Yachi Kwanda Kirwooget lagogap Ammon
Ng'aleek che ming'in agobo Ammon, Edom, Damasko, Kedar ak Hazor, ak Elam. Ki iyani age tugul kii: mwanik, utaatindo, konoraik che kooen, emet ne lelach ne ma king'ot. Konyonjin age tugul Kwandanyo kobut. Kiile Ammon ak Elam kiweekyinegei tugukwak eng' let; ago kiistoe Edom ak Hazor karurugutyet agoi koigeny.
Ng'alaali Kwandanyo eng' mustarisyek 1–33, 35–39
49 1Agobo lagogap Ammon: Mwaei Kwandanyo ko uu ni: Tos matinyei Israel weeriik? Tos matinyei chiito ne lasto? Amu nee si konam Milkom emetap Gad, ak komeny piikyik eng' nganasookyik? 2Ko uu nooto, nyoonei peetuusyek, mwaei Kwandanyo, ye tuun aibun kurgeetap lugeet agobo Rabbah ne po lagogap Ammon; koek karurugutyet ne karaatya, ak kebeel nganasookyik eng' maat. Yeityo koluul Israel icheeget che ki luul ineendet, mwaei Kwandanyo. 3“Riir, Hesbon, amu kaolusye Ai! Oriir, tiibiigap Rabbah! Olaachi ngoroik che po riirek ak oriir; orwaa otirirenot kwenutap irimeet, amu ko kimut Milkom koba kamutet, kobooto tisiikyik ak laitorinikyik. 4Amu nee si ikalaasune soosyekuk, sooeng'ung' ne loo logoek, chepto ne iweechigei let—inyee ne ki iyan konoraiguk, ile, ‘Ng'oo ne imuuchi konyoonjo?’” 5Anyoo aibun inyee kanyaliilet, mwaei Kwanda ne po lugosyegap kipsengwet, kobun tugul che mi oldang'ung'. Kioonin, age tugul komwee tai, ak ma mi ne yumei che mwei. 6Ago let nooto, aweechigei kogeny lagogap Ammon, mwaei Kwandanyo.
Ming'iisyei Kwanda Menateetap Edom
7Agobo Edom: mwaei Kwanda ne po lugosyegap kipsengwet ko uu ni: Tos matinyei Teman utaatindo? Tos kabet kaguiyet eng' che utaatindos? Tos kapulyo naennywa? 8“Mwee, weektegei, ounkei eng' rirosyek, inyee ne menyei Dedan, amu amutu agobo Esau yaityet eng' sait ne ayaun kirwooget. 9Ngo pwa che turei sabibuk, tos ma pagaakta turoonik kityo? Ngo pwa chooriik eng' kemeut, tos ma choor kityo che machei? 10Ago anee ko ka areek Esau; kang'aany ole iune, ak ma imuuchi kounykei. Kabek keswekyik, tupchosyekyik ak piik che rubei ineendet, ak ma mi. 11Pagaakta kibananoguk; asoobi icheek. Ingoyan osotiguk anee.”
12Mwaei Kwandanyo ko uu ni: Icheeget che ma kiyachi koe soteet, koe kityo—tos imuuchi iweigei inyee? Acha, iyoe iman. 13Amu ka aamun eng' anee-ineegei, mwaei Kwandanyo: Koek Bosra kwang'utyet, kiwechei, karaatya, ak chubeet, ak koek nganasookyik tugul karaatyoosyek che tebyei. 14Ka kas logoiywek che kobunu Kwandanyo: ki kiyookto motwondet kwenutap pororyosyek, kole, ‘Otuiye tuwai ak obargei ak ineendet! Ong'et agobo lugeet!’ 15Nguno ayan inyee koek ming'in kwenutap pororyosyek, ne kisas kwenutap piik. 16Kagoberber inyee nguuret ne iyaei ak menateetap muguleldang'ung', inyee ne menyei eng' ryeewogap rwandet, ne nam paragutap tulweet. Agoi ngo iteksei kesweng'ung' koi ko uu ne po kipsiichit, eng' olooto akoororin ng'wony, mwaei Kwandanyo. 17Koek Edom kiit ne kwang'utyet; kokwong'yo tugul che siirtoe, ak kosasei agobo pirutikyik tugul. 18Ko uu ye ki kibut Sodom ak Gomorah, kobooto nganasookwak che rubei, mwaei Kwandanyo, ma meny chii yooto, ma tebi chii age eng' ineendet. 19“Ko uu ng'etundo ne ng'etee eng' sondisyegap Jordan konyo keswek che nyololunotet, aoone Edom kabisiit eng' emennyi. Ng'oo ne kilewen ne ainde parak eng' emonooto? Amu ng'oo ne uu anee, ak ng'oo ne imuuchi koguurwo? Ng'oo mestowondet ne imuuchi kotonon? 20Nooto anyun, ogas bwaatutyet ne kabwaat Kwandanyo agobo Edom, ak bwaatutik che kayai agobo icheek che menyei Teman: Agot lagogap keechiirek che mengech kila; iman kokwong'ye keswek agobo kagesunennywa. 21Eng' tuugeetap ibutyeetwak koriruuch ng'wony; kigas tuugeetap riirekwak eng' Araroochet ne Birirta. 22Keer! Togostoi kipsiichit ak koberber, kogesen kebebaikyik parak eng' Bosra. Eng' peetuunooto koek mugulelwegap murenigap lugeet che po Edom ko uu muguleldap kwondo ne mi labotu.”
