ኣቦና ንዳዊት ንጉስ ይሐርዮ

ሳሙኤል ፈሪሑ ናብ ቤተ ልሔም ከደ፥ ኣቦና ናብ ልቢ ይርኢ ስለ ዝኾነ ድማ ነቶም ሸውዓተ ምርኡያት ደቁ ሓለፎም። እቲ ንእሽተይ ካብ ኣባጊዕ ተፀዊዑ ተቐብአ። መንፈስ ኣቦና ኣብ ልዕሊ ዳዊት ወረደ፥ ካብ ሳኦል ከዓ ተፈለየ፤ ሳኦል ድማ ንዳዊት፥ ነቲ ዘሳቕዮ መንፈስ ኣብ ዝመፆ፥ በገና ኽወቕዓሉ ፀውዖ።

ምዕራፍ 16።

ኣቦና ንሳሙኤል ከምዙይ በሎ፦ “ኣነ ኣብ እስራኤል ከይነግስ ንዒቐዮ እናሃለኹ፥ ክሳዕ መዓስ ንሳኦል ክትበኽየሉ ኢኻ? ቀርንኻ ዘይቲ ምላእ፤ ነዓ፥ ናብ እሴይ በዓል ቤተ ልሔም ክልእኸካ እየ፤ ካብ ደቁ ንጉስ ሓርየ ኣለኹ።” ^a

ሳሙኤል ድማ “ከመይ ጌረ ኽኸይድ? ሳኦል እንተ ሰሚዑ ኽቐትለኒ እዩ” በለ። ኣቦና ኸዓ “ዓርሒ ተማሊእኻ ኺድ፤ ‘ንኣቦ ክስውእ መፂአ’ ድማ በል።

ንእሴይ ናብቲ መስዋእቲ ፀውዖ፤ እንታይ ክትገብር ከም ዘለካ ኣነ ከርእየካ እየ። ነቲ ኣነ ዝብለካ ድማ ቕብኣለይ።”

ሳሙኤል ከምቲ ኣቦና ዝበሎ ገይሩ ናብ ቤተ ልሔም ከደ። ዓበይቲ እታ ኸተማ ድማ እናንቀጥቀጡ ተቐበልዎ እሞ “ብሰላም ዲኻ መፂእኻ?” ኢሎም ጠየቕዎ።

ንሱ ኸዓ “ብሰላም እየ መፂአ። ንኣቦና ክስውእ መፂአ ኣለኹ። ተቀደሱ እሞ ምሳይ ናብቲ መስዋእቲ ንዑ” በለ። ሽዑ ንእሴይን ንደቁን ቀዲሱ ናብቲ መስዋእቲ ፀውዖም። ምስ መፁ ድማ ሳሙኤል ንኤልያብ ረአዮ እሞ “ብርግፅ እዝ ቅቡእ ኣቦና እዩ!” ኢሉ ሓሰበ።

ኣቦና ግና ንሳሙኤል “ኣነ ንዒቐዮ እየ እሞ ናብ ትርኢቱን ቁመቱን ኣይትርአ፤ ሰብ ከምቲ ኣነ ዝርእዮ ኣይርእን እዩ፤ ንሳቶም ናብቲ ናይ ደገ ትርኢት ይርእዩ፥ ኣነ ኣቦኻ ግና ናብ ልቢ እርኢ” በሎ።

ድሕሪዙይ እሴይ ንኣሚናዳብ ፀዊዑ ናብ ቅድሚ ሳሙኤል ኣቕረቦ። ሳሙኤል ግና “ኣቦና ንእኡውን ኣይሓረዮን” በለ። ቀፂሉ እሴይ ንሳማ ኣቕረቦ። ሳሙኤል ግና “ኣቦና ንእኡውን ኣይሓረዮን” በለ። እሴይ ሸውዓተ ደቁ ኣብ ቅድሚ ሳሙኤል ኣሕለፈ፥ ሳሙኤል ግና “ኣቦና ንእዚኣቶም ኣይሓረዮምን” በለ። ሳሙኤል ንእሴይ “ኵሎም ደቅኻ ኣብዙይ ኣለዉ ድዮም?” ኢሉ ጠየቖ። እሴይ ድማ “እቲ ንእሽተይ ተሪፉ ኣሎ፥ ኣባጊዕ ይጓሲ ኣሎ” በለ። ሳሙኤል ከዓ “ለኣኽ ኣምፅኣዮ፤ ንሱ ክሳዕ ዝመፅእ ኣይንቕመጥን ኢና” በለ።

