Jeremiah 49

49 ¹Ammonnaobingwui pongli: ithumwui Avāna hithāda hānga: Israelli naomayara maleimala? shimluikatpa maleimala? Khisāda Milcomna Gad khuithuihaida, kala awui mibingna chiwui keinungbingli pamhaira? ²Chiwui vang atam rārali, chitharan ina Ammonnaobingwui Rabbahwuishong raiwui khangā khonghaira da ithumwui Avāna hānga; chi ja̱ta kahai kā onngasakra, kala chiwui kha̱bing mei eina sa̱tāhaira. Chitharan Israelna ali ngapaikhuibingli ngapaikhuihaira, da ithumwui Avāna hānga. ³"Chaplu, O Heshbon, kaja Ai acho ngasāhaira! Ringngālu, O Rabbahwui naongalāva̱bing! Bora ngavailaga sifalu; phākho ngachaili kuimareida zatlu, kaja Milcomna awui pāngmonbing kala awui wungnaobing eina ngasoda raikathāli khuithuihaora. ⁴O shitkasang makhalei sha̱nao, khisāda nawui tampākbingwui vang, nawui athei khamatheiya tampākwui vang na langsokhala? Na nawui lanbingli shitsangda, 'Khipāna iwuishong rāshaprakhala?' da hānga." ⁵Nali kuimareida khalei saikorawui eina ina nawuitungli khangachee tāra, da kazingramwui raimibingwui Avāna hānga. Nathum kachichā khalatta kui khāngda kashamhaira, yāmkashokbingli kazipmi khipākha maleimana. ⁶Kha naoda ina Ammonnaobingwui lan hanmiluira, da ithumwui Avāna hānga.

Avāna Edomwui Langkasoli Teongasakra

⁷Edomwui pongli: kazingramwui raimibingwui Avāna hithāda hānga: Temanli thangkhamei ara maleimala? Shingā katheibingwui eina hāngkachithei shimānhaira mala? Athumwui thangkhamei parhaira mala? ⁸"Yāmulu, ngalanlu, kathukali thumkhuilu, O Dedanli kapambing, kaja ali tandi mi atamli ina Esauwuitungli kalāshāt tāra. ⁹Drakhāthei rāleebing nawuili raakha, atham mātham makataimila phāthuiserhaorala? Ngayāshong nawuili khalebing raakha, athumwui khuingaimāng makhuimarala? ¹⁰Kha ina khalattana Esauli raimikhuihaira; awui khangathum pambingli ina phāshokmihaira, kala ana khalattali thummihai mashapmana. Awui ara̱-azā, achinābing kala khongnaibing shimānhaira, kala ana ara maleiluimana. ¹¹Nawui avāva̱ makhalei naobingli horlu; ina athumli kharing eina keisāra. Nawui ra̱meiva̱ ngarāna iwuili shitsangranu."

¹²Ithumwui Avāna hithāda hānga: Tengkot mangkhavai tuitak makhaleibingnala tangda mangahaira; kha na ningkhān samphangrala? Maning, na mangphalungra. ¹³Kaja ina khalattali ngashithaira, da ithumwui Avāna hānga: Bozrah khangachee, maishi, ja̱ta, kala khonkashi onngasakra, kala chiwui keinungbing saikora katang makhavai ja̱ta ngasakra. ¹⁴Ithumwui Avā eina pao akha ina shāhaira: paome akha yurbing alungli chihovāhaira, hithāda hānga: 'Kazipkhuilu, kala awuishong rai muivālu! Raiwui vang ngakarthuilu!' ¹⁵Ara mibingwui ngachaili yangkharing khavai, ina nali yurbingwui ngachaili teo ngasakra. ¹⁶Nawui ning langkaso kala nana sākahai khangacheena nali chipathaira, na, lunghārwui amaitarenli kapambing, kaphungwui kajuipamli kapambing. Nana khalāng thāda kajuiva̱li nawui athip sākhuilala, chipam eina ina nali khuitāra, da ithumwui Avāna hānga. ¹⁷Edom khangachee ngasāra; khaung khavā saikorana matakhakhaira kala awui khamā saikorali mana̱shira. ¹⁸Sodom eina Gomorrah kala chiwui khongnaiwui keinungbing shimān khangasak thāda, chithāda chipamli mi akha maokthuira, kala miwui naomayara akhanala chili mayaora, da ithumwui Avāna hānga. ¹⁹"Jordanwui thichangli eina hekmaheilak matek seihomphungli kaphangā kazingkha̱ thāda, ina thākta Edomli awui ngaleiwui eina kharomzata. Awuitungli ina kapangmi khavai kapang kahai chi kachikhala? Kaja kachina ili thāda, kala kachina ili hokhuishapta? Kachikathā yaokahomana iwui mangāli khuirārarshapta? ²⁰Chiwui vang Edomwuitungli ithumwui Avāna ngarān kahai chi, kala Temanli kapambingwuitungli awui themsak kahai chi nganālu: Yaobingwui naonaobing eina tangda khuiunghaora; kachangkhat athumwui seihomphungna athumwui atam chili matakhakhaira. ²¹Athumwui kongkhaluikhon eina ngalei nganukra; athumwui kachapkhon Red Seali shāhaira. ²²Yanglu! Khalāng akha yongkāda, Bozrahwuitungli angachāng kaphayai thāda yongzatra. Chithanghon Edomwui raikapingbingwui wuklung chi naokhara̱ sha̱naowui wuklung thāra."

