Jeremia 50 FHB Father's Heart Bible™

50 ¹Ũyũ nĩ ũhoro ũrĩa Ithe witũ aaririe ũkoniĩ Babuloni, bũrũri wa andũ a Babuloni, na kanua ka Jeremia mũnabii:

²Anĩrĩrai thĩinĩ wa ndũũrĩrĩ na mũhunjie ũhoro ũyũ; ambarariai bendera na mũhunjie; mũtikahithe ũndũ. Ugai atĩrĩ: Babuloni nĩĩnyiĩtwo; Beli nĩaconokete, Maraduku nĩoinangĩkĩte. Mĩhiano yake nĩĩconokete, mĩhianano yake nĩyunangĩkĩte. ^a a v2 Beli na Maraduku maarĩ ngai iria nene cia Babuloni. ³Nĩgũkorwo kuuma mwena wa gathigathini nĩgũgũũka rũrĩrĩ rũkamĩũkĩrĩra; rũrĩrĩ rũu rũgaatua bũrũri wake ũtuĩke werũ, na gũtirĩ mũndũ ũgaatũũra kuo. Andũ o na nyamũ nĩciũrĩte; nĩithiĩte.

⁴Matukũinĩ macio na ihinda rĩu, ũguo nĩguo Ithe witũ ekuuga, ciana cia Isiraeli nĩigooka, cio hamwe na ciana cia Juda hamwe; igaathiĩ ikĩrĩraga o igĩthiĩ, na nĩigaacaria Ithe wao. ⁵Nĩmakoorĩrĩria njĩra ya gũthiĩ Zayuni, mothiũ mao merekeire kuo, makoiga atĩrĩ, “Ũkai, twĩnyiitithanie na Ithe witũ na kĩrĩĩkanĩro gĩa tene na tene, kĩrĩa gĩtakaariganĩra o na rĩ.” ⁶Andũ akwa matuĩkĩte ng'ondu ciũrĩte; arĩithi ao nĩmamahĩtithĩtie, makĩmarekereria irĩmainĩ. Nĩmoorũũrire kuuma kĩrĩma nginya karĩma; makĩriganĩrwo nĩ handũ hao ha kũhurũka. ⁷Arĩa oothe maamoonire nĩmamarĩire, nao thũ ciao ikiuga atĩrĩ, “Ithuĩ tũtirĩ na ihĩtia, tondũ nĩmehĩirie MWATHANI, ũrĩa warĩ ũrĩithio wao wa ma, MWATHANI, mwĩhoko wa maithe mao ma tene.” ⁸Ũrĩrai muume thĩinĩ wa Babuloni; umai bũrũriinĩ wa andũ a Babuloni, na mũtuĩke ta thenge iria itongoragia rũũru. ⁹Nĩgũkorwo ta rora, nĩngwarahũra na ndeehe gũũkĩrĩra Babuloni mũingĩ wa ndũũrĩrĩ nene kuuma bũrũri wa gathigathini. Nĩikeyara ikĩmĩũkĩrĩra, nao kuuma kũu nĩĩkanyiĩtwo. Mĩguĩ yao ĩũmbũkaga ta ya njamba ya ita njoogi, ĩrĩa ĩtacookaga moko matheri. ¹⁰Babuloni nĩĩgaatahwo; arĩa oothe makaamĩtaha nĩmakahũũnia, ũguo nĩguo Ithe witũ ekuuga.

¹¹Tondũ nĩmũkenaga, tondũ nĩmũrĩĩaga iruga, inyuĩ atahi a igai rĩakwa, tondũ mũrũgarũgaga ta moori ĩkĩranga ngano, na mũgakaya ta mbarathi cia njamba, ¹²nyũkwa nĩagaaconorithio mũno; ũrĩa wakũciarire nĩagaaconoka. Ta rora, nĩagaatuĩka wa mũthia wa ndũũrĩrĩ— werũ, bũrũri mũũmũ, werũ wa mũthanga. ¹³Nĩ ũndũ wa mang'ũrĩ ma Ithe witũ ndĩgaatũũrwo nĩ andũ; nĩĩgaatuĩka werũ mũtheri biũ. Mũndũ o wothe ũkaahĩtũkĩra Babuloni nĩakagegio na nĩakamĩithĩria nĩ ũndũ wa ironda ciayo ciothe. ¹⁴Mwĩhaarĩriei mũũkĩrĩre Babuloni mĩena yothe, inyuĩ aikia a mĩguĩ othe. Mĩratheei; mũtikaiganĩre mĩguĩ, nĩgũkorwo nĩĩhĩirie Ithe witũ. ¹⁵Mĩanĩrĩrĩrei mĩena yothe; nĩĩneanĩte. Mĩthiringo yayo nĩĩgũĩte; thingo ciayo nĩimomoretwo. Kuona atĩ rĩĩrĩ nĩ ciira wa kĩhooto wa Ithe witũ, mĩherithiei; mĩĩkei o ta ũrĩa yĩkĩte. ¹⁶Eheriai kuuma Babuloni mũhaandi na mũgethi. Mbere ya rũhiũ rwa njora rwa mũhiinyĩrĩria, o mũndũ nĩagacookerera andũ ao, na o mũndũ nĩakoorĩra bũrũri wake mwene.