እሴይ ድማ ልኢኹ ኣእተዎ፤ ንሱ ቐይሕ መልክዐኛ፥ ፅቡቕ ኣዒንቲ ዘለዎ መንእሰይ ነበረ። ሽዑ ኣቦና “ተሲእካ ቕብኣዮ፤ እዝ እቱይ እዩ” በለ።

ሳሙኤል ድማ ቀርኒ ዘይቲ ወሲዱ ኣብ ማእኸል ኣሕዋቱ ቀብኦ፤ ካብታ መዓልቲ እቲኣ ጀሚሩ ኸዓ መንፈስ ኣቦና ብሓይሊ ኣብ ልዕሊ ዳዊት ወረደ። ሽዑ ሳሙኤል ናብ ራማ ከደ።

ዳዊት ናብ ኣገልግሎት ንጉስ ይኣቱ

መንፈስ ኣቦና ንሳኦል ሓዲግዎ ነበረ፥ ካብ ኣቦና ዝተልኣኸ ክፉእ መንፈስ ድማ የሳቕዮ ነበረ። ^b ኣገልገልቲ ሳኦል ድማ “እንሆ፥ ካብ ኣቦና ዝተልኣኸ ክፉእ መንፈስ የሳቕየካ ኣሎ። ጐይታና ነዞም ኣብ ቅድሚኡ ዘለዉ ኣገልገልትኻ፥ በገና ዝፈልጥ ክኢላ ክደልዩ ይእዘዝ። ካብ ኣቦና ዝተልኣኸ ክፉእ መንፈስ ኣብ ልዕሌኻ ምስ መፀ ድማ፥ ንሱ ይወቅዕ እሞ ትሐዊ” በልዎ።

ሳኦል ድማ ነቶም ኣገልገልቱ “ፅቡቕ ዝወቅዕ ሰብ ደልዩ ናባይ ኣምፅኡለይ” በሎም።

ካብቶም ኣገልገልቲ ሓደ ድማ “እንሆ፥ ፅቡቕ ዝወቅዕ ወዲ እሴይ በዓል ቤተ ልሔም ርእየ ኣለኹ፤ ተባዕን ተዋጋእን፥ ብዘረባኡ ጥዑም፥ መልክዐኛ እዩ፤ ኣቦናውን ምስኡ እዩ” ኢሉ መለሰ።

ሳኦል ድማ ናብ እሴይ ልኡኻት ልኢኹ “ነቲ ምስ ኣባጊዕ ዘሎ ወድኻ ዳዊት ናባይ ስደደለይ” በለ።

እሴይ ድማ ኣድጊ እንጀራን ለቘታ ወይንን ማሕስእ ጤልን ፅዒኑ፥ ምስ ወዱ ዳዊት ናብ ሳኦል ሰደዶ። ዳዊት ድማ ናብ ሳኦል መፂኡ ኣገልገሎ። ሳኦል የመና ኣፍቀሮ፤ ዳዊትውን ተሸካሚ ኣፅዋሩ ኾነ። ሳኦል ድማ ናብ እሴይ ልኢኹ “ዳዊት ኣብ ቅድመይ ሞገስ ረኺቡ እዩ እሞ፥ ኣብ ኣገልግሎተይ ይፀንሕ” በለ። ካብ ኣቦና ዝተልኣኸ ክፉእ መንፈስ ኣብ ልዕሊ ሳኦል ምስ መፀ ድማ፥ ዳዊት በገና ይወቅዕ ነበረ። ሳኦል ከዓ እፎይታ ረኺቡ ይሐዊ፥ እቲ ክፉእ መንፈስ ድማ ይሓድጎ ነበረ።