ኤርሚያስ 49 FHB Father's Heart Bible™

49 ¹ብዛዕባ ደቂ ኣሞን፦ ኣቦና ከምዙይ ይብል ኣሎ፦ እስራኤል ኣወዳት የብሉን ድዩ? ወራሲ የብሉን ድዩ? ሚልኮም ስለ ምንታይ ደኣ ንጋድ ወሪስዋ? ህዝቡ ኸዓ ስለ ምንታይ ኣብ ከተማታታ ሰፊሩ? ²ስለዙይ፥ እንሆ፥ መዓልቲታት ይመፃ ኣለዋ፥ ይብል ኣሎ ኣቦና፥ ኣብ ልዕሊ ራባ ናይ ደቂ ኣሞን ጭድርታ ውግእ ከስምዕ እየ፤ ንሳ ኸዓ ባድማ ዅምራ ክትከውን እያ፤ ዓድታታ ድማ ብሓዊ ክነዳ እየን። ሽዑ እስራኤል ነቶም ዝወረስዎ ክወርሶም እዩ፥ ይብል ኣሎ ኣቦና። ³ኣቲ ሔስቦን፥ ጋይ ጠፊኣ እያ እሞ፥ ኣእዊ! ኣትን ኣዋልድ ራባ፥ ኣእውያ! ክዳን ሓዘን ተኸዲንክን ኣልቅሳ፤ ሚልኮም ምስ ካህናቱን ሹማምቱን ናብ ምርኮ ክኸይድ እዩ እሞ፥ ኣብ ማእኸል መካበብያ ንየው ነጀው ጕየያ። ⁴ኣቲ ኸዳዕ ጓል፥ ብስንጭሮታትኪ፥ ብፍርያም ስንጭሮኺ ስለ ምንታይ ትምክሒ? ንስኺ “መን እዩ ናባይ ዝመፅእ?” እናበልኪ ብመዛግብትኺ ኢኺ እትኣምኒ። ⁵እንሆ፥ ኣባኺ ፍርሓት ከምፅእ እየ፥ ይብል ኣሎ ኣቦ ሰራዊት ሰማይ፥ ካብ ኵሎም እቶም ኣብ ዙርያኺ ዘለዉ። ነፍሲ ወከፍ ናብ ቅድሚኡ ጓይዩ ክስጎ እዩ፤ ነቶም ዝሃደሙ ዘኣኻኽብ ከዓ ኣይህሉን እዩ። ⁶ይኹን እምበር፥ ድሕሪ እዙይ ንምርኮ ደቂ ኣሞን ክመልሶ እየ፥ ይብል ኣሎ ኣቦና።

ኣቦ ንትዕቢት ኤዶም የዋርዶ

⁷ብዛዕባ ኤዶም፦ ኣቦ ሰራዊት ሰማይ ከምዙይ ይብል ኣሎ፦ ኣብ ቴማን ደጊም ጥበብ የለን ድዩ? ካብቶም ለባማት ምኽሪ ጠፊኡ ድዩ? ጥበቦም በስቢሱ ድዩ? ⁸ህደሙ፥ ተመለሱ፥ ኣብ ዓሚቝ ተሓብኡ፥ ኣቱም ኣብ ዴዳን እትነብሩ፥ በታ ዝቐፅዓሉ ጊዜ ኣብ ልዕሊ ኤሳው መዓት ከምፅእ እየ እሞ። ⁹ቀራፅቲ ወይኒ ናባኻ እንተ መፁ፥ ቍሩብ ቐሪም ዘይገድፉ ድዮም? ሰረቕቲ ብለይቲ እንተ መፁ፥ እቲ ዝደለይዎ ጥራሕ ዘይሰርቁ ድዮም? ¹⁰ኣነ ግና ንኤሳው ቐንጢጠዮ እየ፤ መሕብኢታቱ ኸዓ ቐሊዐዮ፥ ክሕባእ ድማ ኣይኽእልን። ዘርኡ ጠፊኡ፥ ኣሕዋቱን ጐረባብቱን ጠፊኦም፥ ንሱ ኸዓ የለን። ¹¹ነቶም ደኽታማትካ ሕደጎም፤ ኣነ ብህይወት ከንብሮም እየ። መበለታትካ ድማ ብኣይ ይተኣመና።

