Goliathũ Aagũĩkaga Mbũtũ cia Isiraeli

Mĩthenya mĩrongo ĩna, mũndũ mũraihu anyararaga Isiraeli atĩ maakĩrie mũndũ ũmwe, nao othe makoiga guoya. Daudi, atwaríire ariũ a nyina mĩgate, aigua ũru nĩ ũndũ wa mbũtũ cia Ithe ũrĩa ũrĩ muoyo. Arega nguo cia mbaara cia gũcuuka, akagũthũra mahiga matano rũũĩ-inĩ, na akagũithia Goliathũ na rĩmwe.

Gĩcunjĩ 17.

Nao Afilisti makĩũngania mbũtũ ciao cia mbaara, makĩũngana Soko kũu Juda, makĩamba hema Efesi-Damimu, gatagatĩ ka Soko na Azeka. Nao Saũlũ na andũ a Isiraeli makĩũngana, makĩamba hema Gĩtuamba-inĩ kĩa Ela, makĩhaarĩria mbũtũ ciao cia mbaara maangʼetheire Afilisti. Nao Afilisti makĩrũgama kĩrĩma-inĩ kĩmwe, nao Isiraeli makĩrũgama kĩrĩma-inĩ kĩrĩa kĩngʼetheire, nakĩo gĩtuamba kĩarĩ gatagatĩ kao. Na rĩĩrĩ, hakiuma mũndũ wa hinya thĩinĩ wa kambĩ ya Afilisti, wĩtagwo Goliathũ wa Gathu, na ũraihu wake warĩ ta buti kenda na inji kenda. Mũtwe-inĩ wake aarĩ na ngũbia ya gĩcango; nake eehumbĩte nguo ya mbaara ya gĩcango ĩrĩa ndito ta ratili igana rĩmwe na mĩrongo ĩĩrĩ na ithano. Ngʼaro cia gĩcango nĩciahumbĩrĩte magũrũ make, naguo mũcengi wa gĩcango wacuurĩtio gatagatĩ ka ciande ciake. Mũtĩ wa itimũ rĩake watariĩ ta mũtĩ wa mũtumi wa nguo, naguo mũtwe warĩo wa kĩgera warĩ ũndũ ta ratili ikũmi na ithano. Nake mũkuui wa ngo yake aathiiaga mbere yake. Nake akĩrũgama akĩanĩrĩra kũrĩ mbũtũ cia Isiraeli, akĩmeera atĩrĩ, “Mũũkĩte kũhaarĩria mbaara nĩ kĩĩ? Githĩ niĩ ti Mũfilisti, na inyuĩ mũrĩ ndungata cia Saũlũ? Thuurai mũndũ mũmũikũrũkie kũrĩ niĩ. Angĩkorwo no ahote kũrũa na aanjũrage, nĩtũgũtuĩka ndungata cianyu; no angĩkorwo niĩ ndĩmũtoorie na ndĩmũũrage, nĩmũgũtuĩka ndungata citũ, mũtũtungatagĩre.” Mũfilisti ũcio agĩcooka akiuga atĩrĩ, “Ũmũthĩ nĩngũĩkaga mbũtũ cia Isiraeli! Heei mũndũ tũrũe.”

Na rĩrĩa Saũlũ na Isiraeli oothe maaiguire ciugo cia Mũfilisti ũcio, makĩũrwo nĩ hinya, makĩiyũrwo nĩ guoya mũnene.

Nake Daudi aarĩ mũrũ wa Jese, Mũefiratha wa Bethilehemu kũu Juda, ũrĩa warĩ na aariũ anana. Matukũ-inĩ ma Saũlũ, Jese aarĩ mũkũrũ, mũndũ wa mĩaka mĩingĩ. Nao aariũ atatũ a Jese arĩa akũrũ makĩrũmĩrĩra Saũlũ mbaara-inĩ: Eliabu irigithaathi, na Abinadabu wa keerĩ, na Shama wa gatatũ. Nake Daudi nĩ we warĩ mũnini mũno. Nao atatũ arĩa akũrũ makĩrũmĩrĩra Saũlũ, no Daudi aathiiaga na agacooka kuuma kũrĩ Saũlũ nĩguo arĩĩthagie ngʼondu cia ithe kũu Bethilehemu.

