Yeremia 50

50 ¹Neno ambalo Baba yetu alilinena kuhusu Babeli, nchi ya Wababeli, kwa kinywa cha Yeremia nabii:

²Tangazeni kati ya mataifa na hubirini; inueni bendera na hubirini; msifiche neno lolote. Semeni: Babeli imetekwa; Beli ameaibika, Merodaki amevunjika. Sanamu zake zimeaibika, vinyago vyake vimevunjika. ^a a v2 Beli na Merodaki walikuwa miungu wakuu wa Babeli. ³Kwa maana taifa linakuja juu yake kutoka kaskazini; litaifanya nchi yake kuwa ukiwa, wala hapatakuwa na mtu wa kukaa ndani yake. Watu na wanyama wamekimbia; wametoweka.

⁴Katika siku hizo na wakati huo, asema Baba yetu, wana wa Israeli watakuja, wao pamoja na wana wa Yuda; watakwenda huku wakilia wanapotembea, nao watamtafuta Baba yao. ⁵Watauliza njia ya kwenda Sayuni, nyuso zao zikielekea huko: "Njooni, na tuungane na Baba yetu katika agano la milele ambalo halitasahauliwa kamwe." ⁶Watu wangu wamekuwa kondoo waliopotea; wachungaji wao waliwapotosha, wakawaacha wapotee milimani. Walitanga-tanga kutoka mlima hata kilima; wakapasahau mahali pao pa kupumzika. ⁷Wote waliowapata waliwala, na adui zao wakasema, "Sisi hatuna hatia, kwa sababu walimtenda dhambi BWANA, malisho yao ya kweli, BWANA, tumaini la baba zao." ⁸Kimbieni kutoka katikati ya Babeli; tokeni katika nchi ya Wababeli, mkawe kama mabeberu waongozao kundi. ⁹Kwa maana tazama, ninaamsha na kuleta juu ya Babeli kundi la mataifa makuu kutoka nchi ya kaskazini. Watajipanga dhidi yake, na kutoka huko atatekwa. Mishale yao huruka kama ya shujaa mahiri asiyerudi mikono mitupu. ¹⁰Babeli itatekwa nyara; wote wanaomteka nyara watashibishwa, asema Baba yetu.

¹¹Kwa sababu mnafurahi, kwa sababu mnashangilia, enyi mnaoteka nyara urithi wangu, kwa sababu mnarukaruka kama ndama apurao nafaka na kulia kama farasi dume, ¹²mama yenu ataaibishwa kabisa; yeye aliyewazaa atafedheheshwa. Tazama, atakuwa wa mwisho kati ya mataifa— jangwa, nchi kame, nyika. ¹³Kwa sababu ya ghadhabu ya Baba yetu haitakaliwa na watu; itakuwa ukiwa mtupu. Kila apitaye karibu na Babeli atashangaa na kuzomea majeraha yake yote. ¹⁴Jipangeni dhidi ya Babeli pande zote, enyi nyote wapiga mishale. Mpigeni; msihifadhi mishale, kwa maana amemtenda dhambi Baba yetu. ¹⁵Pigeni kelele dhidi yake pande zote; amejisalimisha. Minara yake imeanguka; kuta zake zimebomolewa. Kwa kuwa hii ndiyo haki ya Baba yetu, tekelezeni haki juu yake; mtendeeni kama alivyotenda yeye. ¹⁶Mkatilieni mbali na Babeli mpanzi na mvunaji. Mbele ya upanga wa mdhalimu kila mmoja atarudi kwa watu wake mwenyewe, na kila mmoja atakimbilia nchi yake mwenyewe.

¹⁷Israeli ni kundi lililotawanyika ambalo simba wamelifukuza. Kwanza mfalme wa Ashuru alimla, na sasa mwishoni Nebukadneza mfalme wa Babeli ameutafuna mifupa yake.

¹⁸Hivi ndivyo asemavyo Baba wa majeshi ya mbinguni, Baba yetu wa Israeli: Nitamwadhibu mfalme wa Babeli na nchi yake kama nilivyomwadhibu mfalme wa Ashuru. ¹⁹Nitamrudisha Israeli katika malisho yake mwenyewe, naye atajilisha katika Karmeli na Bashani; katika vilima vya Efraimu na Gileadi nafsi yake itashibishwa. ²⁰Katika siku hizo na wakati huo, asema Baba yetu, hatia ya Israeli itatafutwa wala haitakuwapo; dhambi za Yuda zitatafutwa wala hazitaonekana, kwa maana nitawasamehe mabaki niwaachao hai.

²¹Panda juu dhidi ya nchi ya Merathaimu, na dhidi ya wakaao Pekodi. Waueni na kuwaweka wakfu kwa uangamizo, asema Baba yetu; fanya yote niliyokuamuru. ²²Kelele za vita zimo nchini, na uharibifu mkuu. ²³Jinsi nyundo ya dunia yote ilivyokatwa na kuvunjika! Jinsi Babeli ilivyokuwa kitu cha kutisha kati ya mataifa! ²⁴Nilikutegea mtego, Babeli, nawe ukanaswa kabla hujajua. Ulionekana na kukamatwa kwa sababu ulishindana na Baba yetu.

