1 Samuel 17 FHB Father's Heart Bible™

17 ¹Philistine khan pora lorai nimite tarkhan laga sena khan ke joma korise, aru Judah desh laga Socoh te joma hoise, aru Socoh aru Azekah laga majot te, Ephes-dammim te tambu lagaise. ²Saul aru Israel laga manuh khan joma hoi kene, Elah laga upotika te tambu lagaise, aru Philistine khan ke bhirai kene lorai laga sari khara korise. ³Philistine khan ekta pahar te khara hoise, aru Israel tu dusra phale laga pahar te, aru tarkhan laga majot te upotika thakise. ⁴Philistine laga tambu pora Gath sheher laga Goliath koi kene ekjon bir ulai ahhise, tar lamba te nou feet aru nou inch nisena thakise. ⁵Tar matha te pitol laga ekta topi thakise; aru tai pitol laga chaal thaka jhukti pindhi thakise, jun laga bhar 125 pound nisena thakise. ⁶Pitol laga rokhia tar theng khan ke dhakise, aru tar kandha laga majot te pitol laga ekta bhala jhulai thakise. ⁷Tar bhala laga dandi tu kapor bona manuh laga dandi nisena thakise, aru tar loha laga matha laga bhar pondro pound nisena thakise. Aru tar dhal bukhi diya manuh tar age te jaise. ⁸Tai khara hoi kene Israel laga sena khan ke hala kori kene koise, “Kile tumikhan lorai nimite sari lagabole ulai ahhise? Moi ekjon Philistine nohoi, aru tumikhan Saul laga noukar khan nohoi? Ekjon manuh basi kene tai ke moi logot niche pathai dibi. ⁹Jodi tai moi logot lorai kori kene moi ke morai dibo pare, titia hole amikhan tumikhan laga noukar hoi jabo; kintu jodi moi tai ke harai kene morai dile, titia hole tumikhan amikhan laga noukar hobo aru amikhan ke sewa koribo.” ¹⁰Titia Philistine pora koise, “Aji moi Israel laga sena khan ke choleng di ase! Moi ke ekjon manuh dibi; amikhan lorai koribo.”

¹¹Jitia Saul aru pura Israel pora Philistine laga kotha khan hunise, tarkhan bisi chinta hoi kene bhoi khaise.

¹²David tu Jesse laga putro thakise, jun Judah desh laga Bethlehem sheher laga ekjon Ephrathi manuh thakise aru tar aathjon putro thakise. Saul laga somoy te Jesse tu bura hoi kene umor te bisi dangor hoi jaise. ¹³Jesse laga tinjon dangor putro khan Saul laga pichete lorai te jaise: poila jonom Eliab, dusra Abinadab, aru tisra Shammah. ¹⁴David tu sobse huru thakise. Tinjon dangor khan to Saul laga pichete jai jaise, ¹⁵kintu David tu Saul logot pora ahh-ja kori kene Bethlehem te tar baba laga mer khan ke sa-bole thakise.

¹⁶Chalis din tak Philistine tu hodai phojur aru saam age te ahhi kene khara hoise.

¹⁷Jesse pora tar putro David ke koise, “Tumar bhai khan nimite bhuna kora dhaan laga eitu dangor bhag aru eitu dosta roti loi kene, tambu te thaka tumar bhai khan logot joldi loijabi. ¹⁸Eitu dosta cheese tarkhan laga dolpoti ke dibi. Tumar bhai khan kineka ase sabi, aru tarkhan laga khobor wapas loi anibi. ¹⁹Saul, David laga bhai khan, aru Israel laga sob manuh khan Elah laga upotika te, Philistine khan logot lorai kori thakise.”