Nake Mũfilisti ũcio aathiiaga mbere o rũũciinĩ na hwaĩ-inĩ, akarũgama, matukũ mĩrongo ĩna.

Nake Jese akĩĩra mũriũ Daudi atĩrĩ, “Oya ngano ĩno hĩhie na mĩgate ĩno ikũmi ũtwaarĩre ariũ a thoguo, ũmahiũhĩrie nginya kambĩ-inĩ. Na ndwaru ici ikũmi cia iria rĩkũmanie ũcitwaarĩre mũnene wao wa ikundi igana. Ũrore ũrĩa ariũ a thoguo matariĩ, na ũnjookerie ũhoro wao. Nao Saũlũ na ariũ a thoguo na andũ a Isiraeli oothe marĩ Gĩtuamba-inĩ kĩa Ela, makĩrũa na Afilisti.”

Na rũũciinĩ tene Daudi agĩũkĩra, agĩtiga rũũru na mũrĩĩthi, akĩoya indo akĩumagara ta ũrĩa Jese aamwathĩte. Nake agĩkinya kambĩ-inĩ rĩrĩa mbũtũ ĩrathiĩ harĩa ĩhaarĩirio ya mbaara, ĩkĩanagĩrĩra mũgambo wa mbaara. Nao Isiraeli na Afilisti makĩhaarĩria mbũtũ ciao mangʼetheanĩire. Nake Daudi agĩtiga indo ciake kũrĩ mũmenyereri wa indo, agĩtengʼera nginya harĩa mbũtũ ya mbaara ĩhaarĩirio, agĩkĩgeithia ariũ a ithe. Na o akĩaria nao, Goliathũ Mũfilisti ũcio wa hinya wa Gathu akiuma thĩinĩ wa mbũtũ cia Afilisti, akĩanĩrĩra ta ũrĩa aamenyerete, nake Daudi akĩigua ũhoro ũcio. Na rĩrĩa andũ a Isiraeli moonire mũndũ ũcio, oothe makĩmũũrĩra marĩ na guoya mũnene. Nao andũ a Isiraeli makiuga atĩrĩ, “Nĩmũroona mũndũ ũyũ ũroka? Okaga nĩguo aĩke Isiraeli. Mũthamaki nĩakaahe mũndũ ũrĩa ũkaamũũraga ũtonga mũingĩ, na amũhe mwarĩ, na arekererie andũ a nyũmba ya ithe wagĩte gũtungata thĩinĩ wa Isiraeli.”

Nake Daudi akĩũria andũ arĩa maarĩ hakuhĩ nake atĩrĩ, “Mũndũ ũrĩa ũkaaũraga Mũfilisti ũyũ na eherie thoni cia Isiraeli nĩ kĩĩ akaaheo? Amu Mũfilisti ũyũ ũtaruu nĩ we ũ, atĩ nĩguo aĩke mbũtũ cia Ithe witũ ũrĩa ũrĩ muoyo?”

Nao andũ makĩmũcookeria o ũguo, makĩmwĩra ũrĩa gũgeekwo mũndũ ũrĩa ũkaamũũraga.

Na rĩrĩa Eliabu, mũrũ wa nyina na Daudi ũrĩa mũkũrũ, aamũiguire akĩaria na andũ acio, agĩakĩrwo nĩ marakara nĩ ũndũ wa Daudi. Akĩmũũria atĩrĩ, “Waikũrũkire gũkũ nĩkĩ? Nacio ngʼondu icio nini watigire na ũ kũu werũ-inĩ? Niĩ nĩnjũũĩ mwĩtĩĩo waku na waganu wa ngoro yaku, atĩ waikũrũka nĩguo o wĩrorere mbaara.”