²⁵Baba yetu amefungua ghala lake la silaha na kutoa silaha za ghadhabu yake, kwa maana Baba wa majeshi ya mbinguni ana kazi ya kufanya katika nchi ya Wababeli. ²⁶Njooni dhidi yake kutoka kila upande; fungueni maghala yake ya nafaka; irundikeni kama chungu za nafaka. Iwekeni wakfu kwa uangamizo; asisalie hata mmoja wake. ²⁷Waueni mafahali wake wote wachanga; washuke kwenye machinjo. Ole wao, kwa maana siku yao imefika, wakati wa adhabu yao. ²⁸Sikilizeni—wakimbizi na wasafiri kutoka nchi ya Babeli, wakija Sayuni kutangaza haki ya Baba yetu, haki yake kwa ajili ya hekalu lake. ²⁹Waiteni wapiga mishale dhidi ya Babeli, wote wapindao upinde. Pigeni kambi kuizunguka pande zote; asitoroke hata mmoja. Mlipeni kwa kadiri ya matendo yake; mtendeeni yote aliyotenda. Kwa maana amejigamba dhidi ya Baba yetu, dhidi ya Mtakatifu wa Israeli.

³⁰Kwa hiyo vijana wake watanguka katika njia zake, na askari wake wote watanyamazishwa siku hiyo, asema Baba yetu. ³¹Tazama, mimi ni juu yako, ewe mwenye kiburi, asema Baba wa majeshi ya mbinguni, kwa maana siku yako imefika, wakati nitakapokuadhibu. ³²Yule mwenye kiburi atajikwaa na kuanguka, wala hapatakuwa na mtu wa kumwinua. Nitawasha moto katika miji yake, nao utateketeza kila kitu kinachomzunguka. ³³Hivi ndivyo asemavyo Baba wa majeshi ya mbinguni: Wana wa Israeli wanaonewa, na wana wa Yuda pamoja nao. Wote waliowateka wanawashikilia; wanakataa kuwaacha waende.

³⁴Mkombozi wao ni hodari; Baba wa majeshi ya mbinguni ndilo jina lake. Hakika ataitetea shauri yao, ili kuipa dunia raha lakini fadhaa kwa wakaao Babeli.

³⁵Upanga dhidi ya Wababeli, asema Baba yetu, na dhidi ya wakaao Babeli, na dhidi ya wakuu wake na wenye hekima wake! ³⁶Upanga dhidi ya manabii wa uongo, nao watakuwa wapumbavu! Upanga dhidi ya mashujaa wake, nao watavunjika! ³⁷Upanga dhidi ya farasi zake na magari yake ya vita, na dhidi ya jeshi lote la kigeni lililo katikati yake, nao watakuwa kama wanawake! Upanga dhidi ya hazina zake, nazo zitatekwa nyara! ³⁸Ukame dhidi ya maji yake, nayo yatakauka! Kwa maana ni nchi ya sanamu, nao wanaenda wazimu kwa ajili ya vinyago vyao vya kutisha. ³⁹Kwa hiyo viumbe vya jangwani na fisi wataishi humo, na mbuni watakaa ndani yake. Haitakaliwa tena na watu kamwe wala kuishiwa vizazi vyote. ⁴⁰Kama vile Baba yetu alipoipindua Sodoma na Gomora na miji jirani yake, asema Baba yetu, ndivyo hapatakuwa na mtu wa kukaa huko; hakuna binadamu atakayekaa ndani yake. ⁴¹Tazama, jeshi linakuja kutoka kaskazini; taifa kuu na wafalme wengi wanaamshwa kutoka pande za mbali za dunia. ⁴²Wanashika upinde na mkuki; ni wakatili wala hawana huruma. Sauti yao inanguruma kama bahari wanapopanda farasi, wakijipanga kama mtu kwa vita dhidi yako, Ewe Binti Babeli. ⁴³Mfalme wa Babeli amesikia habari zao, na mikono yake imelegea. Uchungu umemshika, maumivu kama ya mwanamke aliye na utungu. ⁴⁴Tazama, kama simba apandaye kutoka vichaka vya Yordani hadi malisho yenye kudumu, kwa ghafula nitamfukuza Babeli kutoka nchi yake, nami nitamweka juu yake yeyote nimchaguaye. Kwa maana ni nani aliye kama mimi? Ni nani awezaye kuniita? Ni mchungaji gani awezaye kusimama mbele yangu?

⁴⁵Kwa hiyo sikilizeni shauri ambalo Baba yetu ameliazimia dhidi ya Babeli na makusudi aliyoyafanya dhidi ya nchi ya Wababeli: Hakika wadogo wa kundi lao watakokotwa mbali; hakika malisho yao yatashangaa kwa hatima yao. ⁴⁶Kwa sauti ya kutekwa kwa Babeli dunia itatetemeka, na kilio chake kitasikika kati ya mataifa.