1 Samuel 16

16 ¹Ithumwui Avāna Samuelli hānga, "Ina Saulli Israelwuitungli awunga sāda khalanhaira, chithāda leilakha nana kayākha atam awui vang chapkhangachākhala? Nawui angaji thao eina sākuphaolu; vaulu, ina nali Bethlehemwui Jesseli chihovāra; kaja awui naomayarabingwui eina ina awunga akha pangkhuihaira." ^a a v1 Thao angaji hi sā akhawui angaji eina sākhami thaokhong akhana, thao neo khavai thao khuivai khangatha̱na.

²Samuelna hānga, "Kathāda ina vārakhala? Saulna chi shaakha, ana ili shaothatra." Ithumwui Avāna hānga, "Seilānao akha nala khuivālu, kala hānglu, 'Ina Avāli pha̱kaphayā chigat khavai kharāna.'

³Jesseli pha̱kaphayāli holu; nana khi sārakhala kaji ina nali theingasakra. Kala ina nali kahāng mi chi iwui vang neomilu."

⁴Samuelna ithumwui Avāna kahāng athishurda sai, kala Bethlehemli vai. Chiwui keinungwui khararnaobingna kathirriri eina ali samphanglaga ngahāna, "Na chingri kahai eina kharāla?"

⁵"Chingri kahai eina," da ana hānga. "Ina ithumwui Avāli pha̱kaphayā chigat khavai kharāna. Nathum khalatta tharchigatlu, kala pha̱kaphayāli ili ngasoda rālu." Chieina ana Jesse kala awui naomayarabingli tharchigatlaga athumli pha̱kaphayāli hokhui. ⁶Athum vākashung tharan, Samuelna Eliabli theilaga phaninga, "Kachangkhata hi ithumwui Avāwui thao neomi kahai china!"

⁷Kha ithumwui Avāna Samuelli hānga, "Awui zakmai lah awui kajuili mayangalu; kaja ina ali khalanhaira. Mibingna ina yangda thāda mayangmana; athumna ayar chi yanga, kha I, nawui Avāna, malung chi yanga."

⁸Chieina Jessena Abinadabli hokhuilaga ali Samuelwui mangāli ngareivā ngasaka. Kha Samuelna hānga, "Ithumwui Avāna hilila makapangkhuimana." ⁹Chiwui thili Jessena Shamadruli mangāli rā ngasaka. Kha Samuelna hānga, "Ithumwui Avāna hilila makapangkhuimana." ¹⁰Jessena awui naomayara shinili Samuelwui mangāli ngareivā ngasaka, kha Samuelna hānga, "Ithumwui Avāna hibingli makapangkhuimana." ¹¹Samuelna Jesseli ngahāna, "Nawui naomayara saikora hili leidalei khala?" "Naopaisho chi choda lei, ana yao homda lei," da Jessena hānga. "Ali hokhuilu," da Samuelna hānga. "Ana marāranglakha eina tangda ithumna mapampaimara."

¹²Jessena chihoda ali khuirā ngasaka. Ana mainao hungping, mik khamathā eina azak mathālak kahaina. Chieina ithumwui Avāna hānga, "Ngakarthuilu, ali neomilu; hi chi ana china."

¹³Samuelna thao angaji khuishoklaga awui achināngarā ngachaili ali neomi, kala chithang eina thuida ithumwui Avāwui Manglāna pangshap eina Davidli rāzanga. Chieina Samuelna Ramahli vai.

Davidna Awungawui Otramli Kazang

¹⁴Ithumwui Avāwui Manglā chi Saulwui eina thuihaira, kala ithumwui Avāwui eina makaphā manglā akhana ali chotchāng ngasaka. ^b b v14 Makaphā manglā akhalala ithumwui Avāna mayākha tharan maningla khikha masāshapmana; hili ana bichar sāda Saulwui eina awui khudam sā chi latunkhuihaira, kha ava akhalatta makaphāwui haophokpa maningchingmana. ¹⁵Saulwui raobingna ali hānga, "Yanglu, ithumwui Avāwui eina makaphā manglā akhana nali chotchāng ngasakta lei. ¹⁶Ithumwui amei china hili khalei narao ngarāli lyre huida kathem mi akha phākhui khavai hāngranu. ithumwui Avāwui eina makaphā manglā chi nawuitungli kharā tharan, ana lyre huira, kala na raira."

¹⁷Chieina Saulna awui raobingli hānga, "Lyre huida kathem mi akha phākhuilaga ali iwuili khuirālu."

¹⁸Rao akhana ngahānkai, "Bethlehemli khalei Jessewui naomayara akha ina theihaira, ana laa mathālak eina kasāna; ana kapinga, raimi akha, tuila matuitheia, azak mathālaka, kala ithumwui Avā ali ngasokhami."

¹⁹Chieina Saulna Jesseli paomebing chiholaga hānga, "Yao ngasoda khalei nanao David ili chihomilu."

²⁰Chieina Jessena khamui, drakhāra̱ khao akha, kala yaonao akha gadhāli shaksākhuilaga, awui naomayara David ngasoda Saulli chihovai. ²¹Davidna Saulwuili kharāda awui mangāli nganinga. Saulna ali kazā leishihaowa, kala Davidna awui chāngvei phungme ngasāhaowa. ²²Saulna Jesseli pao chihoda hānga, "David iwui mangāli pamranu, kaja ana iwui mangāli ngahānkhangai." ²³Ithumwui Avāwui eina makaphā manglā Saulwuitungli rāzang tharan, Davidna lyre huihaowa. Chieina Saulna vikasang theilaga rai, kala makaphā manglā chi awui eina thuihaowa.