Nake Daudi akĩmũũria atĩrĩ, “Rĩu-rĩ, nĩ atĩa njĩkĩte? Githĩ to kĩũria ndoririe?” Nake akĩhũgũkĩra mũndũ ũngĩ, akĩũria o ũndũ ũcio, nao andũ makĩmũcookeria o ta mbere. Nacio ciugo cia Daudi igĩiguuo, igĩcookererio Saũlũ, nake akĩmũtũmanĩra. Nake Daudi akĩĩra Saũlũ atĩrĩ, “Ndũkareke ngoro ya mũndũ o na ũmwe ĩrũo nĩ hinya nĩ ũndũ wake. Ndungata yaku nĩĩgũthiĩ ĩkarũe na Mũfilisti ũyũ.”

Nake Saũlũ akĩmwĩra atĩrĩ, “Ndũngĩhota kũrũa na Mũfilisti ũyũ. Wee ũrĩ o kahĩĩ, nake nĩ mũrũi wa mbaara kuuma ũnini-inĩ wake.”

Nake Daudi akĩĩra Saũlũ atĩrĩ, “Ndungata yaku yararĩithagia ngʼondu cia ithe. Rĩrĩa mũrũũthi kana nduba yookire ĩkĩoya ngʼondu kuuma rũũru-inĩ, nĩndayĩrũmĩrĩire ngĩmĩgũtha, ngĩteithũra ngʼondu ĩyo kuuma kanua-inĩ kayo. Na rĩrĩa yangʼetheire-rĩ, ngĩmĩnyiita njoya cia ngingo, ngĩmĩgũtha, ngĩmĩũraga. Ndungata yaku nĩyooragire mũrũũthi o na nduba; nake Mũfilisti ũyũ ũtaruu agaatuĩka ta ũmwe wacio, nĩ ũndũ nĩaĩkĩte mbũtũ cia Ithe witũ ũrĩa ũrĩ muoyo.” Nake Daudi agĩthiĩ na mbere, akiuga atĩrĩ, “Ithe witũ, ũrĩa waahonokirie kuuma gũũko-inĩ kwa mũrũũthi na gwa nduba, nĩwe ũkaahonokia kuuma guoko-inĩ kwa Mũfilisti ũyũ.” Nake Saũlũ akĩmwĩra atĩrĩ, “Thiĩ, nake Ithe witũ arokorwo hamwe nawe.”

Nake Saũlũ akĩhumba Daudi nguo ciake mwene cia mbaara. Akĩmwĩkĩra ngũbia ya gĩcango mũtwe, akĩmũhumba nguo ya mbaara. Nake Daudi akĩĩoha rũhiũ rwa njora igũrũ rĩa nguo icio cia mbaara, akĩgeria gũthiĩ, no ndaamenyerete. Agĩcooka akĩĩra Saũlũ atĩrĩ, “Ndingĩhota gũthiĩ na nguo ici, nĩ ũndũ ndiciĩmenyerete.” Nake agĩcirĩta.

Akĩoya rũthanju rwake, agĩthuura mahiga matano maniaru kuuma karũũĩ-inĩ, akĩmekĩra mondo-inĩ yake ya ũrĩĩthi, akĩnyiita kĩgũtha guoko-inĩ, agĩkuhĩrĩria Mũfilisti ũcio. Nake Mũfilisti ũcio, arĩ hamwe na mũkuui wake wa ngo mbere yake, agĩthiĩ o na mbere gũkuhĩrĩria Daudi. Nake Mũfilisti ũcio akĩrora Daudi wega, akĩona nĩ o kahĩĩ ka gĩthiũ gĩtune na kĩthaka, akĩmũnyarara. Akĩĩra Daudi atĩrĩ, “Niĩ ndĩ ngui, atĩ nĩkĩo ũgũũka kũrĩ niĩ na thanju?” Nake Mũfilisti ũcio akĩruma Daudi na ngai ciake. Mũfilisti ũcio akĩmwĩra atĩrĩ, “Ũka gũũkũ, nĩngũhe nyoni cia rĩera-inĩ na nyamũ cia werũ-inĩ nyama ciaku.”

