Jeremiah 50

50 ¹Babylonwui pongli, Babylonnaobingwui ngaleiwui pongli, khamarānapa Jeremiahwui eina ithumwui Avāna kahāng tui chi hina:

²Miyurbingwui ngachaili phongshoklu kala vaosanglu; philān khāngkālu kala vaosanglu; khangatei mathumhaialu. Hānglu: Babylon yuihaira; Bel pa̱ngapāhaira, Marduk sākakhuihaira. Awui meoma̱bing pa̱ngapāhaira, awui meoma̱ sākakhuihaira. ^a a v2 Bel eina Marduk chi Babylonwui pāngmon varebing sai. ³Kaja atungshongwui eina yur akhana awuili ngararra; ana awui ngalei ramcho ngasā ngasakra, kala khipānakha chiwui alungli mapamluimara. Mi kala sā khanini yāmhaira; athum kānhaira.

⁴Chithang ngashunbingli kala atam chitharan Israelwui naobing kala Judahwui naobing ngasoda rāra; athum chapngachāda rizatta vāra, kala athumna athumwui Avāli phāra, da ithumwui Avāna hānga. ⁵Athumna Zionli apong ngahānra, athumwui amai chishong ngareida: "Rālu, ithumna ithumwui Avāli katang makhavai tuingashit eina ngaruma, china khikha malaiserluimara." ⁶Iwui mibing shimān kahai yao ngasāhaira; athumwui yaokahomabingna athumli ma̱zat ngasaka, kaphungbingli athumli phanngasaka. Athum phungreiwui eina kaphungli zata; athumwui ngasām khavaipam athumna malaihaowa. ⁷Athumli samphang kahai saikorana shaihaowa, kala athumwui yangkashebingna hānga, "Athumna athumwui akachanga seihomphung, athumwui avāngarāwui kachihān PROHO Vareli morei sākahaiwui vang, ithumwui vang morei maleimana." ⁸Babylonwui alungwui eina yāmshoklu; Babylonnaobingwui ngaleiwui eina shoklu, kala yao ashangva̱wui kathāna mevā thāda sālu. ⁹Kaja yanglu, ina atungshong ngaleiwui eina yur kachungkhabingwui ngachai akha ngatha̱ ngasakta Babylonwuitungli khuirāra. Athumna awuili ngararda rairim sāra, kala chiwui eina awuili yuihaira. Athumwui malāthing chi malā singkathei kapinga akhawui thāda phanra, china khamasai eina malatungluimara. ¹⁰Babylonnaobingwui ngalei ngaponra; awuili ngaponkhui kahai saikora ningyāng ungra, da ithumwui Avāna hānga.

¹¹O iwui shimluina ngaponbing nathum, nathum ringphā kala ringphārum kahaiwui vang, mā takakā seilānao thāda chaka, sigui thāda ngasha̱zata kahaiwui vang, ¹²nawui anuna khayak kahai eina pa̱ngapāra; nali kapharāna maishihaira. Yanglu, ana miyurbingwui alungli naomeikap ngasāda lamhāng, ngalei katheng kala siwuk ngasāra. ¹³Ithumwui Avāwui malungkhavātwui vang eina awuili mapamluimara; ana peida ramcho ngasāra. Babylonli rākakān kachiva̱na ngacheera kala awui kalāshāt saikora chi kasirorra. ¹⁴Malā kasingabing nathum saikora, Babylonwuitungli kuimareida rairim sālu. Awuili kāplu; malāthing mashivāmalu, kaja ana ithumwui Avāli morei sāhaira. ¹⁵Awuili apam kachida khavaokhon vaolu; ana pāng mihaira. Awui dolanbing tātunghaira; awui phākho sakhaihaira. Hi ithumwui Avāwui mashun kajiwui vang, awuili athut khuilu; ana kasā thāda awuili sāmilu. ¹⁶Babylonwui eina khayaoa kala kahāta katatmilu. Singkakharenga miwui raighaiwui mangāli mi kachiva̱na akhalattawui mibingli latungra, kala mi kachiva̱na akhalattawui ngaleili yāmra.

¹⁷Israel chi kazingkha̱na kharomkhayang kahai, chaiyāng kahai yao ashangva̱na. Khare Assyriawui awungana ali shai, kala ara naomeikapta Babylonwui awunga Nebuchadnezzarna awui ara̱-arā manirkachupa.

¹⁸Rai saikorawui Avā, Israelwui ithumwui Avāna hithāda hānga: Assyriawui awungali ina tandi khami thāda, Babylonwui awunga kala awui ngaleili ina tandi mira. ¹⁹Israelli awui seihomphungli ina latung ngasakra, kala ana Carmel kala Bashanli phāshaira; Ephraim kala Gileadwui kaphungli awui wuklung ningyāng ungra. ²⁰Chithang ngashunbingli kala atam chitharan Israelwui khayonkhamāng phāshangra kha maleimara; Judahwui morei phāshangra kha akhala masamphangmara, kaja ina ring ngasak kahaibing chili pheomira, da ithumwui Avāna hānga.

²¹Merathaim ngaleili shoklu, kala Pekodli kapambing chili ngararlu. Athumli shaothatlu, kala sāthatserhaolu, da ithumwui Avāna hānga; ina nathumli kaso saikora chi sālu. ²²Raiwui khon kala kachungkha kashimān ngaleili lei. ²³Okathui katongawui yāmkar kathāda katatmihaira kala sākhayanghaira! Babylon kathāda yurbingwui alungli khangachee-khangachā ngasāhaira! ²⁴O Babylon, nali ina khalen sanghaira, kala nana thei makāranga na manhaira. Na theihaida tukkhuihaira, khikhalajila nana ithumwui Avāli ngakaishiya.