¹⁷Isiraeli nĩ rũũru rũhurunjũku rũrĩa mĩrũũthi ĩingatĩte. Mbere mũthamaki wa Ashuri nĩamũrĩire, na rĩu mũthiainĩ Nebukadinezaru mũthamaki wa Babuloni nĩathũngũrĩte mahĩndĩ make.

¹⁸Ũũ nĩguo Ithe wa mbũtũ cia ita cia igũrũ, Ithe witũ wa Isiraeli, ekuuga atĩrĩ: Nĩngaherithia mũthamaki wa Babuloni na bũrũri wake o ta ũrĩa ndaaherithirie mũthamaki wa Ashuri. ¹⁹Nĩngacookia Isiraeli ũrĩithioinĩ wake mwene, nake nĩakarĩĩthio Karimeli na Bashani; irĩmainĩ cia Efiraimu na Gileadi ngoro yake nĩĩkahũũna. ²⁰Matukũinĩ macio na hĩndĩinĩ ĩyo, ũguo nĩguo Ithe witũ ekuuga, mahĩtia ma Isiraeli nĩmagaacaario na matigakorwo ho; meehia ma Juda nĩmagacaario na gũtirĩ makoneka, nĩgũkorwo nĩngarekera matigari marĩa ngaatigia marĩ muoyo.

²¹Ambatai mũtharĩkĩre bũrũri wa Merathaimu, na mũtharĩkĩre arĩa matũũraga Pekodi. Mooragei na mũmaniine biũ, ũguo nĩguo Ithe witũ ekuuga; ĩkai maũndũ mothe marĩa ndĩĩmwathĩte. ²²Mbugĩrĩrio ya mbaara ĩrĩ bũrũriinĩ, na kũniinwo kũnene. ²³Kaĩ nyondo ya thĩ yothe nĩyunangĩtwo na ĩkoinwo-ĩ! Kaĩ Babuloni ũtuĩkĩte kĩndũ gĩa kũmakania gatagatĩinĩ ka ndũũrĩrĩ-ĩ! ²⁴Nĩndakũigĩire mũtego, wee Babuloni, nawe ũkĩgwatio o mbere ya ũmenye ũhoro ũcio. Nĩwonirwo na ũkĩnyiitwo tondũ nĩwarũĩte na Ithe witũ.

²⁵Ithe witũ nĩahingũrĩte nyũmba yake ya kũiga indo cia mbaara na akaruta indo cia mbaara cia mang'ũrĩ make, nĩgũkorwo Ithe wa mbũtũ cia ita cia igũrũ arĩ na wĩra wa gwĩka bũrũriinĩ wa andũ a Babuloni. ²⁶Ũkai mũmũtharĩkĩre kuuma mĩena yothe; hingũrai makũmbĩ make ma ngano; mũmũirĩrĩre hĩba ta irũndo cia ngano. Mũniinei biũ; gũtikagĩe kĩndũ gĩgũtigara kĩa we. ²⁷Ũragai ndegwa ciake ciothe iria nini; irekei iikũrũke ithĩnjĩrwo. Kaĩ irĩ na haaro-ĩ, nĩgũkorwo mũthenya wacio nĩmũkinyu, ihinda rĩa kũherithio kwacio. ²⁸Thikĩrĩriai—aoori na arĩa moorĩire kuuma bũrũriinĩ wa Babuloni, mookĩte Zayuni kwanĩrĩra ũhoro wa kũrĩhanĩria kwa Ithe witũ, kũrĩhanĩria gwake nĩ ũndũ wa hekarũ yake. ²⁹Ĩtai aikia a mĩguĩ matharĩkĩre Babuloni, arĩa othe magetaga ũta. Ambai hema mũkĩmũthiũrũrũkĩria mĩena yothe; gũtikagĩe mũndũ ũkũũra. Mũrĩhei kũringana na ciĩko ciake; mwĩkei o ũrĩa wothe ekĩte. Nĩgũkorwo nĩerahĩte agookĩrĩra Ithe witũ, agookĩrĩra Ũrĩa Mũtheru wa Isiraeli.

