ነሓሲ ቍራዕ ገበረሉ፤ ድርዒ ኸዓ ኣከደኖ። ዳዊት ድማ ኣብ ልዕሊ እቲ ድርዒ ሰይፊ ተዓጢቑ ክኸይድ ፈተነ፤ ግና ኣይለመዶን ነበረ። ንሳኦል ከዓ “ኣይለመድክዎምን እየ እሞ፥ በዚኣቶም ክኸይድ ኣይኽእልን እየ” በሎ። ስለዙይ ኣውፅኦም።

በትሩ ድማ ኣብ ኢዱ ሓዘ፤ ካብቲ ፈሳሲ ማይ ከዓ ሓሙሽተ ልሙፃት ኣእማን መሪፁ፥ ኣብ ጁባ ናይቲ ናይ ጓሳ ኸረጢቱ ኣእተወን፤ ወንጪፍ ድማ ኣብ ኢዱ ሒዙ ናብቲ ፍልስጥኤማዊ ቐረበ። እቲ ፍልስጥኤማዊ ኸዓ፥ እቲ ዋልታኡ ዝሓዘ ኣብ ቅድሚኡ ኾይኑ፥ ናብ ዳዊት እናቐረበ መፀ። እቲ ፍልስጥኤማዊ ድማ ንዳዊት ጠሚቱ፥ ቐይሕ መልክዐኛ ቖልዓ ጥራሕ ምዃኑ ምስ ረአየ፥ ነዓቖ። ነቲ ፍልስጥኤማዊ ድማ “ብኣባትር ክትመፅኣኒ፥ ኣነዶ ኸልቢ እየ?” በሎ። እቲ ፍልስጥኤማዊ ኸዓ ብኣማልኽቱ ንዳዊት ረገሞ። እቲ ፍልስጥኤማዊ ድማ “ናብዙይ ንዓ፤ ስጋኻ ኸዓ ንኣዕዋፍ ሰማይን ንኣራዊት መሮርን ክህቦ እየ” በሎ።

ዳዊት ድማ ነቲ ፍልስጥኤማዊ ከምዙይ በሎ፦ “ንስኻ ብሰይፍን ብዂናትን ብጦርን ናባይ ትመፅእ ኣለኻ፤ ኣነ ግና በቲ ንስኻ ዝፀረፍካዮ፥ ብስም ኣቦ ሰራዊት ሰማይ፥ ኣቦ ሰራዊት እስራኤል ናባኻ እመፅእ ኣለኹ። ሎሚ ኣቦና ናብ ኢደይ ኣሕሊፉ ክህበካ እዩ፤ ኣነ ኸዓ ክወቕዐካ፥ ርእስኻውን ክቘርፅ እየ። ሎሚ መዓልቲ ድማ ሬሳ ሰራዊት ፍልስጥኤማውያን ንኣዕዋፍ ሰማይን ንኣራዊት ምድርን ክህቦ እየ፤ ኵላ ምድሪ ድማ ኣብ እስራኤል ኣቦና ኸም ዘሎ ክትፈልጥ እያ።

ኵሉ እዝ ኣብዙይ ዝተኣከበ ህዝቢ ድማ ኣቦና ብዘይ ሰይፍን ብዘይ ዂናትን ከም ዘድሕን ክፈልጥ እዩ፤ ውግእ ናይ ኣቦና እዩ እሞ፥ ንኣኻትኩም ኵልኻትኩም ናብ ኢድና ኣሕሊፉ ክህበኩም እዩ።”

እቲ ፍልስጥኤማዊ ክወቕዖ ተሲኡ ምስ ቀረበ ኸዓ፥ ዳዊት ክቕበሎ ቀልጢፉ ናብቲ ሰለፍ ጐየየ። ዳዊት ድማ ኢዱ ናብ ከረጢቱ ሰዲዱ፥ ሓደ እምኒ ኣውፂኡ፥ ወንጪፉ ነቲ ፍልስጥኤማዊ ኣብ ግምባሩ ወቕዖ። እቲ እምኒ ኸዓ ኣብ ግምባሩ ኣተወ፤ ንሱ ድማ ብገፁ ናብ ምድሪ ወደቐ። ከምዙይ ጌሩ ድማ ዳዊት ነቲ ፍልስጥኤማዊ ብወንጭፍን ብእምንን ሓየሎ፤ ሰይፊ ኣብ ኢዱ ኸይሓዘ ኸዓ ወቒዑ ቀተሎ። ዳዊት ድማ ጐይዩ ኣብ ልዕሊኡ ደው በለ። ሰይፊ እቲ ፍልስጥኤማዊ ወሲዱ፥ ካብ ሰገባኡ መሊሑ ቀተሎ፤ ብእኡ ድማ ርእሱ ቘረፆ። እቶም ፍልስጥኤማውያን ከዓ ጅግንኦም ከም ዝሞተ ምስ ረኣዩ ሃደሙ።

ሽዑ ሰብ እስራኤልን ይሁዳን ዓው ኢሎም ተሲኦም ነቶም ፍልስጥኤማውያን ክሳዕ ኣፍ ደገ ጌት፥ ክሳዕ በርታት ኣስቀሎና ሰጐጕዎም። ቅቱላት ፍልስጥኤማውያን ከዓ ኣብ መንገዲ ሸዓራይም፥ ክሳዕ ጌት፥ ክሳዕ ኣስቀሎና ወደቑ። ደቂ እስራኤል ድማ ነቶም ፍልስጥኤማውያን ካብ ምስጓጕ ምስ ተመለሱ፥ ሰፈሮም ዘመቱ። ዳዊት ድማ ርእሲ እቲ ፍልስጥኤማዊ ናብ ኢየሩሳሌም ወሰደ፤ ኣፅዋር ጎልያድ ከዓ ኣብ ድንኳኑ ኣንበረ። ሳኦል ድማ ዳዊት ነቲ ፍልስጥኤማዊ ክቕበሎ ክወፅእ እንተሎ ምስ ረአየ፥ ነቲ ሓለቓ ሰራዊቱ ኣበኔር “ኦ ኣበኔር፥ እዝ መንእሰይ ወዲ መን ኮን ይኸውን?” ኢሉ ሓተቶ። ኣበኔር ከዓ “ብህይወትካ እምሕል ኦ ንጉስ፥ ኣይፈልጥን እየ” ኢሉ መለሰ።

ንጉስ ድማ “እዝ መንእሰይ ወዲ መን ምዃኑ ፍለጥ” በለ።

ዳዊት ድማ ነቲ ፍልስጥኤማዊ ቀቲሉ ምስ ተመለሰ፥ ኣበኔር ወሲዱ ናብ ቅድሚ ሳኦል ኣምፅኦ፤ ርእሲ እቲ ፍልስጥኤማዊ ኸዓ ኣብ ኢዱ ነበረ። ሳኦል ድማ “ኦ መንእሰይ፥ ወዲ መን ኢኻ?” ኢሉ ጠየቖ። ዳዊት ከዓ “ወዲ ሓሽከርካ እሴይ በዓል ቤተ ልሔም እየ” በለ።