²⁵Ithumwui Avāna awui raisāri pam makāhaira, kala awui malungkhavātwui khutlai khuirāhaira, kaja rai saikorawui Avāna Babylonnaobingwui ngaleili ot sākhavai lei. ²⁶Kuikhamareiwui eina awuili rālu; awui heiunbing makālu; mākei akhum thāda awuili phāsanglu. Awuili sāthatserhaolu; awui khikhala mashākmara. ²⁷Awui mukvānao saikora shaothatlu; athum taikathatpamli tāranu. Athumli ringkashi ngasāranu, kaja athumwui zimiksho, athumli tandi khamiwui atam chi rāhaira. ²⁸Nganālu! Babylon ngaleiwui eina yāmkazatbing kala yāmkashokbing, Zionli ithumwui Avāwui athut, awui khorumshimwui vang awui athut chi phongkhavai rārali. ²⁹Babylonwui yangkashe malā kasingabing, malā kahunga saikora hokhuilu. Awui kuimareida ungshung vāshungda rairum vālu; khipākha mayāmshokmara. Awui kasāwui athishurda awuili sāman milu; ana kasā saikora chi awuili sālu. Kaja ana ithumwui Avāli, Israelwui Katharapali langsohaira.

³⁰Chiwui vang eina awui yaronnaobing awui chānreili pitāra, kala awui shipaibing saikora chithanghon sashimānmihaira, da ithumwui Avāna hānga. ³¹Yanglu, O langkaso, ina nawui yangkashe lei, da rai saikorawui Avāna hānga; kaja nawui zimiksho, ina nali tandi mikhavai atam chi rāhaira. ³²Langkaso china ngaphokta pitāra, ali khāngkai khavai khipākha maleimara. Ina awui keinungbingli mei thotra, kala china awui kuikhamareili khalalei saikora chuitāserhaora. ³³Rai saikorawui Avāna hithāda hānga: Israelwui naongarābing kala athumli ngasoda Judahwui naongarābingla rekharek eina leihaira. Athumli tukkhui kahaibing saikorana athumli ngavaptitta lei; athumli chihokhavai marāngaimana.

³⁴Athumwui Ngatangkhame panglaka; rai saikorawui Avā hi awui mingna. Okathuili chingri ngasak khavai, kha Babylonli kapambing chili kakhanang ngasak khavai, ana kachangkhata athumwui vang nganingmira.

³⁵Chaldeanaobingwuitungli, Babylonli khalei mibingwuitungli, kala awui wungnaobing eina awui thangkhamabingwuitungli raighai lei, da ithumwui Avāna hānga! ³⁶Minama marānbingwuitungli raighai lei, kala athum mangkhama̱ ngasāra! Awui raikapingbingwuitungli raighai lei, kala athum sākakhuihaora! ³⁷Awui siguibing eina awui siguigaribingwuitungli, kala awui alungli khalei makathei raimibing saikorawuitungli raighai lei, kala athum sha̱nao thāda ngasāra! Awui lanwuitungli raighai lei, kala phāshokhaora! ³⁸Awui tara̱wuitungli kazing kakāng lei, kala thenghaora! Kaja chi meoma̱wui ngaleina, kala athumna athumwui khangachee meoma̱bingwui vang pāhaora. ³⁹Chiwui vang eina lamhāngwui ramsāyur eina hyenabing chili pamhaora, kala ostrichbingna alungli pānra. Chi khikha mi maokthuiluimara kala thot saikorali mayaorāluimara. ⁴⁰Sodom eina Gomorrahli kala chiwui luinganai keinungbingli ithumwui Avāna shimān khangasak thāda, chili mi maokthuiluimara; khipākha alungli mayaorāluimara, da ithumwui Avāna hānga. ⁴¹Yanglu, atungshongwui eina raimi ashangva̱ ungra; kahaka yur eina awunga kachungkhana okathui achikun saikorawui eina ngakarthuihaira. ⁴²Athumna malā eina kazei tukkhuiya; athum sāshilaka, lukhamashan maleimana. O Babylonwui naongalāva̱, athum sigui tongda nali rai khavai mipā thāda ngarānhaira, kala athumwui akhon yirei thāda khanganga. ⁴³Babylonwui awungana pao shāhaira, kala awui pāng mangatha̱thukmana. Kakhanang, sha̱naona naokhara̱wui khangashei thāda kachot china ali yuihaira. ⁴⁴Yanglu, kazingkha̱ Jordanwui thichangli eina kanantāp kahai seihomphungli shok thāda, mikkhayip akhawui alungli Babylonli awui ngaleiwui eina ina kashamshokra, kala awuitungli iwui mikhangaiali ina phākhuira. Kaja khipā iwui thāda leikhala? Khipāna ili hokhuishapra? Khipā yaokahomana iwui mangāli nganingshaprakhala?

⁴⁵Chiwui vang ithumwui Avāna Babylonwuitungli ngarān kahai chi, kala Chaldea ngaleitungli awui ningli ngarān kahaibing nganālu: Kachangkhat eina athumwui yao ashangva̱wui naonaobing khuizatra; kachangkhat eina athumwui seihomphungla athumwui atam chili matakhakhaira. ⁴⁶Babylonwui tukkakhuikhon eina okathui nganukra, kala awui kachapkhon yurbingwui ngachaili shāra.