Iibu Kwanda Kirwoogeet eng' Damasko
23Agobo Damasko. Koruruuch Hamath ak Arpad, amu kagas logoiywek che yaach, kobegu eng' ywei, kirirenotgei ko uu araroochet ne ma tebee. 24Kanyalul kimnateetap Damasko; kaweekta komwee, ak kagonam kanyaliilet ineendet. Kagonam ineendet nyalilda ak kong'eet ineendet, ko uu kong'eetap kwondo ne mi labotu. 25Amu nee si mabagaktaat nganaseet ne po kalasunet, nganaseet ne apoiboiyee? 26Iman kobutyo murenikyik che mengech eng' ortinwekyik; kosilem murenigap lugeet tugul eng' peetuunooto, kole Kwanda ne po lugosyegap kipsengwet. 27Ande maat irimeetap Damasko; ak kobeel irimoik che kiim che po Ben-hadad.
Irwoogei Kwanda Kedar ak Hasor
28Agobo Kedar ak laitornatosyegap Hasor, che ki par Nebukadnesar laitoryatap Babilon. Mwaei Kwandanyo ko uu ni: Ong'etegei, oba obargei ak Kedar! Obar piik che po tai! 29Emaunikwak ak keechiirekwak kiip; ngoroik che po emaunikwak ak tuguukwak tugul. Kiip ng'amisiekwak, ak kokuursei piik, “Ywei eng' komosta age tugul!” 30Omwee kabisiit! Ounkei eng' rirosyek, okweek che menyei Hasor, kole Kwandanyo, amu Nebukadnesar laitoryatap Babilon kabwaat bwaatutyet agobo okweek; kabwaat bwaatutik agobo okweek. 31Ong'etegei, oba obargei ak pororyet ne mi kaalyeet, ne menyei eng' mang'unet, kole Kwandanyo—pororyet ne ma tinyei kurgotik anan logeet, ne menyei kityo. 32Koek ng'amisiekwak koleek, ak koek kiyagiikwak che chaang' koleek. Aiyeste icheek eng' usoonaik tugul che tilei luukwegap suumeekwak, ak aibun icheek yaityet eng' komosta age tugul, kole Kwandanyo. a a v32 Tilyeetap luukwegap suumeek ko ki kiit ne kiyai kaptich che po pororyosyegap Arabu alak che menyei surkwen. 33Koek Hasor ole menyei suik, karaatya ne koigeny. Ma meny chii yooto, ma tebee kimugulmet age eng' ineendet.
Iyesta Kwanda Elam ak Koweeksei
34Ng'olyootap Kwandanyo ne konyo Jeremiah maotindet agobo Elam, ye kingo nam Zedekiah laitoryatap Judah laitornatennyi:
35Mwaei Kwanda ne po lugosyegap kipsengwet ko uu ni: Atil legetyeetap Elam, ne po kimnateennywa. 36Aibun Elam usoonaik ang'wan che punu komosisyek ang'wan che po kipsengwet; aiyeste icheek eng' usoonaichu tugul, ak ma mi pororyet ole ma we kionootigap Elam. 37Atil Elam eng' tainnywa puunikwak, eng' taitap icheek che mache kobar icheek. Amutu icheek kiy ne ya, nereegekyuk che oo, kole Kwandanyo; asubi icheek ak rotweet kot aiyestochini ole loo. 38Ande kurgeetnyu eng' Elam, ak abar laitoryandennyi ak kiptainikyik, kole Kwandanyo. 39Ago eng' peetuusyek che nyonei aweech Elam kogeny, kole Kwandanyo.