³⁰Nĩ ũndũ ũcio aanake ake nĩmakaagũĩra njĩrainĩ ciake, na thigari ciake ciothe nĩigaakirio mũthenya ũcio, ũguo nĩguo Ithe witũ ekuuga. ³¹Ta rora, nĩngũgũũkĩrĩra, wee mwĩtĩĩi, ũguo nĩguo Ithe wa mbũtũ cia ita cia igũrũ ekuuga, nĩgũkorwo mũthenya waku nĩmũkinyu, ihinda rĩrĩa ngaakũherithia. ³²Mwĩtĩĩi ũcio nĩakahĩngwo agwe, na gũtirĩ mũndũ ũkaamũũkĩria. Nĩngaakia mwaki matũũrainĩ make manene, naguo nĩũgaacina indo ciothe iria imũthiũrũrũkĩirie. ³³Ũũ nĩguo Ithe wa ita cia igũrũ ekuuga atĩrĩ: Ariũ a Isiraeli nĩmahinyĩrĩrie, o hamwe na ariũ a Juda. Arĩa oothe maamatahire nĩmamanyiitĩte momu; makarega kũmarekereria.

³⁴Mũkũũri wao arĩ na hinya; rĩĩtwa rĩake nĩ Ithe wa ita cia igũrũ. Ti-itherũ nĩakamaciirĩrĩra, nĩguo arehere thĩ ũhurũko, no arĩa matũũraga Babuloni amarehere kĩrigiicano.

³⁵Rũhiũ rwa njora rũũkĩrĩre andũ a Babuloni, ũguo nĩguo Ithe witũ ekuuga, na rũũkĩrĩre arĩa matũũraga Babuloni, na anene aake na andũ aake oogĩ! ³⁶Rũhiũ rwa njora rũũkĩrĩre anabii a maheeni, nao matuĩke irimũ! Rũhiũ rwa njora rũũkĩrĩre njamba ciake cia ita, nacio ihehenjwo! ³⁷Rũhiũ rwa njora rũũkĩrĩre mbarathi ciake na ngaari ciake cia ita, na rũũkĩrĩre mbũtũ ciothe cia ageni iria irĩ gatagatĩ gaake, nao matuĩke ta atumia! Rũhiũ rwa njora rũũkĩrĩre igĩĩna ciake, nacio itahwo! ³⁸Riũa rĩũkĩrĩre maaĩ maake, namo makooma! Nĩgũkorwo nĩ bũrũri wa mĩhianano, nao makĩgũrũkĩra mĩhianano yao ya kũmakania. ³⁹Nĩ ũndũ ũcio nyamũ cia werũinĩ na hiti nĩigaatũũra kuo, nacio nyaga igaatũũra thĩinĩ wake. Ndĩgaacooka gũtũũrwo rĩngĩ kana ĩikarwo njiarwainĩ ciothe. ⁴⁰O ta ũrĩa Ithe witũ aang'aũranirie Sodomu na Gomora na matũũra marĩa maariganĩtie namo, ũguo nĩguo Ithe witũ ekuuga, ũguo noguo gũtirĩ mũndũ ũgaatũũra kuo; gũtirĩ mũndũ ũgaikara thĩinĩ wake. ⁴¹Atĩrĩrĩ, mbũtũ ya ita nĩĩrooka yoimĩte mwena wa gathigathini; rũrĩrĩ rũnene na athamaki aingĩ nĩmararahũka kuuma ituriinĩ cia thĩ. ⁴²Manyiitĩte ũta na itĩmũ; nĩ andũ matarĩ tha, na matiiguanagĩra tha. Mũgambo wao ũraruruma ta iria o makĩhaica mbarathi, mehaarĩirie ta mũndũ wa mbaara nĩguo makũũkĩrĩre, wee Mwarĩ wa Babuloni. ⁴³Mũthamaki wa Babuloni nĩaiguĩte ũhoro wao, namo mooko make makaregera. Nĩanyiitwo nĩ ruo, ruo ta rwa mũtumia akĩrũmwo. ⁴⁴Atĩrĩrĩ, ta mũrũũthi ũkĩambata uumĩte ihingainĩ cia Jorodani ũgĩthiĩ gĩthakainĩ kĩrĩa gĩtũũru, o rĩmwe nĩngaingata Babuloni oime bũrũriinĩ wake, na nĩngamũigĩrĩra ũrĩa niĩ ngaathuura. Nĩgũkorwo nũũ ũhaana ta niĩ? Nũũ ũngĩĩnjĩta? Nĩ mũrĩithi ũrĩkũ ũngĩrũgama mbere yakwa?

⁴⁵Nĩ ũndũ ũcio iguai mũbango ũrĩa Ithe witũ aathugundĩire Babuloni na matanya marĩa aathugundĩire bũrũri wa andũ a Babuloni: Ti-itherũ tũũri twa rũũru rwao nĩtũgaaguucũo tũtwarwo; ti-itherũ ũrĩithio wao nĩũkamakio nĩ ũndũ wa ũrĩa magaakorwo. ⁴⁶Hĩndĩ ĩrĩa mũgambo wa gũtahwo kwa Babuloni ũkaiguĩka, thĩ nĩĩkainaina, naguo kĩrĩro gĩake kĩiguuo ndũũrĩrĩinĩ.