¹²ኣቦና ከምዙይ ይብል ኣሎ፦ እቶም እታ ፃውዒ ክሰትዩ ፍርዲ ዘይተዋህቦም እኳ ብርግፅ ይሰትይዋ እዮም፤ ንስኻ ኸ ብነፃ ክትተርፍ ኢኻ ድዩ? ኣይፋሉን፥ ክትሰቲ ኢኻ እምበር። ¹³ብነፍሰይ ምሒለ እየ እሞ፥ ይብል ኣሎ ኣቦና፦ ባሶራ መስደመምን ነውርን ዑናን መረገምን ክትከውን እያ፤ ኵለን ከተማታታ ድማ ንዘለኣለም ዑና ክኾና እየን። ¹⁴ካብ ኣቦና ወረ ሰሚዐ ኣለኹ፦ ናብ ማእኸል ኣህዛብ ልኡኽ ተልኢኹ፦ “ተኣከቡ እሞ ኣጥቅዑላ! ንውግእ ድማ ተንስኡ!” ¹⁵እንሆ፥ ኣብ ማእኸል ኣህዛብ ንእሽቶ፥ ኣብ ማእኸል ሰብ ድማ ንዑቕ ክገብረካ እየ። ¹⁶እቲ እተፍርሆ ፍርሓትን ትዕቢት ልብኻን ኣስሒቱካ እዩ፥ ኣታ ኣብ ነቓዕ ከውሒ እትነብር፥ ኣብ ላዕለዋይ ኵርባ ዝሓዝካ። ከም ንስሪ ጐጆኻ ልዕል ኣቢልካ እኳ እንተ ሰራሕካ፥ ካብኡ ኸውርደካ እየ፥ ይብል ኣሎ ኣቦና። ¹⁷ኤዶም መስደመም ክትከውን እያ፤ ኵሎም እቶም ብኣ ዝሓልፉ ኽግረሙ፥ ብዅሉ ቍስላ ድማ ከፅርፉ እዮም። ¹⁸ከምቲ ሶዶምን ጎሞራን ምስ ጐረባብተን ከተማታት ዝተገምጠላ፥ ይብል ኣሎ ኣቦና፥ ከምኡ ሓደ ሰብ ኣብኣ ኣይነብርን፥ ዋላ ሓደ ወዲ ሰብ ኣብኣ ኣይቅመጥን እዩ። ¹⁹ከም ኣንበሳ ካብ ዱር ዮርዳኖስ ናብ ልሙዕ መሰማርያ ዝድይብ፥ ንኤዶም ብድንገት ካብ ምድሩ ክሰጎ እየ። እቲ ኣነ ኣብ ልዕሊኣ ዝሸሞ ሕሩይ መን እዩ? ከማይ መን ኣሎ፥ መን ከ ክፅውዓኒ ይኽእል? ኣብ ቅድመይ ደው ክብል ዝኽእል ኣየናይ ጓሳ እዩ? ²⁰ስለዙይ ነቲ ኣቦና ኣብ ኤዶም ዝመኸሮ ምኽሪ፥ ነቲ ኣብ ነበርቲ ቴማን ዝሓሰበ ሓሳባትውን ስምዑ፦ ናእሽቱ እተን መጓሰ እኳ ክስሓቡ እዮም፤ ብሓቂ መሰማርያኦም በቲ ዝበፅሖም ክስደምም እዩ። ²¹ብድምፂ ውድቀቶም ምድሪ ክትንቀጥቀጥ እያ፤ ድምፂ ኣውያቶም ኣብ ቀይሕ ባሕሪ ክስማዕ እዩ። ²²እንሆ! ንስሪ ክድይብን ክዝምብን እዩ፥ ኣኽናፉ ኣብ ልዕሊ ባሶራ ክዝርግሕ እዩ። በታ መዓልቲ እቲኣ ልቢ ጀጋኑ ኤዶም ከም ልቢ እትሓርስ ሰበይቲ ክኸውን እዩ።

ኣቦ ኣብ ደማስቆ ፍርዲ የምፅእ

²³ብዛዕባ ደማስቆ። ሓማትን ኣርጳድን ክፉእ ወረ ሰሚዖም እዮም እሞ ሓፊሮም ኣለዉ፤ ፈሪሖም ይመክኩ፥ ከም ዘይህድእ ባሕሪ ተጨኒቖም ኣለዉ። ²⁴ደማስቆ ደኺማ እያ፤ ናብ ህድማ ገጻ መሊሳ እያ፥ ራዕዲ ድማ ሒዝዋ፤ ከም ቃንዛ እትሓርስ ሰበይቲ ጓህን ቃንዛን ሒዝዋ። ²⁵እታ ምስጋና ዘለዋ ከተማ፥ እታ ኣነ ባህ ዝብለኒ ዓዲ፥ ስለ ምንታይ ኣይተሓድገትን? ²⁶ብሓቂ መንእሰያታ ኣብ ኣደባባያታ ክወድቁ እዮም፤ ኵሎም ተዋጋእታ በታ መዓልቲ እቲኣ ስቕ ክብሉ እዮም፥ ይብል ኣቦ ሰራዊት ሰማይ። ²⁷ኣብ መንደቕ ደማስቆ ሓዊ ከእጉድ እየ፤ ንዕርድታት ወልደ ኣዴር ድማ ክበልዕ እዩ።