²⁰Phojur te David tu mer khan ke ekjon rokhiya logot chari kene, saman khan uthai loi kene, Jesse pora hukum diya nisena jaise. Jitia sena khan lorai laga sari phale jai kene lorai laga hala kori thakise, titia tai tambu te punchise. ²¹Israel aru Philistine khan ekjon-ekjon ke bhirai kene tarkhan laga sari khara korise. ²²David tu tar saman khan to saman rokhiya logot chari kene, lorai laga sari phale polaise, aru tar bhai khan ke salam korise. ²³Jitia tai tarkhan logot kotha koi thakise, titia Gath laga Philistine bir Goliath tu Philistine laga sena khan pora ulai ahhi kene tar hodai laga choleng ke hala korise, aru David pora eitu hunise. ²⁴Jitia Israel laga manuh khan hei manuh ke dikhise, tarkhan sob bisi bhoi pora tai pora polai jaise. ²⁵Israel laga manuh khan koise, “Eitu manuh jun hodai ulai ahhi ase, taike dikhi ase na? Tai Israel ke choleng dibole ahhi ase. Jun pora tai ke morabo, hei manuh ke raja pora bisi dhun dibo, aru tai ke tar chukri dibo, aru Israel te sewa kora pora tar baba laga ghor ke chari dibo.”

²⁶David pora tar usorte thaka manuh khan ke hudise, “Jun manuh eitu Philistine ke morabo aru Israel laga sorom ke hatai dibo, hei manuh ki pabo? Kilemane eitu sunnot nakora Philistine tu kun ase, jun jinda Pitri laga sena khan ke choleng dibo?”

²⁷Jun manuh tai ke morabo, hei manuh nimite ki koribo, eitu manuh khan pora tai ke aru bar koi dise.

²⁸Jitia David laga dangor bhai Eliab pora tai manuh khan logot kotha kora hunise, titia tai David uporte khong uthise. “Tumi kile niche ahhise? Jongol te hei olop mer khan ke tumi kun logot chari ahhise? Moi tumar phutani aru tumar biya mon jani ase—tumi khali lorai sabole niche ahhise.”

²⁹David pora koise, “Etiya moi ki korise? Eitu khali ekta kotha hudi thakise.” ³⁰Tai dusra ekjon phale ghuri kene thik eitu hudise, aru manuh khan pora age nisena tai ke jawab dise. ³¹David laga kotha khan huni kene Saul ke koi dise, aru Saul pora tai ke matise. ³²David pora Saul ke koise, “Tai nimite kun bhi laga mon komjur nahobo dibi. Apuni laga noukar jai kene eitu Philistine logot lorai koribo.”

³³Saul pora koise, “Tumi eitu Philistine logot lorai koribo naparibo. Tumi khali ekjon chokra ase, aru tai tar jawan somoy pora ekjon sipahi ase.”

³⁴David pora Saul ke koise, “Apuni laga noukar pora tar baba laga mer khan ke sa-thakise. Jitia ekta singho na ekta bhalu ahhi kene jhar pora ekta mer loi jaise, ³⁵moi tai laga pichete khedise, tai ke marise, aru tar mukh pora mer ke bachai loise. Jitia tai moi phale ghurise, moi tar gola laga baal dhori kene, tai ke mari morai dise. ³⁶Apuni laga noukar pora singho aru bhalu duita ke morai dise; eitu sunnot nakora Philistine bhi tarkhan majot te ekta nisena hobo, kilemane tai jinda Pitri laga sena khan ke choleng dise.” ³⁷David pora aru koise, “Amar Pitri, jun moi ke singho laga nakhun pora aru bhalu pora bachaise, Tai moi ke eitu Philistine laga hath pora bhi bachabo.” Saul pora koise, “Jabi—amar Pitri tumar logote thakibo dibi.”

³⁸Titia Saul pora David ke tar nijor jhukti pindhai dise. Tai David laga matha te pitol laga ekta topi lagai dise aru tai ke lorai laga jhukti pindhai dise. ³⁹David pora jhukti uporte talwar bandhi kene berabole kosis korise, kintu tai eitu te abhyas nathakise. “Moi eitu khan pindhi kene jabo naparibo,” tai Saul ke koise, “kilemane moi eitu te abhyas nai.” Titia tai eitu khan khuli dise.