Nake Daudi akĩĩra Mũfilisti ũcio atĩrĩ, “Wee ũranjũkĩrĩra na rũhiũ rwa njora, na itimũ, na mũcengi, no niĩ ndĩrakũũka na rĩĩtwa rĩa Ithe witũ wa mbũtũ cia igũrũ, Ithe witũ wa mbũtũ cia Isiraeli iria wee ũĩkĩte. Ũmũthĩ Ithe witũ nĩagũkũneana moko-inĩ makwa, na niĩ nĩngũkũgũtha, ndĩgũtinie mũtwe. Na mũthenya o ũyũ nĩngũhe nyoni cia rĩera-inĩ na nyamũ cia gĩthaka cia thĩ ciimba cia mbũtũ ya Afilisti, nayo thĩ yothe nĩĩkũmenya atĩ kũrĩ Ithe witũ thĩinĩ wa Isiraeli.

Nao oothe arĩa monganĩte haha nĩmakũmenya atĩ Ithe witũ ndahonokagia na rũhiũ rwa njora kana na itimũ; amu mbaara nĩ ya Ithe witũ, nake nĩakamũneana othe moko-inĩ maitũ.”

Na rĩrĩa Mũfilisti ũcio ookĩrĩire gũtharĩkĩra Daudi, Daudi agĩtengʼera narua agĩĩrorera na kũrĩ mbũtũ ya mbaara nĩguo amũtũnge. Nake Daudi agĩikĩria guoko mondo-inĩ yake, akĩruta ihiga, akĩrĩikia na kĩgũtha, akĩgũtha Mũfilisti ũcio thiithi. Narĩo ihiga rĩgĩtoonya thiithi wake, nake akĩgũa ũthiũ thĩ. Ũguo nĩguo Daudi aatoorire Mũfilisti ũcio na kĩgũtha na ihiga; atarĩ na rũhiũ rwa njora guoko-inĩ, akĩmũgũtha akĩmũũraga. Nake Daudi agĩtengʼera, akĩrũgama igũrũ rĩake. Akĩoya rũhiũ rwa njora rwa Mũfilisti ũcio, akĩrũcomora njora-inĩ, akĩmũũraga, akĩmũtinia mũtwe naruo. Na rĩrĩa Afilisti moonire mũrũi wao nĩakua, makĩũra.

Nao andũ a Isiraeli na a Juda makĩũkĩra na mũgambo, makĩingata Afilisti nginya itoonyero-inĩ rĩa Gathu na ihingo-inĩ cia Ekironi. Nacio ciimba cia Afilisti ikĩgwa njĩra-inĩ ya Shaaraimu nginya Gathu na Ekironi. Na rĩrĩa andũ a Isiraeli maacookire kuuma kũingata Afilisti, magĩtaha indo cia kambĩ yao. Nake Daudi akĩoya mũtwe wa Mũfilisti ũcio akĩũtwaara Jerusalemu, no indo cia mbaara cia Goliathũ agĩciiga hema-inĩ yake mwene. Na rĩrĩa Saũlũ oonire Daudi akiuma gũtũnga Mũfilisti ũcio, akĩũria Abineri mũnene wa mbũtũ yake atĩrĩ, “Kamwana gaka nĩ mũrũ wa ũ, Abineri?” Nake Abineri akĩmũcookeria atĩrĩ, “O ta ũrĩa wee ũrĩ muoyo, wee mũthamaki wakwa, niĩ ndiũĩ.”

Nake mũthamaki akiuga atĩrĩ, “Ũria wega kamwana gaka nĩ mũrũ wa ũ.”

Na rĩrĩa Daudi aacookire kuuma kũũraga Mũfilisti ũcio, Abineri akĩmuoya, akĩmũtwaara mbere ya Saũlũ, arĩ na mũtwe wa Mũfilisti ũcio guoko-inĩ. Nake Saũlũ akĩmũũria atĩrĩ, “Wee kamwana, ũrĩ mũrũ wa ũ?” Nake Daudi akĩmũcookeria atĩrĩ, “Ndĩ mũrũ wa ndungata yaku Jese wa Bethilehemu.”