ኣቦ ንቄዳርን ንሓፆርን ይፈርድ

²⁸ብዛዕባ ቄዳር፥ ነቲ ናቡከደነፆር ንጉስ ባቢሎን ዝወቕዖ መንግስታት ሓፆርን። ኣቦና ከምዙይ ይብል ኣሎ፦ ተንስኡ፥ ናብ ቄዳር ሕለፉ! ነቶም ሰብ ምብራቕ ኣጥፍኡ! ²⁹ድንኳናቶምን መጓሰኦምን ክውሰዱ እዮም፤ መጋረጃ ድንኳናቶምን ኵሉ ኣቑሑቶምን እውን ክውሰድ እዩ። ኣግማሎም ክውሰዱ እዮም፥ ሰባት ድማ “ብዅሉ ወገን ራዕዲ!” ኢሎም ክጭድሩሎም እዮም። ³⁰ቀልጢፍኩም ህደሙ! ኣቱም ነበርቲ ሓፆር፥ ኣብ መዓሙቝ ተሓብኡ፥ ይብል ኣቦና፤ ናቡከደነፆር ንጉስ ባቢሎን ኣባኻትኩም ምኽሪ መኺሩ፥ ኣባኻትኩም ሓሳብ ሓሲቡ እዩ እሞ። ³¹ተንስኡ፥ ናብቲ ህዱእ ህዝቢ ሕለፉ፥ ናብቲ ተኣማሚኑ ዝነብር ህዝቢ፥ ይብል ኣቦና፤ ደገ ዀነ መሳዅቲ ዘይብሉ ህዝቢ፥ በይኑ ዝነብር ህዝቢ። ³²ኣግማሎም ዘመተ ክኾኑ እዮም፥ ብዙሕ ማሎም ድማ ምርኮ ክኸውን እዩ። ነቶም ኵርናዕ ፀጕሮም ዝቕንፅቡ ናብ ኵሉ ንፋስ ክብትኖም እየ፥ ካብ ኵሉ ወገንውን መዓት ከምፅኣሎም እየ፥ ይብል ኣቦና። ^a a v32 ኵርናዕ ፀጕሪ ምቕናፅ፥ ናይ ገሊኦም ኣብ በረኻ ዝነብሩ ዓረባውያን ነገዳት ፍሉይ ልማድ ነበረ። ³³ሓፆር መዕቘቢ ወኻሩ ክትከውን እያ፥ ንዘለኣለም ድማ በረኻ ክትከውን እያ። ኣብኣ ዝነብር ሰብ የለን፥ ወዲ ሰብ ድማ ኣይክቕመጣን እዩ።

ኣቦ ንዔላም ይብትንን ይመልስን

³⁴ቃል ኣቦና ብዛዕባ ዔላም፥ ሴዴቅያስ ንጉስ ይሁዳ ኽነግስ ኣብ ዝጀመረሉ ጊዜ፥ ናብ ነቢይ ኤርሚያስ መፀ፦

³⁵ኣቦ ሰራዊት ሰማይ ከምዙይ ይብል ኣሎ፦ እንሆ፥ ነቲ ቀስቲ ዔላም፥ ምንጪ ሓይሎም፥ ክሰብሮ እየ። ³⁶ካብ ኣርባዕተ ማእዝናት ሰማይ ኣርባዕተ ንፋሳት ኣብ ልዕሊ ዔላም ከምፅእ እየ፤ ናብ ኵሎም እዞም ንፋሳት ድማ ክብትኖም እየ፥ ናይ ዔላም ስደተኛታት ዘይከዱዎ ህዝቢ ከዓ ኣይህሉን እዩ። ³⁷ንዔላም ኣብ ቅድሚ ፀላእቶም፥ ኣብ ቅድሚ እቶም ክቐትልዎም ዝደልዩ ክሰብሮ እየ። ኣብ ልዕሊኦም ጥፍኣት፥ እቲ ብርቱዕ ቍጥዓይ ከምፅእ እየ፥ ይብል ኣቦና፤ ክሳዕ ዘጥፍኦም ድማ ብሰይፊ ክሰጎም እየ። ³⁸ዝፋነይ ኣብ ዔላም ከንብር እየ፤ ንንጉሳን ንሹመኛታታን ከዓ ከጥፍእ እየ፥ ይብል ኣቦና። ³⁹ኣብ ዝመፅእ መዓልቲታት ግና ንምርኮ ዔላም ክመልሶ እየ፥ ይብል ኣቦና።