⁴⁰Tai tar lathi loi kene, nodi laga tol pora pansta chikna pathor basi loise, aru eitu khan tar mer-rokhiya laga jhula laga theli te rakhise, aru hath te gulti loi kene Philistine usorte jaise. ⁴¹Hei somoy te Philistine tu, tar dhal bukhi diya manuh tar age te thaki kene, David usorte ahhi thakise. ⁴²Philistine pora David ke bhal pora saise, aru tai khali ekjon chokra ase koi kene dikhise—gaal rangate aru sundor—aru tai ke tuch korise. ⁴³Tai David ke koise, “Moi ekta kutta ase naki, tumi moi logot lathi khan loi kene ahhi ase?” Philistine pora tar devta khan laga nam te David ke shrap dise. ⁴⁴Tai koise, “Yate ahhibi, aru moi tumar gaw-mangso ke akas laga chiriya khan aru kheti laga janwar khan ke dibo.”

⁴⁵David pora Philistine ke koise, “Tumi moi logot talwar, bhala, aru javelin loi kene ahhi ase, kintu moi sorgo laga sena khan laga Pitri, Israel laga sena khan laga Pitri, jun ke tumi choleng dise, Tai laga nam te tumar logote ahhi ase. ⁴⁶Aji amar Pitri pora tumi ke moi laga hath te di dibo, aru moi tumi ke mari kene tumar matha kati dibo. Thik aji moi Philistine sena laga lahs khan ke akas laga chiriya khan aru prithibi laga jongli janwar khan ke dibo, aru pura prithibi pora Israel te amar Pitri ase koi kene jani jabo.

⁴⁷Yate joma huwa sob manuh pora jani jabo ki amar Pitri talwar na bhala nalagi kene bachai; lorai tu amar Pitri laga ase, aru Tai tumikhan sob ke amikhan laga hath te di dibo.”

⁴⁸Jitia Philistine tu tai ke mari dibole ahhise, David tu tai logot lok pabole lorai laga sari phale joldi polaise. ⁴⁹David pora tar jhula bhitorte hath ghusai kene, ekta pathor loise, eitu gulti pora marise, aru Philistine laga kopal te marise. Pathor tu tar kopal bhitorte ghusi jaise, aru tai mati te mukh niche giri jaise. ⁵⁰Eneka David pora ekta gulti aru ekta pathor pora Philistine ke harai dise; hath te talwar nathaki kene, tai Philistine ke mari kene morai dise. ⁵¹David tu polai ahhi kene tai uporte khara hoise. Tai Philistine laga talwar loi kene, eitu laga khaap pora ulai loise, aru eitu pora tar matha kati kene tai ke morai dise. Tarkhan laga bir mori ja dikhi kene, Philistine khan polai jaise.

⁵²Titia Israel aru Judah laga manuh khan hala kori kene uthise, aru Philistine khan ke Gath laga ghusa jaga aru Ekron laga duar khan tak khedise. Gath aru Ekron jabole Shaaraim laga rasta uporte Philistine laga mora lahs khan giri thakise. ⁵³Jitia Israel laga manuh khan Philistine khan ke khedi kene wapas ahhise, tarkhan Philistine laga tambu ke lut korise. ⁵⁴David pora Philistine laga matha ke Jerusalem te loi jaise, aru Goliath laga hathiyar khan ke tar nijor tambu te rakhise. ⁵⁵David tu Philistine logot lok pabole ulai ja Saul pora sai thakise, aru tai laga sena laga dolpoti Abner ke hudise, “Abner, eitu jawan manuh kun laga putro ase?” Abner pora jawab dise, “He moi laga raja, apuni jinda thaka nisena hosa, moi najane.”

⁵⁶Raja pora koise, “Eitu jawan manuh kun laga putro ase, eitu khuji sabi.”

⁵⁷Jitia David tu Philistine ke morai kene wapas ahhise, Abner pora tai ke loi kene Saul laga age te anise, aru Philistine laga matha tar hath te thakise. ⁵⁸Saul pora hudise, “He jawan manuh, tumi kun laga putro ase?” David pora koise, “Apuni laga noukar, Bethlehem laga Jesse laga putro ase.”