Avāna Damascusli Bichar Sāmi

²³"Damascuswui pongli: Hamath eina Arpad khayakta leihaira, kaja athumna makaphā chānpao shāhaira, ngachee eina menghaira, chingri makhalei yirei thāda malung ringhaira. ²⁴Damascus khangazan sāhaira; yām khavai ngalanhaira, kala ngachee china ali singkhuihaira. Naokhara̱ sha̱naowui kachot thāda kakhanang eina kachot china ali tukkhuihaira. ²⁵Khisāda ina ringphāki masot keinung chi mahorserhaira? ²⁶Kachangkhat awui yaronnaobing awui chānreili thira; chithanghon awui shipaibing saikora sashimānmihaira, da kazingramwui raimibingwui Avāna hānga. ²⁷Damascuswui phākholi ina mei chihotāra; kala china Ben-hadadwui raipan chuitup tāmira."

Avāna Kedar eina Hazorli Bichar Sāra

²⁸Babylonwui awunga Nebuchadnezzarna yuikhui kahai Kedar eina Hazorwui wungrambingwui pongli, ithumwui Avāna hithāda hānga: Ngakarthuilu, Kedarwuitungli muivālu! Zingshoshongwui mibingli shimān ngasaklu! ²⁹Athumwui kachonshim eina athumwui yaobing, chonrān kala ot saikora ngaponkhuihaora. Athumwui utbing khuiunghaora, kala mibingna athumli, 'Apam kachida ngachee lei!' da vaora. ³⁰Thākta yāmulu! Kathuka pamli ngarung khuilu, O Hazorli kapambing, da ithumwui Avāna hānga, kaja Babylonwui awunga Nebuchadnezzarna nathumwuitungli ngarān kahai lei; ana nathumwuitungli tuimāng themsak kahaira. ³¹Ngavei kala phākashut makhalei, achamda okthui kapam, kala ning ngazipta reisanglak eina kapam miyur akhawuitungli ngakarthuida muivālu, da ithumwui Avāna hānga. ³²Athumwui utbing ngaponkakhui ngasāra, kala athumwui sha̱kei kachungkha sāshai ngasāra. Athumwui sam achikun kachichāpabingli ina masi saikorali chaiyāngmira, kala apam kachida athumwuitungli kashimān rāngasakra, da ithumwui Avāna hānga. ^a a v32 Sam achikun kachichāpa hi siwukpheili khalei Arab miyur kateibingwui kachangkha khangachā kachina. ³³Hazor ramfa yaokhavaipam ngasāra, katang makhavai ramcho sāra. Chipamli mi akha maokthuira, kala miwui naomayara akhanala chili mayaora.

Avāna Elamli Chaiyāng kala Hanmiluishit

³⁴Judahwui awunga Zedekiahna awungashi hokaphok tharan, Elamwui pongli profet Jeremiahli ithumwui Avāwui tui kharā chi hina:

³⁵Kazingramwui raimibingwui Avāna hithāda hānga: Athumwui pangshapwui ura̱, Elamwui malā chi ina sātekmira. ³⁶Elamwuitungli kazingram achikun matiwui eina masi achikun mati chi ina khuirāra; masi hi saikorali athumli ina yaoyāngmira, kala Elamwui raithā kahaibingna mavāwui yur akhala maleimana. ³⁷Elamli athumwui yangkashebingwui mangāli, athumli shaothat khavai ngarānbingwui mangāli ina akha̱-akhā sāra. Athumwuitungli ina kalākashi, iwui malungvātshun kahai chi khuirāra, da ithumwui Avāna hānga; athumli ina sāshimānchaoranglakha eina tangda raighai eina kharomra. ³⁸Elamli iwui wungpamkhong ina shunra, kala awui awunga kala wungnaobingli ina sāshimānhaora, da ithumwui Avāna hānga. ³⁹Kha rārāda khalei zimiksholi Elamwui shimlui ina hanmiluira, da ithumwui Avāna hānga.